Esetalasi 4 - Tosi Tapu

Fakafesagai o fili o le kau Sutea ; fakatuu o le gaoi o le fale tapu

¹ Na logo loa a fili o Suta mo Pesamino kua toe liliu mai le kau Sutea mei le popula, ti kua lotou lolotoga fau se fale tapu ki le Eteleno, le Atua o Iselaele.

² Ti na lotou au loa kia Solopapele mo le kau pule famili, o pati kia latou : E motou tokoi loa kia koutou talie e motou fetapa ki lokoutou Atua ofaipe koutou, ti e motou momoli kiate ia ni sakilifisio talu mei le temi o Esale-Atone, sau o Asilia, leia na aumai ia matou ki leinei.

³ Kae na tali loa Solopapele, mo Sosue, ti mo la ake kau pule famili o Iselaele kia latou : E leaise tonu ke kotou kau mo matou ki le fakatuu o le fale o lomatou Atua ; e motou fakatuu tefua loa le fale o le Eteleno, le Atua o Iselaele, ofaipe le nea leia na fakatotonu mai kia matou e Silusi, sau o Pelesi.

⁴ Koia na fakalotogaegae ai loa e le kakai o le fenua le kakai o Suta ; na lotou fakaii loa kia latou ke taofi ai le gaoi o le fale,

⁵ ti na lotou totogi paaga loa ni kau tagata i le kau pule a le sau o Pelesi, ke lotou faigai ke tiaki le gaoi. Na lotou fai fenaaki loa i le mauli katoa o Silusi, sau o Pelesi, o kaku ki le sau a Taliusi, sau o Pelesi.

⁶ I le kamataaga o le sau o Asuelusi, na lotou fai loa se tosi o tukugavelii ai le kakai o Suta mo Selusalemi.

⁷ I le sau o Aletasese, na fai loa e Piselame, mo Miteletate, mo Tapeele, ti mo la ake olatou fetaina, se tosi kia Aletasese, sau o Pelesi. Na fai le tosi i le fai tosi fakaalamea ti mo le masau fakaalamea.

⁸ Na fai loa e le kovana ko Leume mo le sekalaipe ko Simesai le tosi leinei ki le sau ko Aletasese, o uiga mo Selusalemi :

⁹ Ko au Leume, le kovana, mo Simesai, le sekalaipe, ti mo oma fetaina, latou o Tine, mo latou o Afalesatake, mo latou o Talepele, mo latou o Afalase, mo latou o Eleke, mo latou o Papilone, mo latou o Suse, mo latou o Tea, mo latou o Elame,

¹⁰ ti mo la ake kakai ala na aumai e le tagata lasi mo logologona ko Osenapale o fakanofo i le kolo ko Samalia ti mo iki ake ganea i le fetuu leinei o le vaitafe.

¹¹ Ko lona siki leinei o le tosi leia na lotou ave kiate ia, io ki le sau ko Aletasese : Ko au tagata fakasausau i le fetuu leinei o le vaitafe.

¹² Ke iloa e le sau ko le kau Sutea leia na mavae mei lou fenua ti kua kaku mai kia matou i Selusalemi nei, kua lotou toe laga le kolo agatuu mo agaveli, io, kua lotou laga ona paa ti kua lotou fakafoou ona fakatafito.

¹³ Ke iloa e le sau, kapau e toe laga le kolo leinei, ti kapau e toe fakatuu ona paa fatu, e leaise lotou toe totogi loa se tua, pe ko se tukusau, pe ko se tute, ti e mativa loa i ai le fale koloa o le sau.

¹⁴ Ti ko leinei, e motou kai foki le patai o le fale sau ti e leaise motou malie ia le fakanoai o le sau, koia kua motou fakakaku atu ai ki le sau a logo anei.

¹⁵ Ke fai ni afaafa i le tosi fakamanatu o ou tamana ; ti e ke maua loa ti e ke tio loa i le tosi lena ko le kolo leinei ko se kolo agatuu mo fakalialia ki le sau mo puleaga, ti na agatuu a ia talu mei le temi mua. Koia leia na maumaui ai le kolo leinei.

¹⁶ E motou fakasa ki le sau, kapau e toe lagai le kolo leinei, ti kapau e toe tuu ona paa fatu ki aluga, e leaise ke toe pule loa ki le fetuu leinei o le vaitafe.

¹⁷ Ko leinei le tali a le sau ki le kovana ko Leume mo le sekalaipe ko Simesai, ti mo ola fetaina ala na nonofo i Samalia ti mo le fetuu lena o le vaitafe : Fakaalofa atu…

¹⁸ Ko le tosi leia na kotou aumai kiate au na lau totonu i oku mua.

¹⁹ Na kau fakatotonu ke fai ni afaafa ; ti na maua loa na agatuu le kolo lena ki sau talu mei le temi mua, ti na tau soko i ai ni veli mo ni agatuu.

²⁰ Na i ai loa i Selusalemi ni sau makeke, ala na pule ki le fenua katoa o le fetuu lena o le vaitafe, ti na totogi kia latou ni tukusau mo ni maua, ti mo ni tute.

²¹ Koia, ke kotou fakatotonu ki le kakai lena ke taofi lalatou gaoi, ke aua na toe fakatuu le kolo lena kae e leikiaise kau tuku atu se fakataga.

²² Ke kotou tokaga ai ki le nea lena, talie ke aua na soko se nea veli ki le sau.

²³ I le oki o le lau o le tosi a le sau ko Aletasese i mua o Leume mo le sekalaipe ko Simesai ti mo ola fetaina, na la ano fakatavili aifai ki Selusalemi, ki le kau Sutea, o taofi fakamakeke lalatou gaoi.

²⁴ Ti na tuu ai loa le gaoi o le fale o le Atua i Selusalemi. Koia na tuu ai le gaoi o kaku ki le fetuu lua o le sau o Taliusi, sau o Pelesi.