Apokalipisi 3 - Tosi Tapu

Tosi ki le Ekelesia o Salete

¹ Tosi ki le aselo o le Ekelesia o Salete : Ko leinei le nea leia e pati ki ai leia e nofo mo Laumalie e fitu o le Atua ti mo fetuu e fitu : E kau iloa au gaoi. E kau iloa e ke maua le igoa e ke mauli, kae e ke mate.

² Ke ke tokaga, o fakamakeke le toetoega leia ka mate ; talie na leaise kau maua au gaoi kua malie tukupau i mua o loku Atua.

³ Koia ke ke manatui ai pe na feaki lau tali mo lau logo ki le folafola, ti ke ke kukumi a ia, ti ke ke fakasemala. Kapau e leaise ke tokaga, e kau au loa ofaipe se tagata kaia, ti e leaise ke iloa loa pe ko le ola fea leia e kau au ai loa o fakamauatoka a koe.

⁴ Kae e ke maua i Salete ni tagata ala na leaise fakakelekele ia olatou kofu ; e lotou saele loa mo au i ni kofu tetea, talie e lotou gali mo kofu ana.

⁵ Ko leia e malo loa, e fakakofu loa a ia ki ni kofu tetea ; e leaise kau soloi loa lona igoa i le tosi o le mauli, ti e kau fakasa loa lona igoa i mua o loku Tamana ti mo mua o ana kau aselo.

⁶ Ko leia e maua ia ni taliga ke logo a ia ki le nea leia e fakasa e le Laumalie ki atu Ekelesia.

Tosi ki le Ekelesia o Filatelefia

⁷ Tosi ki le aselo o le Ekelesia o Filatelefia : Ko leinei le nea leia e pati ki ai le Maokioki, le Maoki, leia e nofo mo le kalavi o Tavite, leia e fakamavaa, ti e leaise tapono e se tasi, leia e tapono, ti e leaise fakamavaa e se tasi :

⁸ E kau iloa au gaoi. Ko leinei, kua kau tuku i ou mua se matapa kua mavaa, leia e leaise mafai ke tapono e se tasi : talie e ke maua se makeke ikiiki fua, ti na ke tausi laku folafola, ti na leaise ke fakafiti ki loku igoa.

⁹ Tio, e kau soli kiate koe ni iki o le sinakoka o Satana, ala e pati ko le kau Sutea, kae e leai, e lotou loi ; tio, e kau fakamakeke loa latou ke lotou au o punou i ou vae, ti ke lotou iloa kua kau alofa kiate koe.

¹⁰ Talie na ke tausi le folafola o le kataki fualoa iate au, e kau tausi loa a koe i le ola o le asiasii leia ka au ki le malama nei katoa, ke asiasii ai le kakai o le malama nei.

¹¹ E kau au vave. Taofi le nea leia e ke maua, o tupu ke aua na too lou pala e se tasi.

¹² Ko leia e malo loa, e kau fakatuu loa a ia ko se fa pou lasi i le fale tapu o loku Atua, ti e leaise toe mavae loa a ia mei ai ; e kau tosi loa iate ia le igoa o loku Atua, ti mo le igoa o le kolo o loku Atua, o le Selusalemi foou leia e ifo mei le lagi mei tafa o loku Atua, ti mo loku igoa foou.

¹³ Ko leia e maua ia ni taliga ke logo a ia ki le nea leia e fakasa e le Laumalie ki atu Ekelesia.

Tosi ki le Ekelesia o Laotise

¹⁴ Tosi ki le aselo o le Ekelesia o Laotise : Ko leinei le pati a le Amene, le tagata fakamaoki agatonu mo maoki, le tupuaga o nea ala na fakatupu e le Atua :

¹⁵ E kau iloa au gaoi. E kau iloa e leaise ke momoko pe ke vevela ! E kau amusia ake ke ke momoko pe ke ke vevela !

¹⁶ Koia talie e ke mamafana fai, o leaise ke momoko pe ke vevela, e kau luluai loa a koe mei loku gutu.

¹⁷ Talie e ke pati : E kau mou koloa, kua kau fakatupu o lasi oku koloa, ti e leaise aoga mai kiate au se nea, kae e leaise ke iloa e ke malaia, mo fakaaloalofa, mo mativa, mo kivi, ti mo telefua,

¹⁸ e kau kole kiate koe ke ke totogi atu iate au se aulo kua fakamea e le afi, o tupu ke ke liliu o mou koloa, ti mo ni kofu tetea, o tupu ke ke kofu ai, ti ke aua na sa le luma o lou telefua, ti mo se tului ke tului ai ou mata, o tupu ke ke tio malama.

¹⁹ Ko au, e kau valoki ti e kau tautea latou fuli ala e kau alofa ki ai. Koia ke ke loto oli mo ke fakasemala.

²⁰ Ko leinei, e kau tuu i le matapa, ti e kau fitifiti. Kapau e logo se tasi ki loku leo, mo fakamavaa le matapa, e kau ulu loa ki lona fale, e kau kai afiafi loa mo ia, ti ko ia mo au.

²¹ Ko leia e malo loa, e kau fakanofo loa a ia mo au i loku ekeekeaga fakasau, ofaipe au leia na malo ti kua ekeeke mo loku Tamana i lona ekeekeaga fakasau.

²² Ko leia e maua ia ni taliga ke logo a ia ki le nea leia e fakasa e le Laumalie ki Ekelesia.