Ekesote 39 - Tosi Tapu

Le fai o kofu tapu o Alone

¹ Na fai loa ki ni kie usi, mo kula malie, mo kula fakapouli, ti mo tea, a kofu gaoi ki gaoi i le sagatualio, ti mo kofu tapu o Alone, o mulimuli ki le nea leia na fakatotonu e le Eteleno kia Moisese.

² Na fai loa le efote ki le aulo, mo le filo usi, mo kula malie, mo kula fakapouli, ti mo le filo tea makeke.

³ Na tuki loa ni laui aulo ke maninifi, ti na koti loa i ai ni filo o lalaga fakatasi mo ni filo usi, mo ni filo kula malie, mo ni filo kula fakapouli, ti mo ni filo tea makeke. Na fai fakateuteu loa le gaoi lena.

⁴ Na fai loa i ai ni tuauma e lua ala na fakapipiki ia a ia ; ti na fakatasi a ia i ona kapa e lua.

⁵ Na fai le kilii pipi ofaipe le fai o le efote, ti na fakamau a ia ki ai ; na fai a ia ki le aulo mea, mo le filo usi, mo kula malie, mo kula fakapouli, ti mo le filo tea makeke, o mulimuli ki le nea leia na fakatotonu e le Eteleno kia Moisese.

⁶ Na takatakai loa ki ni fakamau aulo ni fatu ko le onise, ala na togi ai loa a igoa o vosa o Iselaele, ofaipe le togi o mama fakamaoki.

⁷ Na fakapikipiki loa latou ki tuauma fakateuteu o le efote, ke fakamanatu ai a vosa o Iselaele, o mulimuli ki le nea leia na fakatotonu e le Eteleno kia Moisese.

⁸ Na fai loa le peketolale, o fakateuteu, ofaipe le gaoi o le efote, ki le aulo, mo le filo kula malie, mo kula fakapouli, ti mo le filo tea makeke.

⁹ Na tapa fa tatau a ia, ti na fai a ia ke lolua ; ko lona loa ko le alofilima e tasi, ti ko lona laulasi ko le alofilima e tasi. Na lolua a ia.

¹⁰ Na teuteui loa a ia ki ni atu fatu e fa : ko le uluaki atu ko le saletuane, mo le topasi, mo le emelote ;

¹¹ ko le lua o atu : ko le kelenate, mo le safile, mo le taimane ;

¹² ko le tolu o atu : ko le opale, mo le akate, mo le ametisite ;

¹³ ko le fa o atu : ko le kilisolite, ko le onise, mo le sasepe. Na fakapikipiki a fatu ana ki olatou fakamau aulo.

¹⁴ Na i ai ni fatu e kau agafulu tupu lua, o mulimuli ki igoa o vosa o Iselaele ; ti na togi latou ofaipe ni mama, ti na lotou tasi mo ia le igoa o famili e kau agafulu tupu lua o Iselaele.

¹⁵ Na fai loa i le peketolale ni ga tini aulo mea, kua fili ofaipe ni ga maea.

¹⁶ Na fai loa ni takafi aulo e lua mo ni kavei aulo e lua, ti na fakapipiki loa a kavei e lua ki potupotu e lua o le peketolale.

¹⁷ Ti na fakaulu loa ni tini aulo e lua i loto o kavei e lua ala i potupotu e lua o le peketolale ;

¹⁸ ti na fakagato loa i mua a potupotu o tini e lua ki fakamau e lua ala i aluga o tuauma fakateuteu o le efote.

¹⁹ Na toe fai loa ni kavei aulo e lua, o fakapikipiki ki potupotu e lua o le peketolale, i le tapa loto leia e pipiki ki le efote.

²⁰ Na toe fai foki ni iki kavei aulo e lua, o fakapipiki ki tapatapa lalo o tuauma fakateuteu e lua o le efote i mua, i tafa o le sokoga, i aluga o le kilii pipi o le efote.

²¹ Na nonoa loa le peketolale i ona kavei ki kavei o le efote, ki se ga maea usi, o tupu ke nofo le peketolale i aluga o le kilii pipi o le efote, ti ke aua na mafai ke masau a ia mei le efote, o mulimuli ki le nea leia na fakatotonu e le Eteleno kia Moisese.

²² Na fau loa le kofu loloa o le efote, leia na tui katoa loa ki le kie usi.

²³ Na i ai i loto malie o le kofu, se mavaa ki le ua o le kofu, ti na tui fakamakeke le mavaa lena i lona tafatafa katoa, talie ke aua na masae le kofu.

²⁴ Na tui loa ki tapatapa o le kofu ni fuai kelenati usi, mo kula malama, mo kula fakapouli, ti mo tea makeke.

²⁵ Na fai loa ki le aulo mea ni ga pele liliki, ti na fakapikipiki loa latou i vasa o fuai kelenati, i le takatakai katoa o le tapatapa o le kofu, i vasa o fuai kelenati :

²⁶ Ko le ga pele mo le fa kelenati, ti ga pele mo le fa kelenati, i le takatakai katoa o le tapatapa o le kofu, ki le fai o le gaoi, o mulimuli ki le nea leia na fakatotonu e le Eteleno kia Moisese.

²⁷ Na fai loa a kofu loloa ki le kie tea makeke, kia Alone mo ona vosa ;

²⁸ na fai loa le tiale ki le kie tea, ti na fai foki le puloga mo vavae ki le kie tea makeke ;

²⁹ na fai loa le kilii pipi ki le kie tea makeke o tui fakateuteu ki le filo usi, mo kula malie, mo kula fakapouli, o mulimuli ki le nea leia na fakatotonu e le Eteleno kia Moisese.

³⁰ Na fai loa le palaa ki le aulo mea, le palaa tapu, ti na tosi loa i ai ofaipe le fakateuteu o se mama : Maokioki ki le Eteleno.

³¹ Na nonoa loa a ia ki se ga maea usi ki le tiale, i aluga, o mulimuli ki le nea leia na fakatotonu e le Eteleno kia Moisese.

³² Ti na oki loa gaoi fuli o le tapenakulo, o le falela tapu. Na fai loa e fanau a Iselaele a nea fuli ala na fakatotonu e le Eteleno kia Moisese ; na lotou fai loa o fenaaki.

³³ Na aumai loa le tapenakulo kia Moisese : le falela mo nea fuli ala na kau ki ai : ona fakamau, mo ona papa, mo ona amo, mo ona pou, ti mo ona tuuaga ;

³⁴ mo le la kilii ovi kula, mo le la kilii kakaututuu, ti mo le lito leia e vaelua ia le potu tapu mo le potu taputapu ;

³⁵ mo le aleka o le fakapapau mo ona amo, ti mo le nofoaga o le manava alofa ;

³⁶ mo le laupapa, mo ona nea gaoi fuli, mo pane tapu ;

³⁷ mo le tuuaga malama aulo magamaga, mo ona malama, mo malama kua teuteui, mo ona nea gaoi fuli, mo le lolo ki le tuuaga malama ;

³⁸ mo le aletale aulo, mo le lolo tapu, mo le kaloni fakamanogi, ti mo le lito o le uluaga o le falela ;

³⁹ mo le aletale sila mo lona ukamea pupu, mo ona amo, ti mo ona nea gaoi fuli ; mo le tanoa mo lona tuuaga ;

⁴⁰ mo kie puipui o le malae, mo ona pou, mo ona tuuaga, mo le lito o le matapa o le lototoa, mo ona maea, mo ona pike, ti mo nea gaoi fuli ki le gaoi i le tapenakulo mo le falela tapu ;

⁴¹ mo kofu gaoi ki le sagatualio, mo kofu tapu o le tagata faisakilifisio ko Alone, mo kofu o ona vosa ki le fai o le gaoi fakapelepitelo.

⁴² Na fai loa e fanau a Iselaele a gaoi fuli ana, o mulimuli totonu ki fakatotonu fuli ala na tuku e le Eteleno kia Moisese.

⁴³ Na tioi loa e Moisese a gaoi fuli ; ti ko leinei, kua lotou fai a nea fuli o mulimuli totonu ki nea ala na fakatotonu e le Eteleno, na lotou fai fenaaki loa. Ti na tapuaki loa Moisese kia latou.