ɛTomɛ 1 - ɛWee ne ìTsɛm iHywas

iBol ne Nang iKabyik ɛTaanggbey

¹ iGyɛ ne ndiinday ɛTiyɔfɔlɔs. Ndɔ ne ɛwee ɛyisɛ wo ne nggaa haa yɛnɛ wo, nggaa ne haa yɛ nikɔn na gbik ne ɛYɛso gha kaa tsa ɛ mɔn, nɛ ninaa ne ɛ kaa mɛmɛ nɛ.

² Phyii bhɛ hɔn igbey yo ne ɛTaanggbey ya kɛ bo ɛbhɛ ɛ phɛ nɛ dak ne irywa, ɛtsim mɛ ne ɛ kɛ mɔng ninɔn ne tom ɛbhɛ na ɛkɔn na nɛ nibhɛ yaa mɔn lenɛ iKabyik ɛTaanggbey de.

³ Ɛtsim ne iku ɛbhɛ gha, ɛ kaa ne bhɛ tɔɔrek ito ɛbhɛ ɛlɔ ninyi yɛnaa nggyɛ wo ɛ mɔn nikɔn na gbom tɛ nibhɛ seng ncɛncɛng wu ɛ so ɛken. Ɛ kaa ne bo nituk nzuwubɔ nwaas ɛ mɔɔng ɛbhɛ wuru nibhɛ ɛ bol nɛ nibhɛ ibol ne igbɔm ɛTaanggbey da.

⁴ Kaa ne sɛ ɛdɛ ɛtuk kɛ nɛ nibhɛ re ire, ɛYɛso gha ne boote, ɛ yaak nibhɛ, “Sɔng ɛ tek ɛn iYɛrushɛlɛm be nang. Hyep ɛn te kyi shwaak ɛkɔn na ne ɛKyɛɛ nge gha kɛ ku sim-mɛ wo nyɛɛn, ɛli ne nggɛ ku tɔng nyini wo.

⁵ ɛYohana gha kaa Yaak ne iBatisima de ne inɛn, nituk kɛ kɛ ne mak bɔbɔk ne ya yaak nyini ne ibatisima de ne iKabyik ɛTaanggbey.”

Kɛ Bo ɛYɛso yegha Yek ghe nɛ Daa ne iRywa

⁶ Kɛ ne sɛ ninɔn ne tom ma sonɛ niYɛso yena, nibhɛ ne phom ɛYɛso yegha, nibhɛ yɔngɔ, “ɛDaray, ɛlyilyɛghaa wo, ne aa ji phɔt niSɛrɛla na ɛ nang nibhɛ igbɔm baa?”

⁷ ɛYɛso gha ne yaak nibhɛ, “ɛKyɛɛ nge gha zɔng ɛbhɛ bok igbɔm ne yɛk nɛ nituk ka ne nten nɛ, sɔng iphɛ so nggbinggbing ɛ yɛɛ ɛn nang.

⁸ Ɛ sɛ ne sɛ ɛn ihwet ne sɛ́ sɛ iKabyik ɛTaanggbey de kɛ yɛɛs nyini wo, ɛ sɛ ne sanga ibol nge de ne iYɛrushɛlɛm, ne iYahudiya, ne iSamariya, ne ɛgak ɛzay yo gbik.”

⁹ Ne sɛ ɛ kɛ boote ɛlɛ wo, ne bo ɛYɛso yegha ɛnu ɛyisɛ nibhɛ phɛɛs nɛ daa ne irywa. Idɛ inɔp be ne cwaal ɛbhɛ, sɔng nibhɛ tang yaang ɛbhɛ nang.

¹⁰ Kɛ ne sɛ ɛli nɛ nibhɛ kɛ see irwisɛ da daa ne irywa wo nibhɛ wɛɛ ɛli ne ɛ hyel lo, ninyi ifaa nɛ nibhɛ bok itsura ihwala ne shii yɛɛs nibhɛ kyinak cɛcɛk nɛ nibhɛ.

¹¹ Nibhɛ ne yɔngɔ, “Ninyi ne iGalili iKyee phɛ kɛ te ɛ kɛ kyinasek ɛn ɛbɛ woo ɛ wɛɛ ɛn ɛdaa ne irywa woo? Kɛ bo ɛYɛso yeghaa i hyel lɛ phɛɛs nɛ daa ne irywa, ɛhak ɛtuk, ɛ sɛ ne bhɛ kyii ɛli ne ɛ kɛ yaang ɛn ihywel lɛ wo.”

Kɛ Kasa ɛMatayas Se te Ɛ Bo ɛTomɛ ɛYahuza

¹² Ninɔn ne tom ma ne tek igol de ne i bok iphɛ ne iGol Niphaa de nibhɛ kyii ne iYɛrushɛlɛm. iHywel lɛ kaa ne so cɛcɛɛy ne ihywel ɛtuk ne iWɛsɛ. iFɛ sɛɛ hɔn ngguk ne imɛɛl.

¹³ Ne sɛ nibhɛ kɛ bhɛ tuu ndɔ ɛgarang nga, nibhɛ ne bhɛ wara dak ne ijwee ne irywa wo nɛ nibhɛ ku shɛɛ nɛ wo. Ninaa nibhɛ kaa sonɛ wo: ɛBiturus, ɛYohana, ɛYakub, ɛNdarawus, ɛFilibus, ɛToma, ɛBatɔlɔmi, ɛMacu, ɛYakub ne ɛ so ɛngɔn ɛLifiyos, ɛSimɔn ne ɛ kaa sim ɛgarang ɛbhɛ gbom, ne ɛYahuza ne ɛ so ɛngɔn ɛYakub.

¹⁴ Ninyi yɛnaa wo ne nang ito nibhɛ, nibhɛ ne byinkit nibhɛ roro. Nidɛng nikuk ka kaa ne ma sonɛ, ɛMɛri gha ne ɛ so ɛgyinɛ ɛYɛso gha, nɛ nigwaa ɛYɛso na niras se kaa ne ma sonɛ.

¹⁵ Kaa ne sɛ ɛdɛ ɛtuk kɛ ninaa ne roos sa ne tumɛ ɛn. Nibhɛ kaa ne hɔn ninyi ikɔl idaan ne nzuwubɔ ifaa gbik. ɛBiturus sa ne yilitsik ɛ yɔngɔ,

¹⁶ “Nigwaa en, iphɛ so ngbingbing i shwaak ibol ne ɛWee ne iBol ɛTaanggbey yo ne iKabyik ɛTaanggbey de kɛ bol ɛnu ɛDoda gha ne ito ɛYahuza de, ne ɛbhɛ kaa tɔɔrek ɛYɛso yegha i wum mo.

¹⁷ ɛYahuza gha kaa ne so ɛdaan ndɔ njwɛɛn no, ɛ kaa ne bok ɛhaa ɛbhɛ ɛtomɛ ndɔ ɛtomɛ njwɛɛn na.”

¹⁸ ɛYahuza gha kaa ne bo ijam ne ibebhe ɛbhɛ de ɛ say ne ihwap, daa ne ifɛ ne ɛ kaa ne kyi ho nɛ ne ito, ibuu yɛ tasat, ila yɛ wuru ne izay gbik.

¹⁹ iBol ne iku ɛYahuza de kaa ne shwalat ndɔ ne iYɛrushɛlɛm be gbarang, nibhɛ ne yaa yeres ihwap pɛ ne ilem nibhɛ de “iKɛdama” kaabi i bo, “iHwap neyi.”

²⁰ ɛBiturus sa ne re ɛnu ɛyisɛ ɛ yɔngɔ, “Kɛ ku haa ndɔ ne ɛwee ne iBol ɛTaanggbey i bo, ‘Te ijwee ɛbhɛ wo teye ihoo ne hap ɛtaba, sɔng ɛnyi tang shɛɛ nɛ ne ijwee yɛ nang.’ ” Kɛ ne ta haa i bo, “Te ɛhak ɛnyi say ɛtomɛ ɛbhɛ gha.”

²¹ “iPhɛ ɛlɛy yang, iphɛ ne so ngbingbing njwɛɛn kasa ɛdɛng ndɔ ninyi na ne ɛ ku so ne njwɛɛn nten de ne ɛDaray ɛYɛso gha kɛ so ne njwɛɛn no.

²² iPhɛ kɛ jam mɛ te ɛnyi yɛ so ɛhaa ne njwɛɛn ku sonɛ nibhɛ lenɛ nten de ne ɛYohana gha kaa yɛk ɛYɛso yegha ne iBatisima de, phyin bhɛ hɔn nten de ne kɛ bo ɛbhɛ i phɛ nɛ dak ne irywa wo. ɛNyi gha ne yaa ne kasa wo nang, njwɛɛn ne yaa ne tɔng ibol ne yilitsik ne ikpuu ɛYɛso da ne nibhɛ.”

²³ Nibhɛ ne bo ninyi ifaa: ɛYisifu ne bok ɛbhɛ ɛBasabas ne ta yeres ɛbhɛ ɛYɔsitɔs nibhɛ ne ɛMatayas.

²⁴ Nibhɛ ne roo nibhɛ yɔngɔ: “ɛDaray, igyɛ ɛ yɛɛ irway ninyi da gbik. Tɔɔrek njwii ɛnyi gha ne ˆɛ kɛ kasa ndɔ ninyi ifaa yɛnaa wo,

²⁵ ne aa teye ɛNgɔn ne tom ma, te ɛ bo ɛlɔ ne soos ɛYahuza gha ne ɛ kɛ tek ɛ yek ghe ɛlɔ gha ne ɛ ku so ɛhaa ɛbhɛ gha.”

²⁶ Nibhɛ ne kasa ikasa da, iphɛ ne ho daa ne ito ɛMatayas. Ne ɛ teye ɛngɔn ne Tom ɛ hantey yɛdaa nibhɛ ɛnduwubɔ ne ɛnyi ɛdaan na.