Esitele 1 - Tosi Tapu

Kai a le sau ko Asuelusi

¹ Na soko le isitolia leinei i le temi o Asuelusi, le Asuelusi leia na pule i Initia o kaku ki Etiopia ki fenua e kau lelau kau lua tupu fitu.

² I le aso aia na eke le sau ko Asuelusi i lona ekeekeaga fakasau i Suse, ko le kolo mua.

³ I le fetuu tolu o lona sau, na fai loa e ia se kai lasi ki aliki fuli o lona puleaga ti mo ana tagata fakasausau ; ti na fakatasi loa a pule o le kau tau o Pelesi mo Meti, mo le kau lalasi ti mo le kau pule fenua fuli, ki ona mua.

⁴ Na fakasa loa e ia i ni aso mauke ai le lasi o koloa o lona puleaga ti mo le fulumalie o lona kololia, i aso e kau lelau kau valu.

⁵ I le sili o aso ana, na fai loa se kai e le sau ki le kakai katoa leia na nofo i Suse ko le kolo mua, i lolotoga o aso e fitu, i le malae o le fale o le sau.

⁶ Na nonoa ni fa kie tetea, mo sesega ti mo usi ki ni maea nilo tetea mo kula, ti na fakamau latou ki ni mama siliva ki ni pou fatu tetea. Na tuu ni palepale aulo mo siliva i le faliki o le fale leia na fai ki le polefile, mo le malepe, mo le nakele ti mo ni fatu uli.

⁷ Na asu le nea inu i ni ipu aulo, ti na kesekese fuli a ipu, ti na tafe le vino o gali mo le sau, o fakatatau ki le kaisolisoli a le sau.

⁸ Kae na leaise fakamakeke fua se tasi ke inu, talie na fakatotonu e le sau ki le kakai katoa o lona fale ke mulimuli ki le loto o le tagata taki toka tasi.

⁹ Ti na fai foki e le fafine sau ko Vaseti se kai lasi ki fafine i le fale o le sau ko Asuelusi.

Agatuu a le fafine sau ko Vaseti

¹⁰ I le fitu o aso, i le fiafia o le loto o le sau i le vino, na fakatotonu loa e le sau ko Asuelusi kia Meumani, mo Pisita, mo Alepona, mo Pikita, mo Apakita, mo Setale, ti mo Kalekasi, ko enuke e toka fitu ala na tausi kiate ia,

¹¹ Ke aumai ki ona mua le fafine sau ko Vaseti, mo le pala fakasau, o tupu ke fakasa lona fulumalie ki le kakai ti mo le kau lalasi, talie na fulumalie ai a ia.

¹² Kae na leaise fia au le fafine sau ko Vaseti, i lana maua le fakatotonu a le sau i le kau enuke. Koia na itaita lasi ai loa le sau, ti na mea katoa loa a ia i lona ita.

¹³ Ti na masau loa le sau ki le kau poto, ala na iloa ia a temi. Talie na fai fenaaki a nea fuli a le sau, i mua o latou fuli ala na iloa ia a lao mo le fakamaau.

¹⁴ Na i nonofo i ona tafa a Kalesena, mo Setale, mo Atemate, mo Talesisi, mo Melese, mo Malesena, ti mo Memukani, ko aliki e toka fitu o Pelesi mo Meti, ala na tio ki mata o le sau, ti na maua ia a tuulaga lalasi o lona puleaga.

¹⁵ Na pati loa a ia kia latou : Kolea le lao leia e tonu ke tuku ki le fafine sau ko Vaseti, o tupu ko lana fakafiti le fai o le fakatotonu a le sau ko Asuelusi i le kau enuke ?

¹⁶ Na tali loa Memukani i mua o le sau mo aliki : Na leaise gato fua ki le sau leia e fai ki ai le nea veli lena e le fafine sau ko Vaseti ; kae ki aliki fuli mo kakai fuli foki ala e nonofo i fenua fuli o le puleaga o le sau ko Asuelusi.

¹⁷ Talie e kaku loa ki fafine fuli le nea leia na fai e le fafine sau, ti e tupu ai loa ia latou le fia nukinuki ki alatou avaga, o lotou pati loa : Na fakatotonu e le sau ko Asuelusi ke aumai ki ona mua le fafine sau ko Vaseti, ti na leaise ano a ia.

¹⁸ I le aso loa lena, e fakamatala loa e fafine aliki o Pelesi mo Meti, ala e logo loa ki le nea leia na fai e le fafine sau ko Vaseti, ki kau aliki fuli a le sau ; ti e tupu ai loa se nukinuki lasi mo se ita lasi.

¹⁹ Koia kapau e malie a ia ki le sau, ti ke fai e ia se lao fakasau, ti ke tosi a ia i le lao a le kau Pelesi mo le kau Meti, o tupu ke aua na toe maumaui a ia, ti ke aua na toe sa loa le fafine sau ko Vaseti i mua o le sau ko Asuelusi, ti ke soli loa e le sau lona tuulaga ko le fafine sau ki se tasi ake leia e malie ake iate ia.

²⁰ E tonu ke iloa le lao a le sau i lona puleaga katoa, logo ai lona lasi, ti ke fakaapaapa a fafine fuli ki olatou avaga, mei leia e lasi ki leia e ikiiki.

²¹ Na malie loa le tonu lena ki le sau mo le kau aliki, ti na fai loa e le sau o mulimuli ki le masau a Memukani.

²² Na fakamomoli loa e le sau ko Asuelusi ni tosi ki fenua fuli o lona puleaga, ki fenua taki tasi o mulimuli ki lana faitosi ti mo kakai taki tasi o mulimuli ki lana masau ; ti na fakamaua e tosi ana ke pule le tagata i lona fale, ti ke masau a ia i le masau o lona kakai.