Esaia 61 - Tosi Tapu

Ko le fakamafola o le fakamauli

¹ E iate au le Laumalie o le Aliki, le Eteleno, Talie na fakanofo au e le Eteleno ke ave ia ni logo malilie kia latou e mativa ; Na kakau e ia au ke fakamauli latou e loto fatifati, Ke fakasa ki le kau popula le lauatea, Ki le kau pilisoni le saofaki ;

² Ke fakasa se fetuu o le kalasia o le Eteleno, Ti mo se aso o le sausau o lotatou Atua ; Ke fakapelepele latou fuli ala e mamae ;

³ Ke soli kia latou fuli ala e mamae i Sione, Io, ke soli kia latou se pala fakasau ke fetogi ai le mugalafu, Mo se lolo fakafiafia ke fetogi ai le putu, Mo se kofu fakafetai ke fetogi ai le loto mamae, O tupu ke fakaigoa latou ko ni telepate o le faitotonu, Se faisaga a le Eteleno, ke tausi ki lona kololia.

⁴ E lotou toe laga loa ni fale foou i aluga o kolo na maumau i mua, E lotou toe laga loa a maumau afea, E lotou fakafoou loa ni kolo na tiaki, Na maumau talu mei fualoa.

⁵ E nofo loa ni kau matapule i ai, ti e lotou fagai loa akoutou kau manu, E gaoi loa ni vosa o le matapule i akoutou faisaga mo akoutou vite.

⁶ Kae ko koutou, e fakaigoa loa koutou ko tagata faisakilifisio a le Eteleno, E fakanofo loa koutou ko tagata fakasausau a lotatou Atua ; E kotou kai loa a koloa o atu puleaga, Ti e kotou maua loa lolatou kololia.

⁷ Talie e fetogi loa lokoutou luma ki se vaega liuga lua ; E fetogi loa lokoutou mamae ki se fiafia i lokotou vaega ; Io, e kotou maua loa se vaega liuga lua i lokoutou fenua, Ti e lee gato loa lokoutou fiafia.

⁸ Talie ko au, le Eteleno, e kau alofa ki le faitotonu, E kau vesia ki le kaia mo le agaveli ; E kau soli loa kia latou lolatou fakapale totonu, Ti e kau fai loa mo latou se sai lee gato.

⁹ E iloa loa lolatou lanu i atu puleaga, Ti e logo loa lolatou sakoga i lotolotoga o kakai ; Ti ko latou fuli ala e tio loa kia latou e fakamaoki loa Ko latou ko se lanu tapuakina e le Eteleno.

¹⁰ E kau fiafia lasi loa i le Eteleno, E nekenekea loa loku laumalie i loku Atua ; Talie kua fakakofu e ia au ki ni kofu o le fakamauli, Kua ufiufi e ia au ki le taupulupulu o le maokioki, Ofaipe se tama avaga e teu ki se pala, Ofaipe se taine avaga e teu ki ona kofu fakateuteu.

¹¹ Talie, ofaipe le kele leia e fakasomo ia lona pulapula, Ti e faipe le oloto leia e fakatupu ia ona fakaili, E fakatupu loa e le Aliki, le Eteleno, le fakamauli mo le fakafetai I mua o atu puleaga fuli.