ɛMarakus 11 - ɛWee ne ìTsɛm iHywas

ɛYɛso gha kɛ Lel ne iYɛrushɛlɛm te ɛGɔm

¹ Kɛ ne sɛ niYɛso yena yungaa tuu iYɛrushɛlɛm be nang, nibhɛ ne phɛ ɛdɛ ɛgarang nga ne i bok ɛbhɛ iBatafaji gbik ne ɛdɛng ne i bok ɛbhɛ iBɛtani. niGarang ngɛnaa nggyɛ wo so cɛcɛk ne idɛ igol de ne i bok iphɛ iGol Niphaa. ɛYɛso gha ne yel-le ninɔn ne icwam ɛbhɛ na ifaa ɛ tom nibhɛ,

² ɛ yaak nibhɛ, “Cwi ɛn ndɔ ɛgarang ngɛghaa nggyɛ wo. Yaa ne sɛ ɛ kɛ bhɛ lel ɛn, aa ne yaang ɛn ɛjaakyi ne hame ɛnyi kɛ ku taay yɛ, i kɛ rop ɛbhɛ. Biri ɛn ɛbhɛ te ɛ yɛɛs ɛn nɛ.

³ Wu ɛnyi kɛ yaak nyini, ‘Aa biri ɛn ɛjaakyi gha ɛ phɛ nɛ ɛbii?’ Yaak ɛn ɛbhɛ, ‘ɛDaray ya ɛbhɛ sim ɛjaakyi gha, aa ne phyɔngɔle ɛbhɛ kyii nɛ.’ ”

⁴ Ninɔn ne icwam ifaa yenaa nggyɛ wo ne phɛ ndɔ ɛgarang nga. Nibhɛ ne sɛ ɛjaakyi gha kɛ rop ɛbhɛ ɛnu ne izuk cɛcɛk ne nkiinɛ. Nibhɛ ho ne biisi yɛ.

⁵ Kɛ ne sɛ nibhɛ so ne biisi ɛjaakyi gha, nidɛng ninyi na nɛ nibhɛ so ɛnggyɛ wo ne yaak nibhɛ, “Ɛ biisi ɛn ɛjaakyi gha aa mɔn ɛn ɛbhɛ ne kyee?”

⁶ Ninɔn ne icwam ma ne kyii nibhɛ nɛ ɛli ne ɛYɛso gha kɛ mɔng nibhɛ wo. Ninyi yɛnaa nggyɛ wo ne sim nibhɛ nɛ nibhɛ hyel ne ɛjaakyi gha.

⁷ Kɛ ne sɛ nibhɛ kɛ bhɛ nang ɛYɛso yegha ɛjaakyi gha, nibhɛ ji tang itsura nibhɛ, nibhɛ gyura ɛjaakyi gha nɛ, ɛYɛso gha ne ji taay yɛ.

⁸ Ninyi na gbom ne bɛɛ itsura nibhɛ ne nkiinɛ, nidɛng ne leesel ndɔ nihay, nibhɛ bhɛ was ivee nibhɛ ma laasek ngɛ.

⁹ Ninaa nɛ nibhɛ so ɛyisɛ, nɛ ninaa nɛ nibhɛ so ɛtsim ne i tabha ikpiil nibhɛ bo, “Hosana” “Te nang ɛTaanggbey yegha ne ndiinday!” “Te ɛTaanggbey ya sit ɛnyi gha ne ɛ kɛ yɛɛs ndɔ ne irywɛɛk ɛHaa ne Inat to ne ɛwɛng!”

¹⁰ “Te ɛTaanggbey ya sit igbɔm ɛkyɛɛ njwɛɛn ɛDoda da ne ifɛ yaaso wo ne ɛwɛng.” “Hosana ne ɛTaanggbey ɛdaa ne ɛnyu ne irywa gha.”

¹¹ Kɛ ne sɛ ɛYɛso gha kɛ bhɛ tuu ndɔ ne iYɛrushɛlɛm de nang, ne ɛbhɛ lel ndɔ ne iDeng ngge ɛ wɛɛ nikɔn na gbik. ɛLɔ yɛ ne yaa tes ywii ɛYɛso gha ne kyii, nɛ ninɔn ne icwam ɛbhɛ na nibhɛ phɛ ndɔ ɛ ɛgarang ne iBɛtani.

ɛYɛso gha kɛ Toke ɛPharang

¹² Kɛ cwiil ne ihwɛlɛ ye nibhɛ tek iBɛtani de nibhɛ i hyel, ɛYɛso gha ne yaa phok ikpyak.

¹³ ɛYɛso gha ne yaang ɛpharang, ne ɛ bo nikɔn ɛ phɛ ɛlɔ ɛhon na wu yaa bhɛ sɛ ikpam mɛ i re. Kɛ ne sɛ ɛ kɛ bhɛ tuu itin ɛhon de nang, sɔng ne ɛ sɛ ɛhon na bok ikpam nang. Ɛ bok ɛbebee zɔng daa ɛli ne nten ne yɛk ɛhon de kaa kyi tɔ.

¹⁴ ɛYɛso gha ne boote ne ɛhon na ne irway njɛt ɛ yaak ɛbhɛ, “Sɔng ɛnyi sɛ ne tang re ikpam mo da dɔng nang ishay-ishay.” Ninɔn ne icwam ɛbhɛ na ne phok ibol de ne ɛ kɛ boote daa ne ito ɛhon de.

ɛYɛso gha kɛ Roos Ninaa ne Bees iDeng

¹⁵ Kɛ ne sɛ niYɛso yena kɛ bhɛ lel ndɔ ne iYɛrushɛlɛm de nang, ɛYɛso gha ne bhɛ phɛɛ ɛ phɛ ndɔ ɛsaa ne iDeng nga. Ne ɛbhɛ sɛ ninaa ne lɛbhɛl nikɔn nibhɛ dat iza ɛnggyɛ wo. ɛYɛso gha ne roos nibhɛ, ɛ tobhos nitɛɛbul ninaa ne sunusi ijam ɛ ta tobhos nilɔ ne sooset ninaa ne lɛbhɛl ihywihywaa dɔng.

¹⁶ Sɔng ɛYɛso gha ne sim ɛnyi tɔɔk ɛkɔn ɛ phee nɛ ndɔ ɛsaa ne iDeng nga nang.

¹⁷ Ne ɛ yaak ninyi na, “Kɛ haa ndɔ ne iWee ne ibol ɛTaanggbey yo i bo, ‘iJwee nge wo soye ijwee ne igbagha sɛ re me ne ntsong. iPhɛdee ˆɛ kɛ ne bo ɛn ifɛ, ifɛ kɛ teye ɛsɛm ne shɛɛ ninaa ɛyi.’ ”

¹⁸ Nindiinday nibo ɛTaanggbey ya gbik nɛ ninaa ne kpɛl ɛshara gha ne phok ɛkɔn na ne ɛYɛso gha kɛ mɔn no, nibhɛ ne yaa tɔk ɛnkiinɛ nɛ nibhɛ sɛ nibhɛ phoo ɛbhɛ nɛ. Nibhɛ ne kyii tel ɛnik ɛYɛso wo daa ɛli nɛ ninyi na kaa kyii phok iyɛnɛng ne ibol ɛbhɛ de.

¹⁹ Kɛ ne sɛ ɛlɔ yɛ kɛ te ywii nang, ɛYɛso gha nɛ ninɔn ne icwam ɛbhɛ na ne wuru ndɔ ɛgarang nga.

iBol ɛPharang Ngge

²⁰ Kɛ ne cwiil ne ihwɛlɛ nang, niYɛso yena ne hyel nibhɛ phɛɛs ndɔ ne iYɛrushɛlɛm de dɔng, nibhɛ yaang ɛpharang nga ne ɛYɛso gha kɛ boote nɛ wo ɛ kɛ howo nyɔwɔkɔk.

²¹ ɛBiturus sa ne taate ne ibol ɛYɛso de, ne ɛ yaak ɛbhɛ, “ɛKyɛɛ! Yaang ɛpharang nga ne ɛ kɛ boote nɛ wo ɛ kɛ howo!”

²² ɛYɛso gha ne kyii nibhɛ nɛ ɛ yɔngɔ, “Say ɛn ibol ɛTaanggbey de!

²³ Nzi tɔng nyini itin nɛ, ɛhiha ɛnyi ne ɛ sɛ kyi yaak ɛphang ngɛwoo be, ‘Yilitsik ɛbhɛ ho ndɔ ɛrenes,’ ɛ sang kyii to irway ne daa ne ibol lɛ, ɛ yang nang ne itin nɛ daa ne ibol de ne ɛ kɛ boote wo, ɛkɔn na ne ɛ kɛ boote wo aa ne te.

²⁴ iPhɛ ɛlɛy, nzi ne bok nyini, yaa sɛ ɛ kɛ roo ɛn ɛkɔn na ne ɛ nang ɛn ne itin nɛ ɛ kɛ sɛ ɛn ɛbhɛ. Yaa ne nang ninyi gbik ɛkɔn na ne ɛ kɛ phom ɛn no.”

²⁵ Yaa ne sɛ aa roo ɛn no nang, ne ɛ kyi tsa ɛ han ɛn ninyi na nɛ nikɔn nikpɛɛ na nɛ nibhɛ kɛ mɔn nyini nɛ wo gbik, te ɛKyɛɛ mɔn na ne ɛ so daa ne irywa wo ne ma han nyini ne ɛfɔt mon no ne mang.

²⁶ [Wu ɛ kɛ sang han ɛn ninyi na ne ɛfɔt to nɛ nibhɛ kɛ mɔn nyini nɛ wo nang, sɔng ɛTaanggbey ya, ne ɛ so dak ne irywa wo, yaa ne ma han nyini nɛ nang.]

iPhom daa ne iGbɔm ɛYɛso

²⁷ ɛYɛso gha nɛ ninɔn ne icwam ɛbhɛ na ne ta kyii nibhɛ phɛ ndɔ ne iYɛrushɛlɛm de dɔng. Kɛ ne sɛ ɛYɛso gha i te tsɛɛ ndɔ ɛsaa ne iDeng niYahodawa na, nindiinday nibo ɛTaanggbey ya nɛ ninaa ne kpɛl ɛshara na gbik nɛ ninu nikɔɔn ɛgarang ngɛ ne yɛɛs ɛlɔ ɛYɛso gha.

²⁸ Nibhɛ ne ji phom ɛbhɛ nibhɛ yaak ɛbhɛ, “Ne ncwincway ɛhay ne ɛ mɔn nɛ nikɔn nɛnaa woo? ɛHay ɛbhɛ kɛ tom mɛɛ?”

²⁹ ɛYɛso gha ne kyii nɛ ɛ yaak nibhɛ, “Naa ne ma phom nyini ɛdɛ ɛkɔn na ɛbhɛ daan. Yaa sɛ ɛ kɛ mɔng ɛn mɛɛn nang, naa ne ma mɔng nyini ncwincway ɛnyi ba ne n nzi bol lɛ wo.

³⁰ Mɔng ɛn mɛɛn. ɛHay ɛbhɛ kaa yaak ɛYohana yegha wu te ɛ yɛk ninyi na ne ibatisima ne dee? ɛTaanggbey ye, hang ɛten ɛsii?”

³¹ Nibhɛ ne yaa bol ndɔ nibhɛ, nibhɛ bo, “Wu njwɛɛn kɛ yɔng wu ɛTaanggbey ɛbhɛ kaa yaak ɛbhɛ ɛlɛy, aa ne yaak njwɛɛn wu kyee phɛ kaa ne te njwɛɛn sang nang ne itin nɛ ne ɛbhɛ wo dek.

³² Njwɛɛn yaa ne yɔng wu ɛten ɛsii be?” (Nibhɛ kaa ne ku i phok ɛnik ninyi wo daa ɛli nɛ nibhɛ kɛ ku seng ɛli nɛ ninyi na ku yɛɛ ɛli ne ɛYohana gha so ɛnɛbi gha).

³³ Nibhɛ ne kyii ɛYɛso yegha nɛ nibhɛ yaak ɛbhɛ, “Sɔng njwii yɛɛ nang.” ɛYɛso gha ne yaak nibhɛ, “Sɔng na ne ma mɔng nyini ncwincway ɛnyi ba ne n nzi mɔn nɛ nikɔn nɛnaa wo nang.”