iBirani 4 - ɛWee ne ìTsɛm iHywas

ìFɔng ne ɛTaanggbey kɛ ku Sim-mɛ

¹ ɛTaanggbey ya kɛ nang njwɛɛn ibol ne iphɔrɔt de ne ɛ kɛ ku sim-mɛ wo, iphɛ ɛlɛy nɛ njwɛɛn ne wɛɛ ɛn hywɛɛ ɛlɔ ne ɛdɛ mon sɛ yung bhɛ wɔs.

² Daa ɛli ne njwɛɛn kɛ phok iBol iYɛnɛng ngge ɛli nɛ ninyi ɛTaanggbey ya nɛ nibhɛ kaa so ndɔ ɛhay ya kaa ma phok ko. Gbik ne iphɛ ɛlɛy, sɔng ibol de nɛ nibhɛ kɛ ne phok ko kɛ ne phyik nibhɛ nang, daa ɛli ne sɔng nibhɛ kaa say iphɛ lenɛ ne ìnang ne itin de nang.

³ Njwɛɛn no ne kɛ ne nang ne itin nɛ wo i ne leesel ɛlɔ ne phɔng nga ne ɛTaanggbey ya kɛ ku sim-mɛ wo. iPhɛ so ɛli ne kɛ ku haa i bo, “Nggaa te njenjek ne n lɛlɛm ihywa n yɔngɔ, ‘Sɔng nibhɛ sɛ bhɛ lel ne ivel da nggɛ nang nibhɛ tɛ nibhɛ bhɛ phɔng ngɛ wo nang.’ ” Gbik ne iphɛ ɛlɛy, ɛTaanggbey ya kaa ne ku taal ɛtomɛ ɛbhɛ gha nten de ne ɛ kaa ryɔng ɛzay ya.

⁴ Daa ɛli ne kɛ boote daa ne ito ɛtuk ɛniitaa gha ɛdɛ ɛlɔ yɛ ndɔ ne ɛWee ne iBol ɛTaanggbey yo i bo, “ɛTaanggbey kaa phɔng ɛtuk ɛniitaa yɛ ɛtsim mɛ ne ɛ kɛ taal ɛtomɛ ɛbhɛ gha.”

⁵ Kɛ ne kyi ta boote ibol lɛ i bo, “Sɔng nibhɛ sɛ bhɛ lel ɛlɔ ne phɔng nge gha nang.”

⁶ Kaa tɔng iBol iYɛnɛng ngge daa ne ìfɔng ngɛdaa nggyɛ wo, sɔng ninyi na ne kaa ne tɔng nibhɛ wo kaa ne lel ɛlɔ ne phɔng nga nang daa ɛli nɛ nibhɛ kaa mbaray tang nang ne itin nɛ. iPhɛ ɛlɛy, ɛnkiinɛ sonɛ nɛ nihak ninyi sɛ bhɛ lel ne ìfɔng ngga.

⁷ iPhɛ dee, ɛTaanggbey ya kɛ ne kyii ta yɛk ne ɛdɛ ɛtuk ka ne ɛ bok ɛbhɛ “iZenge.” Ɛ kaa yɛk ngɛ, ɛtsim ne ishay maa, nten de ne ɛ kaa boote ɛnu ɛkpuru ɛbhɛ ɛDoda, te ɛli ne kɛ haa ndɔ ne ɛWee ne iBol ɛTaanggbey de i bo, “Yaa sɛ ɛ kɛ phok ɛn izɔlɔs ɛTaanggbey de iZenge, sɔng ne ɛ yɛk ɛn ito ihet de nang.”

⁸ Sɛ́ yɔngɔ ɛYɛsuwa gha kaa ne nang ninyi na ìfɔng ngga ne ɛTaanggbey ya kaa ku sim-mɛ wo, nten de nɛ nibhɛ kaa bhɛ lel ne ivel ne iKaana da, sɔng ɛTaanggbey ya sɛ ne kyi ta boote ibol ɛhak ɛtuk ne ìfɔng ngga kang ngo nang.

⁹ iPhɛ ɛlɛy, ɛtuk ne iwɛsɛ gha ne sonɛ nɛ ninyi ɛTaanggbey ya sɛ phɔng ngɛ.

¹⁰ Daa ɛli ne gbik ɛnyi gha ne ɛ kɛ lel ndɔ ne ìfɔng ɛTaanggbey da, aa ne ma phɔng daa ɛtomɛ ɛbhɛ ɛli ne ɛTaanggbey ya kaa ma phɔng da ɛtomɛ daa ɛbhɛ gha.

¹¹ iPhɛ ɛlɛy, te njwɛɛn kyangkey yɛ gbom te bhɛ lel ndɔ ne ìfɔng ngɛdaa nggyɛ wo. Sɔng ɛdɛ ɛnyi shɛɛ tang bhɛ lel daa ɛli ne ɛ kɛ roos ngkɔɔl ninaa ne mbaray ibol ɛTaanggbey de nang.

¹² Daa ɛli ne ibol ɛTaanggbey de so iken nɛ, iphɛ bok ihwet. iPhɛ re iphɛ phyin ˆɛwal ninu ifaa. iPhɛ lel ndɔ ɛnyi gha gbik iphɛ hyɛ iphɛ hobhose iken ne ikabyik, ne ikpup ne isɔrɔm, iphɛ tuul icwas ɛnyi da gbik.

¹³ Sɔng ɛkɔn sonɛ ndɔ nikɔn na ne kɛ ryɔng ngo ne ɛ so gying ɛnu ɛyisɛ ɛTaanggbey ya nang. Nikɔn na gbik so wɛsɛrɛk kpas ne irwisɛ ɛbhɛ da, ɛbhɛ wo ne njwɛɛn sɛ bhɛ tɔng ɛbhɛ ɛli ne njwɛɛn kɛ shɛɛ.

ɛYɛso gha Ɛbhɛ soye ɛGbaang ɛGɔm Nibo Njwɛɛn

¹⁴ iPhɛ ɛlɛy, nɛ njwɛɛn kyinak gɛgɛy daa ìnang ne itin ne njwɛɛn de ne njwɛɛn tɔng ngo. Te njwɛɛn mɔn ɛlɛ wo daa ɛli ne njwɛɛn bok ɛgbaang ɛgɔm nibo wo ne ɛ kɛ phɛ daa ne irywa wo, ɛnu ɛyisɛ ɛTaanggbey ya, ɛbhɛ so ɛYɛso ne ɛ so ɛNgɔn ɛTaanggbey.

¹⁵ Sɔng ɛGɔm Nibo njwɛɛn na ne so ɛnyi ne ɛ sang tas itaasek njwɛɛn da nang. Ɛ yang so ɛnyi ne kɛ ma ku tɛɛsek ɛbhɛ ndɔ nikɔn na gbik te njwɛɛn no, gbik ne iphɛ ɛlɛy sɔng ne ɛ mɔn ɛfɔt nang.

¹⁶ iPhɛ ɛlɛy, ne njwɛɛn shompeey cɛcɛk ne ɛcuruu ne igbɔm ɛTaanggbey ya ne irway nviit, te njwɛɛn sɛ isan iyɔm ɛTaanggbey, njwɛɛn ta sɛ izɛɛng ne ihywɛ yaa phyik njwɛɛn nten de ne njwɛɛn i tɔk iphyik ga.