ɛMarakus 15 - ɛWee ne ìTsɛm iHywas

Kɛ phɛ ne ɛYɛso gha ɛlɔ ɛBilatus

¹ Kɛ ne cwiil ne ihwɛlɛ ywiriri, nindiinday nibo ɛTaanggbey ya nɛ nindiinday ne igbagha na, nɛ ninaa ne kpɛl ɛShara na, nɛ nibhɛ so itɔrɔng ngge, ne rop ɛnu, nibhɛ ji robhos ɛYɛso yegha, nibhɛ bo ɛbhɛ, nibhɛ phɛ nɛ ɛlɔ ɛBilatus.

² ɛBilatus sa ne phom ɛYɛso yegha ɛ yaak ɛbhɛ, “iGyɛ soye ɛgɔm niYahodawa naa?” ɛYɛso gha ne kyii ɛbhɛ nɛ ɛ yaak ɛbhɛ, “iGyɛ ɛ bo ɛlɛy.”

³ Nindiinday nibo ɛTaanggbey ya ne robhos ɛYɛso yegha ne ihyoo de kang-ka-kang.

⁴ ɛBilatus sa ne kyii ta phom ɛYɛso yegha ɛ yaak ɛbhɛ, “Ɛli nɛ nibhɛ maa bol ivol ba dak ne ito mo de gbik ɛlɛ wo, ne ɛ ma bok idɛng ne aa kyii nibhɛ nɛɛ?”

⁵ Sɔng ɛYɛso gha ne yɔng ɛkɔn nang, ɛ maa shɛɛ ɛbhɛ nggbyak. ɛBilatus sa ne yaa wɛɛ ɛbhɛ zii.

Kɛ Hyɛ ɛYɛso yegha ɛShara ne Ku

⁶ I ne sɛ nten ne idira ne iPasika de kɛ tuu nang, ɛBilatus sa yaa ne biri ɛnyi ɛdaan ndɔ ne ijwee ne nyang ngo, ɛhaa nɛ ninyi na kɛ roo ɛbhɛ wu te ɛ biri ɛbhɛ.

⁷ Nten nɛdee nggyɛ wo, ɛdɛ ɛnyi gha kaa ne so ndɔ ne ijwee ne nyang ngo ne bok ɛbhɛ ɛBarabas. Ɛ kaa ne so ndɔ ɛnggyɛ wo nɛ nidɛng ninyi na nɛ nibhɛ kaa phopho ninyi ndɔ ne de ishishim be ne kaa dat ne igbɔm.

⁸ iDira ninyi de ne phɛ ɛlɔ ɛBilatus sa nibhɛ bhɛ yaak ɛbhɛ wu te ɛ mɔn ɛkɔn na ne ɛ ku mɔn en nɛ wo.

⁹ ɛBilatus sa ne yaak nibhɛ, “Ɛ sim ɛn te n nzɛ biri nyini ɛGɔm niYahodawa gha naa?”

¹⁰ ɛBilatus sa kɛ phom nibhɛ ɛlɛ wo daa ɛli ne ɛ kɛɛ ku seng nindiinday nibo ɛTaanggbey ya bok irway ne ɛYɛso gha. iPhɛ phɛ kɛ te nibhɛ phɛ ne ɛYɛso gha ɛlɔ ɛbhɛ gha.

¹¹ Nindiinday nibo ɛTaanggbey ya ne yaak ninyi na wu tɛ nibhɛ yaak ɛBilatus segha wu te ɛ biri en ɛBarabas se.

¹² ɛBilatus sa ne phom ninyi na ɛ yaak nibhɛ, “Ne n ji mon ɛnyi gha ne ɛ bok ɛn ɛbhɛ ɛgɔm niYahodawa gha ne kyee?”

¹³ Nibhɛ ne tɔɔk izɔlɔs nibhɛ yɔngɔ, “Te gangat ɛbhɛ!”

¹⁴ ɛBilatus sa ne ta phom nibhɛ ɛ yɔngɔ, “ɛLɔ ne ikyee? iKyee ne ɛ kɛ mɔn ne?” Nibhɛ ne ta jung tɔɔk izɔlɔs de nibhɛ yɔngɔ, “Te gangat ɛbhɛ!”

¹⁵ ɛBilatus sa ne i sim te ɛ sɛ laasek nibhɛ irway, iphɛ ɛlɛy yang, ne ɛ biri ɛBarabas segha ndɔ ne nyang ngge ɛ tek ɛbhɛ. Ne ɛ ji yɛk ngɛ lɛng ɛYɛso yegha, ɛ ji nang nisooja ɛbhɛ wu tɛ nibhɛ bhɛ gangat ɛbhɛ.

Nisooja na kɛ Sɛ ɛYɛso Yegha

¹⁶ Nisooja na ne bo ɛYɛso yegha nibhɛ phɛ ne ɛbhɛ ɛsaa ɛBilatus sa nibhɛ ne ji bhɛ yeres en.

¹⁷ Nibhɛ ne sɔɔl ɛbhɛ ɛdɛ ɛtura nigɔm mo ne ɛbhɛ so ɛ̀seng ngɛ mpumpuk, nibhɛ ne harap ɛbhɛ ɛkɔn ne ito ne igbɔm ne itsutsɔ, nibhɛ sɔɔl ɛbhɛ.

¹⁸ Nibhɛ ne ji yaa sɛ ɛbhɛ nibhɛ bo, “Te iken mo phyɔngɔle ɛgɔm niYahodawa yɔɔy!”

¹⁹ Nibhɛ ne i tang ncwɛng nibhɛ hal ɛbhɛ nɛ daa ne ito, nibhɛ ta tuk ɛbhɛ ne ncwincway. Nibhɛ ne ji cwi ne irwa-nggburuk, nibhɛ bɛɛs ɛbhɛ, wu te ne ji yɔngɔ wu n si kyiisi ɛbhɛ.

²⁰ Kɛ ne sɛ nibhɛ kɛ bɛɛs ɛbhɛ wo nang, nibhɛ ne ji tul ɛtura ne igbɔm nibhɛ wo nibhɛ yɛk ɛbhɛ ne ivaa ɛbhɛ. Nibhɛ ne ji bo ɛbhɛ nibhɛ wuru nɛ, nibhɛ phɛɛs ne gangat.

Kɛ Gangat ɛYɛso Yegha

²¹ ɛ ne sɛ nibhɛ so ndɔ ne ihywel ba nang nibhɛ ne sɛme ne ɛdɛ ɛnyi gha ne i bok ɛbhɛ ɛSimɔn. ɛNyi yeghaa nggyɛ wo so ɛnyi ne iSɛrene. Ɛ kaa bok ninɔn ne i bok ɛdɛng ɛLɛzɛnda, ne yaak ɛdɛng ɛRufus. Nisooja na ne yɛk ɛbhɛ nɛ nggbinggbing ɛ say ɛYɛso yegha itson ne gangat ɛbhɛ wo.

²² Nibhɛ ne bo ɛYɛso yegha nibhɛ phɛ ne ɛbhɛ ɛlɔ gha nɛ nibhɛ bok ɛbhɛ iGolgota. Kaabi i bo wu ɛlɔ ne ikpɔrɔk ne itso.

²³ ɛNggyɛy yo nang, nibhɛ ne bhɛ nang ɛbhɛ iguut ne kɛ yɛk ne ɛdɛ ɛkɔn na ne i bok ɛbhɛ imuru wu te ɛ sɔ, ɛYɛso gha ne ɛ mbaray.

²⁴ Nibhɛ ne ji tuul itsura ɛYɛso ba, nibhɛ gangat ɛbhɛ. Nibhɛ ne ren inɛn daa ne ibol ne itsura ɛbhɛ da tɛ nibhɛ seng ɛwoo ne ɛrɔngɔ yaa boos.

²⁵ Nten de kaa ne soye igyɔs ɛnduwujɛng ne ihwɛlɛ nɛ nibhɛ kaa gangat ɛYɛso yegha.

²⁶ Nibhɛ ne ji bo idɛ ihon baghatak ko, nibhɛ haa ne ihyoo de nɛ nibhɛ kɛ rop ɛbhɛ nɛ wo ɛlɛ: “ɛGɔm niYahodawa.” Nibhɛ ne ji gangke ihon nɛwoo nggyɛ wo daa ne ihon no nɛ nibhɛ kɛ gangat ɛYɛso yegha nɛ wo, nto-nto ɛbhɛ.

²⁷ Nibhɛ kaa ne ma gangat ninaa ɛyi ifaa ɛnggyɛ wo. ɛDɛng kaa ne so ne iwɔ ne irwye ɛYɛso wo, ɛdɛng ne so ne iwɔ ne itsan ɛbhɛ. [

²⁸ iPhɛ kaa ne ji shwaak ɛkɔn na ne kɛ haa ndɔ ne iWee ne ibol ɛTaanggbey yo i bo, “Kɛ byinki ɛbhɛ nɛ ninaa ne bɛɛs igbɔm i gangat.”]

²⁹ Ninyi na nɛ nibhɛ kaa ne i phebhe cɛcɛk ɛlɔ gha ne kɛ gangat ɛYɛso yegha nɛ wo ne i bol ivol ne bɛɛs, nibhɛ simis itso nibhɛ bo, “Yaa! Ta cwi nɛ! iGyɛ wo ne ɛ bo wu ya tobhos iDeng ngge i kyii ta lɔl iphɛ ndɔ nituk itwat ta.

³⁰ Wu ɛ sɔng i so ɛlɛ wo, nɛ ɛ phɔt ito mo te ɛ tɔm dak ne ihon no.”

³¹ ɛLɛy nɛ nindiinday nibo ɛTaanggbey ya nɛ ninaa ne kpɛl ɛShara na ne maa bol nibhɛ bɛɛs ɛbhɛ ne mang nibhɛ bo, “Yung wɛɛ ɛn! Ɛ kɛ phɔrɔt nidɛng, sɔng aa ne ji yɛɛ ne phɔt ito ɛbhɛ nang!

³² Wu ɛbhɛ soye ɛKiriti gha, wu ɛbhɛ ne soye ɛgɔm niSɛrɛla na, te nɛ ɛ tɔm dak ne ihon no te njwɛɛn yaang; njwɛɛn yaa ne ji nang ne itin nɛ ne ibol ɛbhɛ de.” Ninaa ɛyi na ne kaa ma gangat nibhɛ nɛ ɛlɔ ye wo, ne bol ivol ne bɛɛs da ne mang.

iKu ɛYɛso De

³³ Kɛ ne sɛ ɛceree ne igbey, ɛlɔ gha ne ku te gbyighilik, ne ɛ shɛɛ ɛlɛ wo nten de phyii bhɛ hɔn igyɔs ɛtat.

³⁴ Kɛ ne sɛ nten de kɛ hɔn igyɔs itwat, ɛYɛso gha ne ji boote ne ɛgbaang ne izɔlɔs ɛ yɔngɔ, “Ɛlɔy, ɛlɔy, lama sabatani?” Kaa so ɛ bo, “ɛTaanggbey nge, ɛTaanggbey nge! iKyee iphɛ kɛ te ɛ kɛ hyere me ɛtsim maa?”

³⁵ ɛByin ninyi na nɛ nibhɛ kaa so ne ɛlɔ yɛwo ne yɔngɔ, “Phok ɛn! Ɛ kɛ yaa yeres ɛLiya ye.”

³⁶ ɛDɛng ndɔ nibhɛ wo ne shii zuwa ɛbhɛ bo ɛsoso ɛngɔn ɛshesheng ɛ sɛɛl ndɔ ne inɛn nzɔwɔkɔk ɛ ji sɔɔl ɛbhɛ ne ihon, ɛ nang ɛYɛso yegha wu te ɛ sɔ. Nibhɛ ne yaak ɛbhɛ, “Tek ɛnyi gha te njwɛɛn yaang, hang ɛLiya gha ya yɛɛs ɛ tɔmɔsek ɛbhɛ yɔɔ.”

³⁷ ɛYɛso gha ne kyangkey ɛ salan, ifɔng ɛbhɛ da ne ji wuru.

³⁸ Nɛ nten nɛ, ɛlɛbhɛlɛ ndɔ ne iDeng nga ne le dak ɛ kpɛrɛt ɛceree ɛ hobhoset ɛphaa. ɛLɛbhɛlɛ ndɔ ne iDeng nga ne ɛ kɛ hobhose ɛLɔ gha kɛ Tul Kang ngo ne ɛHaa ne kɛ Tul Kang i Shɛs so.

³⁹ Kɛ ne sɛ ɛndiinday nisooja na ne ɛ sonɛ ɛlɔ yɛwo kɛ yaang ɛlɛ wo nang ne ɛ boote ɛ yɔngɔ, “ɛTsak! ɛNyi yɛghaa wo soye ɛNgɔn ɛTaanggbey.”

⁴⁰ Nidɛng nikuk ka kaa ne so ɛnggyɛ wo, nɛ nibhɛ kaa taay kyaam, nibhɛ shɛɛ wɛɛ ɛkɔn na ne ɛ tes so. Ndɔ nibhɛ wo nang, ɛMɛri ne ɛ le ne iMagadala kaa ne sonɛ, ɛSɔlɔmi ne sonɛ, ɛMɛri ne ɛ kaa so ɛgyinɛ ɛYakub ɛshɛɛrɛng, ne ɛYisifu kaa ne ma sonɛ.

⁴¹ Nikuk kɛnaa nggyɛ wo kaa ku i roos ɛYɛso yegha ɛli ne ɛ kaa so ne iGalili nibhɛ wɛɛ ɛbhɛ. Nihak nikuk nɛ nibhɛ kaa ne ma roos ɛbhɛ nibhɛ hɔn iYɛrushɛlɛm de kaa ne sonɛ ne mang.

iRɛɛ ɛYɛso Da

⁴² ɛTuk kɛghaa nggyɛ wo kaa ne so ɛtuk ka nɛ niYahodawa na yaa ryɔng en, (da ɛli ne sɛ cwiil ne ihwɛlɛ yɛ nibhɛ shɛɛ ne iwɛsɛ nibhɛ). iPhɛ ɛlɛy yang ne sɛ ɛlɔ yɛ kɛ teye irwirywɛ,

⁴³ ɛdɛ ɛndiinday ne iTɔrɔng niYahodawa na kaa sonɛ, ne bok ɛbhɛ ɛYisifu. Ɛ kaa ne le ɛgarang ne iRamatiya. ɛYisifu gha kaa ne ku so ɛdaan ndɔ ninaa nɛ nibhɛ kaa i hyep igbɔm ɛTaanggbey ba. Ɛ kaa ne te ne iras, ɛbhɛ sɛ ɛBilatus segha, ɛ yaak ɛbhɛ wu te ɛ nang nge ikom ɛYɛso de te bhɛ rɛɛ.

⁴⁴ ɛBilatus sa ne wum me zii ne kɛ sɛ i bok ɛbhɛ wu ɛYɛso gha kɛ ku wo. iPhɛ ɛlɛy yang, ne ɛ yel-le ɛsooja gha ne ɛ kaa wɛɛ ɛYɛso yegha ɛ phom ɛbhɛ, ɛ yaak ɛbhɛ, “iTin nɛ ne i bo wu ɛYɛso gha kɛ ku woo?”

⁴⁵ ɛSooja gha ne yaak ɛbhɛ “Ɛɛy.” ɛBilatus sa ne yaak ɛYisifu yegha te ɛbhɛ bo ikom be.

⁴⁶ ɛYisifu gha ne bhɛ say ɛtura nɛ nibhɛ yaa harap ikom be nɛ. Nibhɛ ji tɔmɔsek ikom ɛYɛso de, nibhɛ harap iphɛ ne ɛtura wo, nibhɛ rɛɛ ndɔ ne idɛ ikpuu ba ne kɛ ku ryɔng ifɛ te icwak. Nibhɛ ji bhɛ kungare ɛdɛ ɛkikɛɛ wo nibhɛ cwaal ne ɛnu yɛ.

⁴⁷ ɛMɛri gha ne ɛ kaa le ɛgarang ne iMagadala gha, ne ɛMɛri gha ne ɛ so ɛgyinɛ ɛYisifu gha, ne maa wɛɛ ɛlɔ gha ne kɛ bhɛ rɛɛ ɛYɛso yegha nɛ wo.