ɛMacu 8 - ɛWee ne ìTsɛm iHywas

ɛYɛso gha kɛ Tul ɛKaparong iVebhe

¹ Kɛ ne sɛ ɛYɛso gha kɛ tɔm daa ne ɛwarang ngo, idira ninyi de gbom ne kungus ɛbhɛ.

² Ɛdɛ ɛnyi gha ne ɛ so ɛkparong ne yɛɛs ɛ te ne irwa-nggburuk ɛnu ɛyisɛ ɛYɛso gha, ɛ yaak ɛbhɛ, “ɛDaray, wu ɛ kɛ sim, ɛ sɛɛ ne yɛɛ ne tul ivebhe nge da.”

³ ɛYɛso gha ne dat ɛnyi gha ne iwɔ ne ɛ ji yaak ɛbhɛ, “Nggɛ sim, te ivebhe da tek kɛ.” Nɛ nten nɛ, ɛnyi gha ne te ɛken, ikparong ngga ne tek ɛbhɛ.

⁴ ɛYɛso gha ne yaak ɛnyi gha, “Yaang, sɔng ɛ mɔng ɛnyi ibol lɛ nang, yang cwi ɛlɔ ɛbo gha te ɛbhɛ tɔɔrek ito mo, ɛ ji hap itsanga de ne ɛMuusaa gha kɛ yɛk ngɛ wo, tɛ ninyi na ne ji seng wu ɛ kɛ te ɛken na.”

ɛYɛso gha kɛ te ɛKpuru ɛndiinday Nisooja ne iRooma ɛKen

⁵ Kɛ ne sɛ ɛYɛso gha kɛ bhɛ lel ndɔ ɛgarang ne iKafanahum, ɛdɛ ndiinday Nisooja ne iRooma na ne yɛɛs ɛlɔ ɛbhɛ, ɛ roro ɛbhɛ iphyik,

⁶ ɛ yɔngɔ, “ɛDaray ɛkpuru nge so ɛlɔ ne laal, ɛ kɛ baghat, ɛ sɔ nggbang gbom.”

⁷ ɛYɛso gha ne yaak ɛbhɛ, “Naa phɛ te mbɛ ɛken.”

⁸ ɛNdiinday ɛsooja gha ne kyii nɛ ɛ yɔngɔ, “ɛDaray, sɔng nggɛ hɔn ɛli ne aa yɛɛs ne ijwee nge wo nang, yang boote zɔng, ɛkpuru nge gha yaa ne te ɛken.

⁹ Daa ɛli ne mee wo, ma n bok ndiinday, ne n bok nisooja ne nzi ma wɛɛ nibhɛ. Nzi ne yaak ɛdɛng, ‘Cwi ɛnggyɛ,’ ne ɛ phɛ. Ne n da yaak ɛdɛng, ‘Yɛɛs ɛbɛ,’ ne ɛ yɛɛs. Wu nggɛ ne yaak ɛkpuru nge gha, ‘Mɔn ɛlɛ,’ aa ne mɔn.”

¹⁰ Ne sɛ ɛYɛso gha kɛ phok ɛlɛ wo, ne ɛ wum ɛnu zii, ne ɛ ji yaak ninyi na nɛ nibhɛ kungus ɛbhɛ wo, “Nzi tɔng nyini itin nɛ, sɔng nggɛ ku sɛ ɛdɛ ɛnyi niSɛrɛla gha ne ɛ bok ihywee ne ìnang ne itin nɛdee wo nang.

¹¹ Nzi tɔng nyini. Ninyi na gbom sɛ les ne iwap ɛdak gbik ne iwap ɛgɔɔ nibhɛ sooset, nibhɛ re nɛ ɛBaraying nga, ne ɛShaaku gha ne ɛYakub pa daa ne igbɔm ɛdaa ne irywa ba.

¹² Ne ji tuul ninyi na nɛ nibhɛ soye ninaa ɛTaanggbey ya, i cwaasek nibhɛ ndɔ ɛlɔ gbyik, ɛlɔ gha nɛ nibhɛ sɛ bhɛ san ne ntsɛk ne izinɛ.”

¹³ ɛYɛso gha ne yaak ɛndiinday nisooja na, “Hyel, yaa mɔn ɛli ne ˆɛ kɛ nang ne itin nɛ wo.” ɛKpuru ɛbhɛ gha ne te ɛken nɛ nten nɛ.

ɛYɛso gha kɛ Tes Ninyi gbom niKen

¹⁴ Kɛ ne sɛ ɛYɛso gha kɛ phɛ ne ijwee ɛBiturus, ne ɛbhɛ sɛ ɛgyinɛ ɛkuk ɛBiturus sa kɛ laal, ndɔm bok ɛbhɛ.

¹⁵ ɛYɛso gha ne dat ɛbhɛ iwɔ, ndɔm ba ne shii tek ɛbhɛ, ne ɛ yilitsik ɛ nang nibhɛ ire.

¹⁶ Kɛ ne sɛ irwirywɛ kɛ tuu, ninyi na ne yɛɛset ɛYɛso yegha nɛ ninaa ne ikpabyik niphoo, ɛYɛso gha ne tuul ikpabyik niphoo da ne ibol ɛnu ɛbhɛ, ɛ tes nishwa na niken gbik.

¹⁷ Kaa mɔn ɛlɛ wo te shwaak ibol de ne ɛnɛbi ɛShaa gha kaa boote ɛ yɔngɔ, “Ɛ kɛ tul njwii ndɔ irɔ mos ne ɛ bo ishwa mos.”

Nggbang ne Roos ɛYɛso Ye

¹⁸ Kɛ ne sɛ ɛYɛso gha kɛ yaang ɛli ne ɛgbaang idira ninyi wo kɛ te ɛbhɛ gyɔɔ wo, ne ɛ yɛk ninɔn ne icwam ɛbhɛ na wu tɛ nibhɛ bere ɛn gɔɔ ne ihwak ikpang ɛrenes so.

¹⁹ ɛDɛ ɛhaa ne kpɛl ɛShara gha ne yɛɛs ɛlɔ ɛYɛso gha, ɛ yaak ɛbhɛ, “ɛKyɛɛ ne iCwam, naa roos sɛ, gbik ɛlɔ gha ne ɛ phɛɛs.”

²⁰ ɛYɛso gha ne yaak ɛbhɛ, “Nikwiy ya bok ivong, ninon ɛdaa ne irywa na ne bok niryee, sɔng ɛNgɔn ɛNyi gha ne ɛ bok ɛlɔ ne aa phɔng ngɛ nang.”

²¹ Ɛdɛng ndɔ ninɔn ne icwam ɛYɛso gha ne yaak ɛbhɛ, “ɛDaray, shɛɛ yak nggyi bhɛ rɛɛ ɛkyɛɛ nge nyɛɛn.”

²² ɛYɛso gha ne yaak ɛbhɛ, “Kungus me, te ɛ tek ikpom ba ifɛ rɛrɛs ikpom ba.”

ɛYɛso gha kɛ Boote ne ɛGbaang ne iGbil

²³ ɛYɛso gha ne tɔm ndɔ ne ikparak, ninɔn ne icwam ɛbhɛ na ne ma kungus ɛbhɛ.

²⁴ Ne tang phyɔngɔle, ɛgbaang ne igbil ne shii wuru ifɛ yaa subhus inɛn ɛrenes da gbom, mpɛ ne i leesel ndɔ ne ɛkparak ko, ɛkparak ko ne yaa mɔn te ɛbhɛ yaa rene, ɛlɛy ɛYɛso gha bhɛ so nwa.

²⁵ Ninɔn ne icwam ɛbhɛ na ne bhɛ seme ɛbhɛ, nibhɛ yaak ɛbhɛ, “ɛDaray, phɔt njwii! Njwi yaa kus!”

²⁶ ɛYɛso gha ne yaak nibhɛ, “Nyinɛn ninaa ne ìnang ne itin mon de so ncɛt to, ikyee phɛ kɛ te ɛ wum ɛn ɛnik koo?” ɛYɛso gha ne ji yilitsik ɛ sit igbil lo ne igbugbung inɛn da ne ɛbung, ɛlɔ yɛ ne ku shii te yak.

²⁷ Ninyi na ne wum ɛnu zii, nibhɛ ne yɔngɔ, “Ya ihywee ɛnyi de wo ne igbil lo gbik ne igbugbung inɛn da ji ta phok ɛbhɛ woo?”

ɛYɛso gha kɛ Tul Ninyi ifaa iKabyik iBebhe

²⁸ Kɛ ne sɛ ɛYɛso gha kɛ bhɛ tuu ivel ne iGadaren ne ifɛ so ne ikpang ɛrenes so, nidɛng ninyi na nɛ nibhɛ shɛɛ ne ikpuu ne bhɛ sɛ ɛbhɛ. Ninyi yɛnaa nggyɛ wo kaa bok niphoo ndɔ nibhɛ, nibhɛ kaa ne bok irywen gbom ɛli ne hame ɛnyi kaa yɛɛ ne roos ɛnkiinɛ yɛwoo nggyɛ wo.

²⁹ Nibhɛ ne shii ta ikun, nibhɛ yɔngɔ, “iKyee ne ɛɛ tɔk njwii nɛ ɛNgɔn ɛTaanggbey? Ɛ kɛ yɛɛs ɛbɛ wo, ɛ yɛɛs ne bak njwi nggbang ngga nten nɛ tɔ naa?”

³⁰ Cɛcɛk ɛnggyɛ wo iwa ne itsɔɔm kaa ne sonɛ ne i hyep ifɛ.

³¹ Niphoo na ne roo ne ɛYɛso gha, nibhɛ yɔngɔ, “Wu ɛ kɛ tul njwi ndɔ ninyi yɛnaa wo, te ne ɛ tek njwii njwi bhɛ lel ndɔ ne iwa ne itsɔɔm mɛwoo nggyɛ.”

³² ɛYɛso gha ne yaak nibhɛ, “Cwi ɛn.” Nibhɛ ne wuusi nibhɛ bhɛ lel ndɔ ne itsɔɔm ba. iWa ne itsɔɔm mo ne tel ifɛ roos ɛmbambang ɛrenes sa, ifɛ bhɛ hoghɛse ndɔ ɛrenes sa gbik, ifɛ kus.

³³ Ninaa ne hyep itsɔɔm ma ne tel nibhɛ phɛ ndɔ ɛgarang, nibhɛ bhɛ tɔng ibol lɛ, gbik ne ɛkɔn na ne ɛ kɛ te nɛ nyini na nɛ nibhɛ kaa bok niphoo na.

³⁴ Ninaa ɛgarang nga ne wuru gbik, nibhɛ phɛ ɛlɔ ɛYɛso gha, Kɛ ne sɛ nibhɛ kɛ bhɛ yaang ɛYɛso yegha, nibhɛ ne roo ne ɛbhɛ wu te ɛ tek en ivel nen da.