Esaia 11 - Tosi Tapu

Ko le Mesia mo lona sau

¹ Ti e somo ake loa se ga laa i le tafito o Isaia, Ti e tupu ake loa se uli i ona aka.

² E nofo loa le Laumalie o le Eteleno iate ia : Laumalie o le poto mo le atamai, Laumalie o le tokoi mo le makeke, Laumalie o le iloa mo le i ki le Eteleno.

³ E iloa vave loa e ia le i ki le Eteleno. E leaise fakamaau loa a ia i le tio mata, E leaise valoki loa a ia i le logo taliga.

⁴ Kae e fakamaau loa e ia le kau mativa i le maoki, Ti e tuku loa e ia se fakamaau totonu ki le kau fakaaloalofa o le malama nei ; E taai loa e ia le malama nei ki lana folafola ofaipe lana taai ki se laakau, Ti e tamate loa e ia le tagata agaveli ki le tukumanava o lona gutu.

⁵ E liliu loa le faitotonu ko le kilipipi o ona vakavaka, Ti mo le agatonu ko le kilipipi o ona ifiifi.

⁶ E nofo fakatasi loa le lupo mo le akeno, Ti e moe fakatasi loa le taika mo le uviki koti ; Ti e fakatasi loa le uviki pipi, mo le uviki laione, mo manu lalata, Ti e taki loa latou e se ga toe.

⁷ E kai fakatasi loa le pipi fafine mo le uluso fafine i le faisaga e tasi, Ti e momoe fakatasi loa ola uviki. Ti e kai lau laakau loa le laione ofaipe le pipi.

⁸ E manogi loa le ga toe koi u i le ofaga o le gata velo, Ti e velo loa e le ga toe koi vavae lona lima ki le pu o le gata utikona.

⁹ E leaise toe fai loa se nea veli, pe ko se maumau I loku mauga maokioki katoa ; Talie e apele loa le malama nei katoa i le iloa o le Eteleno, Ofaipe le apele o le takele o le tai i vai ala e ufiufi ia a ia.

¹⁰ I le aso lena, e nofo loa i ai le uli o Isaia Ofaipe se manumanu ki kakai fuli ; E afa loa a ia e atu puleaga, Ti e malolo loa a ia i le kololia.

Ko le toe liliu o le kau popula

¹¹ I le aso lena, e toe falo loa e le Aliki o tua lua lona lima Ke toe totogi le toetoega o lona kakai, Leia na mavetevete i Asilia mo Esipito, I Patolosi mo Etiopia, I Elame, i Sineale ti mo Amate, Ti mo atu motu o le tai.

¹² E siki loa e ia se manumanu ki atu puleaga, E fakatasi loa e ia le kau popula o Iselaele, Ti e aumai loa e ia le kau mavetevete o Suta, Mei potupotu e fa o le malama nei.

¹³ E puli loa le finenonofo o Efalaimi, Ti e tamate loa ona fili i Suta ; E leaise toe finenonofo loa Efalaimi kia Suta, Ti e leaise toe fili loa a Suta kia Efalaimi.

¹⁴ E la lele fakatasi loa ki mauga liliki o le kau Filisitini i le potu uesite, Ti e la maumaui loa mo kaia loa a koloa o vosa o le potu esite ; Ko Etome mo Moape ko le nea kai o ona lima ; Ti e fakalogo loa a vosa o Amone kia laua.

¹⁵ E fakamalo loa e le Eteleno le alelo o le tai o Esipito, Ti e siki loa e ia lona lima ki le vaitafe o Eufalate, o pupusi fakamakeke ki ai : E vaei loa e ia a ia i ni magai vai e fitu, Ti e fakalaka loa i ai i ni taka.

¹⁶ Ti e i ai loa se ala ki le toetoega o lona kakai, Leia e toe loa mei Asilia, Ofaipe le ala leia na tuku ki Iselaele, I le aso leia na mavae ai i Esipito.