Esaia 7 - Tosi Tapu

Ko le taui o Suta e Letisini mo Pekase

¹ Na soko loa i le temi o Akasi, vosa o Sotame, vosa o Osiasi, sau o Suta, na pale loa Letisini, sau o Silia, mo Pekase, vosa o Lemalia, sau o Iselaele, ke taui Selusalemi, kae na leaise la mafai ia.

² Na fakasa loa ki le fale o Tavite : Kua fakatuu le nofolaga tau o le kau Silia i Efalaimi. Ti na lulu loa le loto o Akasi mo lona kakai ofaipe le lu o laakau o le vao e le matagi.

³ Ti na pati loa le Eteleno kia Esaia : Ano o fakafetaulaki kia Akase, a koe mo lou vosa ko Seale-Sakupe, i le gatoaga o le tafeaga vai ki le fa tane aluga, i le ala lasi ki le ganea fakaifoifo.

⁴ Ti ke pati loa kiate ia : Ke ke fimalie, aua na ke tuania fua se nea, Ti ke aua na oso noa lou loto i mua o ga potu ugaafi afu ana e lua, Mo mua o le itaita o Letisini, mo le kakai o Silia, ti mo le vosa o Lemalia.

⁵ E kau iloa a fakakaukau veveli a Silia kiate koe, Ti mo masau a Efalaimi mo le vosa o Lemalia ala e pati :

⁶ Tou pale o taui a Suta, tou takatakai le kolo, Ti tou taui a ia ke maua ni mavaa, ti ke tou fakanofo ke sau i ai le vosa o Tapeele.

⁷ Ko leinei le folafola a le Aliki, le Eteleno : E leaise soko mai loa le nea lena, e leaise fai loa le nea lena.

⁸ Talie ko le ulu o Silia ko Tamaso, Ti ko le ulu o Tamaso ko Letisini. Koi toe fai a fetuu e kau ono tupu lima, Ti e leaise toe nofo loa Efalaimi ko se kakai.

⁹ Ko le ulu o Efalaimi ko Samalia, Ti ko le ulu o Samalia ko le vosa o Lemalia. Kapau e leaise kotou tui, Ti e leaise kotou tologa loa.

Le fakamailoga lasi : le tupu o Emanuele i se taupoou

¹⁰ Na toe folafola loa le Eteleno kia Akase, o pati kiate ia :

¹¹ Kole kiate koe se fakamailoga mei le Eteleno, lou Atua ; kole a ia, mei ganea loloto o le kele, pe mei potu taualuga o le lagi.

¹² Na tali loa Akase : E leaise kau kole loa se nea, e leaise kau asiasii loa le Eteleno.

¹³ Ti na pati loa Esaia : Kotou fakalogo mai, fale o Tavite ! Pe ko se nea noa kia koutou ke kotou fakafiu le kataki o tagata, Ke kotou toe fakafiu ia foki le kataki o loku Atua ?

¹⁴ Koia e tuku atu loa e le Aliki totonu kia koutou se fakamailoga ; Ko leinei, e tinae loa le taupoou, ti e fanaui loa e ia se tama, Ti e soli loa e ia kiate ia le igoa ko Emanuele.

¹⁵ E kai loa e ia le gako o le sua pipi mo le meli, o kaku ki lana iloa le nea leia e veli e tonu ke tiaki mo le nea leia e malie e tonu ke filifili.

¹⁶ Kae i mua o le iloa e le toe ke tiaki le nea e veli ti ke filifili le nea e malie, E tiaki loa le fenua leia e ke tuania ia ona sau e lua.

Ko le fakamaau o Iselaele

¹⁷ E kakau mai loa e le Eteleno kiate koe, Mo lou kakai ti mo le fale o lou tamana, Ni aso ala e leikiaise maua ni ona tatau, Talu mei le mavae a Efalaimi ia Suta, (Le sau o Asilia).

¹⁸ I le aso lena, e vekai loa e le Eteleno a lago Ala e nonofo i gatoaga o vaitafe o Esipito, Ti mo lago meli ala e nonofo i le fenua o Asilia ;

¹⁹ E lotou au loa, ti e lotou nonofo fuli loa i ganea lavaki fuli, Mo pu o utu, Mo laakau uluvao fuli, Ti mo faisaga sesega fuli.

²⁰ I le aso lena, e tele loa e le Aliki Le ulu mo fulu o vae o Iselaele Ki se tele leia na lue i leia atu fetuu o le vaitafe o Eufalate, Ki le sau o Asilia ; E toe tele foki e ia mo le kaukava.

²¹ I le aso lena, E tausi loa e le tagata taki toka tasi se pipi fafine muli e tasi mo ni ovi fafine e lua ;

²² Ti e maua loa le sua pipi o lasi, Ti e kai loa ki le gako o le sua pipi, Talie ko latou fuli ala e nonofo loa i le fenua, E kai ia loa le gako o le sua pipi mo le meli.

²³ I le aso lena, E tiaki loa ke vaoa A ganea fuli ala e maua ai loa ni tafito vite e afe, Ala na totogi ki sikele siliva e afe : E sosomo loa i ai a vao talatala mo vao sukisukia.

²⁴ E ulu loa ki ai mo ni gasau ti mo ni kalolo, Talie e apele loa le fenua katoa i uluvao gaoa mo talatala.

²⁵ Ti e leaise toe ano loa i ganea taualuga fuli ala na gaoi ai ki le piosi, O tupu ko le i ki uluvao gaoa mo talatala : E tuku loa ki ai le pipi, ti e takatakafi loa e le ovi le kele.