ɛMarakus 5 - ɛWee ne ìTsɛm iHywas

ɛYɛso kɛ Tul iKabyik iBebhe ndɔ ɛNyi

¹ ɛYɛso gha nɛ ninɔn ne icwam ɛbhɛ na ne berey gɔɔ ne ikpang ɛrenes so, nibhɛ bhɛ hɔn ivel ne iGɛrɛsa.

² Kɛ ne sɛ ɛYɛso gha kɛ shii wuru ndɔ ne ikparak ko nang, ɛdɛ ɛnyi gha nɛ niphoo so ndɔ ɛbhɛ ne wuru, ɛlɔ ne ikpuu, ɛ phɛɛs ne sɛme ne ɛYɛso gha.

³ iKpuu ba ifɛ kaa ne ku so ɛlɔ ne shɛɛ ɛbhɛ. Sɔng ɛnyi ne sonɛ ne ɛ yɛɛ ne wum ɛbhɛ ɛ yɛk ɛbhɛ ne nyang nang.

⁴ Kaa ne i sɛ kɛ yɛk ɛbhɛ ne nyang, ne ɛ sɛrɛse nyang ne ibɔ ɛbhɛ de, ɛ mbalak igyɔs de ne kɛ rop ɛbhɛ ne ita de, ɛ yilitsik ɛ yaa hyel. Sɔng ɛnyi kaa bok ihwet ne ɛ sɛ yɛɛ ne kyɛngɛ ɛbhɛ nang.

⁵ Ne ɛtuk ne igbey, ɛ kaa ne i kaan ndɔ ne ikpuu ba ɛ banga ikun. Ne ɛ ta shɛɛ ne ibarang ɛ koon ibek ɛbhɛ ne ifang ngga.

⁶ Kɛ ne sɛ ɛYɛso gha tɔ kyakyak ne ɛbhɛ nang, ɛnyi gha ne seng ɛbhɛ, ne ɛ zugha ɛbhɛ ho nggbuk ɛnu ɛyisɛ ɛbhɛ.

⁷ Ne ɛ ji boote ne ɛgbaang ne izɔlɔs ɛ yɔngɔ, “ɛYɛso ne ɛ so ɛNgɔn ɛHaa ne Ndiinday gbik. iKyee iphɛ kɛ byinki yɛ ne me woo? Nzi ne roro ne igyɛ ndɔ ne irywɛɛk ɛTaanggbey, sɔng ɛ bak me nggbang nang!”

⁸ Ɛ kɛ boote ɛlɛ wo daa ɛli ne ɛYɛso gha kɛ ku boote nɛ niphoo na ɛ yaak nibhɛ, “Wuru ndɔ ɛnyi gha igyɛ ne ikabyik ibebhe.”

⁹ ɛYɛso gha ne yaak ɛNyi gha, “I bok kɛ ɛhay?” Niphoo na nɛ nibhɛ so ndɔ ɛnyi gha ne kyii nɛ nibhɛ yaak ɛbhɛ, “I bok me ɛTul. Njwi so maa.”

¹⁰ ɛTul la ne ji roo ne ɛYɛso gha dɔng ɛ yaak ɛbhɛ, “Sɔng ɛ roos njwii ne ivel lɛdaa wo nang.”

¹¹ iDɛ iwa ne itsɔɔm mo kaa ne so ɛnggyɛ wo cɛcɛk ne i hyep ifɛ.

¹² iTul niphoo yɛdee nggyɛ wo ne roo ɛYɛso yegha iphɛ yaak ɛbhɛ, “Tom njwii ndɔ ne itsɔɔm mɛdaa nggyɛ, tek njwii njwi bhɛ lel ndɔ ne ifɛ.”

¹³ ɛYɛso gha ne say ibol lɛ, niphoo na ne wuru ndɔ ɛnyi gha, nibhɛ bhɛ lel ndɔ ne itsɔɔm ba. iWa ne itsɔɔm mo gbik ne tel ifɛ bhɛ hoghɛsɛ ndɔ ɛLing nga, ifɛ kus. iFɛ kaa ne hɔn ninom mɛ ifaa.

¹⁴ Ninaa ne hyep itsɔɔm ma ne tel nibhɛ bhɛ tɔng ibol lɛ ndɔ nigyigyaarang nga nɛ nibhɛ so cɛcɛk ɛnggyɛ wo, nibhɛ phyii bhɛ hɔn ne ndɔ ɛgarang nga. Ninyi na ne wuru nibhɛ phɛɛs ne yaang ɛkɔn negha ne ɛ kɛ te wo.

¹⁵ Kɛ ne sɛ ninyi na kɛ bhɛ tuu ɛlɔ ɛYɛso gha nang nibhɛ ne yaang ɛnyi gha ne ɛ kaa bok niphoo na ɛ kɛ soos yak ɛ bok itsura, ihywɛɛ ɛbhɛ so ɛlɔ ɛdaan. Nibhɛ ne wum ɛnik.

¹⁶ Ninaa nɛ nibhɛ kɛ ne yaang ɛkɔn neghaa wo ne tɔng igbagha wo ɛli ne ɛkɔn neghaa wo kɛ te ne ɛnyi gha gbik ne itsɔɔm ba.

¹⁷ iPhɛ ɛlɛy yang ninyi na ne roo ne ɛYɛso gha wu te ɛ tek ivel nibhɛ ba.

¹⁸ Kɛ ne sɛ ɛYɛso gha kɛ lel ndɔ ne ikparak ko aa bo nikɔn ɛ hyel nang, ɛnyi gha ne ɛ kaa bok itul niphoo de ne yaa roro ne ɛbhɛ wu yaa roos ɛbhɛ.

¹⁹ Sɔng ɛYɛso gha ne sim nang, ne ɛ yaak ɛbhɛ, “Yang kyii te ɛ hyil lɛ gɔɔ ne ijwee mo ɛbhɛ sɛ nigwaa mo ɛ tɔng nibhɛ ɛgbaang ɛkɔn na ne ɛTaanggbey ya kɛ mɔn nɛ nɛwo. Ɛ ta tɔng nibhɛ ɛli ne ɛ kɛ san iyɔm mo de.”

²⁰ ɛNyi gha ne kyii ɛbhɛ leesel ndɔ ne ivel ba ne bok ifɛ nigarang ɛnduwubɔ na, ɛ tɔng ɛkɔn na ne ɛYɛso gha kɛ mɔn ɛbhɛ nɛ wo gbik. Ninyi na gbik ne yaang ɛkɔn ne kparat.

iBol ɛLap ɛYɛrus ne iDee ɛKuk ne ɛ kaa bok iSha ne tel Neyi

²¹ Kɛ ne sɛ ɛYɛso gha kɛ kyii ɛ berey gɔɔ ne ikpang ɛrenes so nang, idira ninyi de ne bhɛ tumareey ɛlɔ ɛbhɛ gha ɛmbambang ɛrenes sa.

²² ɛDɛ ndiinday ne itɔɔy niYahodawa na ne i bok ɛbhɛ ɛYɛrus ne ma phɛ. Kɛ ne sɛ ɛ kɛ yaang ɛYɛso yegha, ne ɛ ho ne irwa-nggburuk ɛnu ɛyisɛ ɛYɛso gha,

²³ ɛ yaa kyangase ɛ roro ne ɛbhɛ ɛ bok ɛbhɛ, “ɛLap nge so ɛnu ne ikpuu bo ɛbɔk te ɛ yɛɛs ɛbhɛ dat ɛbhɛ te ɛ te ɛken ɛ shɛɛ.”

²⁴ ɛYɛso gha ne bo nikɔn ɛ kungus ɛnyi gha. Ninyi na gbom ne ma roos nibhɛ, nibhɛ ne phyii en.

²⁵ ɛDɛ ɛkuk ka ne ɛ kaa ku bok ishwa ne tel neyi, ne ihywɛ kɛ hɔn ishay ɛnduwubɔ ne ifɛ ifaa kaa ne ma so ɛnggyɛ wo.

²⁶ ɛKuk kɛghaa nggyɛ wo kɛ sɔ nggbang gbom ɛlɔ ne ninaa ne ihwal. Ɛ kɛ ne phoo ijam gbom gbik ne iphɛ ɛlɛy sɔng ɛ kɛ ne sɛ iphyonka nang. iShwa ɛbhɛ de yang kyii mɔn te ihywɛ hanas se nɛ.

²⁷ Kaa ne sɛ ɛ kɛ phok ibol ɛYɛso de nang ne ɛbhɛ phyilɛl le ndɔ ninyi na ɛ roos ɛtsim ɛYɛso gha, ɛ dat iwusang ne ɛtura ɛbhɛ,

²⁸ ɛɛ tas ɛ bo, “Te n nzɛ maa sɛ n dat iwusang ne ɛtura ɛbhɛ zɔng, n nzɛ ne te ɛken.”

²⁹ Kɛ ne sɛ ɛli ne ɛ kɛ shii dat ɛtura ɛYɛso wo nang, neyi ɛbhɛ na ne kyinak, ne ɛ phok ndɔ ne ibek ɛbhɛ de ɛli ne ɛ kɛ shii te ɛken na.

³⁰ Nɛ nten nɛ ne mang ɛYɛso gha ne shii seng wu ito-ndiinday ɛbhɛ kɛ wuru, ne ɛ hyereey ɛ phom ninyi na ɛ yaak nibhɛ, “ɛHay ɛbhɛ kɛ dat me ɛtura woo?”

³¹ Ninɔn ne icwam ɛbhɛ na ne kyii nɛ nibhɛ yaak ɛbhɛ, “Ninyi na kɛ ma pham mɛ gbom, aa ne mɔn ɛli ɛ yaa phomos wu ɛhay bhɛ kɛ dat tɛ dek koo?”

³² ɛYɛso gha ne jung hyeeme ɛ tɔk ɛnyi gha ne ɛ kɛ dat ɛbhɛ wo.

³³ ɛKuk ka ne ɛ kɛ seng ɛkɔn na ne ɛ kɛ te ne ɛbhɛ wo ne wuru, ɛ kparat ne ɛbhɛ ho ɛnu ɛyisɛ ɛYɛso gha ne irwa-nggburuk, ɛ tɔng ɛbhɛ ibol lɛ gbik.

³⁴ ɛYɛso gha ne yaak ɛbhɛ, “ɛLap, ìnang ne itin mo de kɛ teyɛ ɛken, njwii me ncaang, te ishwa mo de tek kɛ.”

³⁵ Kɛ ne sɛ ɛYɛso gha tɔ ndɔ ne ivol ba nang, nidɛng ninyi na ne le ne ijwee ɛYɛrus so nibhɛ tuu nibhɛ yaak ɛbhɛ, “ɛLap mo gha kɛ ku, sɔng ɛ yung yɔng wu yaa bak ɛkyɛɛ yegha nggbang nang.”

³⁶ Sɔng ɛYɛso gha ne wɛɛ ibol lɛ te ɛkɔn nang. Ne ɛ yaak ɛYɛrus segha, “Sɔng ɛ yung sap ɛkɔn nang, nang ne itin nɛ zɔng.”

³⁷ Sɔng ɛYɛso gha ne sim ninyi na nɛ nibhɛ roos ɛbhɛ nibhɛ bhɛ hɔn ijwee ɛYɛrus so nang, ɛ kaa bo ɛBiturus se ne ɛYakub, gbik ne ɛgwaa ɛbhɛ ɛYohana zɔng nibhɛ phɛ.

³⁸ ɛYɛso gha ne bhɛ tuu ijwee ɛYɛrus so, ne ɛ yaang ninyi na kɛ ku te buruburu; nibhɛ san nibhɛ bunga ikpun.

³⁹ Ne ɛ lel ɛ yaak nibhɛ, “ɛLɔ nggyɛ ne ɛ bees ɛn irway ba ɛlɛ woo? iKyee iphɛ kɛ ta te ɛ san ɛn noo? Sɔng ɛngɔn neghaa wo kɛ ku nang, ɛ kɛ wum nwa.”

⁴⁰ Nibhɛ ne yaa sɛ ɛbhɛ. ɛYɛso gha ne tuul nibhɛ gɔɔ ne izay gbigbik, ne ɛ ji bo ɛkyɛɛ ɛngɔn na ne ɛgyinɛ yɛ, gbik nɛ ninɔn ne icwam ma ne ɛ kɛɛ sonɛ nibhɛ wo, nibhɛ lel ndɔ ne izuk ko ne ikom ɛngɔn de sonɛ wo.

⁴¹ Ne ɛ wum ɛngɔn na iwɔ ɛ yaak ɛbhɛ, “Talita Ikum!” Te kaa so ɛ bo, “Ɛnyɛn, n nzi bok kɛ, yilitsik.”

⁴² ɛNgɔn na ne shii yilitsik ɛ yaa hyel. (ɛNgɔn neghaa nggyɛ wo kaa ne bok ishay ɛnduwubɔ ne ifɛ ifaa nɛ nten nɛ). Ninyi na ne yaang ɛkɔn ne kparat gbom.

⁴³ ɛYɛso gha ne kpɛng nibhɛ gbom, ɛ yaak nibhɛ wu hang nibhɛ mɔng ɛnyi ibol lɛ. Ne ji yaak nibhɛ, “Nang ɛn ɛbhɛ ɛkɔn te ɛ re.”