Nikɔn ne kɛ Phaal 8 - ɛWee ne ìTsɛm iHywas

ɛKɔn ɛNiitaa yɛ ne kɛ Baa ne iCwɛɛm Ba

¹ Ne sɛ ɛNgɔn ne Pharak ka kɛ bala icwɛɛm ɛniitaa yɛ, ɛlɔ gha ne te nggbyak daa ne irywa wo iphɛ phɛɛs ne hɔn iminti nzuwubɔ icwat.

² Ne n yaang kɛ nang nimalɛka ɛniitaa na nɛ nibhɛ kɛ kyinasek ɛnu ɛyisɛ ɛTaanggbey ya ntsuntsuung ɛniitaa.

³ ɛDɛ ɛmalɛka gha ne ɛ bok ɛkpɛɛt ne izinariya ne i wɔɔ ne ɛturarɛ, ne yɛɛs ɛ kyinak ɛlɔ ɛraa ne hap itsanga gha. Ne nang ɛbhɛ ɛturarɛ gbom te ɛ byinki ne ɛroo ninyi ɛTaanggbey ya ne kɛ tul kang ngo, te ɛ wɔɔ nibhɛ ɛraa ne izinariya ne hap itsanga gha ne ɛ so ɛnu ɛyisɛ ɛcuruu ne igbɔm ma.

⁴ Ngkoy ne ɛturarɛ da ne byinket ne ɛroo ninyi ɛTaanggbey ya mpɛ yilitsik ndɔ ne iwɔ ɛmalɛka wo, mpɛ wara daa ɛnu ɛyisɛ ɛTaanggbey ya.

⁵ ɛMalɛka ɛTaanggbey ya ne bo ɛkpɛɛt ne izinariya wo, ɛ bone igboo ndɔ ɛraa ne hap itsanga gha hyɔrɔ. Ɛ ji sangare ifɛ ndɔ ɛzay ya. ɛLɔ yɛ ne yaa wunga, ɛɛ tɛɛ, gburung! Gburung! Ɛɛ tes derep, ivel runket.

Ntsuntsuung Nwaas ɛYisɛ Yɛ

⁶ niMalɛka ɛniitaa na nɛ nibhɛ bok ntsuntsuung ɛniitaa da ne ryɔng en ɛli ne ɛrɔngɔ yaa wuuti ɛwoo ɛbhɛ.

⁷ ɛMalɛka ɛyisɛ yɛ ne wuuti ɛntuntuung ɛbhɛ, nkpaaling ne igboo ne ifɛ kɛ byinket nɛ neyi ne wuru, ifɛ sirit te ndɔ ɛzay ya. iGboo yɛ ne re ihop idaan ndɔ iphɛ itwat ɛzay de, ne ihop idaan ndɔ ne iphɛ itwat nihon, ne idik gbik.

⁸ ɛMalɛka ne ifaa yɛ ne wuuti ɛntuntuung ɛbhɛ wo, ne cwaak ɛdɛ ɛkɔn na ne ɛ so te ɛgbaang ne ɛwarang ne ɛbhɛ re igboo ndɔ ɛling. iHop idaan ndɔ ne iphɛ itwat ɛling nga ne hyereey iphɛ teye neyi.

⁹ iHop idaan ndɔ ne iphɛ itat ndɔ nikɔn niken ɛling nga ne kus, ihop idaan ndɔ ne iphɛ itwat nigyirigyi inɛn na ne bees se.

¹⁰ ɛMalɛka ne itwat tɛ ne wuuti ɛntuntuung ɛbhɛ wo, ɛgbaang ɛyuyɔrɔ ne ɛ re igboo te igboo ne ikingit ne le daa ne irywa ɛ ho ne ihop idaan ndɔ ne iphɛ itwat ne ihel gbik ne irong inɛn.

¹¹ I bok ɛyuyɔrɔ yɛ “ɛRaghatak.” iHop idaan ndɔ ne iphɛ itwat inɛn da ne te raghatak. Ninyi na gbom ne kus daa ɛli nɛ nibhɛ kɛ sɔ inɛn da ne mpɛ kɛ te raghatak ko.

¹² ɛMalɛka ne nwaas sɛ ne wuuti ɛntuntuung ɛbhɛ wo, ne hale ihop idaan ndɔ ne ihop itwat ne iroy de. Ne ihop idaan ndɔ ne iphɛ itwat ne ifɛl lo. Ne ihop idaan ndɔ ne iphɛ itwat niyuyɔrɔ na, te ihop idaan ndɔ ne iphɛ itwat nikɔn nɛnaa wo te gbyik. ɛLɛy te ihop idaan ndɔ ne iphɛ itwat ne igbey kɔɔng nge tang tol, ihop idaan ndɔ ne ihop itwat ɛtuk ge ne ma kɔɔng nge tang tɔɔ tol.

¹³ Ne sɛ nggɛ yɛɛn, ne n bok ika ne ɛ so ɛceree ne irywa ne ivel i bol ne ɛgbaang ne izɔlɔs, ɛ bo, “ɛKɔn ne ɛnik! ɛKɔn ne ɛnik! ɛKɔn ne ɛnik yaa sɛ nyini ndɔ ɛzay ya ɛtsim mɛ ne kɛ wuute ntsuntsuung itwat da nɛ nimalɛka itwat da kɛ ryɔng en nibhɛ yaa wuute wo!”