ɛMacu 9 - ɛWee ne ìTsɛm iHywas

ɛYɛso gha kɛ te ɛBaghat ɛKen

¹ ɛYɛso gha ne lel ndɔ ne ikparak ɛ kyii ɛ ta berey gɔɔ ne ikpang ɛgarang ɛbhɛ wo dɔng.

² ɛNggyɛ wo nidɛng ninyi na ne yɛɛs ɛbhɛ ne ɛdɛ ɛnyi gha ne ɛ so ɛbaghat ɛ kɛ laal ne iphuurang. Kɛ ne se ɛYɛso gha kɛ yaang ìnang ne itin nibhɛ de, ne ɛ yaak ɛbaghat ta, “ɛNyɛn sɔng ɛ sap nang, kɛ hana yɛ ne ɛfɔt mo wo.”

³ Nidɛng ninaa ne kpɛl ɛShara gha ne shii ya bol ndɔ nibhɛ, nibhɛ bo, “ɛNyi yɛghaa wo i bol ivol ne bɛɛs ɛTaanggbey ye.”

⁴ ɛYɛso gha ne seng icwas nibhɛ da, ne ɛ yaak nibhɛ, “iKyee phɛ kɛ te ɛ tas ɛn icwas ivebhe da ndɔ ne irway mon daa?

⁵ iYa phɛ yɛ iphɛ so phyonkaa? I yaak ɛnyi gha, ‘Kɛ hana yɛ ne ɛfɔt mo wo,’ hang i yaak ɛbhɛ, ‘Yilitsik te ɛ bo iphuurang mo de ɛ hyel’?

⁶ Naa ne tɔɔrek nyini wu ɛNgɔn ɛNyi gha bok igbɔm ne hana ɛfɔt to ndɔ ɛzay ya. ɛYɛso gha ne ji yaak ɛnyi ɛbaghat ta, ‘Yilitsik te ɛ bo iphuurang mo de ɛ hyil lɛ.’ ”

⁷ ɛNyi gha ne yilitsik ɛ hyil lɛ.

⁸ Kɛ ne sɛ idira ninyi de kɛ yaang ɛlɛ wo, nibhɛ ne wum ɛnu zii. Nibhɛ ne ji dɛp ɛTaanggbey ye ne ɛbhɛ kɛ nang ninyi na ihywee ne igbɔm mɛdaa nggyɛ wo.

ɛYɛso gha kɛ Yel-le ɛMacu Ye

⁹ Kɛ ne sɛ ɛYɛso gha kɛ bo nikɔn ɛnggyɛ wo, ne ɛ yaang ɛdɛ ɛhaa ne saasel ijam ne ivel la ne i bok ɛbhɛ ɛMacu ɛ so ɛnu ɛtomɛ ɛbhɛ. ɛYɛso gha ne yaak ɛbhɛ, “Roos me.” ɛMacu gha ne yilitsik ɛ roos ɛYɛso yegha.

¹⁰ ɛTsim mɛ ɛlɛy, ɛYɛso gha ne bhɛ soos ne ijwee ɛMacu wo ɛɛ re ire, ninaa ne saasel ijam ne ivel la gbom nɛ ninaa ne ɛfɔt ne ma yɛɛs nibhɛ sos nɛ niYɛso yena, nɛ ninɔn ne icwam ɛbhɛ na, nibhɛ re ire de.

¹¹ Ne sɛ niFarisawa na kɛ yaang ɛlɛ wo, nibhɛ ne yaak ninɔn ne icwam ɛYɛso na, “iKyee phɛ kɛ te ɛkyɛɛ ne icwam mon na i re ire de nɛ ninaa ne saasel ijam ne ivel gbik nɛ ninaa ne ɛfɔt taa?”

¹² ɛYɛso gha phok ibol lɛ, ne ɛ kyii nɛ ɛ yɔngɔ, “Sɔng ɛnyi ɛken na tɔk ɛhaa ne ihwal nang, ɛNyi ɛsha ɛbhɛ yang tɔk ɛbhɛ.

¹³ Cwi ɛbhɛ mɛmɛ ɛn nɛ, ˆɛ seng ɛn ɛkɔn na ne ibol lɛdee wo i bol ne iphɛ bo, ‘Nzi sim san iyɔm, sɔng hap itsanga nang, sɔng nggɛ yɛɛs te n yeres ninaa nɛ nibhɛ sang ɛfɔt tang, nggɛ yang yɛɛs ɛlɔ ninaa ne ɛfɔt ta.’ ”

iBol ne Kuma

¹⁴ Ninɔn ne icwam ɛYohana gha ne yɛɛs ɛlɔ ɛYɛso gha, nibhɛ yaak ɛbhɛ, “iKyee iphɛ kɛ te njwit to nɛ niFarisawa na njwii kuma wo, ninɔn ne icwam mo na ne ji sang mɔn ɛlɛy yoo?”

¹⁵ ɛYɛso gha ne yaak nibhɛ, “Yaa mɔn ɛlii nitaay ɛyiyaam ne yɛl la bok irway ishwii da nten de ne ɛyiyaam ne yɛl la sonɛ nibhɛ woo? Nten nɛ yaaso, ne sɛ bo ɛyiyaam en yɛl la, nten nɛdee nggyɛ wo nɛ nibhɛ sɛ ne ji kuma wo.

¹⁶ “Sɔng ɛnyi gha bo nggyɛt ne ɛtura ɛphas ne ɛbhɛ tɔ tang hɔwɔɔy ɛ baa ne ɛtɛl lo nang, wu ɛ kɛ mɔn ɛlɛ wo yaa ne sɛ nggyɛt da kɛ hɔwɔɔy, ibong ne ɛtura de ne kyii ta hantey yɛ.

¹⁷ Sɔng ɛnyi gha ne ta sit inɛn ɛnap mpas da ndɔ ne ihuhu ne ifɛ kɛ taal ihwet tang. Wu ɛ kɛ mɔn ɛlɛ wo inɛn da yaa ne kpɛrɛ ihuhu da mpɛ loghɛt, ihuhu da ne ta bees se. Ninyi na yang sit inɛn ɛnap mpas da ndɔ ne ihuhu ne sit tɛ ifas, ɛlɛy kɛ phɔt nibhɛ.”

iBol ɛLap ɛYɛrus ne iDee ɛdɛ ɛKuk Ge

¹⁸ ɛYɛso gha kɛ ne ma tɔ bol nɛ nibhɛ ibol lɛ de wo, ɛdɛ ɛndiinday niYahodawa na ne yɛɛs ɛ cwi ne irwa-nggburuk ɛnu ɛyisɛ ɛbhɛ ɛ yɔngɔ, “iFɔng ɛlap ngɛ kɛ shii wuru, yɛɛs te ɛbhɛ dat ɛbhɛ, aa ne shɛɛ ɛken.”

¹⁹ ɛYɛso gha ne yilitsik ɛ roos ɛbhɛ, ninɔn ne icwam ɛbhɛ na ne ma kungus.

²⁰ Ɛdɛ ɛkuk ka ne ɛ kaa i tel neyi, ishay ɛnduwubɔ ne iphɛ ifaa, ne yɛɛs ɛ roke ɛtsim ɛYɛso gha ɛ dat iwusang ne ɛtura ɛYɛso de.

²¹ Ɛ kaa ku yɔngɔ ndɔ ne irway ɛbhɛ, “Nzɛ ma kyi bhɛ dat iwusang ne ɛtura ɛbhɛ zɔng, nzɛ ne te ɛken.”

²² ɛYɛso gha ne hyereey, ne ɛ yaang ɛkuk ka ne ɛ yaak ɛbhɛ, “ɛLap, sɔng ɛ sap nang, ìnang ne itin mo de kɛ phɔt tɛ.” Nɛ ne nten nɛ ɛkuk ka ne shii te ɛken.

²³ Kɛ ne sɛ ɛYɛso gha kɛ tuu ijwee ɛndiinday yo, ɛ yaang ninaa ne wurus ɛntuntuung ne iku wo, nɛ ninyi na nɛ nibhɛ bees irway ba,

²⁴ ne yɔngɔ, “Cwi ɛn gɔɔ, sɔng ɛlap pa kɛ ku nang, ɛ so nwa.” Nibhɛ ne yaa sɛ ɛYɛso yegha.

²⁵ Ne sɛ kɛ yɛk ninyi na nɛ nibhɛ wuusi ne izay, ɛYɛso gha ne lel ndɔ ne izuk ko ne ɛngɔn na sonɛ wo ɛ wum ɛbhɛ iwɔ, ɛngɔn na ne yilitsik.

²⁶ iBol lɛ ne ku shii shwalat gbik nɛ ne ivel lɛ.

ɛYɛso gha kɛ Te Niwil iFaa niKen

²⁷ Kɛ ne sɛ ɛYɛso gha kɛ tek ɛlɔ yɛghaa nggyɛ wo ɛ hyel, nidɛng ninaa ne iwil la ifaa ne kungus ɛbhɛ, nibhɛ bol ne ɛgbaang ne izɔlɔs nibhɛ bo, “San iyɔm mos igyɛ ne ɛNgɔn ɛDoda!”

²⁸ Ne sɛ ɛYɛso gha kɛ bhɛ lel ndɔ ne ijwee, ninaa ne iwil ifaa na ne phɛ ɛlɔ ɛbhɛ, ɛYɛso gha ne yaak nibhɛ, “Ɛ kɛ nang ɛn ne itin nɛ nzɛ yɛɛ ne te nyini ɛken naa?” Nibhɛ ne kyii nɛ nibhɛ yɔngɔ, “ɛDaray, njwi kɛ nang ne itin nɛ.”

²⁹ ɛYɛso gha ne dat irwisɛ nibhɛ ba, ne ɛ yɔngɔ, “Ɛli ne ìnang ne itin mon de so, te iphɛ ne te nyini ɛlɛy.”

³⁰ iRwisɛ nibhɛ da ne shii phaale. ɛYɛso gha ne kpɛngke nibhɛ, ɛ yaak nibhɛ, “Sɔng ɛ tɔng ɛn ɛnyi ibol lɛ nang.”

³¹ Gbik ne phɛ ɛlɛy, nibhɛ ne hyel nibhɛ bol ibol ɛYɛso de ne ivel lɛdaa nggyɛ wo.

ɛYɛso gha kɛ te ɛNyi ne ɛ Sang Bol ɛKen

³² Kɛ ne sɛ nibhɛ kɛ bo nikɔn nibhɛ hyel, nidɛng ninyi na ne yɛɛs ɛYɛso yegha ne ɛdɛ ɛnyi gha ne ɛ bok ɛphoo ne ɛ ring ɛbhɛ ne bol lɛ.

³³ Ne sɛ ɛYɛso gha kɛ tul ɛphoo gha, ɛnyi gha ne ɛ sang ku bol lo ne ɛ yaa bol. iDira ninyi de ne wum en zii, nibhɛ ne ji yɔngɔ, “Sɔng njwi kɛ ji ku yaang ihywee ɛkɔn nɛ de wo ndɔ niSɛrɛla de nang.”

³⁴ niFarisawa na ne jung yɔngɔ, “ɛGɔm niphoo ɛbhɛ kɛ nang ɛYɛso yegha ihwet ne tuul niphoo na.”

ɛYɛso gha kɛ San iyɔm Ninyi De

³⁵ ɛYɛso gha roos nigarang ne ndiinday ya nɛ nishɛɛrɛng ngɛ gbik, ɛ leesel ne idee ne itsɔɔy da, ɛɛ mɛmɛ nibhɛ nɛ, ɛ tɔng ibol iyɛnɛng ne igbɔm be, ɛ ta tes ninaa nɛ nibhɛ bok ishwa de ihywee-ihywee niken gbik.

³⁶ Ne sɛ ɛYɛso gha kɛ yaang idira ninyi de ne ɛ san iyɔm nibhɛ, daa ɛli nɛ nibhɛ kɛ te buruburu nibhɛ tang iphyik te ᐩigyol ntsabhak ne hame ihywɛ bok ɛhaa ne hyep.

³⁷ ɛYɛso gha ne yaak ninɔn ne icwam ɛbhɛ na, “iRe de kɛ bel gbom ninaa ne pha yɛ ne so ncɛt.

³⁸ Roo ɛn ɛDaray yegha ne ɛbhɛ ɛ so ɛhaa ne ihwap pa te ɛ tom nɛ ninaa ne pha yɛ ndɔ ɛhay ya.”