ɛTomɛ 16 - ɛWee ne ìTsɛm iHywas

ɛTimɔti Kɛ Kungus ɛBulus se gbik ne ɛSila

¹ ɛBulus sa ne ɛSila gha ne phɛ ne iDaribe gbik ne iLisitira. ɛNggyɛ wo nibhɛ ne bhɛ sɛ ɛdɛ haa ne roos sa ne i bok ɛbhɛ ɛTimɔti ne ɛgyinɛ kaa ne so ɛkuk ne ilem niYahodawa ne ɛ kɛ nang ne itin nɛ, ɛkyɛɛ ne ɛ ji so ɛnyi ne iGirik.

² Ninaa ne roos ne iLisitira na gbik nɛ ninaa iKɔnyum ma kaa ne ton ɛTimɔti yegha.

³ ɛBulus sa kaa ne i sim te ɛ sɛɛ boos ɛTimɔti yegha, ne ɛ yɛk ngɛ i hyɛ ɛbhɛ itee, daa ɛli nɛ niYahodawa na nɛ nibhɛ kaa so ndɔ nigarang ngɛ wo kaa ku yɛɛ ɛli ne ɛkyɛɛ ɛTimɔti gha so ɛnyi ne iGirik ka.

⁴ Ne sɛ nibhɛ so ne ihywel ba, nibhɛ ne i roos nigarang-nigarang nibhɛ tɔng ninaa ne roos sa ivol da nɛ ninɔn ne tom ma gbik nɛ ninu ne ikɔɔn na kaa rop ne iYɛrushɛlɛm be nibhɛ bok nibhɛ wu tɛ nibhɛ roos.

⁵ iPhɛ ɛlɛy idira ninaa ne roos de ne hante ne ihwet ndɔ ne ìnang ne itin de, nibhɛ ne ta i hanas se nɛ nibhɛ tes gbogbom.

Kɛ Tɔɔl ɛBulus segha ne iMakyidɔniya Ndɔ ne iYuwa

⁶ ɛBulus sa nɛ ninyi ɛbhɛ na ne phɛ ne iFirijiya gbik ne iGalatiya, daa ɛli ne iKabyik ɛTaanggbey de kaa ring nibhɛ ne tɔng ibol de ivel ne iSiya.

⁷ Ne sɛ nibhɛ kɛ tuu ɛgak ne ivel ne iMasiya, nibhɛ ne i sim tɛ nibhɛ yaa phɛ ne ivel ne iBitaniya, iKabyik ɛYɛso de ne ring nibhɛ nɛ.

⁸ iPhɛ ɛlɛy, nibhɛ ne roos iMasiya de nibhɛ phɛ ɛgarang ne iTurasa.

⁹ Ne sɛ ɛtuk, ɛBulus sa ne yaang ɛdɛ ɛnyi ne iMakyidɔniya gha ndɔ ne iyuwa, ɛ kɛ kyinak cɛcɛk ne ɛbhɛ ɛ roro ne ɛbhɛ ɛ bok ɛbhɛ, “Yɛɛs ne iMakyidɔniya de te ɛ phyik njwii.”

¹⁰ Kɛ ne sɛ ɛtsim mɛ ne ɛBulus sa kɛ yaang iyuwa de, njwi ne yɔngɔ hywarat njwi bo nikɔn njwi phɛ ne iMakyidɔniya de, daa ɛli ne njwi kɛ seng wu ɛTaanggbey ɛbhɛ kɛ yel-le njwii te njwi tɔng ninyi ɛgarang ngɛnaa nggyɛ wo iBol iYɛnɛng nge.

ɛLidiya kɛ Teye ɛHaa ne Roos

¹¹ Njwi ne tek iTurasa de njwi lel ne ɛgyirigyi inɛn njwi phɛ ne iSamɔtakiya. Ne sɛ ihwɛlɛ yɛ, njwi ne bhɛ hɔn iNipolis.

¹² Njwi ne le ɛnggyɛ wo, njwi phɛ ne iFilibi ne ɛ kaa soye ɛgbaang ɛgarang ne iMakyidɔniya de nɛ ninyi ne iRooma kaa lɔl. Njwi ne bonɛ nituk maa njwii shɛɛ ɛnggyɛ wo.

¹³ Ne sɛ ɛtuk ne iWɛsɛ niYahodawa na, njwi ne wuru ne izay ɛgarang ngo njwi phɛ ɛnu ne ihywel njwi wɛɛ te njwi yaa bhɛ sɛ ɛlɔ ne roo niYahodawa. Njwi ne bhɛ bol nɛ nikuk ɛnggyɛ wo nɛ nibhɛ kɛɛ tumɛy yɛ.

¹⁴ Ndɔ nikuk kɛnaa nggyɛ wo, ɛdɛng kaa ne sonɛ ne bok ɛbhɛ ɛLidiya ne ɛ kaa le ɛgarang ne iTiyatira. Ɛ kaa ne i lɛbhɛl itsura ne jam ne ifɛ bok inɛn ntseng ngɛ mpumpuk ne ɛ re ɛTaanggbey ye ntsong. ɛDaray ya ne yɛk ngɛ ɛ kyii ne irway ɛbhɛ daa ne ibol de ne ɛBulus sa tɔng ngo, ɛ say iphɛ.

¹⁵ Kɛ ne sɛ ɛtsim mɛ ne kɛ yɛk ɛbhɛ ne ibatisima nɛ ninaa ne ijwee ɛbhɛ gbik, ne ɛ roo njwii ɛ yɔngɔ, “Wu ɛ kɛ sim ɛn wu nggɛ te me ɛhaa ne roos ɛDaray yegha ɛtsak, nɛ njwi ɛn ɛbhɛ shɛɛ ɛn ne ijwee nge.” Ne ɛ roro ne njwit, njwi ne roos ɛbhɛ njwi phɛ ne ijwee ɛbhɛ wo.

Kɛ Rop ɛBulus se gbik ne ɛSila ne iJwee ne Nyang

¹⁶ Kaa ne sɛ ɛdɛ ɛtuk kɛ ne njwi phɛɛs ɛlɔ ne roo niYahodawa na njwi ne sɛme ne ɛdɛ ɛngɔn ɛlyilyap pa ne ɛ kaa so ɛkpuru. Ɛ kaa bok ikabyik ne ikyarakyut ne iphɛ te ɛbhɛ ɛ tɔng nikɔn na nɛ nibhɛ sɛ tes gɔɔ ɛyisɛ, ɛ ji sɛ ninaa ne ijwee ɛbhɛ ijam gbom lenɛ ne ikabyik kɛdee nggyɛ wo.

¹⁷ ɛNgɔn ɛlyilyap pɛghaa wo ne yaa kungus njwii nɛ niBulus se na ɛ rɛrɛ, ɛ bo, “Ninyi yɛnaa wo so nikpuru ɛTaanggbey ɛdaa nyu ne irywa! Nibhɛ tɔng nyini ɛnkiinɛ ne phɔrɔt!”

¹⁸ Ne ɛ mɔn ɛlɛ wo nituk maa. ɛBulus sa ne te njenjek ne ɛ hyereey ɛ yaak ɛphoo gha ne ɛ so ndɔ ɛbhɛ wo, “Nzi bok kɛ tek ɛngɔn nɛghaa wo ndɔ ne irywɛɛk ɛYɛso ɛKiriti!” Nɛ nten nɛ ɛphoo gha ne shii wuru ndɔ ɛngɔn ɛlyilyap pa.

¹⁹ Ne sɛ ninaa ne ijwee ɛngɔn ɛlyilyap pa kɛ yaang ɛli ne kɛ kyɛngɛ nibhɛ ɛnkiinɛ ne sɛ ijam be, nibhɛ ne wum ɛBulus segha ne ɛSila gha, nibhɛ hɔ nibhɛ nibhɛ bhɛ nɛ ndɔ ɛtungga ɛlɔ nigɔm.

²⁰ Ne phɛ nɛ nibhɛ ɛlɔ ninaa ne ibol ɛshara, nibhɛ ne ji yɔngɔ, “niYahodawa yɛnaa wo i subhus ihywɛɛ ninaa ɛgarang njwɛɛn de.

²¹ Nibhɛ mɛmɛ nɛ nikɔn na nɛ nibhɛ so ninaa ne njwɛɛn, ninyi ne iRooma na, kyii.”

²² iDira ninyi de ne byingis se daa nibhɛ, ninaa ne bol ɛshara gha ne kpɛɛ itsura ɛBulus da ne ɛSila gha nibhɛ ji yɛk ngɛ i hal nibhɛ ne ncwɛng.

²³ Ne sɛ kɛ hal nibhɛ gbom, ne ji bhɛ gangke nibhɛ ne izuk ne nyang, i yɛk ɛhaa ne hyep ɛnu ne izuk ne ijwee ne nyang nga nɛ wu te ɛ wɛɛ nibhɛ yɛnɛng.

²⁴ Ne sɛ ɛhaa ne hyep ijwee ne nyang nga kɛ phok ɛlɛ wo, ne ɛbhɛ gangke ɛBulus segha ne ɛSila gha gɔɔ ɛduk, ɛ sɔɔl ita nibhɛ ndɔ ne igɔrɔ ne ihon ne kɛ sɛp ɛ rop nibhɛ.

²⁵ Ne sɛ ɛceree ɛtuk ɛBulus sa ne ɛSila gha ne yaa bol ne ɛTaanggbey nibhɛ yaang ne iywel ɛbhɛ, ɛbyin ninyi na nɛ nibhɛ so ne ijwee ne nyang ngge ne i tenes nibhɛ.

²⁶ iVel ne shii sungket ifɛ bhɛ hɔn ɛtum ne ijwee ne nyang ngo, ninu ne izuk ne iduk kɛ phaasel le, nyang ngge ne kɛ robhos ninyi na nɛ wo ne sɛs se.

²⁷ Ne sɛ ɛhaa ne hyep ijwee ne nyang nga kɛ seme ɛ kɛ yaang ninu ne izuk ka phere wo, ne ɛ sɔnɔ ihywa ɛbhɛ ɛ sim te aa phoo ito ɛbhɛ nɛ, daa ɛli ne ɛ kaa wɛɛ tɛ ninyi na kɛ tel.

²⁸ ɛBulus sa ne kyanke ye ɛ boote ɛ yɔngɔ, “Sɔng ɛ yung phok kɛ ɛ teyɛ nɛ nyang nang, njwi sonɛ gbik mos.”

²⁹ Ɛhaa ne hyep ijwee ne nyang nga ne yɔng te yɛɛs ne igboo. Ne ɛ lel ndɔ ne izuk ko, ɛ kparat ɛbhɛ ho ɛBulus segha ne ɛSila gha ne ita.

³⁰ Ne ɛ tul ɛBulus segha ne ɛSila gha ne izay, ne ɛ yaak nibhɛ, “Nindiinday, ikyee iphɛ so nggbinggbing n mɔn te nzɛ iphɔrɔt daa?”

³¹ Nibhɛ ne yaak ɛbhɛ, “Nang ne itin nɛ ne ɛDaray ɛYɛso, aa ne sɛ iphɔrɔt da igyɛ ne ijwee mo gbik.”

³² ɛBulus sa ne ɛSila gha ne tɔng ɛbhɛ ibol ɛDaray de nɛ ninaa ne ijwee ɛbhɛ gbik.

³³ Ndɔ ɛtuk kɛghaa nggyɛ wo, ɛhaa ne hyep ijwee ne nyang nga ne bo ɛBulus segha ne ɛSila gha ne ɛbhɛ kuus nibhɛ inuu nibhɛ de. Ne ma ku roos i yɛk ne ibatisima de nɛ ninaa ne ijwee ɛbhɛ na.

³⁴ Ne ɛ bo ɛBulus segha ne ɛSila gha ɛ phɛ nɛ ne ijwee ɛbhɛ, ɛbhɛ nang nibhɛ ire. Ɛbhɛ wo ne ijwee ɛbhɛ gbik ne yɛk irway ihwala daa ɛli nɛ nibhɛ kɛ nang ne itin nɛ ne ɛTaanggbey ya.

³⁵ Ne cwiil ne ihwɛlɛ yɛ, ninaa ne bol ɛshara gha ne tom ninɔn ne ntsɛng, tɛ nibhɛ bhɛ yaak ɛhaa ne hyep pa ɛlɛ: “Biri ninyi yɛnaa nggyɛ wo nibhɛ hyil le.”

³⁶ Ɛhaa ne hyep ijwee ne nyang nga ne yaak ɛBulus segha, “Ninaa ne bol ɛshara gha kɛ tom me nibhɛ bo te n yaak nyini tɛ hyel ɛn. iPhɛ ɛlɛy, ne ɛ wuru ɛn ɛ hyel ɛn. Njwii ɛn ncaang.”

³⁷ ɛBulus sa ne yaak ɛngɔn ne ntsɛng nga, “Njwi so ninyi ne iRooma, sɔng njwi kɛ ne mɔn ɛkɔn nang nibhɛ kɛ ne hal njwii ɛnu ɛyisɛ ninyi, nibhɛ cwaak njwii ndɔ ne ijwee ne nyang. ɛLyilyɛghaa wo nɛ nibhɛ ne ji sim tɛ nibhɛ yaa yɛk njwii nkiinɛ gying nge? Kwa! Tɛ nibhɛ yɛɛs ne ito nibhɛ, nibhɛ tul njwii.”

³⁸ ɛNgɔn ne ntsɛng nga ne bhɛ tɔng Ninaa ne bol ɛShara gha ɛkɔn ne ɛBulus sa kɛ bol. Ne sɛ ninaa ne bol ɛshara gha kɛ phok wu ɛBulus sa ne ɛSila gha so ninyi ne iRooma na, nibhɛ ne wum ɛnik.

³⁹ Ninaa ne bol ɛShara gha ne yɛɛs nibhɛ roo ɛBulus segha ne ɛSila gha ihana. Nibhɛ ne ji tul nibhɛ ndɔ ne ijwee ne nyang ngo nibhɛ ne roo nɛ nibhɛ wu tɛ nibhɛ tek ɛgarang ngɛ.

⁴⁰ Ne sɛ ɛBulus sa ne ɛSila gha kɛ wuru ndɔ ne ijwee ne nyang ngo nibhɛ ne phɛ ne ijwee ɛLidiya. Kɛ ne sɛ ɛtsim mɛ nɛ niBulus se na kɛ bhɛ yaang nigwaa ninaa ne roos sa, nibhɛ ne te nibhɛ itsɔngɔl gɛgɛy nibhɛ ji hyel.