Esitele 4 - Tosi Tapu

Mamae o le kau Sutea

¹ I le iloa e Maletoseo le nea katoa leia kua soko, na sae loa e ia ona kofu, kae tui loa e ia se taga, ti na laku loa e ia se mugalafu ki lona ulu mo lona tino katoa. Ti na ano loa a ia i loto malie o le kolo, o tagi mo kalaga i le lasi o lona mamae,

² ti na ano loa a ia ki le matapa ulu ki le malae o le sau, leia na tapui kia latou fuli ala e kofu ki se taga.

³ I le fenua taki tasi, mo ganea fuli ala kua kaku ki ai le fakatotonu a le sau mo lana lao, na i ai loa se mamae lasi i le kakai Sutea ; na lotou sesunio, mo fetagisi, mo tagi laulau, ti na momoe se toka api ki le taga mo le mugalafu.

⁴ Na ano loa a fafine fakasausau a Esitele mo lana kau enuke, o fakamatala kiate ia le nea lena, ti na mamae lasi loa i ai le fafine sau. Na kakau loa e ia ke ave ni kofu o fakakofu ki ai a Maletoseo ti mo tatala lona taga, kae na leaise tali e ia latou.

⁵ Ti na kakau loa e Esitele a Atake, ko se tasi o le kau enuke leia na tuku ake e le sau kiate ia, ti na tuku loa e ia kiate ia ke ano o vesili kia Maletoseo pe kolea le nea leia kua soko, ti kolea e fai felaaki ai a ia.

⁶ Na ano loa Atake kia Maletoseo i le malae lasi o le kolo, i mua o le matapa o le sau.

⁷ Ti na fakamatala loa e Maletoseo kiate ia a nea fuli ala kua soko kiate ia, ti mo le paaga leia na fakapapau e Amane ke soli ki le koloa o le sau, kae totogi ki le maumaui o le kakai Sutea.

⁸ Na soli foki e ia se siki o le tosi o le lao leia kua tufa i Suse ke fakapuli latou, o tupu ke fakasa e ia a ia kia Esitele ti ke iloa e ia a nea fuli ; ti na fakatotonu loa e ia ke ano Esitele ki le sau, o fai se su kiate ia ti mo se tagi i ona mua o uiga mo lona kakai.

⁹ Ti na au loa Atake o fakamatala kia Esitele a masau fuli a Maletoseo.

¹⁰ Ti na toe kakau loa e Esitele a Atake ke ano o pati kia Maletoseo :

¹¹ E iloa e tagata fakasausau fuli a le sau, ti mo le kakai o fenua fuli o le sau, e i ai se lao leia e fakatuaa ia ki le mate se tasi fua, fafine pe tagata, e ulu ki le malae loto o le fale o le sau kae na leaise kalagai a ia. E gato tasi ki leia e velo loa ki ai e le sau lona tokotoko aulo e saofaki loa lona mauli. Ti ko au, na leaise toe kalagai au ki tafa o le sau, talu mei aso e kau lua.

¹² I le fakasa o masau a Esitele kia Maletoseo,

¹³ Na kakau loa e Maletoseo ke tali kia Esitele, o pati : Aua na ke masalo e ke sao toka tasi loa i le kau Sutea fuli, talie e ke nofo i le fale o le sau ;

¹⁴ talie, kapau e ke fakalologo i le temi nei, e au loa le tokoi mo le fakamauli ki le kau Sutea mei se tasi ake ganea, kae ko koe mo le fale o lou tamana, e kotou pupuli loa. Ti ko ai e iloa ia na saga kua ke kaku ki le tuulaga fakasau o tupu ko le temi leinei ?

¹⁵ Ti na kakau loa e Esitele ke pati kia Maletoseo :

¹⁶ Ano, o fakatasii le kau Sutea fuli leia e nonofo i Suse, ti kotou sesunio kiate au, aua na kotou kai fua pe kotou inu fua i ni aso e tolu i le pouli mo le ao. Ko au foki, e kau sesunio loa mo aku fafine fakasausau, ti oki aia, e kau ano loa ki le sau, logo ai le lao ; ti kapau e tonu ke kau mate, e kau mate loa.

¹⁷ Na ano loa Maletoseo ti na fai loa e ia a nea fuli ala na fakatotonu ake e Esitele.