Esitele 3 - Tosi Tapu

Lao ke tamate le kau Sutea katoa

¹ I le sili o nea ana, na fakatotonu loa e le sau ko Asuelusi ke siki ki aluga a Amane, vosa o Ametata, le tagata Akake ; na siki loa e ia lona igoa ti mo lona tuulaga i aluga o le kau aliki katoa leia na nofo i ona tafa.

² Na peluki a tuli mo tulolo a ulu o tagata fakasausau fuli a le sau, ala na tutuu i le matapa o le sau, i mua o Amane, talie ko le fakatotonu aia a le sau o uiga mo ia. Kae na leaise peluki fua e Maletoseo lona tuli ti na leaise tulolo fua a ia.

³ Ti na pati loa a tagata fakasausau a le sau, ala na nonofo i le matapa o le sau kia Maletoseo : Kolea e ke maumaui ai le fakatotonu a le sau ?

⁴ I aso fuli na lotou masau kiate ia ki le nea lena, kae na leaise fakalogo fua a ia kia latou, ti na lotou fakasa loa a ia kia Amane, o tupu ke tio pe tuu mau aifai a ia i lana fakapapau ; talie na fakasa e ia kia latou ko se Sutea a ia.

⁵ Ti na tio loa Amane e leaise peluki fua e Maletoseo lona tuli ti e leaise tulolo fua a ia i ona mua. Na apele loa a ia i le ita ;

⁶ Kae na fakanoai e ia ke fa lona lima kia Maletoseo toka tasi, talie na fakasa loa kiate ia le kakai o Maletoseo, kae na loto loa a ia ke maumaui le kakai katoa o Maletoseo, le kau Sutea katoa leia e nonofo i le puleaga o Asuelusi.

⁷ I le uluaki masina, leia ko le masina o Nisane, i le fetuu kau agafulu tupu lua o le sau o Asuelusi, na fakatotonu loa e Amane ke ti a pulimi, ke iloa le aso ti mo le masina leia e malie ki ana fakatuutuu ; ti na vilo loa le toso ki le kau agafulu tupu lua o masina, leia ko le masina o Atale.

⁸ Ti na pati loa Amane ki le sau ko Asuelusi : E i ai i fenua fuli o lou puleaga se kakai leia kua mavetevete ti kua mavae i la ake kakai, ti e kesekese alatou lao mo lao o kakai fuli, ti e leaise lotou fakalogo fua ki lao a le sau. Koia e leaise aoga ai ki le sau ke tuku latou ke malolo !

⁹ Kapau e malie ki le sau, ti ke tosi le fakatotonu ke tamate latou ; ti e kau fua loa ni fa tenalio paaga e kau agafulu afe ke soli ki lima o le kau pule fenua, o tupu ke tuku latou ki le koloa a le sau.

¹⁰ Na too loa e le sau lona mama i lona lima o soli kia Amane, vosa o Ametata, le tagata Akake, le fili o le kau Sutea.

¹¹ Ti na pati loa le sau kia Amane : Kua soli atu kiate koe le paaga ti mo le kakai lena ; fai le nea leia e ke loto ki ai.

¹² Na kalagai loa le kau sekalaipe a le sau i le aso kau agafulu tupu tolu o le uluaki masina, ti na tosi loa o mulimuli ki le nea katoa leia na fakatotonu e Amane ki le kau aliki katoa a le sau, mo le kau kovana o le fenua taki tasi ti mo le kau pule o le kakai taki tasi, ki le fenua taki tasi o mulimuli ki lana faitosi, ki le kakai taki tasi o mulimuli ki lana masau. Na tosi loa i le igoa o le sau ko Asuelusi, o fakamaoki ki le mama o le sau.

¹³ Ti na ave loa a tosi e ni kau avetosi ki fenua fuli o le sau, o tupu ke maumaui, mo tamate ti mo fakapuli le kakai Sutea katoa, a tupulaga mo matua, a toe mo fafine, i se aso e tasi, i le aso kau agafulu tupu tolu o le masina kau agafulu tupu lua, leia ko le masina o Atale, ti ke tuku ke too olatou koloa.

¹⁴ Na tuku i loto o tosi ana, se siki o le tosi leia na fakatotonu e le sau ke fakasa i le fenua taki tasi, ti na fakaafe ia a kakai fuli ke nonofo teuteu ki le aso lena.

¹⁵ Na ano fakatavili loa le kau avetosi, o mulimuli ki le fakatotonu a le sau. Na fakasa foki le fono lena i Suse, le kolo mua ; ti na lolotoga inu le sau mo Amane, kae na maveuveu le kolo ko Suse.