ɛMarakus 6 - ɛWee ne ìTsɛm iHywas

Ninyi ne iNazarat Kɛ Mbaray ɛYɛso Yegha

¹ ɛYɛso gha ne tek ɛlɔ yeghaa nggyɛ wo ɛ phɛ ne iNazarat ne ɛ soye ɛgarang ɛbhɛ. Ninɔn ne icwam ɛbhɛ na ne roos ɛbhɛ.

² Kɛ ne sɛ ɛtuk ne wɛsɛ niYahodawa na kɛ tuu nang, ɛYɛso gha ne bhɛ lel ndɔ ne itɔɔy niYahodawa de ɛ yaa mɛmɛ ninyi na nɛ. Ninyi na kaa ne sonɛ gbom nɛ nibhɛ tenes ɛbhɛ wo. Kɛ ne sɛ nibhɛ kɛ phok ibol ɛbhɛ de nang, nibhɛ ne yaa wɛɛ ɛbhɛ zii. Nidɛng ne ji boote nibhɛ yɔngɔ, “ɛNyi yɛghaa wo le ne ishweng ngɛdaa wo ɛbii? iYa ihywee ne ishweng ne ɛTaanggbey ya kɛ ji nang ɛbhɛ ɛlɛ wo, ne ɛɛ mɔn nɛ nikɔn ne kparat ta ɛlɛ woo?

³ Njwii ma bo ɛhaa ne gangat nikɔn nɛnaa wo nang? Ɛbhɛ ɛ so ɛngɔn ɛMɛri gha nang? Ɛbhɛ ma so ɛgwaa niYakub bhe ne ɛYisifu gha, ne ɛYahuza, gbik ne ɛSimɔn na nang? Nigwaa ɛbhɛ nilyilyap pɛ ma so ɛbɛ wo nang?” iPhɛ ɛlɛy yang, nibhɛ ne phu irway ne ɛYɛso gha.

⁴ ɛYɛso gha ne yaak nibhɛ, “Ninaa nihak nigarang i naas ɛNɛbi gha ne ndiinday. Sɔng ninaa ɛgarang ɛbhɛ nɛ nigwaa ɛbhɛ i ne nang ɛbhɛ nɛ nang.”

⁵ iPhɛ ɛlɛy yang, sɔng ɛYɛso gha kaa ne yɛɛ ne mɔn nikɔn ne kparat ta ɛgarang ngɛghaa nggyɛ wo nang. Nidɛng nisha na ncɛt ne ɛ kaa shii dat nibhɛ, nibhɛ tes niken zɔng.

⁶ ɛYɛso gha ne yaang ɛkɔn ne kparat daa ne yɔm ne say ibol nibhɛ de. ɛYɛso gha ne leesel ndɔ nigarang nga nɛ nibhɛ so cɛcɛk ɛnggyɛ wo, ɛ mɛmɛ ninyi na nɛ.

ɛYɛso gha kɛ Tom Ninɔn ne iCwam Ɛbhɛ Na

⁷ Ne ɛ yel-le ninɔn ne icwam ɛbhɛ, ɛnduwubɔ nɛ ninyi ifaa na, ɛ nang nibhɛ ito ne tuul ikpabyik niphoo, ne ɛ ji byingis nibhɛ ifaa-ifaa ɛ tom nibhɛ.

⁸ Ɛ yaak nibhɛ, “Sɔng ɛ boos ɛn ɛkɔn te ire, ne irambak, ne ijam ndɔ ne ihywel lɛdaa wo nang. ɛNtsɛng zɔng ne aa boos ɛn.

⁹ Yɛk ɛn ne ikpikpangat, sɔng ne ɛ boos ɛn ɛhak ɛtura nang.

¹⁰ iJwee wo ne kɛ bhɛ say nyini nɛ, shɛɛ ɛn nɛ ndɔ yɛ ɛ hyep ɛn ɛtuk ka ne aa tek ɛn ɛgarang ngɛ.

¹¹ Yaa ne sɛ ɛlɔ gha nɛ ninyi yɛ kɛ bhɛ mbaray nyini nɛ, nibhɛ ta mbaray tang phok ibol mon de, ne ɛ wuru ɛn ɛ te ɛn ɛbung ne ita mon kokok. ɛBung ngɛghaa nggyɛ wo ɛbhɛ sɛ ne wum nibhɛ.”

¹² iPhɛ ɛlɛy yang, ninɔn ne icwam ma ne leesel ndɔ nigarang nga nibhɛ sanga ibol ɛTaanggbey de, nibhɛ bok ninyi na wu tɛ nibhɛ san ɛbɔk.

¹³ Nibhɛ ne tuul niphoo na ndɔ ninyi na, nibhɛ ne ta sirit ninaa ne ishwa na ne nɔɔy nibhɛ tes nibhɛ niken.

Kɛ phoo ɛYohana ne Yaak ne iBatisima Ye

¹⁴ ɛGɔm ɛHyiridus sa ne ma phyii bhɛ phok ibol lɛ, daa ɛli ne ngka ɛYɛso de kɛ shwalat gbarang. ɛByin ninyi na kaa yaa bol nibhɛ bo, “Maa so ɛYohana ne Yaak ne iBatisima ne ɛ kɛ bhɛ kyii ndɔ ne ikpuu da, iphɛ phɛ kɛ ne te ɛ bok ito ne mɔn nikɔn ne kparat tɛnaa wo.”

¹⁵ Nidɛng ne yɔngɔ, “ɛLiya ghaa wo.” Nidɛng ne ta yɔngɔ, “Maa so ɛdɛ ɛnɛbi ne ile yɛghaa wo.”

¹⁶ Kɛ ne sɛ ɛgɔm ɛHyiridus sa kɛ yaa tenes ivol ba nɛ ninyi na bol daa ne ito ɛYɛso de nang ne ɛ yɔngɔ, “ɛYohana gha ne nggaa tul ito yɛwo ɛbhɛ kɛ bhɛ kyii ndɔ ne ikpuu ba!”

¹⁷ ɛHyiridus sa ɛbhɛ kaa yɛk ngɛ wum ɛYohana yegha bhɛ rop ɛbhɛ ndɔ ne ijwee ne nyang. Ɛ kaa ne mɔn ɛlɛ wo daa ne igboo ɛHyirɔdiya ne ɛ kaa soye ɛkuk ɛgwaa ɛbhɛ ɛFilibus. ɛHyiridus sa kaa ne kyii bo ɛkuk ka ɛ teye ɛhaa ɛbhɛ.

¹⁸ ɛYohana gha kaa ne ma shɛɛ tɔng ɛHyiridus segha ɛ bok ɛbhɛ, “Sɔng iphɛ kɛ jam mɛ ɛ phɔt ɛkuk ɛgwaa mo gha nang.”

¹⁹ ɛHyirɔdiya sa ne yaa tɔk te ɛ sɛ phoo ɛYohana yegha, Sɔng ne ɛ sɛ ɛnkiinɛ yɛ nang.

²⁰ ɛHyiridus sa kaa ne i phok ɛnik ɛYohana wo, ne ɛ kyɛngɛse ɛbhɛ daa ɛli ne ɛ ku yɛɛ wu ɛYohana gha so cik, ɛ ta so ɛnyi kɛ tul kang. Kaa ne i sɛ ɛHyiridus tenes ɛYohana yegha nang ivol lɛ ne i tak ɛbhɛ iyɔm, gbik ne iphɛ ɛlɛy ne ɛ sak ghe ne tenes ɛbhɛ.

²¹ ɛHyirɔdiya sa kaa ne ji mɔɔng ɛ sɛ ɛphiri yɛ ɛtuk ka ne ɛ kaa bok ijɔwɔ ne tas ne ɛtuk ne iyɛk ɛbhɛ. ɛTuk kɛghaa nggyɛ wo nang, ɛHyiridus sa kaa yel-le nindiinday ne ivel, nɛ ninaa nisooja, gbik ne igbaang ninyi ne ivel ne iGalili ba ne idira.

²² Kɛ ne sɛ nibhɛ so ndɔ ne ijɔwɔ de nang, ɛlap ɛHyirɔdiya sa ne yel isham be ne ihywɛ kɛ laasek ɛHyiridus segha gbik nɛ ninyi ɛbhɛ na irway. iPhɛ ɛlɛy yang, ne ɛ yaak ɛngɔn na, “iKyee ne ˆɛ sim n nzɛ mɔn nɛ nɛɛ? Naa nang ngɛ gbik ɛkɔn negha ne ɛ kɛ phom me.”

²³ Ne ɛ lɛlɛm ihywa ɛ yaak ɛngɔn na, “Gbik ɛkɔn negha ne ɛ kɛ phom me naa nang ngɛ. Ɛ sɛ kyi yɔng wu te nang nge idɛ iwap ne igbɔm nge, naa ne nang ngɛ.”

²⁴ ɛNgɔn na ne wuru, ɛbhɛ sɛ ɛgyinɛ ɛ phom ɛbhɛ ɛ yaak ɛbhɛ, “N yɔng te nang me ikyee?” ɛGyinɛ gha ne kyii nɛ ɛ yaak ɛbhɛ, “Yaak ɛbhɛ te ɛ nang ngɛ ito ɛYohana ne Yaak ne iBatisima.”

²⁵ ɛNgɔn na ne shii kyii ne nggbiy ɛbhɛ sɛ ɛgɔm ma, ɛ yaak ɛbhɛ, “ɛLyilyɛghaa wo, cwaak ito ɛYohana ne Yaak ne iBatisima ndɔ ne ikpɛɛt ɛ nang me.”

²⁶ iBol lɛ ne bees ɛgɔm ma irway gbom. Sɔng ne ɛ tang bok ɛhak ɛkɔn ne aa yɔngɔ nang, daa ɛli ne ɛ kɛ ku lɛlɛm ihywa ɛnu ɛyisɛ ne igbaang ninyi ɛbhɛ.

²⁷ iPhɛ ɛlɛy yang ɛgɔm ma ne tom ɛhaa ne hyep ɛbhɛ ɛ yaak ɛbhɛ te ɛbhɛ tul ito ɛYohana de ɛ yɛɛs nɛ. ɛNyi gha ne phɛ ndɔ ne ijwee ne inyang ngo ɛbhɛ tul ito ɛYohana de,

²⁸ ɛ cwaak ndɔ ne ɛkpɛɛt ɛ yɛɛs ɛ nang ɛngɔn na. ɛNgɔn na ne ma ji bhɛ nang ɛgyinɛ gha.

²⁹ Kɛ ne sɛ ninɔn ne icwam ɛYohana na kɛ phok ibol lɛ nang, nibhɛ ne bhɛ bo ɛkpit tɛ nibhɛ bhɛ rɛɛ.

ɛYɛso gha Kɛ Re nɛ Ninyi nɛ Nibhɛ kɛ Hɔn niNom iwii

³⁰ Ninɔn ne tom ma ne bhɛ kyii ɛlɔ gha ne kaa tom nibhɛ nɛ wo, nibhɛ ne tɔng ɛYɛso yegha nikɔn na nɛ nibhɛ kɛ bhɛ mɔn no, gbik ne imɛmɛ ba nɛ nibhɛ kɛ bhɛ mɛmɛ ninyi na nɛ wo.

³¹ Ninyi na ne ta yaa yɛɛset ɛnggyɛ wo gbom. Nibhɛ ne pham ɛlɔ yɛ ɛli ne hame ɛYɛso gha nɛ ninɔn ne icwam ɛbhɛ na kɛ yɛɛ ne sɛ nten nibhɛ cwaak ɛkɔn ɛnu. iPhɛ ɛlɛy yang ɛYɛso gha ne yaak ninɔn ne icwam ɛbhɛ na, “Njwɛɛn te tek ninyi yɛnaa wo njwɛɛn bhɛ tɔk ɛlɔ gha ne hame ɛnyi sonɛ te ɛ sɛ ɛ phɔng ɛn.”

³² Nibhɛ ne lel ndɔ ne ikparak, nibhɛ bo nikɔn nibhɛ phɛɛs ne tɔk ɛlɔ gha ne hame ɛnyi gha sonɛ wo.

³³ Kɛ ne sɛ nibhɛ so ne ihywel ba nang idɛ idira ninyi de ne ta shii seng nibhɛ. iPhɛ ɛlɛy yang ninyi na ne les ndɔ nigarang gbom nibhɛ sap ɛzay nibhɛ bhɛ phɔt niYɛso yena nɛ.

³⁴ Kɛ ne sɛ ɛYɛso gha kɛ bhɛ tuu ɛ kɛ wuru ndɔ ne ikparak ko nang ne ɛ yaang idira ninyi de, ne ɛ yaa san iyɔm nibhɛ daa ɛli nɛ nibhɛ so te ᐩigyol ne hame ihywɛ bok ɛnyi ne hyep. iPhɛ ɛlɛy yang, ne ɛ yaa mɛmɛ nibhɛ nɛ nikɔn na gbom.

³⁵ Kɛ ne sɛ ɛlɔ yɛ kɛ yaa tes ywii ninɔn ne icwam ɛYɛso na ne bhɛ sɛ ɛbhɛ nibhɛ yaak ɛbhɛ, “Sɔng ɛlɔ yɛghaa wo bok idee nang, ɛlɔ yɛ kɛ ne yaa tes ywii.

³⁶ Yɛk ninyi yɛnaa wo nkiinɛ tɛ nibhɛ bhɛ tɔk ɛlɔ gha ne idee sonɛ nibhɛ say ɛkɔn ne re.”

³⁷ ɛYɛso gha ne yaak nibhɛ, “Yang nang ɛn nibhɛ ɛkɔn ne ire gha.” Nibhɛ ne kyii nɛ nibhɛ yaak ɛbhɛ, “iRe ninyi yɛdee wo yaa hɔn ijam gbom. iJam mɛ yaa phɛɛs ne hɔn idinari ikpɔl ifaa, (izee ne ɛnyi sɛ tal ɛngɔn ɛtomɛ nɛ ndɔ ne iphɛl ɛnaras).”

³⁸ ɛYɛso gha ne phom nibhɛ ɛ yaak nibhɛ, “iVɛrɛdi maaghee ne ifɛ kɛ mak nyini woo? Yung cwi ɛbhɛ yɛɛn ɛn.” Nibhɛ ne bhɛ yɛɛn, nibhɛ bhɛ kyii, nibhɛ ne yaak ɛbhɛ, “iFɛ kɛ mak ifɛ iwii ne izing ihywaa.”

³⁹ ɛYɛso gha ne ji yaak nibhɛ wu tɛ nibhɛ yɛk ninyi na nɛ nibhɛ sooset ne idik igbuu-igbuu.

⁴⁰ Ninyi na ne sooset igbuu-igbuu ba. iDɛ igbuu yɛ ne i so ikɔl idaan, ijwɛng ne i so ɛnduwubɔ iwii.

⁴¹ ɛYɛso gha ne ji yinɛ ivɛrɛdi iwii ba ne izing ihywaa de ɛ waal ito ɛ yɛɛn ɛdaa ne irywa ɛ tɔɔrek ɛTaanggbey ye irway ihwala. Ɛ ji kpɛl ivɛrɛdi yɛdaa nggyɛ wo gbik ne izing ngge ɛ naas ninɔn ne icwam ɛbhɛ na nibhɛ ne hosop ninyi na gbik.

⁴² Ninyi na gbik ne re ire yɛdee nggyɛ wo nibhɛ sighisiy hywet.

⁴³ Ninɔn ne icwam ma ne ji tang ɛbyin ne ivɛrɛdi ba ne ɛbyin ne izing nga gbik. iPhɛ ne yɛɛs ne isap ɛnduwubɔ ne iphɛ iphaa hyɔrɔ.

⁴⁴ Niras sa nɛ nibhɛ kaa re ire yɛdee nggyɛ wo kaa ne hɔn ninom iwii.

ɛYɛso gha kɛ Hyel daa iNɛn

⁴⁵ Kɛ ne sɛ ɛYɛso gha kɛ taal renɛ ninyi na nang, ne ɛ yaak ninɔn ne icwam ɛbhɛ na wu te nibhɛ bo ɛkparak ko nibhɛ berey yɛ gɔɔ ɛgarang ne iBasɛda ne ɛ so cɛcɛk ne ɛrenes ne iGalili. Ɛbhɛ wo ne ji kyinak ɛ yɛk ninyi na ne nkiinɛ nyɛɛn.

⁴⁶ Kɛ ne sɛ ɛ kɛ yɛk ninyi na ne nkiinɛ wo, ne ɛbhɛ wara daa ne ɛwarang ɛ roo ne ɛTaanggbey.

⁴⁷ Ɛlɔ yɛ mɔɔng ɛ te ywii, ɛkparak ko nɛ ninɔn ne icwam ɛbhɛ na sonɛ ndɔ yɛwo ne ku bhɛ yek ɛceree inɛn ba. ɛYɛso gha ne maa tɔ daa ne ɛwarang ngo nggenggerey.

⁴⁸ ɛYɛso ne yaang ninɔn ne icwam ɛbhɛ na kɛ yaa kyangas en ne ihywel ne ikparak ga daa ɛli nɛ nibhɛ kɛ nang igbil ɛyisɛ. Ne ji sɛ ɛlɔ yɛ yunga teye ihwɛlɛ, ɛYɛso gha ne bo nikɔn ɛ yaa hyel daa inɛn ba ɛ phɛɛs ne sɛ nibhɛ. Kɛ ne sɛ ɛ yungaa phee nibhɛ,

⁴⁹ ninɔn ne icwam ɛbhɛ na ne yaang ɛbhɛ ɛ hyel daa inɛn ɛling ngga, nibhɛ ne yaa wɛɛ te iyuwa. Nibhɛ ne ta ikun,

⁵⁰ daa ɛli nɛ nibhɛ wo gbik kaa ku wum ɛnik. ɛYɛso gha ne shii yaak nibhɛ, “Ma so mee yee. Sɔng ɛ sap ɛn nang. Sɔng ne ɛ wum ɛn ɛnik ko nang.”

⁵¹ Ne ɛ ji lel ndɔ ne ikparak ko. iGbil lo ne shii kyinak yak. Ninɔn ne icwam ɛbhɛ na ne yaang ɛkɔn ne kparat gbom.

⁵² Sɔng nibhɛ kaa jung bo ɛkɔn daa ne ibol ne ire de ne ɛYɛso gha kɛ saras iphɛ ɛ re nɛ ninyi na nɛ nibhɛ kɛ hɔn ninom iwii na nang. iRway nibhɛ ba kaa tɔ gɛgɛy.

ɛYɛso gha kɛ Tes Nisha ne iVel ne iJɛnasarɛt Niken

⁵³ ɛTsim mɛ ɛlɛy yang, nibhɛ ne bere ɛrenes sa nibhɛ phɛ ne idɛ ivel ba ne bok ifɛ iJɛnasarɛt, nibhɛ ji rop ɛkparak nibhɛ wo ɛnggyɛ yo.

⁵⁴ Kɛ ne sɛ nibhɛ wuusi ndɔ ne ikparak ko ninyi na ne ta shii seng ɛYɛso yegha.

⁵⁵ Nibhɛ ne tel nibhɛ leesel ndɔ nigarang ne ivel lɛbaa nggyɛ wo gbik nibhɛ bhɛ tɔɔsek ninaa nisha ne ifurang nibhɛ, nibhɛ phɛɛs nɛ ɛlɔ gha nɛ nibhɛ kɛ phok wu ɛYɛso gha sonɛ wo.

⁵⁶ Gbik ɛlɔ gha ne ɛYɛso gha kɛ bok ngɛ, hang ndɔ ne igbaang ne nigarang yɔɔ, hang ndɔ nishɛɛrɛng nigarang yɔɔ, hang ndɔ nihak nigyigyaarang yɔɔ, ninyi na ne i teesek nisha na ndɔ nitungga nilɔ yɛ. Nibhɛ ne i roro ne ɛbhɛ wu te ɛ sim nisha na nɛ nibhɛ dat iwusang ne ɛtura ɛbhɛ zɔng, nibhɛ yaa tes niken. iPhɛ ɛlɛy, gbik ninaa nɛ nibhɛ kaa ne dat ɛbhɛ wo, nɛ ninaa nɛ nibhɛ kaa ma dat iwusang ne ɛtura ɛbhɛ de, ne ɛ tes niken.