Ekesote 36 - Tosi Tapu

¹ Ko Petesaleele, mo Ooliape, ti mo tagata poto tufuga fuli ala na tuku ki ai e le Eteleno le poto mo le atamai ki le fai o gaoi, na fai ia loa a gaoi ki le sagatualio, o mulimuli ki nea fuli ala na fakatotonu e le Eteleno.

² Na kalagai loa e Moisese a Petesaleele mo Ooliape, ti mo tagata poto tufuga fuli ala kua tuku ki ai e le Eteleno le atamai, mo latou fuli ala kua loto malie ke tokaga ki le gaoi leia e tonu ke fai.

³ Na lotou too loa i mua o Moisese a moliga fuli ala na ave e fanau a Iselaele ke fai ai a gaoi ki le sagatualio. I usu fuli na ave tuumau kia Moisese ni moliga i le loto malie.

⁴ Ti ko tagata poto tufuga fuli, latou ala na tokaga ki gaoi o le sagatualio, na tasi tuku ia loa lana gaoi, kae lotou ano loa kia Moisese, o pati :

⁵ Ko le nea leia kua aumai e le kakai kua fakalaka i le nea leia e aoga ki gaoi ala na fakatotonu e le Eteleno ke fai.

⁶ Ti na fakasa loa e Moisese i le nofolaga ke aua na toe tokaga se tagata pe ko se fafine ki se moliga ki le sagatualio. Na taofi loa i ai le fai nea alofa o le kakai.

⁷ Ko nea ala kua oki i le teuteui na feauga loa ki gaoi ala e tonu ke fai ; ti na lotou fakalaka foki.

Ko la ato

⁸ Ko tagata poto fuli, ala na gaoi ki le falela, na fai ia loa le tapenakulo ki ni tapi e kau agafulu, ala na fai ki le filo tea makeke, mo le filo usi, mo kula malie, ti mo kula fakapouli ; na paaki loa i ai ni selupino o tui fakateuteu.

⁹ Ko le loa o le tapi e tasi ko meta e kau agafulu tupu fa ; ti ko le laulasi o le tapi e tasi ko meta e lua ; ko le fua e tasi ki tapi fuli.

¹⁰ Na fakapipiki fakatasi tapi e lima : ti na toe fakapipiki fakatasi la ake tapi e lima.

¹¹ Na fai foki ni kavei usi i le tapatapa o le tapi fakaoki o uluaki tapi e lima ; ti na toe fai felaaki foki ki le tapatapa o le tapi fakaoki o la ake a tapi e lima.

¹² Na fai ni kavei e kau lima i le uluaki tapi, ti na fai ni kavei e kau lima i le tapatapa o le tapi fakaoki o la ake tapi e lima ; na fetautonuaki a kavei ana.

¹³ Na toe fai foki ni fakamau aulo e kau lima, ti na fakapipiki loa a tapi ki fakamau. Ti na tuu loa le tapenakulo ko se nea e tasi.

¹⁴ Na fai loa ni tapi fului koti, ke uufi ai le tapenakulo ; na fai loa ni tapi fului koti e kau agafulu tupu tasi.

¹⁵ Ko le loa o le tapi e tasi ko meta e kau agafulu tupu lima, ti ko le laulasi o le tapi e tasi ko meta e lua ; Na fua tatau a tapi fuli ana e kau agafulu tupu tasi.

¹⁶ Na fakasosoko loa a tapi e lima, ti toe felaaki ki la ake a tapi e ono.

¹⁷ Ti na fakapiki loa ni kavei e kau lima i le tapatapa o le tapi fakaoki o uluaki tapi e lima, ti na toe fakapiki foki mo iki kavei e kau lima i le tapatapa o le uluaki tapi o la ake a tapi e ono.

¹⁸ Na fai loa mo ni fakamau sila e kau lima, ke fakasosoko ai a tapi ana e lua, ke tuu ko se fa la e tasi.

¹⁹ Na fai foki ki le falela se la ato ki le kilii ovi tagata kua pena kula, ti mo se tasi a la ki le kilii kakaututuu, ke teki i aluga.

Papa mo olatou fakavae

²⁰ Na fai loa a papa o le tapenakulo ki le akasia, ala na tuu fakasako.

²¹ Ko le loa o le fa papa e tasi ko meta e lima, ti ko le laulasi o le fa papa ko satimeta e kau fitu tupu lima.

²² Na fai loa ni vae e lua ki le fa papa taki tasi o vasa tatau leia ki leia, ti na fakatatau fuli a fa papa o le tapenakulo.

²³ Na fai loa a fa papa e kau lua ki le fetuu saute o le tapenakulo.

²⁴ Na fai loa ni tuuaga siliva e kau fa i lalo o fa papa ana e kau lua, ko tuuaga e lua i lalo o le fa papa e tasi ki ona vae e lua.

²⁵ Ti na fai loa a fa papa e kau lua ki le lua fetuu o le tapenakulo, ki le fetuu noleto,

²⁶ ti mo ona tuuaga siliva e kau fa, ko tuuaga e lua i lalo o le fa papa taki tasi.

²⁷ Na fai loa ni fa papa e ono ki muli o le tapenakulo, ki le fetuu uesite.

²⁸ Na fai loa ni fa papa e lua ki tifi o le tapenakulo i muli ;

²⁹ ko fa papa ana na lolua mei lalo ti na fakamaumau i le tumutumu ki se fa mama. Na fai fenaaki ki fa papa e lua i tifi e lua.

³⁰ Ti na fakatasi ko fa papa e valu, mo olatou tuuaga siliva e kau agafulu tupu ono, ko tuuaga e lua i lalo o le fa papa e tasi.

³¹ Na fai loa ni fa papa akasia fakalavalava e lima ki papa o le fetuu e tasi o le tapenakulo,

³² mo ni iki fa papa fakalavalava e lima ki papa o le lua fetuu o le tapenakulo, ti mo ni fa papa fakalavalava e lima ki papa i muli o le tapenakulo, ki le potu uesite ;

³³ na fai loa le fa papa fakalava i loto o papa fuli mei leia potupotu ki leia potupotu.

³⁴ Na aofi loa a papa ki le aulo, ti na fai loa ki le aulo a mama ala ke fakaulu ai a papa fakalavalava, ti na aofi foki ki le aulo a papa fakalavalava.

Lito e lua

³⁵ Na fai loa le lito ki le filo usi, mo kula malie, mo kula fakapouli, mo tea ; ti na paaki loa i ai ni selupino fakateuteu.

³⁶ Na fai loa ki le lito ni fa pou akasia e fa, o aofi ki le aulo ; na fai foki ona tautauaga aulo, mo ona tuuaga e fa ki le siliva kua saka.

³⁷ Na fai loa ki le matapa o le falela se lito usi, mo kula malie, mo kula fakapouli, mo tea. Ko se gaoi na tui fakateuteu.

³⁸ Na fai loa ona fa pou e lima, mo ona tautauaga, ti na aofi loa ki le aulo a ulu o pou mo fa laakau tautau o le lito ; ti na fai loa a tuuaga e lima o pou ki le sila.