ɛTomɛ 18 - ɛWee ne ìTsɛm iHywas

ɛBulus sa So ne iKɔrɔntos

¹ ɛTsim mɛ ɛlɛy ɛBulus sa ne tek iTina de ɛ phɛ ne iKɔrɔntos.

² ɛNggyɛ wo ɛBulus sa ne bhɛ sɛme ne ɛdɛ ɛnyi ne iYahudiya gha ne i bok ɛbhɛ ɛKyila ne ɛ kaa soye ɛnyi ɛgarang ne iPɔntus. ɛKyila gha ne ɛkuk ɛbhɛ ɛPirisila kaa tɔ le ne iTaliya ɛ yɛɛs ne iKɔrɔntos de daa ɛli ne ɛGɔm ɛKaladiyus ne iRooma kaa yɛk ngɛ wu tɛ niYahodawa na hyel nibhɛ tek ivel ne iRooma da. ɛBulus sa ne phɛ ɛlɔ nibhɛ.

³ ɛBulus sa kaa bhɛ tek nikɔn na ɛlɔ nibhɛ gha, daa ɛli ne ɛtomɛ nibhɛ kaa ɛdaan nɛ. Nibhɛ kaa so ninaa ne ryɔng ihuhu ne lɔl ifo. Nibhɛ ne mɔn ɛtomɛ gha ɛte.

⁴ Ne i sɛ ɛtuk ne iWɛsɛ niYahodawa na, ɛBulus sa ne i bol nibhɛ ne i wɛɛ ibol, nɛ niYahodawa na nɛ ninyi na ne hame nibhɛ soye niYahodawa na ndɔ ne ijwee ne itɔɔy yo ɛ sim te ɛ sɛɛ te nibhɛ nibhɛ hyereey.

⁵ Ne sɛ ɛSila ne ɛTimɔti kɛ lenɛ iMakyidɔniya de nibhɛ bhɛ sɛ ɛBulus segha ne iKɔrɔntos de, ɛBulus sa ne ji ku bo nten ɛbhɛ gbik, ɛ sanga ibol iyɛnɛng ngge ɛ tɔɔsel niYahodawa na wu ɛYɛso ɛbhɛ so ɛKiriti gha.

⁶ Sɔng niYahodawa na ne say bol ɛBulus de nang, nibhɛ ne i towos ɛbhɛ. iPhɛ ɛlɛy, ɛBulus sa ne te ɛbung ne itsura ɛbhɛ rarak, ɛ yaak nibhɛ, “Tɛ neyi mon na shɛɛ daa ne ito mon! Sɔng n bok ɛfɔt mon nang. ɛLyilyɛghaa wo naa tek nyini mbɛ tɔng ninyi na ne hame nibhɛ so niYahodawa ibol ɛTaanggbey de.”

⁷ ɛBulus sa ne tek ijwee ne itɔɔy yo ɛ phɛ ne ijwee ɛdɛ ɛnyi wo ne i bok ɛbhɛ ɛTitus ɛYɔsitus ne ɛ kaa so ɛnyi ne iGirik ne ɛ bok ɛnik ɛTaanggbey. iJwee ɛbhɛ kaa so cɛcɛk ne ijwee ne itɔɔy niYahodawa wo.

⁸ ɛKiribus ne ɛbhɛ kaa so ɛndiinday ne ijwee ne itɔɔy yo ne nang ne itin nɛ nɛ ninaa ne ijwee ɛbhɛ gbik. Nidɛng ninyi ne iKɔrɔntos sa gbom nɛ nibhɛ kɛ phok ɛBulus segha ne ma nang ne itin nɛ, ne i yɛk nibhɛ ne ibatisima.

⁹ Ne sɛ ɛdɛ ɛtuk, ɛDaray ya ne bol ne ɛBulus sa ndɔ iyuwa ɛ bok ɛbhɛ, “Sɔng ɛ phok ɛnik kang, maa sɛɛ ito ne tɔng ibol de, sɔng ɛ shɛɛ nggbyak kang.

¹⁰ Nzo ne igyɛ sɔng ɛnyi yaa ne dat te ɛ phok kɛ ikpom nang daa ɛli ne n bok ninyi gbom ndɔ ɛgarang ngɛgha wo nɛ nibhɛ so ninaa nge.”

¹¹ ɛBulus sa ne shɛɛ ɛnggyɛ wo ishay ne ngguk, ɛ mɛmɛ ninyi na ne ibol ɛTaanggbey de.

¹² Kaa ne sɛ nten de ɛGaliyɔ ɛbhɛ so ɛgɔm-na ne iKaya, niYahodawa na ne rop ɛnu daa ɛBulus sa nibhɛ ne wum ɛbhɛ nibhɛ yɛɛs nɛ ɛlɔ ninaa ne bol ɛshara.

¹³ Nibhɛ ne yɔngɔ, “ɛNyi yɛghaa wo i mɛmɛ ninyi na nɛ wu tɛ nibhɛ re ɛTaanggbey yegha ntsong ngga ne nkiinɛ wo ne ɛbhɛ so kyii ne ɛshara njwɛɛn na.”

¹⁴ Kɛ ne sɛ ɛBulus sa i sim te aa boote, ɛGaliyɔ gha ne yɔngɔ, “Sɛɛ yɔng nyinɛn niYahodawa na ɛ bo ɛn wu ɛnyi yɛghaa wo kɛ mɔn ɛkɔn ɛkpɛɛ, hang ɛdɛ ɛgbaang ne ɛfɔt yɔɔ nzɛ ne bok nten ne naa tenes nyini.

¹⁵ iBol lɛ ne kyii so ishamas daa ne ivol ne irɛɛk gbik ne ibol ɛshara mon, cwi ɛn ɛbhɛ wɛɛ ɛn iphɛ ndɔ mon. Sɔng nzi bol ɛshara ne ihywee ne ivol lɛdaa wo nang.”

¹⁶ ɛGaliyɔ gha ne kasa nibhɛ ndɔ ne icwam ɛshara wo.

¹⁷ niYahodawa na ne wum ɛdɛ ɛnyi gha ne i bok ɛbhɛ ɛSɔtɛnes, ne ɛ soye ɛndiinday ne ijwee ne itɔɔy niYahodawa na, nibhɛ hal ɛbhɛ ɛnu ɛyisɛ ne icwam ɛshara gha. Sɔng ɛGaliyɔ gha ne wɛɛ ibol lɛ nang.

ɛBulus sa kɛ Kyii Ɛ Phɛ ne iNtakiya

¹⁸ ɛTsim mɛ ɛlɛy, ɛBulus sa ne phyɔngɔle ndɔ ne iKɔrɔntos de. Ne ɛ ji tek nigwaa na ɛ bo ɛKyila ye ne ɛPirisila nibhɛ hyel ndɔ ne ɛgyirigyi inɛn nibhɛ phɛɛs ne iSiriya. ɛBulus sa kaa ne hon ito ɛbhɛ ɛdɛ ɛgarang nga ne kaa bok iKɛnkiriya, daa ne ibol ne lɛlɛm ihywa ne ɛ kaa ku lɛlɛm ndɔ ne irywɛɛk ɛTaanggbey wɛɛ.

¹⁹ Nibhɛ ne bhɛ tuu iFisus, ɛBulus sa ne tek ɛKyila yegha ne ɛPirisila gha ɛnggyɛ wo, ɛ ji bhɛ lel ndɔ ne ijwee ne itɔɔy yo ɛ bol nibhɛ ne i wɛɛ ibol lɛ nɛ niYahodawa na.

²⁰ Nibhɛ ne yaak ɛBulus segha wu te ɛ kyi shɛɛ ɛlɔ nibhɛ gha ɛ hante nɛ, ɛBulus sa ne mbaray.

²¹ Ne sɛ ɛBulus sa yaa bo nikɔn, ne ɛ yaak nibhɛ, “Nzɛ ta bhɛ kyii n yɛɛs ɛlɔ mon na wu ɛTaanggbey kɛ sim me nɛ, ne ɛ ji tek iFisus de ɛ hyel ndɔ ne ɛgyirigyi inɛn.”

²² Ne sɛ ɛBulus sa kɛ bhɛ tuu iKɛsɛriya ne ɛ wara ɛbhɛ kyili ninaa ne roos sa nɛ nibhɛ so ne iYɛrushɛlɛm be ɛ ji tɔm ɛ phɛ ne iNtakiya.

²³ Kɛ ne sɛ ɛ kɛ phyɔngɔle ne iNtakiya de, ne ɛ roos nigarang nga nɛ nibhɛ so ne ivel ne iGalatiya gbik nɛ ninaa nɛ nibhɛ so ne ivel ne iFirijiya ɛɛ tes ninaa ne roos sa itsɔngɔl gɛgɛy.

ɛPolos So ne iFisus

²⁴ ɛDɛ ɛnyi ne iYahudiya gha ne i bok ɛbhɛ ɛPolos, ne ɛ so ɛnyi ne ɛLɛzɛndariya, kaa ne yɛɛs ne iFisus de. ɛPolos sa kaa ne so ɛnyi ne ɛ yɛɛ ne bol byirik, ne ɛ yɛɛ ɛWee ne iBol ɛTaanggbey yo gbom.

²⁵ Kaa mɛmɛ ɛPolos segha ne ibol ne nkiinɛ ɛDaray, ɛ kaa ne i yɛɛ ne bol ibol lɛ ne ihwet, ne ɛɛ tɔng ibol ɛYɛso de cik. iBol ne ibatisima idaan zɔng ne ɛPolos sa kaa ne ku yɛɛ, idee ne ibatisima ɛYohana.

²⁶ ɛPolos sa tsa ɛ bol ne irway nviit ndɔ ne ijwee ne itɔɔy niYahodawa wo. Ne sɛ ɛKyila gha ne ɛPirisila gha kɛ phok ivol ɛbhɛ da, nibhɛ ne yel-le ɛbhɛ ne ijwee nibhɛ, nibhɛ bhɛ hante ne kpɛl ɛbhɛ ɛnkiinɛ ne ibol ɛTaanggbey yo ywɛywɛy.

²⁷ Ne sɛ ɛPolos sa sim te aa phɛ ne iKaya, ninaa ne roos sa ne te ɛbhɛ itsɔngɔl gɛy, nibhɛ ne ji haa ɛbhɛ ɛwee wu tɛ ninaa ne roos ne iKaya na say ɛbhɛ ne ibɔ iphaa. Ne sɛ ɛ kɛ bhɛ tuu iKaya de, ne ɛ teye ɛkɔn ne iphyik ɛlɔ ninyi na nɛ nibhɛ kɛ nang ne itin nɛ lenɛ ne izɛɛng ɛTaanggbey de,

²⁸ daa ɛli ne ɛ kaa kyinak ne ita ɛbhɛ iphaa, ɛnu ɛyisɛ ninyi na, ɛ re niYahodawa na ne ishamas, ɛ tɔɔsel nibhɛ ndɔ ne ɛWee ne iBol ɛTaanggbey yo ɛli ne ɛYɛso gha ɛbhɛ soye ɛKiriti gha.