ɛTomɛ 4 - ɛWee ne ìTsɛm iHywas

Kɛ Phɛ ne ɛBiturus sa ne ɛYohana gha ɛNu ɛYisɛ ne iTɔrɔng

¹ Kɛ ne sɛ ɛBiturus sa ne ɛYohana gha tɔ bol nɛ ninyi na, nibo ɛTaanggbey ya gbik nɛ ɛndiinday ninaa ne hyep iDeng nga, nɛ niSadukyawa na ne yɛɛs ɛlɔ nibhɛ.

² Nibhɛ kaa te njenjek daa ɛli nɛ Ninɔn ne Tom ma kaa mɛmɛ ninyi na nɛ nibhɛ bo wu sɛ yiisitsik ne ikpuu da ɛli ne ɛYɛso kɛ ma yilitsik.

³ Nibhɛ ne wum ɛBiturus segha ne ɛYohana gha nibhɛ gangke, nibhɛ hyep ihwɛlɛ daa ɛli ne ɛlɔ yɛ ka ku teye irwirywɛ.

⁴ Gbik ne iphɛ ɛlɛy ninyi na gbom nɛ nibhɛ kaa ne phok ibol ɛBiturus de ne nang ne itin nɛ, ninaa ne roos sa ne hantey nɛ nibhɛ hɔn ninyi na ninom iwii.

⁵ Ne cwiil ihwɛlɛ yɛ, nindiinday niYahodawa na, nɛ ninu ne ikɔɔn na gbik nɛ ninaa ne kpɛl ɛShara gha ne bhɛ sɛm en ne iYɛrushɛlɛm be.

⁶ ɛNas ne ɛ kaa so ɛgɔm nibo ɛTaanggbey, kaa ne ma sonɛ, ne ɛKayafa, ne ɛYohana, ne ɛLɛzɛnda, gbik nɛ ɛbyin ninaa nɛ nibhɛ kaa so ne ijwee ɛgɔm nibo ɛTaanggbey yo.

⁷ Nibhɛ ne yɛk ngɛ i yɛɛs ne ɛBiturus sa ne ɛYohana gha ɛnu ɛyisɛ, nibhɛ ne ji phom nibhɛ, nibhɛ yɔngɔ, “Ne igbɔm ɛhay ne ɛ mɔn ɛn nikɔn nɛnaa woo? Ɛ mɔn ɛn ndɔ ne irywɛɛk ɛhay?”

⁸ iKabyik ɛTaanggbey de ne yɛɛs ndɔ ɛBiturus sa hyɔrɔ, ne ɛ kyii nibhɛ nɛ ɛ yaak nibhɛ, “Nindiinday nɛ ninu ne ikɔɔn ne igbagha,

⁹ Kɛ yel-le njwii izenge wo te phom njwii daa ɛkɔn ɛyɛnɛng nga ne kɛ mɔn ɛnyi ɛlɔɔm mɛghaa wo nɛɛ? I ta sim te sɛɛ seng ɛli ne kɛ mɔn i te ɛbhɛ ɛken naa?

¹⁰ Ne ɛ seng ɛn iphɛ ɛlɛ nyinɛn no gbik nɛ ninyi niSɛrɛla na: ɛnyi yɛghaa wo ne ɛ kɛ kyinak ɛbɛ wo, kɛ te ɛken na lenɛ ne irywɛɛk ɛYɛso ɛKiriti ne iNazarat, ɛhaa ne ɛ kaa gangat ɛn ɛbhɛ wo, ɛhaa ne ɛTaanggbey ya ne kyii yiisik ɛbhɛ tsik ndɔ ne ikpuu da.”

¹¹ “ɛYɛso yɛghaa wo ɛbhɛ soye, ‘iKɛɛ de ne nyinɛn ninaa ne lɔl ijwee na kaa mbaray nyini wo, ɛlyilyɛghaa wo, ɛbhɛ kɛ ne kyi teye ɛkangashi yɛ.’ ”

¹² “ɛYɛso gha zɔng ɛbhɛ so ɛhaa ne phɔt ninyi na, daa ɛli ne irywɛɛk ɛbhɛ wo zɔng ndɔ ɛzay ya nɛ ninyi sɛ ne iphɔrɔt da.”

¹³ iTɔrɔng ngge ne yaang irway nviit ɛBiturus da ne ɛYohana gha, nibhɛ ne ta yɛɛ ɛli nɛ nibhɛ so ninyi nihala, sɔng nibhɛ kɛ bol icwam, nibhɛ ne wum en zii, nibhɛ ne ji seng wu ninyi yɛnaa kaa so en nitaay ɛYɛso.

¹⁴ Sɔng nindiinday ya ne tang yɛɛ ne yɔng ɛkɔn nang, daa ɛli nɛ nibhɛ kaa yaang ɛnyi ɛlɔɔm ma ne kɛ te ɛbhɛ ɛken na kɛ kyinak ɛlɔ ɛBiturus sa ne ɛYohana gha.

¹⁵ Nibhɛ ne yɛk ɛBiturus segha nɛ ne ɛYohana gha nibhɛ wuru ndɔ ne ijwee ne itɔrɔng ngo, iTɔrɔng ngge ne ji boote ndɔ nibhɛ.

¹⁶ Nibhɛ yɔngɔ, “Njwɛɛn yaa mɔn ninyi yɛnaa wo ɛlii? Gbik ninyi ne iYɛrushɛlɛm na i yɛɛ ɛli nɛ nibhɛ kɛ mɔn gbaang ɛkɔn ne kparat. Sɔng njwɛɛn yaa ne yɛɛ ne re ne ishamas sang.

¹⁷ ɛKɔn na ne njwɛɛn yaa mɔn te kɔɔng tang tɔɔ sanga ibol lɛdee wo ndɔ ninyi na, te njwɛɛn sinɛ nibhɛ itsoro wu hang nibhɛ tang bol nɛ ninyi na ndɔ ne irywɛɛk ɛYɛso wo.”

¹⁸ iPhɛ ɛlɛy, nibhɛ ne yel-le ɛBiturus segha ne ɛYohana gha ndɔ ne ijwee wo nibhɛ yaak nibhɛ wu hang nibhɛ tang bol nɛ ninyi na, nibhɛ mɛmɛ nɛ ndɔ ne irywɛɛk ɛYɛso wo dɔng.

¹⁹ ɛBiturus sa ne ɛYohana gha ne kyii nibhɛ nɛ, nibhɛ yɔngɔ, “Yung wɛɛ ɛn ibol lɛdee wo ɛli lɛɛ, ‘Ɛ wɛɛ ɛn te ɛTaanggbey ya sim te njwi sɛɛ roos ibol mon de, hang njwi roos idee ɛbhɛ dee?’

²⁰ Sɔng njwi yaa yɛɛ ne shɛɛ nggbyak daa ɛkɔn na ne njwi kɛ phok ko, njwi ta yaang ngo nang.”

²¹ Ne sɛ nindiinday ya kɛ hante ne sinɛ nibhɛ itsoro wo nibhɛ ne tek nibhɛ. Nibhɛ kaa yaa tɔk ɛli nɛ nibhɛ yaa mɔn nibhɛ bak nibhɛ nggbang nzeet, daa ɛli ne igbagha wo gbik kaa yaa dɛp ɛTaanggbey ye daa ɛkɔn na ne ɛ kɛ te wo.

²² Ɛnyi gha ne kaa mɔn ɛkɔn ne kparat ta, i te ɛbhɛ ɛken na kaa phyin ishay nzuwubɔ nwaas.

Ninaa ne Roos sa Kɛ Boote ne ɛTaanggbey ne iRway Nviit

²³ Ne sɛ kɛ tek ɛBiturus segha ne ɛYohana gha, nibhɛ ne kyii nibhɛ bhɛ sɛ ninyi nibhɛ na, nibhɛ ne tɔng nibhɛ ɛkɔn na nɛ nindiinday nibo na, nɛ ninu ne ikɔɔn ne igbagha na kɛ tɔng nibhɛ wo.

²⁴ Ne sɛ ninaa ne roos sa kɛ phok ɛlɛ wo, nibhɛ ne byinki izɔlɔs nibhɛ gbik, nibhɛ roo ɛTaanggbey nibhɛ yɔngɔ, “ɛDaray ne ito gbik, igyɛ kɛ ryɔng irywa, ne ɛzay nɛ niling gbik nɛ nikɔn na nɛ nibhɛ sonɛ ndɔ yɛ.

²⁵ Kaa lenɛ ne iKabyik ɛTaanggbey de ne ˆɛ yɛk ɛkyɛɛ mos ɛkpuru mo ɛDoda yegha nɛ ɛ boote ɛ yɔngɔ, ‘iKyee phɛ kɛ te ninaa nɛ nibhɛ sang so niYahodawa na kɛ te njenjek koo? iKyee iphɛ kɛ te ilwem ba bok icwas ne mbaray igbɔm daa?

²⁶ Nigɔm ɛzay ya kɛ ku ryɔng en ɛli nɛ nibhɛ aa ta itsom. Nindiinday nibhɛ na kɛ ne byinki ito nibhɛ bok iphup ne ɛDaray ya gbik ne ɛKiriti gha.’ ”

²⁷ Ɛtsak, ɛHyiridus sa ne ɛBuntus ɛBilatus sa kaa byinkit nɛ ninyi na ne hame nibhɛ so niYahodawa na, nɛ niSɛrɛla na ndɔ ɛgarang ngɛghaa wo. Nibhɛ yɛk iphup ne ɛKpuru mo ɛYɛso gha ne ɛ so kang ngo, ɛhaa ne ɛ kɛ sit ɛbhɛ ne nɔɔy da.

²⁸ Nibhɛ kaa byinkit gbik tɛ nibhɛ mɔn ɛkɔn na ne ɛ kɛ ku lɔl lɛ lenɛ ne ihwet mo ne ishwim mo.

²⁹ “ɛDaray, yaang ɛli nɛ nibhɛ ta sim nibhɛ yaa ring njwii ne ɛtomɛ gha. Nang nikpuru mo na irway nviit ne tɔng ibol mo de tang ɛnik.

³⁰ Tɔɔrek igbom mo tes nisha na niken, te tɔɔrek nyu nikɔn ne kparat nɛ nikɔn ne ɛnik lenɛ ne irywɛɛk ɛkpuru mo ɛYɛso ɛKiriti ne ɛ so kang.”

³¹ Kɛ ne sɛ nibhɛ kɛ roo wo, ɛlɔ gha nɛ nibhɛ sonɛ wo ne sunkit. Ne ji yɛk nibhɛ ne iKabyik ɛTaanggbey de hyɔrɔ nibhɛ ne ji yaa tɔng ibol ɛTaanggbey de tang ɛnik.

Nikɔn Ninaa ne Roos sa Kaa ku Soye Nidaan Nɛ

³² Gbik ninaa ne roos sa kaa ne ku bok irway ijwaan ne icwas ijwaan, sɔng ɛdɛng kaa bok ɛkɔn kang nang. Gbik ɛkɔn na ne ɛrɔngɔ bok ɛ kaa ne so ɛhaa nibhɛ ɛte.

³³ Ne ihwet gbom, ninɔn ne Tom ne re ɛnu ɛyisɛ ne tɔng ibol ne yilitsik ɛDaray ɛYɛso de ndɔ ne ikpuu da ɛli nɛ nibhɛ kɛ yaang. ɛTaanggbey ya ne i sirit nibhɛ ne ɛwɛng.

³⁴ Sɔng ɛdɛng ndɔ nibhɛ wo kaa ne tɔk ɛkɔn nzeet tang. Daa ɛli nɛ ninaa ne ihap ne idee kaa lɛbhɛl nibhɛ yɛɛset ne ijam mɛ,

³⁵ nibhɛ ne nang ninɔn ne tom ma. Ne ji hosop ijam be, i nang ɛrɔngɔ ɛli ne ihywɛ yaa hɔn ɛbhɛ.

³⁶ Ɛdɛ ɛnyi ne iKuburus sa kaa ne sonɛ ne kaa bok ɛbhɛ ɛYisifu, ɛ kaa so ɛhaa ne icwaang ɛLawi. Ninɔn ne tom ma kaa ne yeres ɛbhɛ ɛBanabas, Kaabi i bo, ɛHaa ne te itsɔngɔl gɛgɛy.

³⁷ ɛBarabas sa kaa ne rɛp ihwap ɛbhɛ ɛ bo ijam mɛ ɛ yɛɛs ɛ nang ninɔn ne tom ma.