ɛTomɛ 10 - ɛWee ne ìTsɛm iHywas

ɛBiturus ne ɛKɔnɛliyas

¹ ɛDɛ ɛnyi gha kaa so ɛgarang ne iKɛsɛriya ne i bok ɛbhɛ ɛKɔnɛliyas. Ɛ kaa so ɛndiinday nisooja ne iRooma ne i yeres iphɛ ɛGuu ne iTaliya.

² ɛKɔnɛliyas sa nɛ ninaa ne ijwee ɛbhɛ gbik kaa ne i phok ɛnik ɛTaanggbey ne ɛ phyighis ninyi nihala ɛ ta i bol ne ɛTaanggbey cɛcɛɛy.

³ Kaa ne sɛ ɛdɛ ɛtuk ka ne nten de so igyɔs itat ne igbey, ɛKɔnɛliyas sa ne yaang ɛmalɛka ɛTaanggbey ndɔ iyuwa ɛ kɛ yɛɛs ɛlɔ ɛbhɛ ɛ yel-le ɛbhɛ, ɛ yɔngɔ: “ɛKɔnɛliyas!”

⁴ ɛKɔnɛliyas sa ne wum ɛnik ɛ see ɛmalɛka gha ne irwisɛ, ɛ phom ɛbhɛ ɛ yɔngɔ, “ɛDaray, ikyee lɛɛ?” ɛMalɛka gha ne kyii nɛ ɛ yaak ɛbhɛ, “ɛTaanggbey ya kɛ say ivol da ne ɛ bol nɛ ɛbhɛ wo gbik nɛ nikɔn niyɛnɛng nga ne ɛ mɔn nihala na nɛ wo. Ɛ kɛ say nibhɛ te ihap itsanga.

⁵ iPhɛ ɛlɛy ne ɛ tom ninyi ɛgarang ne iYopa tɛ nibhɛ bhɛ yel-le yɛ ɛdɛ ɛnyi gha ne i bok ɛbhɛ ɛSimɔn ɛBiturus.

⁶ Ɛ so ne ijwee ɛSimɔn ne ɛ mɔn ɛtomɛ ne ryɔng ihuhu. iJwee ɛSimɔn no ne so cɛcɛk ne ɛrenes.”

⁷ Ne sɛ ɛmalɛka gha kɛ hyel, ɛKɔnɛliyas sa ne yel-le nidɛng nikpuru ɛbhɛ na nibhɛ ifaa, ne ɛdɛ ɛsooja gha ne ɛ phok ɛnik ɛTaanggbey ɛ so ɛdɛng ndɔ ninaa ne mɔn ɛbhɛ ɛtomɛ.

⁸ Kɛ ne sɛ ɛKɔnɛliyas sa kɛ tɔng nibhɛ bol lɛ gbik, ne ɛ tom nibhɛ ne iYopa de.

⁹ Ne cwiil ihwɛlɛ yɛ ne ɛceree ne igbey, ninyi yɛ na nggyɛ wo ne ji bhɛ tuu cɛcɛk ne iYopa de. Ɛlɛy ɛBiturus sa kɛ wara dak ne ijwee ne irywa te ɛbhɛ boote ne ɛTaanggbey.

¹⁰ ɛBiturus ne te kpyak, ɛ yaa sim te ɛ sɛ re ire. Kɛ ne sɛ tɔ mɔn ire de, ne ɛ yaang iyuwa.

¹¹ Ndɔ ne iyuwa de, ne ɛ yaang irywa kɛ phaal le ɛdɛ ɛkɔn na le ne ɛdak kɛ te ɛgbaang ɛzene ɛ tɔmɔs te kɛ wum ninu nwaas sɛ i tɔmɔs nɛ ndɔ ɛzay ya.

¹² Nikɔn na kaa ne sonɛ ihywee-ihywee ndɔ ɛkɔn nɛghaa nggyɛ wo, inyam ɛhay, ihywee ne izɔ, ihywee ne ihyom gbik ihywee ninon.

¹³ ɛBiturus sa ne ji phok izɔlɔs i bok ɛbhɛ, “Yilitsik te ˆɛ phoo ɛdɛng ˆɛ re.”

¹⁴ ɛBiturus sa ne yɔngɔ, “Yɛwɛy! ɛDaray, sɔng nggɛ ku re ɛdɛ ɛkɔn na ne ɛ sang so wɛwɛy yo ne ikpii da kɛ ring ngɛ wo nang.”

¹⁵ iZɔlɔs de ne kyi ta boote ɛhaa ɛphaa yɛ, ihywɛ yaak ɛBiturus segha, “Ɛkɔn na ne ɛTaanggbey ya kɛ te ɛbhɛ wɛwɛy yo, sɔng ne ɛ yɔng wu hang ɛ so wɛwɛy yo nang.”

¹⁶ Ne mɔn ɛlɛ wo te ɛtat ne ji kyii ne ɛkɔn na ne ɛ so ɛzene gha wara nɛ dak ne irywa wo dɔng.

¹⁷ Nten de ne ɛBiturus sa so ndɔ ne tas ibol ne iyuwa de, ninyi na ne ɛKɔnɛliyas sa kɛ tom mo kɛ kyinak ɛnu ne izuk ne ijwee ɛSimɔn na, ɛtsim mɛ nɛ nibhɛ kɛ ku phomos ijwee yɛ.

¹⁸ Nibhɛ ne phom nibhɛ yɔngɔ, “Ɛbɛ ne ɛSimɔn ne yeres ɛbhɛ ɛBiturus sa sonɛ woo?”

¹⁹ Kɛ ne sɛ ne ɛBiturus sa ma tɔɔ tas ibol le iyuwa de, iKabyik ge ne yaak ɛbhɛ, “ɛBiturus, ninyi itwat sonɛ nɛ nibhɛ i tɔk kɛ.

²⁰ Yilitsik te ɛ tɔm ɛ roos nibhɛ, sɔng ɛ to irway yang mee nggɛ tom nibhɛ.”

²¹ ɛBiturus sa ne tɔm ɛbhɛ sɛ ninyi na ɛ yaak nibhɛ, “Mee nzo ɛnyi gha ne ɛ tɔk ɛn no. iKyee phɛ kɛ yɛɛs ne nyinɛn ne?”

²² Ninyi na ne yaak ɛBiturus segha, “ɛDɛ ndiinday nisooja na ne i bok ɛbhɛ ɛKɔnɛliyas ɛbhɛ kɛ tom njwii. Ɛɛ phok ɛnik ɛTaanggbey, niYahodawa na gbik i naas ɛbhɛ ne ndiinday. ɛMalɛka ne kɛ tul kang ne yaak ɛbhɛ wu te ɛ yel-le yɛ ne ijwee ɛbhɛ te ɛ tenes ibol de ne aa tɔng ɛbhɛ.”

²³ ɛBiturus sa ne leesek ninyi na ndɔ ne ijwee wo nibhɛ ra nɛ. Ne cwiil ihwɛlɛ ɛBiturus sa ne bo nikɔn ɛ kungus ninyi na, nidɛng ninaa ne roos ne iYopa na ne bhɛ hyeeng ɛbhɛ.

²⁴ Ne sɛ ihwɛlɛ yɛ nibhɛ ne bhɛ tuu iKɛsɛriya de. Ɛlɛy ɛKɔnɛliyas sa kɛ ku yeres nigwaa ɛbhɛ nɛ nitaay ɛbhɛ gbik nibhɛ so ɛlɔ ɛdaan.

²⁵ Ne sɛ ɛBiturus sa kɛ lel ne ijwee ɛKɔnɛliyas so, ɛKɔnɛliyas sa ne bhɛ ho nggbuk ɛnu ɛyisɛ ɛbhɛ ɛ nang ɛbhɛ ne ndiinday.

²⁶ ɛBiturus sa ne wum ɛKɔnɛliyas segha ɛ yiisik ɛbhɛ tsik ɛ yaak ɛbhɛ, “Yilitsik! Ma nzo ɛten ɛsii ne mang.”

²⁷ Kɛ ne sɛ ɛBiturus sa tɔ bol ne ɛKɔnɛliyas sa, nibhɛ ne lel ndɔ ne ijwee wo, ɛBiturus sa ne bhɛ sɛ ninyi na kɛ tumɛ ɛn gbom.

²⁸ ɛBiturus sa ne yaak ninyi na, nyinɛn no ɛ ku yɛɛ ɛn gbik ɛShara mos sa kɛ ring njwii niYahodawa na ne byinki ito nɛ ninyi na nɛ nibhɛ sang so niYahodawa na, ɛ ta ring njwii ne phɛ ne ijwee nibhɛ. ɛTaanggbey ya ɛbhɛ ɛ kɛ ne yaak me wu hang n yaak ɛnyi wu hang ɛ so wɛwɛy.

²⁹ iPhɛ ɛlɛy, kɛ ne sɛ kɛ tom mɛ wu te n yɛɛs so, sɔng nggɛ ne yɔng njiinjii nang. ɛLyilyɛghaa wo nzi ne sim te nzɛ seng ɛkɔn na ne ɛ kɛ yel-le ɛn mɛɛn nɛ wo.

³⁰ ɛKɔnɛliyas sa ne yɔngɔ: “Nituk kɛ kɛ hɔn nwaas izenge wo, nten de kaa ne so igyɔs ɛtat ne irwirywɛ, nggaa so ndɔ ne ijwee nge nzi bol ne ɛTaanggbey. Ne n jii yaang ɛdɛ ɛnyi gha kɛ kyinak ɛnu ɛyisɛ nge, ɛ bok itsura ihwala hyahyak.

³¹ Ne ɛ yaak me, ‘ɛKɔnɛliyas, ɛTaanggbey ya kɛ say ivol mo da ne ɛ kɛ bol ne ɛbhɛ wo. Ɛ ne tas ne izɛɛng ngge ne ɛ naas ninyi nihala na.

³² iPhɛ ɛlɛy, ne ˆɛ tom mɛ ne iYopa te bhɛ yel-le yɛ ɛSimɔn ne ne i yeres ɛbhɛ ɛBiturus. Ɛ so ne ijwee ɛdɛ ɛnyi wo ne i ma bok ɛbhɛ ɛSimɔn na ne mang. ɛSimɔn neghaa nggyɛ wo so ɛhaa ne ryɔng ihuhu, ijwee ɛbhɛ wo so cɛcɛk ne ɛrenes.’

³³ iPhɛ ne nggɛ ne shii tom mɛ nɛ wo, iphɛ kɛ ne jam mɛ ne ɛ kɛ yɛɛs so. ɛLyilyɛghaa wo, njwi ne so ɛnu ɛyisɛ ɛTaanggbey ya gbik mos, te njwi phok ɛkɔn na ne ɛ kɛ yɛk kɛ nɛ te ɛ mɔng njwii.”

ɛBiturus sa Kɛ Boote nɛ Ninyi Na

³⁴ ɛBiturus sa ne tsa ivol ba, ne ɛ yɔngɔ, “ɛLyilyɛghaa wo nggɛ ne ji seng, sɔng ɛTaanggbey ya bok sim ito nang

³⁵ ɛTaanggbey ya phok iyɛnɛng ɛhiha ɛnyi ne ɛ phok ɛnik ɛbhɛ ɛ ta hyel cik ndɔ ne igbagha ɛzay yo gbik.

³⁶ Ɛ yɛɛ ɛn ibol de ne ɛ kaa tom niSɛrɛla na nɛ wo, iphɛ phɛ so ibol iyɛnɛng ne irway ne laal da ne ɛYɛso ɛKiriti gha kaa yɛɛs nɛ wo. ɛYɛso ɛKiriti gha ɛbhɛ ne ɛ so ɛDaray ninyi na gbik.

³⁷ Ɛ yɛɛ ɛn ɛli ne ibol lɛ kaa shwalat ne ivel ne iYahudiya da gbik ko. iPhɛ kaa tsa ne iGalili ɛtsim mɛ ne ɛYohana gha kaa tɔng ninyi na ibol ne ibatisima de.

³⁸ Ɛ yɛɛ ɛn ɛli ne ɛTaanggbey ya kaa sit ɛYɛso ne iNazarat tegha ne iKabyik ɛTaanggbey ne ihwet da. ɛYɛso gha kaa ne roos nilɔ na gbik ɛɛ mɔn nikɔn niyɛnɛng ɛ ta tes ninaa ne ɛShɛtan na kaa bok ito de daa nibhɛ wo niken, daa ɛli ne ɛTaanggbey kaa so ne ɛbhɛ.

³⁹ “Njwit to, njwi kaa ne sonɛ njwi yaang nikɔn na ne ɛYɛso gha kɛ mɔn ne iYahudiya de gbik ne iYɛrushɛlɛm be. niYahodawa na kaa ne phoo ɛYɛso yegha nibhɛ gangat ɛbhɛ dak ne ihon.

⁴⁰ Gbik ne iphɛ ɛlɛy, ne sɛ ɛtuk ne itwat tɛ ɛTaanggbey ya ne yiisik ɛYɛso yegha tsik ɛ tɔɔrek ɛbhɛ kpas.

⁴¹ Sɔng ninyi gbik nibhɛ kaa ne yaang ɛYɛso yegha nang. Njwit to zɔng ne ɛTaanggbey ya kaa ku kasa njwi wo te njwi yaang ɛbhɛ njwi tɔng ibol lɛ wo, njwi kaa ne re njwi sɔ ne ɛbhɛ ɛtsim mɛ ne ɛ kɛ yilitsik ne ikpuu da.

⁴² ɛYɛso gha kaa ne yɛk njwii nɛ te njwi tɔng ninyi na ɛnu ne bol ɛbhɛ gha, te njwi ta tɔɔrek nibhɛ wu ɛYɛso gha ne ɛTaanggbey ya kɛ kasa, ɛbhɛ sɛ bol ninyi na nɛ nibhɛ kɛ kus nɛ ninaa nibhɛ sonɛ niken na ɛshara.

⁴³ ɛNyi yɛghaa nggyɛ wo nɛ ninabawa na gbik kɛ ne tɔng ibol lɛ wu gbik ɛnyi gha ne ɛ kɛ nang ne itin nɛ, sɛ ne hana ɛbhɛ ne ɛfɔt ɛbhɛ wo lenɛ ne irywɛɛk ɛYɛso wo.”

Kɛ Nang Ninyi na nɛ nibhɛ Sang so niYahodawa na iKabyik ɛTaanggbey

⁴⁴ Kɛ ne sɛ ɛBiturus sa tɔ bol, iKabyik ɛTaanggbey de ne tɔm dak ninyi na gbik nɛ nibhɛ tenes ibol ɛbhɛ de.

⁴⁵ niYahodawa na nɛ nibhɛ soye ninaa ne roos sa nɛ nibhɛ le ne iJoopa de nɛ niBiturus se na, ne wum en zii ɛtsim mɛ nɛ nibhɛ kɛ yaang kɛ ma kɛ ma sit ninyi na ne hame nibhɛ so niYahodawa na ne izɛɛng ne iKabyik ɛTaanggbey de.

⁴⁶ Daa ɛli nɛ nibhɛ kaa phok nibhɛ kɛ yaa bol ne ihwak ilwem kang nibhɛ dɛp ɛTaanggbey ye. ɛBiturus sa ne yɔngɔ:

⁴⁷ “ɛNyi sonɛ ne aa ring ne yɛk ninyi yɛnaa wo ne ibatisima inɛn dee? iPhɛdee kɛ ma nang nibhɛ iKabyik ɛTaanggbey de ɛli ne kaa ma nang njwɛɛn no.”

⁴⁸ iPhɛ ɛlɛy ɛBiturus sa ne yɛk ngɛ i yɛk nibhɛ ne ibatisima de ndɔ ne irywɛɛk ɛYɛso ɛKiriti wo. Nibhɛ ne roo ɛbhɛ wu te ɛ kyi bonɛ nituk bɔbɔk te ɛ phyɔngɔle nɛ nibhɛ.