ɛTomɛ 20 - ɛWee ne ìTsɛm iHywas

ɛBulus sa kɛ Phɛ ne iMakyidɔniya gbik ne iGiris

¹ Ne sɛ izok ge kɛ laal, ɛBulus sa ne yel-le ninaa ne roos sa, ɛ bol nɛ nibhɛ ivol da ne ifɛ aa te nibhɛ itsɔngɔl gɛgɛy, ɛ yaak nibhɛ wu i yaa hyel, ɛ ji bo nikɔn ɛ phɛɛs ne iMakyidɔniya.

² Ne sɛ ɛ kɛ roos nigarang ngɛnaa nggyɛ wo, ɛ bol nɛ ninaa ne roos ivol da ne ifɛ aa tes nibhɛ itsɔngɔl gɛgɛy, ne ɛ ji phɛ ne iGiris.

³ ɛBulus sa ne bhɛ shɛɛ ɛnggyɛ wo iphɛl itat. Ne sɛ ɛ bok icwas ne aa roos ɛgyirigyi inɛn ɛ phɛ ne iSiriya, ne ɛ kyii seng wu ne iYahudiya na bok ibol ihak daa ɛbhɛ. iPhɛ ɛlɛy ne ɛ hyere icwas ɛbhɛ da wu yaa kyi i bhɛ roos iMakyidɔniya.

⁴ Nidɛng ninyi ne kaa ne roos ɛBulus segha ne ihywel da, nibhɛ kaa ne so ɛlɛ: ɛSopata ne ɛ kaa so ɛngɔn ɛPiryus ne ɛ le ne iBiriya, gbik ne ɛRisitakus ne ɛSɛkundus nɛ nibhɛ kaa le ne iTasɔlɔnika, ne ɛGayus ne ɛ kaa le ne iDaribe, ne ɛTimɔti, ne ɛTikyikus gbik ne ɛTorofimos nɛ nibhɛ kaa le ne ivel ne ɛShiya.

⁵ Ninyi yɛnaa wo kaa ku hyel ɛyisɛ nibhɛ bhɛ hyep njwi ne iTurasa.

⁶ Njwi to nang, njwi kaa ne bo nikɔn ɛgarang ne iFilibi gha ɛtsim ne iDira ne re iBɛrɛdi tang iYis niYahodawa de. Njwi kaa lel ɛgyirigyi inɛn njwi hyel nituk iwii njwi bhɛ sɛ nibhɛ ne iTurasa de. Njwi ne bhɛ shɛɛ ɛnggyɛ wo nituk ɛniitaa.

ɛBulus sa kɛ Phɛ ne iTurasa iPhɛ ɛTsim Mɛ

⁷ Ne sɛ irwirywɛ ɛtuk ne idaan nɛ ndɔ ne isaati de, njwit ninaa ne roos sa kaa ne so ɛlɔ ɛdaan njwi yaa re ire ɛDaray de. ɛBulus sa ne bol nɛ ninaa ne roos sa ihwɛlɛ wuru daa ɛli ne ɛ sim ɛ sɛ cwiil ihwɛlɛ yɛ ɛ hyel.

⁸ iFitila kaa ne sonɛ gbom daa ne ijwee ne irywa wo ne njwi kaa tumɛy yɛwo.

⁹ Ɛdɛ ɛngɔn ɛphas sa ne kaa bok ɛbhɛ ɛYutikus, kaa ne so daa ne ijwee ne irywa wo ɛ kɛ soos ne ihyon. Ne sɛ ɛBulus sa ne ma tɔ ne ivol ba, ɛYutikus sa ne yaa wumus nwa, nwa da ne wum ɛbhɛ gbom, ne ɛ le daa ne ijwee ne irywa wo ihoo ne itwat tɛ, ɛ ho ne ivel, ne yinɛ ɛbhɛ ikom mɛ.

¹⁰ ɛBulus sa ne tɔm ɛ phɛ ɛlɔ ɛYutikus sa ɛ te ne ɛkuum ɛlɔ ɛbhɛ ɛ kumure ɛbhɛ, ɛ yaak ninyi na, “Sɔng ɛ sap ɛn nang, ɛ so ɛken.”

¹¹ Ne sɛ ɛBulus sa kɛ kyii ɛ wara daa ne ijwee ne irywa wo, ne ɛ kpɛlɛ ibɛrɛdi de njwi re. Ne sɛ ɛtsim mɛ ne ɛ kɛ bol nɛ ninyi na ihwɛlɛ phyii wuru, ne ɛ ji hyel.

¹² Ninyi na ne hyil le ne ɛngɔn ɛphas ɛken nɛ, ne irywa ihwala gbom.

ɛBulus sa kɛ Le ne iTaasus de Ɛ phɛ ne iMilitus

¹³ Njwi ne hyel njwi bhe lel ɛgyirigyi inɛn njwi phɛ ɛgarang ne iSos njwii sim njwi yaa bhɛ bo ɛBulus segha ɛnggyɛ wo. ɛLɛy ɛBulus sa kaa ku bok icwas sɛ, ɛ sim aa ho ɛyisɛ ɛ hyel ne ita.

¹⁴ Ne sɛ ɛBulus sa kɛ sɛ njwi ne iSos de, njwi ne bo ɛbhɛ ndɔ ikparak ko njwi phɛ ne iMitilin.

¹⁵ Ne cwiil ne ihwɛlɛ, njwi ne bhɛ hɔn ɛdɛ ɛlɔ gha ne shɛɛ nɛ i wɛɛ ɛgarang ne iKyiyɔs, ne sɛ ihwak ihwɛlɛ njwi ne bhɛ hɔn iSamos, ne ji ta cwiil idɛ ihwɛlɛ yɛ dɔng, njwi ne ji bhɛ tuu iMilitus de.

¹⁶ Sɔng ɛBulus sa kaa ku i sim te ɛ sɛɛ ta phyii kyinak ne iFisus de dɔng nang, daa ɛli ne sɔng ɛ kaa sim te ɛ sɛɛ ta bees nten ne ivel ne iSiya de dɔng nang. Ɛ kaa sim te ɛ sɛɛ yɔng hywarat ɛbhɛ hɔn iYɛrushɛlɛm be nyɛɛn ɛtuk ne iDira ne iPɛntakos kyi tuu.

ɛBulus sa kɛ Bol nɛ nindiinday Ninaa ne Roos ne iFisus

¹⁷ ɛBulus sa ne bhɛ shɛɛ ne iMilitus de ɛ tom mɛ bhɛ yel-le ɛbhɛ ninu ne ikɔɔn ninaa ne roos ne iFisus sa.

¹⁸ Ne sɛ nibhɛ kɛ tuu, ɛBulus sa ne yaak nibhɛ, “Nyinɛn no ne ito mon, ɛ yɛɛ ɛn ihywee ne ishwɛɛ da ne nggɛ shɛɛ ne nyinɛn gbik nten de ne nggɛ shɛɛ ne nyinɛn no, ihywee ne ishwɛɛ da ne nggɛ shɛɛ nten de ne nggaa tsa n tuu ivel ne iSiya da.

¹⁹ Nggɛ laasek ito nge n mɔn ɛtomɛ ɛDaray ya nɛ niyilis ne irwisɛ nge. Nggɛ kyinak gɛgɛy daa ne ihywee ne cɔk irway da nɛ niYahodawa na kɛ cɔk me nɛwo.

²⁰ Sɔng nggɛ shɛɛ tang tɔng nyini ɛdɛ ɛkɔn ɛyɛnɛng nga ne aa phyik nyini nang. Nggɛ roos idee-idee gbik n tɔng ibol de wɛsɛrɛk.

²¹ Nggɛ kpɛng niYahodawa na gbik nɛ ninyi na ne hame nibhɛ soye niYahodawa na, n nzi bo tɛ nibhɛ hyere irway nibhɛ ɛlɔ ɛTaanggbey nibhɛ san ɛbɔk nibhɛ nang ne itin nɛ ne ɛDaray njwɛɛn ɛYɛso gha.

²² “ɛLyilyɛghaa wo iKabyik ge kɛ ne yɛk me nɛ nggbinggbing n phɛɛs ne iYɛrushɛlɛm. Sɔng nzi yɛɛ ɛkɔn na ne aa bhɛ te nɛ mee ɛnggyɛ wo nang.

²³ Nzi yang yɛɛ iKabyik ɛTaanggbey de kɛ ku yaak me wu gbik ɛgarang nga ne naa bhɛ lel ndɔ ne iYɛrushɛlɛm de, nggbang i hyep me, ijwee ne nyang ne ta sonɛ.

²⁴ Gbik ne iphɛ ɛlɛy, sɔng nggɛ ne bo iken nge ɛnu ɛkɔn nang wu naa yang yɛɛ ne taal ɛtomɛ gha ne ɛDaray ɛYɛso gha kɛ yɛk me nɛ wo, ɛtomɛ ne tɔng ninyi na ibol iyɛnɛng ne izɛɛng ɛTaanggbey de.

²⁵ “ɛLyilyɛghaa wo nzi yɛɛ gbik mon no, ne nggɛ roos nyini n tɔng nyini ibol ne igbɔm ɛTaanggbey da, sɔng aa tang yaang ɛn mɛɛn nang.

²⁶ iPhɛ ɛlɛy, n nzi ne bok nyini izenge wu ɛdɛ mon kɛ ne bhɛ lel ne nggbang ne inat sɔng yaa ne phom neyi ɛbhɛ daa ne ito nge nang,

²⁷ daa ɛli ne nggɛ tɔng nyini gbik nikɔn na ne ɛTaanggbey ya sim te ɛ sɛ seng ɛn.

²⁸ Wɛɛ ɛn nyini yɛnɛng, tɛ nɛ ta wɛɛ ɛn ᐩigyol ɛTaanggbey de ne iKabyik ɛTaanggbey de kɛ yɛk nyini nɛ te ɛ wɛɛ ɛn no. Hyep ɛn ninaa ne roos ɛTaanggbey ya ne ɛ kɛ say nibhɛ nɛ neyi ɛNgɔn ɛbhɛ na.

²⁹ “Nzi yɛɛ yaa sɛ ɛtsim mɛ ne nggɛ hyel, nidɛng ninyi na nɛ nibhɛ so tɛ nibabu ne izaram sɛ ne yɛɛs ndɔ mon nibhɛ sim ɛli nɛ nibhɛ sɛɛ bees ᐩigyol ɛTaanggbey de.

³⁰ Ndɔ mon no ne mang, sɛ ne ma sɛ nidɛng nɛ nibhɛ sɛ wuru nibhɛ tusup itin de, tɛ nibhɛ sɛ nibhɛ hɔ ihywɛɛ ninaa ne roos de ɛlɔ nibhɛ.

³¹ iPhɛ ɛlɛy, ne ɛ shɛɛ ɛn ɛkanang! Tas ɛn, izenge wo kɛ hɔn ishay itat ne nzi kpɛng nyini wo. Sɔng nggɛ cwaal ɛnu nang, ne ɛtuk ne igbey nzi kpɛng nyini nɛ niyilis ne irwisɛ nge.

³² “ɛLyilyɛghaa wo, nzi ne bo te ɛTaanggbey hyep nyini. Te bol ne izɛɛng ɛbhɛ de hyep nyini, te iphɛ nang nyini ihwet iphɛ yɛk ngɛ ɛwɛng ɛbhɛ sɛ nyini, ɛwɛng nga ne ɛ sɛ teye isha ninaa ne roos ɛbhɛ na.

³³ Sɔng nggɛ yɛk irisɛ ne ijam gbik nɛ nikɔn niyɛnɛng ɛdɛ mon nang.

³⁴ Nyinɛn no ɛ yɛɛ ɛn ne ibɔ nge yɛdee bɛ nggɛ re ne ito nge gbik nɛ nitaay ɛtomɛ nge na.

³⁵ Ndɔ nikɔn na ne nggɛ mɔn, nggɛ tɔɔrek nyini wu iphɛ so nggbinggbing ɛ mɔn ɛn ɛtomɛ gbom te ɛ sɛ ɛ phyik ɛn nitaasek. Kaabi ɛ tas ɛn ne ibol ɛDaray ɛYɛso de ne iphɛ bo, ‘ɛNyi gha ne ɛ kɛ nang ngo, ɛ bok ɛwɛng ɛ phyin ɛhaa ne kɛ nang ɛbhɛ wo.’ ”

³⁶ Ne sɛ ɛBulus sa kɛ taal ivol da gbik, nibhɛ ne cwi ne irwa-nggburuk gbik nibhɛ boote ne ɛTaanggbey.

³⁷ Nibhɛ ne tasat ne iswin gbom nten de nɛ nibhɛ kɛ kumure ɛBulus segha nibhɛ yaak ɛbhɛ ne nkiinɛ wo.

³⁸ ɛKɔn na ne ɛ kɛ nang nibhɛ irway ishwii da gbom mo ɛ so ibol de ne ɛBulus sa kɛɛ yaak nibhɛ wu hang nibhɛ yaa tang yaang ɛbhɛ wo. Nibhɛ ne bhɛ hyeeng ɛbhɛ ɛlɔ gha ne aa bhɛ lel lɛ ɛgyirigyi inɛn na.