Esaia 26 - Tosi Tapu

Katiko ki le kololia o le Atua

¹ I le aso lena e sua loa le katiko leinei i le fenua o Suta : Kua motou maua se kolo tau ; Kua soli mai e ia kia matou le fakamauli ko lomatou paa malui, mo lomatou paa takatakai.

² Kotou fakamavaa a matapa, Kotou tuku ke ulu le puleaga maokioki mo agatonu.

³ Ki leia e tuu makeke i ana manatu loto E ke tuku maoki le tokamalie, io, le tokamalie, Talie e fanaki a ia kiate koe.

⁴ Kotou fanaki tuumau ki le Eteleno, Talie ko le Eteleno, ko le Eteleno ko le utu o sekulo.

⁵ Na fakaifo e ia ki lalo latou ala na nonofo i ganea taualuga, Na tuku e ia ki lalo le kolo fia nealasi, Na peesi e ia a ia ki le kele, Na fakasogi e ia a ia ki le efu.

⁶ Kua takatakafi a ia ki vae, Ki vae o le kau mativa, ki vae o le kau fakaaloalofa.

⁷ Ko le ala o le tagata agatonu ko le maokioki ; Ko koe, e ke agatonu, e ke fakatokatoka le ala o le tagata agatonu.

⁸ Koia kua motou talitali ai kiate koe, ei Eteleno ! i le ala o au fakamaauaga ; E oli lomatou laumalie ki lou suafa, ti mo lou tukualofa.

⁹ E oli loku laumalie kiate koe i le pouli, Ti e afa loku loto kiate koe iate au ; Talie ka fai au fakamaau ki le malama nei, E ako e le kakai o le malama nei le faitotonu.

¹⁰ Kapau e tuku se kalasia ki le tagata agaveli, e leaise ako e ia le faitotonu, Kae e fai e ia le nea veli i le fenua o le maoki, Ti e leaise tokaga a ia ki le mafimafi o le Atua.

¹¹ Eteleno, e mafimafi lou lima : Kae e leaise lotou tio ki ai. E lotou tio loa ki lou alofa ki le kakai, ti e lotou luma loa ; E tutu loa e le afi ou fili.

¹² Eteleno, e ke soli kia matou le tokamalie ; Talie ko nea fuli ala e motou fai, Ko koe leia e fakasoko ia kia matou.

¹³ Eteleno, lomatou Atua, na pule kia matou ni iki ake a pule kese iate koe ; Kae kua motou fetapa ki lou suafa o tupu ko lou alofa toka tasi.

¹⁴ Ko latou ala kua mamate e leaise toe mauli loa, E leaise toe tutuu ake loa ki aluga ni ata ; Talie na ke tautea latou, na ke tamate latou, Ti na ke maumaui a fakamanatu fuli.

¹⁵ Ei Eteleno ! fakaliuliuga le kakai ! Fakaliuliuga le kakai, fakasa lou kololia ! Soloaki ki muli a koiga fuli o le fenua !

¹⁶ Eteleno, na lotou afa a koe, i le aso leia na lotou nofo ai i le mamae ; Na lotou liligi alotou kole, i le aso leia na ke tautea ai latou.

¹⁷ Ofaipe se fafine tinae, ka fanau, E mapelu ti e kalaga i lona mamae, Na motou fenaaki foki i le aso leia na motou mamao ai i ou mata, ei Eteleno !

¹⁸ Na motou tinanae, ti na mamae omatou ganea, Kae i le aso leia na motou fanau ai, na motou maua le matagi ata : Na leaise fakamauli le fenua, Ti na leaise tupu foou lona kakai.

¹⁹ Ke toe mauuli ou mate ! Ke toe tutuu ake ki aluga oku mate ! Kotou alaala ti kotou fiafia, kakai o le efu ! Talie ko lou sasau ko se sasau fakamauli, Ti e toe soli loa e le kele le malama o le aso ki le kau mate.

²⁰ Ano, ei loku kakai, ulu ki lou kogafale, Ti ke tapono le matapa i ou muli ; Mumuni i se ga temi toetoe fua, O kaku ki le oki o le ita.

²¹ Talie ko leinei, e ulu le Eteleno mei lona nofoaga, Ke tautea le kakai o le malama nei o tupu ko ana agasala ; Ti e fakasa loa e le fenua le toto leia na maligi, Ti e leaise toe fufu loa e ia le kakai leia na tamate.