ɛMarakus 9 - ɛWee ne ìTsɛm iHywas

¹ ɛYɛso gha ne ta yaak nibhɛ, “iTin nɛ ne naa mɔng nyini, ɛbyin mon so ɛbɛ wo ne sɔng nibhɛ sɛ kus sang nyɛɛn nibhɛ yaang igbɔm ɛTaanggbey da yaaso ndɔ ne ito-ndiinday de nang.”

iBek ɛYɛso de kɛ Hyereey

² Kɛ ne sɛ nituk ɛtaraa kɛ phee ye ɛYɛso gha ne bo ɛBiturus se, ne ɛYakub, gbik ne ɛYohana nibhɛ ne phɛ daa ɛco ne idɛ ɛgbaang ne ɛwarang ngo nibhɛ nggenggerey. Ne sɛ ɛli nɛ nibhɛ so ɛnggyɛy yo nang nibhɛ ne yaang ibek ɛYɛso de kɛ hyereey.

³ iTsura ɛbhɛ ne ma hyereey ifɛ te ihwala yɛ hyahyak ɛli ne hame ɛten ɛsii sɛ yɛɛ ne kuus ifɛ, ifɛ te ɛlɛy.

⁴ Ninɔn ne icwam mɛnaa nggyɛ wo ne yaang ɛLiya ye ne ɛMuusaa nibhɛ bol ne ɛYɛso gha.

⁵ ɛBiturus sa ne shii yaak ɛYɛso yegha, “ɛKyɛɛ! iPhɛ kɛ jam mɛ ne njwi so ɛbɛ wo. Njwi yaa ta nyini ifo ifɛ icwat. iPhɛ idaan yaaso idee mo idɛng ne so idee ɛMuusaa idɛng ne ji so idee ɛLiya de.”

⁶ ɛBiturus sa kɛ boote ɛlɛ wo daa ɛli nɛ nibhɛ kɛ ku shii wum ɛnik gbom nibhɛ ne yaa tɔk ɛkɔn negha nɛ nibhɛ yaa bol nzeet.

⁷ iNɔp ne shii yɛɛs iphɛ cwaal niYɛso yena, ne ji phok idɛ izɔlɔs de kɛ yaa bol nɛ ndɔ yɛ ihywɛ bo, “ɛNgɔn ngeghaa wo ɛhaa ne n nzi sim ɛbhɛ, roos ɛn ibol ɛbhɛ de.”

⁸ Nibhɛ ne shii yɛɛn, sɔng nibhɛ ne yaang ɛnyi dɔng nang, ɛYɛso gha kɛ mak nggenggerey.

⁹ Kɛ ne sɛ nibhɛ kɛ bo nikɔn nibhɛ tɔmɔs en ɛYɛso gha ne kpɛngke nibhɛ ɛ yaak nibhɛ, “Sɔng ɛ mɔng ɛn ɛnyi ɛkɔn na ne ɛ kɛ yaang ɛn no nang. Tek ɛn ɛ hyep ɛn nten de ne mee ne ɛNgɔn ɛNyi gha nggɛ yilitsik ndɔ ne ikpuu ba nyɛɛn.”

¹⁰ iPhɛ ɛlɛy yang nibhɛ ne wum ibol lɛ ndɔ nibhɛ, nibhɛ ne kyi ta i phomos en nibhɛ bo, “iKyee phɛ so yilitsik ndɔ ne ikpuu ba lɛɛ?”

¹¹ Nibhɛ ne lenɛ ne icwas sɛdaa nggyɛ wo, nibhɛ ne phom ɛYɛso yegha nibhɛ yaak ɛbhɛ, “iKyee iphɛ kaa ne te ninaa ne kpɛl ɛshara na kaa yɔng wu ɛLiya gha sɛ kyi tsa ɛ yɛɛs so nyɛɛn ɛDaray ya kyi yɛɛs soo?”

¹² ɛYɛso gha ne kyii nɛ ɛ yaak nibhɛ, “iPhɛ so ɛtsak ne kɛ haa ndɔ ne iWee ne ibol ɛTaanggbey yo i bo wu ɛLiya gha se tsa ɛ yɛɛs so ɛ ryɔng nikɔn na. Kɛ ne ma ta haa i bo wu ɛNgɔn ɛNyi gha sɛ ne sɔ nggbang ngga hywee-hywee, ne ta mbaray ɛbhɛ. Hang ma sang so ɛ ɛlɛy naa?

¹³ Naa tɔng ninyi, ɛLiya gha kaa ne yɛɛs, ninyi na ne mɔn ɛbhɛ ne ihywee ɛkɔn de nɛ nibhɛ kɛ sim. Nibhɛ kaa ne mɔn ɛbhɛ ɛli ne kaa ku haa i bo iphɛ sɛ te wo.”

ɛYɛso gha kɛ Tul Niphoo ndɔ ɛNgɔn

¹⁴ Kɛ ne sɛ niYɛso yena kɛ kyii nibhɛ phɛɛs ne tuu ɛlɔ gha ne ɛbyin ninɔn ne icwam ɛbhɛ na sonɛ wo nang, nibhɛ ne yaang idira ninyi de kɛ cwaal ninɔn ne icwam ɛbhɛ na gbom; nidɛng Ninaa ne kpɛl ɛShara na jung dad ishamas nɛ nibhɛ.

¹⁵ Kɛ ne sɛ ninyi na kɛ seng ɛYɛso yegha nang, iphɛ ne teye nibhɛ ɛkɔn ne kparat. Nibhɛ ne tel nibhɛ bhɛ kyili ɛbhɛ.

¹⁶ ɛYɛso gha ne phom ninɔn ne icwam ɛbhɛ na ɛ yaak nibhɛ, “iShamas nggyɛ ne ɛ dad ɛn nɛ ninyi yɛnaa woo?”

¹⁷ ɛDɛng ndɔ ninyi yɛnaa nggyɛ wo ne yaak ɛYɛso yegha, “ɛKyɛɛ, nggɛ yɛɛs te nang ngɛ ɛngɔn ngeghaa bɛ ne ɛphoo so ndɔ ɛbhɛ. Ɛ kɛ te ɛbhɛ ɛ kɛ te nkpɔy.

¹⁸ Yaa sɛ ɛ kɛ yɛk ɛbhɛ nɛ wo nang, ne ɛ cwaak ɛbhɛ ne ivel ɛ yaa re izinɛ ɛ tuul ifurum ɛnu, ɛ te tsey. iPhɛ ne nggɛ ne roo nɛ ninɔn ne icwam mo na tɛ nibhɛ tul ɛphoo gha, sɔng nibhɛ kɛ ne yɛɛnɛ nang.”

¹⁹ ɛYɛso gha ne boote ɛ yaak ninyi na, “Nyinɛn ninaa ne sang inang ne itin ne izam mɛnaa, ishwɛɛ nge da ne nyinɛn no sɛ hɔn nyini ne nggyibhii? ɛBɔk nge gha ne nyinɛn no sɛ bhɛ hɔn nggyibhii? Nang ɛn mɛɛn ɛngɔn na ɛbɛ.”

²⁰ Nibhɛ ne bo ɛngɔn na nibhɛ nang ɛYɛso yegha. Kɛ ne sɛ ɛli ne ɛphoo gha kɛ seng ɛYɛso yegha nang ne ɛ shii subhusi ɛngɔn na, ɛ yinɛ ɛbhɛ ɛ cwaak ɛbhɛ ne ivel. ɛNgɔn na yaa cwis ne ikpayaa ɛ tuul ifurum ɛnu.

²¹ ɛYɛso gha ne phom ɛkyɛɛ ɛngɔn na ɛ yaak ɛbhɛ, “Ɛ kɛ tsa ɛkɔn nɛghaa wo ne nggyibhii lɛɛ?” ɛKyɛɛ ɛngɔn na ne yaak ɛbhɛ, “Ɛ kaa ku tsa ɛli ne ɛ kaa tɔ ncɛt.

²² Niphoo na i mɔɔng nibhɛ cwaak ɛbhɛ ndɔ ne igboo, nibhɛ ne mɔɔng nibhɛ cwaak ɛbhɛ ndɔ inɛn daa ɛli nɛ nibhɛ sim tɛ nibhɛ sɛ phoo ɛbhɛ. Maa san iyɔm mos te ɛ te ɛbhɛ ɛken wu aa yɛɛ nɛ.”

²³ ɛYɛso gha ne yaak ɛkyɛɛ ɛngɔn na, “ɛYakɔn bhɛ kɛ te ɛ bok me wu naa yɛɛ nɛ woo? Sɔng ɛkɔn i bɛ ɛnyi gha ne ɛ kɛ nang ne itin nɛ wo nang.”

²⁴ ɛKyɛɛ ɛngɔn na ne shii yaak ɛYɛso yegha, “Nggɛ nang ne itin nɛ, ne ɛ phyik me te ne n da hante ne nang ne itin de!”

²⁵ Ne sɛ ɛYɛso kɛ yaang ɛli nɛ ninyi na kɛ ya tumɛy ɛlɔ ɛbhɛ gha nang ne ɛ shii sit ɛphoo gha ne ɛbung ɛ yaak iphɛ, “iGyɛ ne ikabyik ne irwan ne ikabyik igbɔy, nzi bok kɛ wuru te ɛ tek ibek ɛngɔn nɛdee wo, sɔng ɛ tang lel ndɔ ɛbhɛ dɔng nang.”

²⁶ ɛPhoo gha ne ta ikun ɛ ta subhusi ɛngɔn na ɛ ji wuru ndɔ ɛbhɛ. ɛNgɔn na ne te lɔɔm te ikom ninyi na ne yaa bo, “ɛNgɔn na kɛ ku.”

²⁷ ɛYɛso gha ne jung wum ɛbhɛ iwɔ ɛ yinɛ ɛbhɛ, ɛngɔn na ne yilitsik ɛ kyinak.

²⁸ Kɛ ne sɛ ɛYɛso gha kɛ bhɛ lel ndɔ ne ijwee nang ninɔn ne icwam ɛbhɛ na ne phom ɛbhɛ nibhɛ yaak ɛbhɛ, “iKyee phɛ kɛ te njwi kɛ doo ne tul ɛphoo gha ndɔ ɛngɔn naa lɛɛ?”

²⁹ ɛYɛso gha ne kyii nɛ ɛ yaak nibhɛ, “Sɔng shii i tul ɛphoo gha ɛlɛ nang, i roo ne ɛTaanggbey nyɛɛn ne ɛ ji wuru.”

ɛYɛso gha kɛ ta Mɔng iBol ne iKu Ɛbhɛ de Dɔng

³⁰ niYɛso yena ne tek ɛlɔ yɛghaa nggyɛ wo nibhɛ hyel nibhɛ phyii bhɛ phee ndɔ ne ivel ne iGalili. Sɔng ɛYɛso ne i sim te ɛnyi sɛ seng ɛlɔ gha nɛ nibhɛ sonɛ nang,

³¹ daa ɛli ne ɛ kɛ ku i mɛmɛ ninɔn ne icwam ɛbhɛ na nɛ ɛ bok nibhɛ, “Sɛ rɛp me ndɔ ne iwɔ ninyi, nibhɛ sɛ ne phoo me sɛ ne sɛ ɛtsim ne nituk itwat n nzɛ ne yilitsik ndɔ ne ikpuu ba.”

³² Sɔng nibhɛ ne seng ibol de ne ɛYɛso gha bol lo nang, nibhɛ ne kyii phok ɛnik ne phom ɛbhɛ.

ɛHay ɛbhɛ Phyin ne iGbom Bee?

³³ ɛYɛso gha nɛ ninɔn ne icwam ɛbhɛ na ne bo nikɔn nibhɛ phɛ ndɔ ɛgarang ne iKafanahum. Kɛ ne sɛ nibhɛ kɛ lel ndɔ ɛgarang nga nang nibhɛ ne phɛ ndɔ ne ijwee. ɛYɛso gha ne ji phom ninɔn ne icwam ɛbhɛ na ɛ yaak nibhɛ, “iShamas nggyɛ ne ɛ bok no dek?”

³⁴ Ninɔn ne icwam ɛbhɛ na ne yaa shɛɛ nggbyak. Nibhɛ kɛ ku i reye ne ishamas de nkiinɛ daa ɛhaa ne ɛ phyin ne igbom.

³⁵ ɛYɛso gha ne soos ɛ yel-le ninɔn ne icwam ɛbhɛ na ɛnduwubɔ nɛ ninyi ifaa na ɛ yaak nibhɛ, “ɛNyi gha ne ɛ sim te ɛ sɛ teye ɛhaa ɛyisɛ yɛwo nang, te ne ɛ teye ɛtsim mɛ, ɛkpuru ninyi na gbik.”

³⁶ Ne ɛ bo ɛdɛ ɛnyinyɔn na ɛ tek ɛceree nibhɛ. Ne ɛ yinɛ ɛbhɛ ɛ ji yaak nibhɛ,

³⁷ “ɛHiha ɛnyi ne ɛ kɛ say ɛnyinyɔn neghaa lenɛ ne irywɛɛk nge wo nang, mee ne ɛ kɛ ne say. ɛHaa ne ɛ kɛ ne say me wo, sɔng mee ne ɛ kɛ ne say zɔng nang, ɛ kɛ ma phyii say ɛKyɛɛ nge gha ne ɛ kɛ tom me wo.”

ɛNyi gha ne Ɛ Sang Bok iPhup be ne Njwɛɛn no Ɛ Soye ɛHaa Njwɛɛn

³⁸ ɛYohana gha ne yaak ɛbhɛ, “ɛKyɛɛ, njwi kɛ sɛ ɛdɛ ɛnyi gha ɛ tuul niphoo ndɔ ne irywɛɛk mo wo, njwi kɛ ne ring ɛbhɛ nɛ daa ɛli ne hame ɛ so ndɔ njwɛɛn.”

³⁹ ɛYɛso gha ne kyii nɛ ɛ yaak nibhɛ, “Sɔng ɛ ring ɛn ɛbhɛ nɛ wo nang. Sɔng ɛdɛ ɛnyi gha sɛ mɔn nikɔn ne kparat ta ndɔ ne irywɛɛk nge wo ɛ kyii shii phyɔngɔle ɛ yaa bol ivol ba ikpɛɛ daa ne ito nge de nang.

⁴⁰ ɛHiha ɛnyi ne hame ɛ mbaray njwɛɛn, ɛ so ɛhaa njwɛɛn.

⁴¹ Nzi tɔng nyini itin nɛ, ɛnyi gha ne ɛ kɛ nang nyini inɛn ne so ɛhyihyangas daa ɛli ne ɛ so ɛn ninaa ɛKiriti na, iphɛ ne so nggbinggbing ɛ sɛ ɛwɛng ɛbhɛ.”

Nikɔn na nɛ Nibhɛ sɛ Nang ɛNyi gha iKyibhɛ

⁴² iPhɛ sɛ teye ɛkɔn ne san iyɔm daa ɛhiha ɛnyi ne ɛ kɛ teye ikɛɛ ne kyibhɛ ɛdɛ haa ne roos nge gha. iPhɛ sɛ ma yung so ɛbhɛ te sɛ yɔng kɛ bo ikɛɛ ne hɔng nkpana i rop ɛbhɛ nɛ ne ntsuuntsɔ ji cwaak ɛbhɛ ndɔ ɛling.

⁴³ Wu iwɔ ijwaan mo wo ifɛ sɛ teyɛ ɛ mɔn ɛfɔt to nang, ne ɛ hyɛ ifɛ ɛ hana. iPhɛ kɛ jam mɛ ɛ sɛ iken ne inat de ne iwɔ ijwaan no ne aa bhɛ lel ndɔ ne ijwee ne igboo wo ne ibɔ mo de gbik ko.

⁴⁴ [“Ndɔ ɛnggyɛ wo nang, itsutsuu ne inat sɛ ne i re nibhɛ, igboo ne ta i re dɔng sɔng ifɛ sɛ ne kuuy nang.”]

⁴⁵ Wu icwa ijwaan mo wo ifɛ sɛ teyɛ ɛ mɔn ɛfɔt to nang, ne ɛ hyɛ ifɛ ɛ hana. iPhɛ kɛ jam mɛ ɛ sɛ iken ne inat de ne icwa ijwaan no ne aa bhɛ lel ndɔ ne ijwee ne igboo wo ne ita mo de gbik ko.

⁴⁶ [“Ndɔ ɛnggyɛ wo nang, itsutsuu ne inat sɛ ne i re nibhɛ, igboo ne ta i re dɔng, sɔng ifɛ sɛ ne kuuy nang.”]

⁴⁷ Wu irisɛ idaan mo iphɛ sɛ ne teyɛ ɛ mɔn ɛfɔt to nang, ne ɛ tul iphɛ ɛ hana. iPhɛ kɛ jam mɛ ɛ sɛ ikɛn ne inat de ne irisɛ idaan de ne aa bhɛ lel ndɔ ne ijwee ne igboo wo ne irwisɛ mo da gbik ko.

⁴⁸ ɛNggyɛ wo nang, itsutsuu ne inat sɛ ne i re nibhɛ, igboo ne ta i re dɔng, sɔng ifɛ sɛ ne kuuy yang.

⁴⁹ “Sɛ bo igboo i kuus ninyi na nɛ ɛli ne bo ngkal ba i hap ne itsanga de.”

⁵⁰ “Ngkal ba kɛ jam, yaa ne sɛ mpɛ kɛ bees se yaa ne tang ryɔng mpɛ ne ikyee? Ne ɛ boos ɛn ìtsɛm be ne ihywɛ so nggɔnggɔɔt te ngkal ndɔ mon no. Ne ɛ shɛɛ ɛn ncaang nɛ nigwaa mon na.”