Esaia 14 - Tosi Tapu

Le fiafia o Iselaele i le lava o Papilone

¹ Talie e alofa loa le Eteleno kia Sakopo, E toe filifili loa e ia Iselaele, Ti e toe fakanonofo loa e ia laua i lola fenua ; Ti e fakatasi loa mo laua le kau matapule, Ti e lotou pipiki loa ki le fale o Sakopo.

² E too loa latou e kakai, o toe fakaliliu ki olatou nofoaga, Ti e toe maua loa latou e le fale o Iselaele i le fenua o le Eteleno, Ofaipe ni tagata fakasausau mo ni fafine fakasausau ; E lotou fakapopula loa latou ala na fakapopula ia latou, Ti e lotou pule loa kia latou ala na fakaveliveli ia latou.

³ Ti ka soli atu loa kiate koe e le Eteleno se malolo, I le oki o ou mamae mo ou i, Ti mo le oki o le popula mamae leia na taomi ia a koe,

⁴ E ke too loa le sua leinei ki le sau o Papilone, Ti e ke pati loa : E a koia ! kua puli le tagata tukipo ! Kua gato le popula !

⁵ Kua fatii e le Eteleno le tokotoko a le kau agaveli, Le laakau a le kau pule ;

⁶ Leia na taai ia a kakai i lona itaita Ki ni tautea faisosoko ; Leia na pule i le fakamakeke ki atu puleaga, Kua tuli fakaveliveli.

⁷ Kua fiafia le malama nei katoa i le malolo ti mo le tokamalie ; Kua sua i le nekenekea.

⁸ Io, kua fiafia foki a sipele mo sete o Lipane i lou vilo : Talu mei le aso leia na ke vilo ai, na leaise toe pale mai se tasi o tamate matou.

⁹ Kua feosoaki le nofoaga o le kau mate o kaku ki ona fakatafito, O teuteu lau kaku ake ; Kua fafagu e ia i ou mua le kau mate, le kau lalasi o le malama nei, Ti kua fakatutuu e ia ki aluga mei olatou ekeekeaga fakasau a sau fuli o atu puleaga.

¹⁰ Kua lotou masau fuli, o pati atu kiate koe : Mo koe foki, kua ke gaegae ofaipe matou, Kua ke liliu o tatau mo matou !

¹¹ Kua ifo lou laukau ki le nofoaga o le kau mate, O fakatasi mo le musika o au lute ; Kua tuku i ou lalo se moelaga ilo, Ti ko lou kie kafu ko ilo.

Ko le vilo o Satana

¹² Ko lena kua ke vilo mei le lagi, A koe, Lusifelo, vosa o le mafoata ! Kua ti a koe ki le kele, A koe leia na malo i atu puleaga !

¹³ Na ke pati i lou loto : E kau pale loa ki le lagi ; E kau siki loa loku ekeekeaga fakasau ke taualuga ake i fetuu a le Atua ; E kau tonatona loa i le mauga o le fakatasiga, I le potupotu o le noleto ;

¹⁴ E kau pale loa ki le tumutumu o ao ; E kau tatau loa mo le Taualuga.

¹⁵ Kae na ti loa a koe ki le nofoaga o le kau mate, Ki loloto o le popoko.

¹⁶ Ko latou ala e tio kiate koe e kikila olatou mata o tio fakamate kiate koe : Pe ko ia maoki, le tagata leia na fakalulu ia le malama nei katoa i ona mua, Leia na luui ia a atu puleaga,

¹⁷ Leia na fakaliliu ia le malama nei o toafa, Leia na maumaui ia mo kaia ia a kolo, Leia na leaise toe fakamavaa ia a fale o lana kau pilisoni ?

Maumaui o Papilone

¹⁸ Ko sau fuli o atu puleaga, io, latou fulifuli, Kua malolo i le mauiga, i olatou tanuma.

¹⁹ Kae ko koe, kua ti a koe o mamao i lou tanuma, Ofaipe se toe leia na vilo kua fakalialia, Ofaipe ni tino o ni iki na motumotu i le seleta, Ti na tiaki fakaveliveli ki fatu o le kau ala, Ofaipe se mate na takatakafi e vae i le tau.

²⁰ E leaise tanu fakatasi loa a koe mo latou i le tanuma, O tupu na ke maumaui lou fenua, ti na ke tamate lou kakai : E leaise toe masau loa i se aso ki le sakoga o le kau agaveli.

²¹ Kotou teuteu le tamate o vosa, O tupu ko le agasala o olatou tamana ! Ke aua na lotou toe tuu ake ki aluga o pule i le kele, Ti mo fakaapele le malama nei i fili !

²² E pati le Eteleno o kau tau : E kau tuu ake loa ki aluga o tau kia latou ; E kau pulii loa le igoa mo le tuuaga o Papilone, Mo ana fanau ti mo lona sologa, e pati le Eteleno.

²³ E kau fakaliliu loa a ia ko le nofoaga o le eliso ti ko se pela, Ti e kau seu loa a ia ki le seupenu o le maumau, E pati le Eteleno o kau tau.

Folafola kikite ki Asilia

²⁴ Kua fakapapau le Eteleno o kau tau, o pati : Io, e soko loa le nea leia na kau fakatotonu ki ai ; E soko maoki loa le nea leia na kau loto ki ai.

²⁵ E kau fatii loa le Asilia i loku fenua ; E kau takatakafi loa a ia ki oku vae i oku mauga ; Ti e too loa lana laakau taki i loku kakai ko Iselaele, Ti e too loa lana kavega i olatou tuauma.

²⁶ Ko lena le nea leia kua kau fakapapau ki le malama nei katoa ; Ko lena le nea leia e fai loa e loku lima falo ki atu puleaga fuli.

²⁷ Kua too e le Eteleno o kau tau le fakapapau lena : Ko ai e fakafesagai loa ki ai ? Kua siki lona lima, ko ai e peluki ia loa a ia ?

Folafola kikite ki le kau Filisitini

²⁸ Na fai le folafola leinei i le fetuu o le mate o le sau ko Akase :

²⁹ Aua na ke fakafiafia, fenua o le kau Filisitini, I le fatii o le laakau leia na taai ia a koe ! Talie e ulu loa mei le aka o le gata se gata utikona, Ti e liliu loa lona fua ko se talakone lele.

³⁰ Ti e makona loa le kau mativa, Ti e malolo loa le kau fakaaloalofa i le fimalie. Kae e kau tamate loa lou aka ki le fia kai, Ti e mate loa i le tau le nea leia e toe loa iate koe.

³¹ Matapa, ke ke tagi ! Kolo, ke ke lauga ! Fenua katoa o le kau Filisitini, ke ke lulu ! Talie kua ifo mai se afu mei le potu noleto, Ti kua kopikopi fua a atu tau o le fili.

³² Ti kolea ke tali loa ki tagata avelogo a le kakai ? Kua fakatuu e le Eteleno a Sione, Ti kua maua e le kau fakaaloalofa o lona kakai se mumuniaga i ai.