Nikɔn ne kɛ Phaal 10 - ɛWee ne ìTsɛm iHywas

ɛMalɛka gbik ne ɛWee ne iHuhu ɛShɛɛrɛng Ngɛ

¹ Ne n da yaang ɛdɛ ɛgbaang ne ɛmalɛka gha ɛ le daa ne irywa ɛ tɔmɔs. Kɛ cwaal ɛbhɛ ndɔ ne inɔp, isheng-iroy so daa ne ito ɛbhɛ. ɛYisɛ ɛbhɛ gha ne so te iroy, ita ɛbhɛ de ne so te ngguk ɛhon ne igboo i re.

² Ɛ kaa bok ɛdɛ ɛwee ɛshɛɛrɛng ne ihuhu ɛbhɛ so phere ne ibɔ ɛbhɛ. Ne ɛ tek icwa ne irwye ɛbhɛ ɛling, ne ɛ tek icwa ne itsan ɛbhɛ ne ivel.

³ Ne ɛ yel-le ne ɛgbaang ne izɔlɔs te ɛkuramanza, ne sɛ ɛ kɛ yel-le wo, irywa ne tɛrɛ ne boote ɛniitaa ifɛ kyii nɛ.

⁴ Ne sɛ irywa wo kɛ tɛrɛ ɛniitaa gha ne n yɔng wu naa haal ibol lɛ, ne n bok idɛ izɔlɔs de ihywɛ le daa ne irywa wo ihywɛ bok me, “Rɛɛ ɛkɔn na ne irywa ne tɛrɛ ɛniitaa gha kɛ boote wo, sɔng ɛ haal nang.”

⁵ ɛLɛy ɛMalɛka gha ne nggɛ yaang ɛbhɛ ɛ kɛ kyinak ɛling nga gbik ne ivel da kɛ tɔɔrek iwɔ ne irwye ɛbhɛ daa ne irywa.

⁶ Ne ɛ lɛlɛm ihywa ne irywɛɛk ɛTaanggbey ne ɛ so ɛken ne ishay-ishay, ne ɛbhɛ kɛ ryɔng irywa wo nɛ nikɔn na nɛ nibhɛ sonɛ ɛdak kɛ gbik, ne ɛzay nɛ nikɔn na nɛ nibhɛ sonɛ ne ndɔ yɛ gbik. ɛMalɛka gha ne yɔngɔ: “Sɔng ya ta bese nten dɔng nang!

⁷ Ya sɛ nten de ne ɛmalɛka ne ɛniitaa yɛ kɛ wuuti ɛntuntuung ɛbhɛ wo, ɛTaanggbey ya ne ji shwaak nikɔn ne gying ɛbhɛ na ɛli ne ɛ kaa tɔng nikpuru ɛbhɛ ninabawa na.”

⁸ Ne n da phok izɔlɔs de ne nggɛ i phok ihywɛ le daa ne irywa wo, ihywɛ bol ne mee dɔng ihywɛ bok me, “Cwi te ɛbhɛ say ɛwee ne ihuhu ɛshɛɛrɛng ngo ne ɛbhɛ so phere ne iwɔ ɛmalɛka gha ne ɛ kɛ kyinak ɛling nga gbik ne ivel da.”

⁹ Ne n phɛ ɛlɔ ɛmalɛka gha n yaak ɛbhɛ te ɛ nang me ɛwee ne ihuhu ɛshɛɛrɛng ngo. Ne ɛ yaak me, “Ngga, te ɛ re ɛbhɛ, ɛbhɛ yaa te raghatak ndɔ ne ibuu mo de, ɛbhɛ yaa ne kyii so nggɔnggɔɔt te itsong ɛnu mo gha.”

¹⁰ Ne n say ɛwee ne ihuhu ɛshɛɛrɛng ngo ne iwɔ ɛmalɛka gha n re, ne n phok ɛbhɛ nggɔnggɔɔt te itsong ɛnu nge gha. Ne sɛ nggɛ wɔl, ɛbhɛ ne te raghatak ndɔ ne ibuu nge de.

¹¹ Ne i ji yaak me, “iPhɛ so ngbingbing ɛ tɔng ibol ɛTaanggbey de daa ɛkɔn na ne ɛ sɛ sɛ̀ ihywee ɛzay de, igbagha wo, ne ilwem ba, nɛ nigɔm ma.”