Esaia 23 - Tosi Tapu

Folafola kikite ki Tile

¹ Folafola a le Atua ki Tile. Kotou fetagisi, koutou ko vaka o Talesisi ! Talie kua maumau a Tile : e leaise koi toe se fale ! e leaise koi maua se matapa ! Na kaku mai le logo kia latou mei le fenua o Kitimi.

² Kotou fakalologo i lokoutou punamauli, koutou ala e nonofo i le mata tai, Koutou ala e fakaapele ki koloa e le kau faikoloa o Sitone, ala e feanoaki i le tai !

³ Na tali e ia le fulumeto o le Nile, Ti na maua e ia a taukai o nea fuli ala na to i tafa o le vaitafe : Na nofo a ia ko le maketi o atu puleaga.

⁴ Ke ke luma, ei Sitone ! Talie e masau feneeki le tai, le kolo tau o le tai : Na leaise kau maua fua ni mamae, na leaise kau fanau, Na leaise kau fagai fua ni toe tagata, Ti na leaise kau taupau fua ni taineliki.

⁵ Ka iloa loa le logo e le kau Esipito, E lotou lulu loa i le logo ki le vilo o Tile.

⁶ Kotou fakalaka ki Talesisi, Kotou tagi laulau, koutou ko kakai o le mata tai !

⁷ Pe ko lokoutou kolo lena, leia na fiafia i mua, Leia na fakatuu talu mei fualoa, Leia na ano o nofo i ni fenua mamao ?

⁸ Ko ai leia na fai ia le fakapapau ke maumaui a Tile, leia na tufa ia ni pala fakasau, Leia na too ona kau faikoloa, kae na kau lona kau faikoloa ki le kau mou koloa o le malama nei ?

⁹ Ko le Eteleno o kau tau, leia na fai ia le fakapapau lena, Ke taai ai le fia nealasi o nea fuli ala e gigila, Ke tuku ai ki lalo le kau lalasi fuli o le malama nei.

¹⁰ Taine o Talesisi, kua oki le popula ! Ke ke eva faitalisa i lou fenua, Ofaipe le faifaitalisa o le Nile !

¹¹ Na falo e le Eteleno lona lima ki le tai ; Na fakaii e ia a atu puleaga ; Na fakatotonu e ia ke maumaui a kolo tau o Kanaane.

¹² Na pati a ia : Taine o Sitone, taupoou kua maumaui ! E leaise ke toe fakafiafia loa. Ti kapau e ke tuu loa ki aluga, o ano ki le fenua o Kitimi, E leaise ke maua ai foki se maloloaga.

¹³ Tio ki le kau Kaletea, leia na leaise ko se kakai i mua, Na lotou nonofo i le toafa, ti na fakatuu e le Asilia se fenua kiate ia ; Kua lotou fakatuu ni tule, kua lotou maumaui a fale sau o Tile, Kua lotou fakaliliu latou ko ni tuuga fale maumau.

¹⁴ Vaka lalasi o Talesisi, kotou tagi laulau, Talie kua maumau lokoutou kolo tau !

¹⁵ I le temi lena, e galoi loa a Tile i fetuu e kau fitu, Ko le fualoa o le mauli o se sau. Kae oki loa a fetuu e kau fitu, e fai loa a Tile Pe le fafine faiaga leia e masau ki ai le sua :

¹⁶ Too le alepe, ano i le kolo, A koe, fafine faiaga, leia na galoi ! Ta lau alepe ke malie, toe sua ke malie au sua O tupu ke toe manatui a koe e le kakai !

¹⁷ I le oki o fetuu ana e kau fitu, E toe asiasi loa le Eteleno ki Tile, Ti e toe liliu loa a Tile ki lona totogi kelekele ; E toe faiaga loa a ia ki puleaga fuli o le kele,. I aluga o le malama nei

¹⁸ Kae e fakatapu loa ona koloa mo lona totogi kelekele ki le Eteleno. E leaise toe tanaki loa latou, pe taupau loa latou ke tologa, Talie e fakaaoga loa lona totogi kia latou ala e nonofo i mua o le Eteleno Ke totogi ai ni nea kai malilie ti mo ni kofu fulumalilie.