Apokalipisi 7 - Tosi Tapu

Ko 144 000 o Iselaele mo le kakai pagani toka api na au mei le mamae lasi

¹ I le oki o le nea lena, na kau tio loa ki aselo e toka fa i potupotu e fa o le malama nei. Ti na lotou taofi a matagi e fa o le malama nei, ke aua na agi se matagi ki le kele, pe ki le tai, pe ki se laakau.

² Ti na kau tio loa ki se tasi ake aselo, na pale ake i le potu o le sopoaga o le laa, ti na too e ia le fakamau a le Atua mauli ; ti na kalaga loa a ia o leo lasi ki aselo e fa ala na tuku ki ai ke tautea ia le kele mo le tai, ti na pati loa a ia :

³ Aua na kotou tautea le kele, mo le tai, mo laakau, o kaku ki le oki o lamatou fakamailoga a lae o tagata fakasausau o lotatou Atua.

⁴ Ti na kau logo loa ki le lau o latou ala na fakamailoga ki le fakamau a le Atua, ko le tino lelau tino fa tupu fa afe, mei faasiga fuli o vosa o Iselaele :

⁵ Mei le faasiga o Suta, ko le tino agafulu tupu lua afe ala na fakamailoga ki le fakamau ; mei le faasiga o Lupeni, ko le tino agafulu tupu lua afe ; mei le faasiga o Kate, ko le tino agafulu tupu lua afe ;

⁶ mei le faasiga o Asele, ko le tino agafulu tupu lua afe ; mei le faasiga o Nefetali, ko le tino agafulu tupu lua afe ; mei le faasiga o Manase, ko le tino agafulu tupu lua afe ;

⁷ mei le faasiga o Simeone, ko le tino agafulu tupu lua afe ; mei le faasiga o Levi, ko le tino agafulu tupu lua afe ; mei le faasiga o Isakale, ko le tino agafulu tupu lua afe ;

⁸ mei le faasiga o Sapulone, ko le tino agafulu tupu lua afe ; mei le faasiga o Sosefo, ko le tino agafulu tupu lua afe ; mei le faasiga o Pesamino, ko le tino agafulu tupu lua afe ala na fakamailoga ki le fakamau.

⁹ I le oki o le nea lena, na kau tio loa, ti ko leinei, na i ai loa se kakai toka api ai, leia na leaise mafai ke lau e se tasi, mei puleaga fuli, mo faasiga fuli, mo kakai fuli, mo masau fuli. Na lotou tutuu i mua o le ekeekeaga fakasau ti mo le Akeno, kua lotou kofu ki ni kofu tetea, ti na lotou too ni lau palema i olatou lima.

¹⁰ Ti na lotou kalaga leo lasi, o pati : ko le saofaki a lotatou Atua leia e ekeeke i le ekeekeaga fakasau, ti mo le Akeno.

¹¹ Ti na tutuu loa a aselo fuli i tafatafa o le ekeekeaga fakasau, mo le kau matua, ti mo manu mauuli e fa. Ti na lotou tulolo loa o fakatuu olatou ulu ki le kele i mua o le ekeekeaga fakasau, o atolasio ki le Atua,

¹² o pati : Amene ! Ke tuku ki lotatou Atua le fakavikiviki, mo le kololia, mo le poto, mo le fakafetai, mo le fakaapaapa, mo le mafimafi, ti mo le makeke, i sekulo mo sekulo ! Amene !

¹³ Ti na masau loa se tasi o le kau matua, o pati mai kiate au : Ko latou ala e kofu ki kofu tetea, ko ai ma latou, ti na lotou au meifea ?

¹⁴ Na kau tali loa kiate ia : Ei loku Aliki, e ke iloa a ia. Ti na pati mai loa a ia kiate au : Ko latou anei na au mei le mamae lasi ; ti kua lotou fo olatou kofu, ti kua lotou fakatetea latou i le toto o le Akeno.

¹⁵ Koia leia kua lotou tutuu ai i mua o le ekeekeaga fakasau o le Atua, o tausi kiate ia i le ao mo le po i lona fale tapu. Ko leia e ekeeke i le ekeekeaga fakasau e nofo tuumau loa mo latou, o puipui latou.

¹⁶ E leaise lotou toe fia kai loa, pe toe fia inu loa ; e leaise toe susunu loa latou e le laa pe ko se tasi ake vevela.

¹⁷ Talie ko le Akeno leia e nofo i loto malie o le ekeekeaga fakasau e fagai ia loa latou ti mo taki ia loa latou ki matapuna o le vai mauli, ti e solosoloi loa e le Atua a loimata fuli i olatou mata.