Apokalipisi 9 - Tosi Tapu

¹ Ko le lima aselo na pupusi ia loa lana fakatagi pupusi. Ti na kau tio loa na vilo se fetuu mei le lagi ki le malama nei. Ti na soli loa kiate ia le kalavi o le sosoni o le vanu,

² ti na fakamavaa loa e ia le sosoni o le vanu. Ti na pale ake loa mei le sosoni se afu, ofaipe le afu o se gutuumu kaka ; ti na fakapouli loa le laa mo le aele i le afu o le sosoni.

³ Ti na mafuta loa mei le afu ni seseivaka, o mavetevete i le kele ; ti na soli loa kia latou se pule veli ofaipe le pule veli leia na maua e sekolopio o le kele.

⁴ Ti na pati loa kia latou ke aua na lotou fai ia se nea veli ki le mutie o le kele, mo le vao sesega, ti mo laakau, kae ke gato fai ki tagata ala e leaise maua ia le fakamailoga o le Atua i olatou lae.

⁵ Ti na soli loa kia latou, ke aua na lotou tamate a tagata, kae ke lotou fakamaemaei latou i masina e lima ; ti ko le mamae leia na fakatupu e seseivaka na faipe le mamae leia e fai e le sekolopio mo ka uuti e ia se tagata.

⁶ I aso ana, e afa loa e tagata le mate, kae e leaise lotou maua loa a ia ; e lotou oli loa ke lotou mamate, kae e sola mamao loa le mate ia latou.

⁷ Ti na tatau a seseivaka ana mo ni osi kua teuteui ki le tau ; ti na i ai se nea i olatou ulu na faipe se pala aulo, ti na fai olatou mata pe mata o tagata.

⁸ Ti na lotou lauulu ofaipe fafine, ti na fai olatou nifo pe nifo o laione.

⁹ Ti na lotou maua ni kofu tau ofaipe ni kofu tau ukamea, ti ko le logoa o olatou kapakau na faipe se logoa o saliote ala kua toso e ni osi mauke, o makape ki le tau.

¹⁰ Ti na lotou maua ni siku kua teuteui ki tala kona, ofaipe sekolopio, ti na maua i olatou siku le makeke ke tautea ai a tagata i masina e lima.

¹¹ Ti na pule loa kia latou le aselo o le vanu, leia na igoa i le fakaepeleo ko Apatone, i le fakakeleka ko Apolione (maumau).

¹² Kua sili atu le uluaki malaia. Ko leinei e toe au i muli ni iki malaia e lua.

¹³ Ko le ono aselo na pupusi ia loa lana fakatagi pupusi. Ti na kau logo loa ki se leo na au mei talai pipi e fa o le aletale aulo leia e tuu i mua o le Atua,

¹⁴ ti na pati loa ki le ono aselo leia e nofo mo le fakatagi pupusi : Veteki a aselo e fa ala na sai i le vaitafe lasi, ko le Eufalate.

¹⁵ Ti na veteki loa e ia a aselo e fa ala kua teuteu ki le ola, mo le aso, mo le masina, ti mo le fetuu, ke tamate ia le vaega tolu o tagata.

¹⁶ Ko le api o le kau tagata eke osi o le fa solia ko tino lelau e lua miliona : Na kau logo loa ki le numelo lena.

¹⁷ Ti ko leinei le nea leia na kau tio loa ki ai i laku moe miti o uiga mo le kau osi ti mo latou ala na eke i ai : na lotou teu ki ni kofu tau kula ofaipe le afi, mo usi ofaipe le safile, ti mo fefelo ofaipe le sulifa. Ko ulu o osi na faipe ulu o laione ; ti na mapusi mei olatou gutu se afi, mo se afu, ti mo se sulifa.

¹⁸ Ti na mate loa le vaega tolu o tagata i malaia ana e tolu, ko le afi, mo le afu, ti mo le sulifa, ala na mapusi mei olatou gutu.

¹⁹ Talie na nofo le makeke o osi i olatou gutu mo olatou siku ; na fai olatou siku pe ni gata ; na lotou maua ni ulu, ti ko ulu ala na tautea ia a tagata.

²⁰ Ko le toega o le kakai, latou ala na leaise mate i tautea ana, na leaise fakasemala loa ki gaoi o olatou lima, o fakagato lalatou atolasio ki temonio, ti mo taulaatua aulo, mo siliva, mo ukamea, mo fatu, ti mo laakau, ala e leaise feala ke tio, mo logo, mo saele ;

²¹ ti na leaise lotou fakasemala foki ki alatou tukipo, mo alatou nea fakatemonio, mo alatou fai feauaki, ti mo alatou kaia.