ɛTomɛ 6 - ɛWee ne ìTsɛm iHywas

Ninyi ɛNiitaa Nɛ Nibhɛ Yaa Phyik Ninɔn ne Tom

¹ Ndɔ nituk kɛnaa nggyɛ wo nɛ ninaa ne roos sa kɛ hantey yɛ nibhɛ te gbom mo, niYahodawa na nɛ nibhɛ ibol ilem ne iGirik ge ne yaa bol daa ne ito niYahodawa de nɛ nibhɛ bol ilem ne iRamik ge, nibhɛ bo wu hang i wɛɛ nikusang nibhɛ daa nikɔn na ne i hosop izenge ne ihwɛlɛ wo.

² Ninɔn ne tom ɛnduwubɔ nɛ nibhɛ ifaa na ne tuma idira ninaa ne roos de gbik ɛlɔ ɛdaan, nibhɛ ne yaak nibhɛ, “Sɔng iphɛ kɛ jam mɛ njwi tek ɛtomɛ ne mɛmɛ ninyi na ne ibol ɛTaanggbey de njwi mak ghe ne ibol ne ire de nang.

³ iPhɛ ɛlɛy nigwaa en, ne ɛ kasa ɛn ninyi ɛniitaa ndɔ mon no nɛ nibhɛ so hyɔrɔ ne ikabyik ne ntsɛntsɛng. Nibhɛ ne njwi yaa ne yɛk nibhɛ ne ɛtomɛ ne wɛɛ ire gha.

⁴ Te njwit to njwi ne ji re ɛnu ɛyisɛ ne bol ne ɛTaanggbey ya gbik ne mɛmɛ ninyi na ne ibol ɛTaanggbey de.”

⁵ iDira ninaa ne roos de gbik ne yaang ibol lɛ kɛ jam, nibhɛ ne sim iphɛ, nibhɛ ne ji kasa ninyi ɛniitaa na. Nibhɛ kaa ne kasa ɛSitivin ne ne ɛ so hyɔrɔ ne itin ne ibol gbik ne iKabyik ɛTaanggbey, ne ɛFilibus, ne ɛPorokos, ne ɛNikanos, ne ɛTimɔn, ne ɛParamɛnas, ne ɛNikɔlas ne ɛ kaa soye ɛnyi ne iNtakiya ne ɛ kɛ teye ɛhaa ne roos ikpii niYahodawa.

⁶ Ne ji bo ninyi yɛnaa wo i nang ninɔn ne tom ma. Ninɔn ne tom ma ne i tek ɛrɔngɔ ne iwɔ, nibhɛ boote ne ɛTaanggbey.

⁷ iBol ɛTaanggbey de ne shwalat. Ninaa ne roos sa ne hantey yɛ gbom ndɔ ne iYɛrushɛlɛm be. Nibo ɛTaanggbey ya gbom ne ma say ibol ne ìnang ne itin de.

Kɛ Wum ɛSitivin Ne

⁸ Kɛ ne so ɛnggyɛ wo, ɛTaanggbey ya ne sit ɛSitivin ne gha ne ɛwɛng, ne ɛ yaa mɔn igbaang nikɔn ne kparat, nɛ nikɔn ne ɛnik ndɔ ninyi na.

⁹ Nidɛng niYahodawa nɛ nibhɛ kaa ne les nigarang ne iSɛrene, ne ɛLɛzɛndariya, ne iSilisiya nɛ nibhɛ so ne ivel ne iSiya kaa ne so ɛnggyɛ wo. Nibhɛ kaa ne re ntsong ɛlɔ gha ne i bok ɛbhɛ iJwee ne itɔɔy ne ninyi nɛ nibhɛ kaa so nikpuru. Ninyi yɛnaa nggyɛ wo kaa ne tum ishamas ne ɛSitivin na.

¹⁰ Sɔng nibhɛ ne yɛɛ nɛ ne ɛSitivin na nang, daa ɛli ne iKabyik ge kaa so ndɔ ɛbhɛ ne ɛ bol ne ntsɛntsɛng.

¹¹ Nibhɛ ne bhɛ nang nidɛng ninyi na ijam gying wu tɛ nibhɛ rop ne ihyoo, nibhɛ yɔngɔ, “Njwi kɛ phok ɛSitivin negha ɛ bol ivol ne bɛɛs ɛMuusaa ye ne ɛTaanggbey.”

¹² iBol lɛ iphɛ ne ji te ninyi na, nɛ ninu ne ikɔɔn na gbik nɛ ninaa ne kpɛl ɛshara gha ne te njenjek, nibhɛ wum ɛSitivin ne gha nibhɛ phɛ ne ɛbhɛ ɛnu ɛyisɛ ne itɔrɔng ngge.

¹³ Nibhɛ ne bhɛ bo nidɛng ninaa ne iwul irywɛɛk ga nɛ nibhɛ kɛ yɔngɔ, “Ɛnyi yɛghaa wo ku bol ivol ikpɛɛ daa ne iDeng ɛTaanggbey gbik ne iMɛmɛ ɛMuusaa da.

¹⁴ Njwi kɛ phok ɛli ne ɛ bo wu ɛYɛso ne iNazarat tɛghaa wo yaa phɔsɔm iDeng ngge ne ɛ ta sunu ihywee ne ihywel da ne ɛMuusaa gha kɛ yɔng te njwɛɛn hyel lo.”

¹⁵ Gbik ninaa ne itɔrɔng nga ne see ɛSitivin ne gha ne irwisɛ, nibhɛ ne yaang ɛyisɛ ɛbhɛ gha so te ɛhaa ɛmalɛka.