Uluaki tosi ki le kau Kolinto 14 - Tosi Tapu

Fakaaoga o nea alofa i le Ekelesia

¹ Kotou afa le alofa. Kotou oli ki nea alofa fakalaumalie, kae tafito ki leia o le kikite.

² Talie, ko leia e masau i masau kesekese e leaise masau a ia ki tagata, kae ki le Atua, talie e leaise matala se tasi kiate ia, ti e masau a ia i le Laumalie ki ni misitelio.

³ Kae ko leia e kikite e masau a ia ki tagata, ke faufau latou, mo fakalotomakeke latou, mo fakafimalie latou.

⁴ Ko leia e masau i masau kesekese e fakamakeke fua e ia a ia totonu ; kae ko leia e kikite e fakamakeke e ia le Ekelesia.

⁵ E kau fakaamu ke kotou masau fuli i masau kesekese, kae e toe malie ake ke kotou kikite. E lasi ake leia e kikite i leia e masau i masau kesekese, mo kapau e fakamatala e ia lana masau ke faufau ai le Ekelesia.

⁶ Ti ko leinei, fetaina, kolea loa loku aoga kia koutou mo kapau e kau natu kia koutou o masau atu i ni masau kesekese, kae e leaise kau masau atu kia koutou i se levelasio, pe i se iloa, pe i se kikite, pe i se akonaki ?

⁷ Kapau ko nea lee mauli ofaipe le fakatagi pupusi mo le ukalele, ala e tasi tuku ia lona musika totonu, e leaise la tuku ia se fa nota leia e matala malie, pe feaki loa ke iloa kesekese laua ?

⁸ Ti kapau e leaise matala le tagi o le fakatagi pupusi, ko ai e teuteu loa ki le tau ?

⁹ E tatau foki mo koutou, kapau e leaise kotou tuku ia ki lokoutou alelo se folafola leia e matala, pe feaki loa ke iloa le nea leia e kotou fakasa ia ? Talie e kotou masau loa i le aele.

¹⁰ Ti e logo ai e maua ni masau kesekese i le malama nei, e leaise masau fua e tasi e leai sona uiga ;

¹¹ Ti kapau loa e leaise kau iloa le uiga o se masau, e kau fai loa pe se matapule ki leia e masau, ti ko leia e masau i le masau lena e fai loa a ia pe se matapule kiate au.

¹² Ti ke tatau foki mo koutou. Kapau e kotou oli ki nea alofa fakalaumalie, kotou afa ke kotou mou koloa i nea ala e faufau ia le Ekelesia.

¹³ Koia ko leia e masau i se masau kese, ke kole e ia le nea alofa o le fakamatala.

¹⁴ Talie kapau e kau faikole i se masau kese, e faikole loku laumalie, kae e nofo paa loku atamai.

¹⁵ Kolea loa ke fai ? E kau faikole loa i le laumalie, kae e kau toe faikole foki i loku atamai ; e kau sua loa i le laumalie, kae e kau toe sua foki i loku atamai.

¹⁶ Talie kapau e ke fakafetai fai i le laumalie, pe feaki loa ke tali mai leia e fakalogo : Amene ! mo kapau e leaise iloa e ia le nea leia e ke fakasa ia ?

¹⁷ E maoki e ke fai ia ni fakafetai malilie ai, kae e leaise faufau leia ake.

¹⁸ E kau fakafetai ki le Atua i laku masau i masau kesekese o lasi ake ia koutou fuli,

¹⁹ kae, i le Ekelesia, e malie ake kiate au ke kau puaki ni kupu e lima i loku atamai, o tupu ke akoi ai foki ala ake, i ni kupu e kau agafulu afe i se masau kese.

²⁰ Fetaina, aua na kotou fakatoe i le potu o le fakamaau ; kae kotou faipe ni toe liliki i le potu o le agaveli, ti kotou faipe ni tagata kua katoa i potu o le fakakaukau.

²¹ Kua tosi i le lao : Ko ni tagata o se masau kese, Ti mo ni laugutu o ni matapule, Ala e kau masau ai loa ki le kakai lena, Ti e leaise lotou fakalogo mai loa kiate au i ai foki, e pati le Aliki.

²² Koia, ko masau kesekese ko se fakamailoga, o leai ki le kau tui, kae ki le kau lee tui ; kae ko le kikite, ko se fakamailoga a ia ki le kau tui, kae leai ki le kau lee tui.

²³ Kapau loa, i se fakatasi a le Ekelesia katoa, e masau fuli i masau kesekese, kae ulu mai ni iki ala e leaise matala pe ko ni iki ala e lee tui, pe leaise lotou pati loa kua kotou valelea ?

²⁴ Kae kapau e kotou kikite fuli, kae e ulu mai loa se tasi leia e lee tui, pe ko se tagata leia e fia logo, e lave loa akoutou masau i lona loto, ti e fakamaaui loa a ia e koutou fuli,

²⁵ ti e fakasa loa a manatu fakapulipuli o lona loto ; ti e fakamapee loa a ia ki le kele, o atolasio ki le Atua, mo fakasa e nofo maoki ai le Atua ia koutou.

Ko le fai o nea alofa i le Ekelesia

²⁶ Kolea loa ke fai, ei fetaina ? I akoutou fakatasi, ka maua loa e ni iki se katiko, se akonaki, se levelasio, se masau kese ti mo lona fakamatala ; ke fai nea fuli ke faufau ai le Ekelesia.

²⁷ Kae kapau e masau ni iki i masau kesekese, ke masau fai se toka lua pe ko se toka tolu, o tasi mo ia lona lakaga, kae ke fakamatala e se tasi ;

²⁸ Kae kapau e leaise maua se tasi ke fakamatala ia, ke fakalologo i le Ekelesia, ti ke masau kiate kita totonu mo le Atua.

²⁹ O uiga mo le kau polofeta, ke masau se toka lua pe ko se toka tolu, kae ke fakamaau e la ake ;

³⁰ kapau e maua e se tasi leia e tonatona i lalo se levelasio, ke fakalologo le uluaki.

³¹ Talie e mafai ke kotou kikite fuli o fakaoloolo, o tupu ke akoi mo fakalotomakeke ai a tagata fuli.

³² E fakalogo a laumalie o le kau polofeta ki le kau polofeta ;

³³ talie ko le Atua e leaise ko se Atua o le maveuveu, kae ko le Atua o le tokamalie. Ofaipe i Ekelesia fuli o le kau sagato,

³⁴ ke fakalologo fafine i fakatasi, talie e leaise taga ke lotou masau i ai ; kae ke lotou fakataulalo, ofaipe lona fakasa foki e le lao.

³⁵ Kapau e lotou fia iloa se nea, ke lotou vesili ki olatou avaga i olatou kaiga ; talie e fakalumaluma ke masau le fafine i le Ekelesia.

³⁶ Pe na au le folafola a le Atua meia koutou ? Pe ko koutou fai ala kua kaku atu ki ai le folafola ?

³⁷ Kapau e pati se tasi ko se polofeta a ia, pe maua e ia se nea alofa fakalaumalie, ke iloa e ia ko le nea leinei e kau tosi atu kia koutou ko se fakatotonu a ia mei le Aliki.

³⁸ Kapau e fakapouli se tasi ki le nea lena, ke aua na tokaga kiate ia.

³⁹ Koia loa, fetaina, kotou oli ki le kikite, ti aua na kotou taofi ke masau i masau kesekese.

⁴⁰ Kae ke fai nea fuli i le fakaapaapa mo le fakatokatoka.