Esaia 19 - Tosi Tapu

Folafola kikite ki Esipito

¹ Folafola ki Esipito. Ko leinei, kua eke le Eteleno i se ao gasolo, o au ki Esipito ; Ti kua lulu a taulaatua o Esipito i ona mua, Ti kua gaegae le loto o le kau Esipito.

² E kau soli loa ni masafu ki le tagata Esipito ke tau ki le tagata Esipito, Ti e tau loa le taina ki lona taina, le kaukau nea ki lona kaukau nea, Le kolo ki le kolo, le puleaga ki le puleaga.

³ E puli loa le laumalie o Esipito i loto malie o ona, Ti e kau maumaui loa lana fakakaukau. E oso loa a ia ki taulaatua, mo le kau fai nea fakatemonio, Mo latou ala e afa ki le kau mate, ti mo latou ala e faikikite ki le apogipogi.

⁴ Ti e pati le Eteleno o kau tau : E kau tuku loa Esipito ki lima o se pule itaita ; E pule loa se sau veli kia latou.

⁵ E mamasa loa a vai o le tai, Ti e liliu loa le vaitafe o malo.

⁶ E sauga veli loa a liua, Ti e mamasa loa a takiaga vai o Esipito o malo, Ti e mamate loa a u mo kofe.

⁷ E maalaala katoa loa le tafeaga o le vaitafe o kaku ki le tai ; Ti ko nea fuli ala na to loa i tafa o le vaitafe e malo loa, Ti e mamate loa, ti e liliu loa o efu.

⁸ E fetagisi loa a tagata faifeua, Ti e tagi laulau loa latou fuli ala e matau i le vaitafe, Ti e gaegae loa latou ala e fola kupega i le vaitafe.

⁹ E luma loa latou ala e gaoi ia le lino kua selu, Ti e lalaga ia a kie tetea.

¹⁰ E gaegae fuli loa a fanakiaga o le fenua, Ti e loto gaegae loa a tagata gaoi totogi fuli.

¹¹ Ko ni kau vale a aliki o Tesoane, Ti ko le fakakaukau a le kau poto a Falaone kua liliu ko se fakakaukau valea. Pe feaki lakoutou toa o pati kia Falaone : Ko le vosa au o le kau poto, ko le vosa au o sau mago ?

¹² Kofea koia ou kau poto ? Ke lotou fakasa atu kiate koe ni levelasio, Ti ke lotou fakailo atu kiate koe a fakatuutuu ala na fai e le Eteleno o kau tau ki Esipito.

¹³ Kua ulu vale a aliki o Tesoane, Kua ninimo a aliki o Nofi, Kua fakasese a Esipito e pule o faasiga ;

¹⁴ Kua tuku e le Eteleno i loto malie o Esipito se laumalie patigataa, Ke siga ai le kau Esipito i alatou gaoiaga fuli, Ofaipe se tagata kona leia e siga o lulua.

¹⁵ Ti e leaise toe mafai loa e Esipito se nea fua e tasi, Mei le ulu ki le siku, Mei le lau palemie ki le fa u.

Ko le mou koloa o Esipito mo Asilia i le puleaga o Kilisito

¹⁶ I le aso lena, e fai loa Esipito pe ni fafine : E lulu loa a ia i lona i, Mo ka tio a ia ki le taugaoi o le lima o le Eteleno o kau tau, Mo ka siki loa e ia a ia kiate ia.

¹⁷ Ti e liliu loa le fenua o Suta ko se nea fakaii ki Esipito : I temi fuli e masau ai loa ki ai i ona mua, e nofo loa a ia i le i lasi, O tupu ko le tonuaga leia ka too loa e le Eteleno o kau tau kiate ia.

¹⁸ I le temi lena, e i ai loa ni kolo e lima o le fenua ko Esipito, Ala e masau loa i le masau o Kanaane, Ti e fakamaoki loa i le suafa o le Eteleno o kau tau : E igoa loa le tasi o kolo ana ko le kolo o le maumaui.

¹⁹ I le temi lena, e i ai loa se aletale ki le Eteleno I loto malie o le fenua o Esipito, Ti mo se nea fakamanatu ki le Eteleno i lona koiga.

²⁰ E liliu loa a ia ko se fakamailoga mo se fakamaoki ki le Eteleno o kau tau I le fenua o Esipito ; E lotou tagi loa ki le Eteleno o tupu ko le kau fakamakeke, Ti e kakau loa e ia kia latou se tasi leia ke fakamauli mo malui ia latou.

²¹ Ti e iloa loa le Eteleno e le kau Esipito, Ti e iloa loa le kau Esipito e le Eteleno i le aso lena ; E lotou fai loa ni sakilifisio mo ni moliga, Ti e lotou fai loa ni fakapapau ki le Eteleno ti e lotou fakasoko loa latou.

²² Koia e taai ai loa e le Eteleno le kau Esipito ; E taai loa e ia latou, kae e toe fakamauli loa e ia latou ; Ti e lotou tafoki loa ki le Eteleno, Leia e tali ia loa alatou kole ti e fakamauli ia loa latou.

²³ I le temi foki lena, e i ai loa se ala mei Esipito ki Asilia : E ano loa le kau Asilia ki Esipito, ti mo le kau Esipito ki Asilia ; Ti e tausi loa le kau Esipito mo le kau Asilia ki le Eteleno.

²⁴ I le temi foki lena, e liliu loa Iselaele ko le tolu o puleaga, Leia e fakatasi ki Esipito mo Asilia, Ti e tapuakina loa a fenua ana.

²⁵ E tapuaki loa le Eteleno o kau tau kia latou, o pati : Ke manuia Esipito, loku kakai, Ti mo Asilia, le gaoiaga o oku lima, Ti mo Iselaele, loku tofiga !