Uluaki tosi ki le kau Kolinto 5 - Tosi Tapu

Maveuveu i le Ekelesia o Kolonitia

¹ Kua logo i ganea fuli e maua ia koutou se fai feauaki, ti ko se fai feauaki leia e leaise maua foki i le kau pagani ; talie kua kaku o nofo se tasi o koutou mo le avaga o lona tamana.

² Ti kua kotou makita i le fia nealasi ! kae na leaise kotou mamae mua, o tupu ke too meia koutou leia kua fai ia le nea lena !

³ Kiate au, e kau puli fakatino ia koutou kae e kau nofo mo koutou i le laumalie, ti kua kau fakamaaui leia na fai ia le nea a ia, o sakinake kua kau nofo tonu mo koutou.

⁴ I le suafa o le Aliki Sesu, ko koutou mo loku laumalie, ala kua fakatasi mo le mafimafi o lotatou Aliki ko Sesu,

⁵ ke tuku le tagata lena kia Satana ke maumaui le tino, kae ke fakamauli le laumalie i le aso o le Aliki ko Sesu.

⁶ E leaise malie lakotou fakakololia kia koutou ! Pe leaise kotou iloa ko se ga momoi fakatupu e fakatutupu ia le falina katoa ?

⁷ Kotou fakapuli le fakatupu matua, o tupu ke kotou liliu ko se falina foou, talie kua kotou sala fakatupu. Talie ko Kilisito, lotatou Pasikate, kua momoli ma tatou.

⁸ Koia ke tou fai le aso, kae leai ki se fakatupu matua, pe ki se fakatupu o le veli mo le agaveli, kae ki ni pane sala fakatupu o le agatonu mo le maoki.

E nofo le kilisiteano i le malama nei kae leaise kau i le malama nei

⁹ Kua kau tosi atu i laku tosi kia koutou, ke aua na kotou fakatasi mo le kau fai feauaki :

¹⁰ E leaise kau pati atu ki le kau fai feauaki katoa o le malama nei, pe ko le kau manumanu paaga, pe ko le kau kaia tagata, pe ko le kau tausi taulaatua ; talie kapau koia, e tonu loa ke kotou mavae i le malama nei.

¹¹ Ko leinei, ko le nea leia kua kau tosi atu kia koutou, ke aua na kotou fakatasi mo se tasi leia e igoa ko se taina kae fai feauaki a ia, pe manumanu paaga, pe tausi taulaatua, pe nukinuki, pe inu kava, pe kaia tagata, ti ke aua foki na kotou kai mo se tagata fenaaki.

¹² Talie kolea e kau fakamaaui ai loa latou mei tafa ? Pe leaise ko latou ala i loto e tonu ke kotou fakamaaui ?

¹³ Kia latou ala i tafa, e fakamaaui latou e le Atua. Kotou too meia koutou le tagata agasala lena.