ɛTomɛ 11 - ɛWee ne ìTsɛm iHywas

ɛBiturus sa kɛ Tɔng Ninaa ne Roos sa iBol Lɛ

¹ Ninɔn ne Tom ma nɛ ninaa ne roos ne iYahudiya na ne phok ɛli nɛ ninyi na ne hame nibhɛ so niYahodawa na kɛ ma say bol ɛTaanggbey de.

² iPhɛ ɛlɛy ne sɛ ɛBiturus sa kɛ phɛ ne iYɛrushɛlɛm be, nidɛng nindiinday ninaa ne roos niYahodawa na nɛ nibhɛ bok ibol ne hyɛghɛ icwee da ne ihwet da ne yaa nep ɛBiturus segha.

³ Nibhɛ bo, “iKyee iphɛ kɛ te ɛ kɛ bhɛ lel ne ijwee ninyi na ne hame nibhɛ kɛ hyɛghɛ icwee da ɛ re ɛn ire de nɛ nibhɛ woo?”

⁴ ɛBiturus sa ne tɔng nibhɛ ivol lɛ gbik, ɛ roos nikabhak kɛ ɛli ne iphɛ kɛ te.

⁵ Ɛ yɔngɔ, “Nggaa so ɛgarang ne iYopa nzi bol ne ɛTaanggbey, ne n yaang ɛdɛ ɛkɔn na ndɔ ne iyuwa te ɛgbaang ɛzene ɛ le daa ne irywa ɛ tɔmɔs te kɛ wum ninu nwaas sɛ i tɔmɔs nɛ. Ne ji tɔmɔsek ɛbhɛ ɛlɔ gha ne n so nɛ wo.

⁶ Ne sɛ nggɛ yɛɛn ndɔ yɛ yɛnɛng, ne n yaang nikɔn na ihywee-ihywee, ᐩinyam ɛhay ne ihywee, ne ᐩizɔ ne ihywee, ne ᐩihyom gbik nɛ ninon.

⁷ Ne n ji phok izɔlɔs i bok me, ‘ɛBiturus, yilitsik te ˆɛ phoo ˆɛ re.’

⁸ “Ne n yɔngɔ, ‘Yɛwɛy! ɛDaray, sɔng nggɛ ku re ɛkɔn ne ɛ sang so wɛwɛy ne ikpii da kɛ ring ngɛ wo nang.’

⁹ iZɔlɔs de ne ta le daa ne irywa wo ihywɛ boote ɛhaa ɛphaa yɛ ihywɛ yɔngɔ, ‘Sɔng ɛ yaak ɛkɔn na ne ɛTaanggbey ya kɛ te ɛbhɛ wɛwɛy yo wu ɛ sang so wɛwɛy yo nang.’

¹⁰ Ne mɔn ɛlɛ wo i te ɛtat ne ji kyii nɛ nikɔn nɛnaa nggyɛ wo gbik i phɛ nɛ dak ne irywa wo dɔng.

¹¹ Nɛ nten nɛ ninyi itwat, ne kɛ tom nibhɛ ɛlɔ nge gha, ne shii tuu ijwee wo ne nzi shɛɛ nɛ wo. Kaa ne tom ne nibhɛ, nibhɛ le ne iKɛsɛriya.

¹² iKabyik ge ne yaak me te ne roos nibhɛ, wu hang n yɔng njiinjii. Nigwaa ninaa ne roos ɛtaraa yɛnaa wo ne roos me, njwi bhɛ lel ne ijwee ɛKɔnɛliyas.

¹³ ɛKɔnɛliyas sa ne tɔng njwi ɛli ne ɛ kɛ yaang ɛmalɛka gha kɛ kyinak ne ijwee ɛbhɛ wo, ɛ bok ɛbhɛ, ‘Tom ninyi ne iYopa tɛ nibhɛ bhɛ yel-le yɛ ɛnyi gha ne bok ɛbhɛ ɛSimɔn ne i yeres ɛbhɛ ɛBiturus sa.

¹⁴ Aa ne mɔng ngɛ ibol ne iphɛ yaa phɔt tɛ nɛ ninaa ne ijwee mo na gbik.’

¹⁵ Kɛ ne sɛ nggɛ bhɛ tsa ivol da, iKabyik ɛTaanggbey de ne ma ho dak nibhɛ ɛli ne iphɛ kaa ho dak njwɛɛn ɛyisɛ gha.

¹⁶ Ne n ji taate ne bol ɛDaray de ne iphɛ bo, ‘ɛYohana gha kaa Yaak ne iBatisima de ne inɛn, nyinɛn no nang, sɛ ne yaak nyini nɛ ne iKabyik ɛTaanggbey.’

¹⁷ Wu ɛTaanggbey ya kɛ ne nang nibhɛ izɛɛng izaan nɛ ne ɛ kaa nang njwɛɛn no nten de ne njwɛɛn kaa nang ne itin nɛ ne ɛDaray ɛYɛso ɛKiriti gha, mee wo nggɛ ne hɔn nzɛɛ kyɛngɛ ɛTaanggbey yeghaa?”

¹⁸ Ne sɛ nibhɛ kɛ phok ibol lɛdee wo, nibhɛ ne kɔɔng ishamas de, nibhɛ ne yaa dɛp ɛTaanggbey ye nibhɛ bo, “ɛTaanggbey ya kɛ ma sim ninyi na ne hame nibhɛ so niYahodawa na nɛ tɛ nibhɛ san ɛbɔk nibhɛ sɛ iken.”

iBol ɛTaanggbey de kɛ bhɛ Hɔn iNtakiya

¹⁹ Ninaa ne roos sa kaa ne tes en shwaa ɛlɔ ne nggbang ngga ne kaa yaa baasek nibhɛ ɛtsim mɛ ne kɛ phoo ɛSitivin negha, nibhɛ kaa ne bhɛ hɔn iFinikiya, ne iKuburus gbik ne iNtakiya, nibhɛ ne i sanga ibol ɛTaanggbey de ndɔ niYahodawa zɔng.

²⁰ Nidɛng ndɔ nibhɛ wo nɛ nibhɛ kaa le ne iKuburus gbik ne iSɛrene ne phɛ ne iNtakiya, nibhɛ yaa bhɛ tɔng ninyi na nɛ ne hame nibhɛ so niYahodawa na ibol iyɛnɛng ɛDaray ɛYɛso de.

²¹ ɛDaray ya ne phyik ninaa ne roos sɛnaa nggyɛ wo, ninyi gbom ne nang ne itin nɛ, nibhɛ san ɛbɔk nibhɛ yaa roos ɛDaray yegha.

²² iBol lɛdee wo ne bhɛ hɔn itoro ne idira ninaa ne roos ne iYɛrushɛlɛm be, nibhɛ ne tom ɛBanabas se ne iNtakiya de.

²³ Kɛ ne sɛ ɛBanabas sa kɛ bhɛ tuu iNtakiya de ɛ yaang izɛɛng ngge ne ɛTaanggbey ya kɛ nang nibhɛ wo, ne ɛ yɛk irway ihwala. ɛBanabas sa ne kpɛng nibhɛ wu tɛ nibhɛ shɛɛ ndɔ ne itin ne ibol ɛDaray de ne irway nibhɛ gbik.

²⁴ ɛBanabas sa kaa ne ku so ɛnyi ɛyɛnɛng, hyɔrɔ ne iKabyik ɛTaanggbey gbik ne ìnang ne itin. Ninyi na gbom ne tes en ninaa ne roos ɛDaray yegha.

²⁵ ɛBanabas sa ne phɛ ne iTaasus de ɛbhɛ tɔk ɛShawulu ye.

²⁶ Ne sɛ ɛBanabas sa kɛ bhɛ sɛ ɛShawulu yegha ne ɛ bo ɛbhɛ nibhɛ yɛɛs ne iNtakiya de. Nibhɛ ne bo ishay idaan nibhɛ shɛɛ ne idira ninaa ne roos de nibhɛ i mɛmɛ ninyi na nɛ gbom. Ne iNtakiya de ne kaa ne tsa nɛ yaa yeres ninaa ne roos sa niKirita na.

²⁷ Nten nɛ de nggyɛ wo nidɛng ndɔ ninabawa na kaa ne le ne iYɛrushɛlɛm be nibhɛ yɛɛs ne iNtakiya de.

²⁸ ɛDɛng ndɔ nibhɛ wo ne kaa bok ɛbhɛ ɛGabus, ne ɛ yilitsik ɛ bol ɛkɔn na ne iKabyik ge kɛ mɔng ɛbhɛ ɛ yɔngɔ, wu sɛ re iyɔm ndɔ ɛzay ya gbom. iBol ɛbhɛ de kaa ne shwaak ghe nten de ne ɛKaladiyus kaa soye ɛgɔm.

²⁹ Ninaa ne roos ne iNtakiya na ne bol nibhɛ sime nɛ wu ɛrɔngɔ yaa nang ɛkɔn na ne aa yɛɛ ne nang ngɛ te i phyik ninaa ne roos ne iYahudiya na nɛ.

³⁰ Nibhɛ ne mɔn ɛlɛy, nibhɛ ji tom ɛBanabas se gbik ne ɛShawulu nɛ nikɔn na, tɛ nibhɛ nang ninu nikɔɔn ninaa ne roos ne iYɛrushɛlɛm be.