ɛTomɛ 23 - ɛWee ne ìTsɛm iHywas

¹ ɛBulus sa ne sit itɔrɔng ngge ne irwisɛ, ne ɛ yɔngɔ, “Nigwaa nge niSɛrɛla, izɔlɔs ne irway nge so byirik daa ɛTaanggbey ya ne nggɛ mɔn no, sɔng nzi to irway izenge wo ɛlɛ daa ɛtomɛ gha ne nggɛ mɔn no nang.”

² Ne sɛ nibhɛ kɛ phok ɛlɛ wo, ɛHananiya gha ne ɛ kaa soye ɛgɔm nibo gha nɛ nten nɛ wo ne ɛ yaak ninyi na nɛ nibhɛ so cɛcɛk ne ɛBulus sa wu tɛ nibhɛ baal ɛbhɛ ɛnu.

³ ɛBulus sa ne yaak ɛHananiya yegha, “ɛTaanggbey ya ma baal lɛ ne mang. iGyɛ wo ne ɛ so ɛluk ka, ne ˆɛ so te iwabha wo ne kɛ ruu ifɛ ne ɛmbon ɛhala gha. ˆƐ kɛ soos ˆɛ bol me ɛshara daa ɛkɔn na ne ɛShara gha i bol, iphɛ dee ˆɛ ne kyi sim te aa ten ɛkɔn na ne ɛShara gha i bol lo daa ɛli ne ˆɛ kɛ yɛk ngɛ wu te baal me.”

⁴ Ninyi na nɛ nibhɛ ne kyinasek ɛnggyɛ wo ne yaak ɛBulus segha, “Ɛ sim aa toke ɛgɔm nibo ɛTaanggbey ya naa?”

⁵ ɛBulus sa ne kyii nɛ ɛ yaak nibhɛ, “Nigwaa nge, sɔng nzi yɛɛ te ɛbhɛ soye ɛgɔm nibo gha nang; kɛ ku haa i bo, sɔng ɛ bol ivol ikpɛɛ daa ɛndiinday ninyi mo na nang.”

⁶ Ne sɛ ɛBulus sa kɛ seng wu itɔrɔng ngge kɛ byingis se nɛ niSadukyawa gbik nɛ niFarisawa na ne ɛ yinɛ izɔlɔs ɛbhɛ ɛ yɔngɔ, “Nigwaa nge, nzo me ɛdaan ndɔ niFarisawa na, ɛkyɛɛ nge so ɛdaan ndɔ niFarisawa na; i ne bol me ɛshara daa ɛli ne nggɛ yɛk irway nge ne yilitsik ne ikpuu.”

⁷ Ne sɛ ɛBulus sa kɛ boote ɛlɛ wo, ishisim ne lel ndɔ niFarisawa na nɛ niSadukyawa na; itɔrɔng ngge ne hobhoset ɛphaa.

⁸ Daa ɛli nɛ niSadukyawa na kaa bo wu hang sɛ yiisik tsik ne ikpuu wu hang nimalɛka gbik nɛ niphoo ne sonɛ. niFarisawa na ne ji i bo wu nikɔn itwat tɛnaa wo gbik sonɛ.

⁹ iPhɛ ɛlɛy, ɛgbaang ne ishisim ne yilitsik ndɔ nibhɛ. Nidɛng ninaa ne kpɛl ɛshara gha nɛ nibhɛ kaa soye niFarisawa na ne yilitsik nibhɛ bol ivaa nibhɛ ivol nibhɛ yɔngɔ, “Sɔng njwii yaang ɛnyi yɛghaa wo kɛ ben nang. Yaa rɔk ɛdɛ ɛmalɛka ɛbhɛ kɛ boote ne ɛbhɛ, hang idɛ ikabyik ɛTaanggbey yɔɔ.”

¹⁰ Ne sɛ ishisim be kɛ hantey yɛ gbom, ɛgbaang ɛndiinday nisooja wo ne wum ɛnik wu yaa yung le ɛnggyɛ wo i kpɛɛ ɛBulus segha, ne ɛ yɛk ngɛ wu tɛ nisooja na phɔt ɛbhɛ ne ihwet nibhɛ phɛ ne ibarakyi nibhɛ.

¹¹ Ne sɛ ɛlɔ yɛ kɛ teye ɛtuk, ɛDaray ya ne yɛɛs ɛ kyinak cɛcɛk ne ɛBulus sa ɛ yaak ɛbhɛ, “Te irway nviit! ɛLi ne ɛ kɛ tɔng ninyi na ibol nge de ne iYɛrushɛlɛm be iphɛ ne so nggbinggbing ɛ ta bhɛ tɔng iphɛ ɛlɛy ne iRooma de dɔng.”

Kɛ Tɔk ɛLi ne Yaa Phoo ɛBulus Segha

¹² Ne cwiil ihwɛlɛ yɛ, nidɛng niYahodawa na ne rop ɛnu nibhɛ, nibhɛ lɛlɛm ihywa, nibhɛ bo wu hang nibhɛ yaa re ɛkɔn, wu hang nibhɛ yaa ne sɔ ɛkɔn wu sɛ kɛ kyi phoo ɛBulus se.

¹³ Ninyi na nibhɛ kaa mɔn ɛlɛ wo kaa phyin nzuwubɔ nwaas.

¹⁴ Nibhɛ ne phɛ ɛlɔ nindiinday nibo na gbik nɛ nindiinday ɛgarang nga nibhɛ yɔngɔ, “Njwi kɛ ku lɛlɛm ihywa njwi bo wu hang njwi yaa re ɛkɔn, wu hang njwi yaa ne ta sɔ ɛkɔn sɛ njwi kɛ phoo ɛBulus se.

¹⁵ iPhɛ ɛlɛy yang, nyinɛn no gbik ne itɔrɔng ngge yaak ɛn ɛgbaang ɛndiinday nisooja na te kyi yɛɛs ne ɛBulus sa te hante ne phɛl ɛbhɛ ririk. Njwi kɛ ku ryɔng ne njwi yaa phyii phoo ɛbhɛ gap ɛ tang tuu ɛbɛ wo.”

¹⁶ Kɛ ne sɛ ɛngɔn ɛras ɛgwaa ɛBulus sa ɛkuk kɛ, kɛ phok ibol lɛdee wo, ne ɛ phɛ ndɔ ne ibarakyi de ɛbhɛ mɔng ɛBulus segha.

¹⁷ ɛBulus sa ne yel-le ɛdɛ ɛndiinday nisooja gha ɛ yaak ɛbhɛ, “Bo ɛngɔn ɛphas sɛghaa wo ɛ phɛ nɛ ɛlɔ ɛgbaang ɛndiinday yo, ɛ bok ibol ne aa mɔng ɛbhɛ.”

¹⁸ ɛNdiinday nisooja na ne bo ɛngɔn na ɛ phɛ nɛ ɛlɔ ɛgbaang ɛndiinday nibhɛ na, ɛ yaak ɛbhɛ, “ɛBulus sa ne kɛ rop ɛbhɛ wo kɛ tom mɛ wu te yel-le me, ne ɛ ji yaak me wu te n bo ɛngɔn sɛghaa n yɛɛs nɛ ɛlɔ mo, wu ɛ bok ibol ne aa mɔng ngɛ.”

¹⁹ ɛGbaang ɛndiinday nisooja ne wum ɛngɔn ɛphas sa iwɔ ɛ phɛ nɛ gɔɔ, ne ɛ ji bhɛ phom ɛbhɛ ɛ yaak ɛbhɛ; “iKyee ne ɛ bok ne ɛ sim te aa mɔng me woo?”

²⁰ ɛNgɔn ɛphas sa ne yaak ɛbhɛ, “Nindiinday niYahodawa na kɛ ku rop ɛnu nibhɛ bo, wu n yaa yaak kɛ te ɛ sɛ bo ɛBulus se ne ihwɛlɛ ɛ phɛ nɛ ɛnu ɛyisɛ ne itɔrɔng, te yɔng yaa kyi ta bhɛ hante ne phɛl ibol ɛbhɛ.

²¹ Sɔng ˆɛ sim nibhɛ nɛ nang, daa ɛli nɛ ninyi na phyin nzuwubɔ nwaas nɛ nibhɛ tɔk tɛ nibhɛ sɛɛ phoo ɛBulus segha. Nibhɛ kɛ ku lɛlɛm ihywa nibhɛ bo wu hang n yaa re ɛkɔn, wu hang n yaa ta sɔ ɛkɔn sɛ nkɛ phoo ɛBulus se. Nibhɛ kɛ ne ku ryɔng en nibhɛ kɛ taal, nibhɛ hyep pɛ te ɛ sim ɛroo nibhɛ gha.”

²² ɛGbaang ɛndiinday nisooja na ne kpɛngke ɛngɔn ɛphas sa ɛ yaak ɛbhɛ, “Sɔng ɛ mɔng ɛnyi wu ɛ kɛ tɔng me ibol lɛdee wo nang, ɛ ji yɛk ɛbhɛ ne nkiinɛ.”

Kɛ Phɛ ne ɛBulus sa ɛLɔ ɛGɔm-na ne iKɛsɛriya

²³ ɛGbaang ɛndiinday nisooja ne iRooma na ne yel-le nidɛng nindiinday ne ɛguu nisooja na ɛ yɛk nibhɛ ɛ yɔngɔ, “Tɔk ɛn ɛguu nisooja nɛ nibhɛ kɛ hɔn ikpɔl ifaa, te nɛ bo ɛn nidɛng nzuwubɔ ɛniitaa nɛ nibhɛ soye nisaa ne ᐩinantse, gbik nɛ nisooja ikpɔl ifaa nɛ nibhɛ soye ninaa ne cwaase nibara. Te ɛ ryɔng nyini, aa tek ɛn ɛbɛ ne igyɔs ɛnduwujɛng ɛtuk ɛ phɛ ɛn ɛgarang ne iKɛsɛriya.

²⁴ Ma ryɔng ɛBulus segha inantse de ne aa taay yɛ te ɛ hyel ɛn ɛbhɛ nang ɛn ɛgɔm-na ɛFɛlis se ɛbhɛ ncenceng.”

²⁵ ɛGbaang ɛndiinday nisooja wo ne haa ɛwee ɛlɛ:

²⁶ ɛWee yɛwoo wo le ɛlɔ nge mee ɛKaladiyus ɛLisiyas, nzi ne haa ɛndiinday nge nɛ ɛgɔm-na ɛFɛlis. Nzi kyiisi yɛ gbom.

²⁷ niYahodawa na kɛ wum ɛnyi yɛghaa wo, nibhɛ kɛ yek cɛcɛk ne phoo ɛbhɛ. Nggɛ ne yɔng ɛhywarat n bo nisooja nge mbɛ phɔt ɛbhɛ nɛ daa ne ɛli nggɛ seng wu ɛ so ɛnyi ne iRooma.

²⁸ Nggɛ ne i sim naa seng ɛkɔn na ne ɛ kɛ te nibhɛ bol daa ne ito ɛbhɛ de, ne n bo ɛbhɛ mbɛ nɛ ne itɔrɔng nibhɛ.

²⁹ Nggɛ ne seng nibhɛ bol ne ɛbhɛ daa ne ibol ɛShara nibhɛ. Sɔng iben da nɛ nibhɛ bo wu ɛ kɛ ben kɛ ne hɔn sɛɛ rop ɛbhɛ ta phoo ɛbhɛ nang.

³⁰ Kɛ ne sɛ kɛ mɔng me idɛ ibebhe de ne kɛ rop daa ɛnyi yɛghaa wo, nggɛ ne yɔngɔ ɛhywarat n tom ɛbhɛ ɛlɔ mo ɛbhɛ gha. Nggɛ ne ma ta yaak ninyi na nɛ nibhɛ bol daa ne ito ɛbhɛ de tɛ nibhɛ yɛɛs ɛlɔ mo gha, te nibhɛ tɔng ngɛ ibol de nɛ nibhɛ bok ne ɛbhɛ wo.

³¹ iPhɛ ɛlɛy, nisooja na ne mɔn ɛkɔn na ne kɛ yɛk nibhɛ nɛ wo, nibhɛ ne bo ɛBulus segha ne ɛtuk kɛ, nibhɛ phɛ ne ɛbhɛ ɛgarang ne iNtipatiris.

³² Ne cwiil ihwɛlɛ yɛ, nisooja ne tek ninaa ne inantse na nibhɛ ihyel ne ɛBulus sa, ɛbyin nɛ ne ji kyii nibhɛ yɛɛs ne ibarakyi nibhɛ de.

³³ Ne sɛ nisooja na kɛ bhɛ tuu iKɛsɛriya de, nibhɛ ne nang ɛgɔm-na gha ɛwee wo ne kɛ haa ɛbhɛ nɛ wo. Nibhɛ ne ji tek ɛbhɛ ne ɛBulus sa ndɔ ne iwɔ ɛbhɛ.

³⁴ Ne sɛ ɛgɔm-na gha kɛ tɔng ɛwee wo ne ɛ phom ivel da ne ɛBulus sa le. Ne sɛ ɛ kɛ seng wu ne ɛBulus sa so ɛhaa ne ivel ne iSilisiya,

³⁵ ne ɛ yɔngɔ, “N sɛ phok ibol mo de sɛ́ sɛ ninaa nɛ nibhɛ bok de ne igyɛ kɛ yɛɛs.” ɛGɔm-na gha ne yɛk ngɛ i bhɛ kyɛngɛ ɛBulus segha ne ijwee ne igbɔm ɛHyiridus.