ɛLuka 5 - ɛWee ne ìTsɛm iHywas

ɛYɛso gha Kɛ Yel-le Ninɔn ne iCwam Ɛbhɛ Ninaa ɛYisɛ Yɛ

¹ ɛDɛ ɛtuk ka, ɛYɛso gha kaa bhɛ kyinak ɛnu ɛRenes ne iJɛnasarɛt, idira ninyi de ne ma bhɛ tumɛy yɛ nibhɛ tenes ibol ɛTaanggbey de.

² ɛYɛso gha ne yaang ikparak ifaa ɛnu renes sa, nɛ ninaa ne lok izing kɛ tek ngɛ, nibhɛ yung bhɛ kuus ikpara nibhɛ.

³ Ne ɛ lel ndɔ ne idɛ ɛkparak ko ne ɛbhɛ so woo ɛSimɔn, ne ɛ yaak ɛSimɔn negha wu te ɛ hante ne shompe ɛbhɛ ndɔ inɛn da. Ne ɛ ji soos nɛ ndɔ yɛ ɛ mɛmɛ ninyi na nɛ.

⁴ Ne sɛ ɛ kɛ taal ivol ba, ne ɛ yaak ɛSimɔn negha, “Shompe ɛkparak ko ɛlɔ gha ne ɛ so ɛkyikyum, te ne ɛ cwaak ɛn ikpara mon da ndɔ inɛn ba ɛ wumus ɛn izing ngge.”

⁵ ɛSimɔn na ne kyii nɛ ɛ yɔngɔ, “ɛKyɛɛ njwi kɛ ra ɛbɛ wo, njwii kyangase ne lok izing ngge, sɔng njwi kɛ ne sɛ ɛkɔn nang. Wu igyɛ ɛ bo ɛlɛy, naa ne cwaak ne ikpara ba.”

⁶ Nibhɛ ne cwaak ikpara ba ndɔ inɛn ba, nibhɛ ne sɛ izing ngge gbogbom, ɛli ne ikpara nibhɛ ba kɛ yaa sɛs se.

⁷ iPhɛ ɛlɛy, nibhɛ ne yel-le nitaay nɛ nibhɛ so ne ɛhak ɛkparak wu tɛ nibhɛ yɛɛs, nibhɛ phyik en. Nitaay ya ne phɛ, nibhɛ bhɛ tuul izing nge, nibhɛ yɛk ihywɛ ne ikparak ifaa ba hyɔrɔ. iKparak ga ne yaa renes se.

⁸ Kɛ ne sɛ ɛSimɔn na, ne i bok ɛbhɛ ɛBiturus sa, kɛ yaang ɛlɛ wo, ne ɛbhɛ ho ɛYɛso yegha, nggbuk, ne iphanta ɛ yaak ɛbhɛ, “Hyel ɛ tek me ɛDaray yɔɔy. Nzo me ɛhaa ne ɛfɔt!”

⁹ Daa ɛli ne ɛbhɛ wo nɛ nitaay ya, kɛ yaang ɛkɔn ne kparat daa ne ihywee ne izing ngge nɛ nibhɛ kɛ wumus so,

¹⁰ ɛlɛy nɛ nitɛɛrɛk ɛSimɔn na, ɛYakub pa gbik ne ɛYohana gha, nɛ nibhɛ so ninɔn ɛZɛbɛdi na. ɛYɛso gha ne yaak ɛSimɔn negha, “Sɔng ɛ wum ɛnik ko nang, yaa tsa izenge wo, aa yaa hɔ me ninyi.”

¹¹ Nibhɛ ne tuul ikparak nibhɛ ba daa ne izay, nibhɛ teesek nikɔn nibhɛ na gbik, nibhɛ roos ɛYɛso yegha.

ɛYɛso gha Kɛ tul ɛKparong iVebhe

¹² ɛDɛ ɛtuk kɛ, ɛYɛso gha so ɛdɛ ɛgarang nga, ɛdɛ ɛnyi gha ne ɛ kaa bok ikparong ne tuu. Kɛ ne sɛ ɛ kɛ seng ɛYɛso yegha, ne ɛbhɛ cwi ne irway nggburuk ɛnu ɛyisɛ ɛbhɛ, ɛ yaak ɛbhɛ, “ɛNdiinday, wu ɛ kɛ sim ɛ sɛɛ ne tul me ivebhe nge da.”

¹³ ɛYɛso gha ne tɔɔl iwɔ, ɛ dat ɛbhɛ yaak ɛbhɛ, “Nggɛ sim, te ivebhe mo da wuru!” Nɛ nten nɛ ikparong ngga ne shii tek ɛbhɛ.

¹⁴ ɛYɛso gha ne yɛk ɛbhɛ nɛ nggbinggbing, ɛ yaak ɛbhɛ, “Sɔng ɛ mɔng ɛnyi ibol lɛdee wo nang, yang ku phee ɛ cwi ɛlɔ ɛbo ɛTaanggbey, te ɛbhɛ hap itsanga de ne ɛMuusaa gha kaa yɔng wu ɛ sɛ mɔn ɛn no, te iphɛ tɔɔrek ɛli ne ivebhe mo da kɛ tek kɛwo.”

¹⁵ Gbik ne iphɛ ɛlɛy, ngka ɛYɛso de ne shwalat gbarang; idira ninyi de ne i phɛɛs ɛlɔ ɛYɛso gha tɛ nibhɛ bhɛ tenes ɛbhɛ, ɛ ta tes nibhɛ niken.

¹⁶ ɛYɛso gha ne i mɔɔng ɛ tek nibhɛ, ɛ phɛ nilɔ na ne hame ɛnyi sonɛ, ɛbhɛ roo.

ɛYɛso gha Kɛ Te ɛBaghat ɛKen

¹⁷ Kaa ne sɛ ɛdɛ ɛtuk kɛ ne ɛYɛso gha so ne mɛmɛ ninyi na nɛ wo, niFarisawa na nɛ Ninaa ne Kpɛl ɛShara gha ne ma sooset ɛnggyɛ wo, nibhɛ kaa ne les nigarang ne iGalili, ne iYahudiya gbik ne iYɛrushɛlɛm. iTo-ndiinday ɛDaray de kaa ne so ndɔ ɛYɛso gha hyɔrɔ, ne ɛ tes nisha na niken.

¹⁸ Nidɛng ninyi na ne yɛɛs, nibhɛ bok ne ɛdɛ ɛnyi gha ne ɛ kɛ baghat, ne iphuurang, nibhɛ sim tɛ nibhɛ sɛɛ lel lɛ, nibhɛ bhɛ tek ɛnu ɛyisɛ ɛYɛso gha.

¹⁹ Sɔng nibhɛ ne sɛ ikɛk kang, daa ɛli ne igbagha wo kɛ pham ɛlɔ yɛ map. Nibhɛ ne wara daa ne ɛco ne ijwee gha, nibhɛ kugha cɛcɛɛy ɛlɔ gha ne ɛYɛso gha sonɛ wo, nibhɛ ne ji tɔmɔsek ɛbaghat ta nɛ ne iphuurang ɛbhɛ, ɛnu ɛyisɛ ɛYɛso gha.

²⁰ Kɛ ne sɛ ɛYɛso gha kɛ yaang ìnang ne itin nibhɛ de, ne ɛ yaak ɛbaghat ta, “ɛSaa! Kɛ hana yɛ ne ɛfɔt mo wo.”

²¹ niFarisawa na nɛ Ninaa ne Kpɛl ɛShara gha ne yaa bol ndɔ nibhɛ, nibhɛ bo, “ɛYa ɛnyi ghaa woo ne ɛɛ bol ivol ne bɛɛs ɛTaanggbey yeghaa? ɛTaanggbey zɔng ɛbhɛ so ɛhaa ne hana ɛnyi gha ne ɛfɔt ɛbhɛ wo!”

²² ɛYɛso gha ne seng icwas nibhɛ da ne ɛ yaak nibhɛ, “iKyee phɛ kɛ te ɛ kɛ yaa tas ɛn icwas sɛdaa woo?”

²³ Ya ibol iphɛ so phyongkaa? iDee ne naa yɔngɔ, “Kɛ hana yɛ ne ɛfɔt mo wo, hang idee ne naa yɔngɔ yilitsik, te ɛ hyil lɛ woo?

²⁴ Naa ne tɔɔl nyini wu ɛNgɔn ɛNyi gha bok ito ne hana ɛnyi gha ne ɛfɔt ɛbhɛ wo ndɔ ɛzay yeghaa wo.” Ne ɛ ji yaak ɛbaghat ta, “Nzi bok kɛ, yilitsik te ɛ bo iphuurang mo de, ɛ hyil lɛ.”

²⁵ Nɛ nten nɛ, ɛnyi gha ne yilitsik ɛnu ɛyisɛ nibhɛ gbik, ɛ bo ɛlɔ ne laal ɛbhɛ gha, ɛ bo nikɔn ɛ hyilis se, ɛ dɛp ɛTaanggbey ye.

²⁶ Ninyi na gbik ne yaang ɛkɔn ne kparat, nibhɛ ne yaa dɛp ɛTaanggbey yegha nibhɛ bo, “Ya kuk! Njwi kɛ yaang ɛgbaang ɛkɔn izenge wo!”

ɛYɛso gha Kɛ Yel-le ɛLawi Ye

²⁷ ɛTsim mɛ ɛlɛy, ɛYɛso gha ne wuru, ɛbhɛ sɛ ɛdɛ ɛhaa ne saasel ijam ne ivel la ne i bok ɛbhɛ ɛLawi, ɛ so ɛnu ɛtomɛ ɛbhɛ. ɛYɛso gha ne yaak ɛbhɛ, “Roos me.”

²⁸ ɛLawi gha ne yilitsik, ɛ tek nikɔn ɛbhɛ na gbik ɛ roos ɛYɛso yegha.

²⁹ ɛLawi gha ne ji yel-le ɛYɛso yegha ne idira ne ijwee ɛbhɛ. iDira ninaa ne saasel ijam ne ivel ba gbik nɛ nihak ninyi kaa ne ma sos ɛnggyɛ wo nibhɛ re ire de nɛ niYɛso yena.

³⁰ Nidɛng ndɔ niFarisawa na, nɛ nidɛng ndɔ Ninaa ne Kpɛl ɛShara gha ne ɛnu nibhɛ so ɛdaan nɛ, ne yaa bol nɛ ninɔn ne icwam ɛYɛso na ivol mumuk nibhɛ bo, “iKyee iphɛ kɛ te ɛ re ɛn, ɛ sɔ ɛn nɛ ninaa ne saasel ijam ne ivel la, gbik nɛ ninaa ne ɛfɔt taa?”

³¹ ɛYɛso gha ne kyii nibhɛ nɛ ɛ yaak nibhɛ, “Sɔng ɛnyi ɛken na tɔk ɛlɔ ɛhaa ne ihwal nang. ɛNyi ɛsha ɛbhɛ yang tɔk ɛbhɛ.

³² Sɔng nggɛ ne yɛɛs te n tɔk ninyi nɛ nibhɛ so cik kang, nggɛ yang yɛɛs te n tɔk ninaa ne ɛfɔt, tɛ nibhɛ san ɛbɔk.”

iBol ne kuma

³³ Nibhɛ ne yaak ɛYɛso yegha, “Ninɔn ne icwam ɛYohana na, kaa mɔɔng nibhɛ roro ne ɛTaanggbey ya, nibhɛ ne i kuma, ɛlɛy nɛ ninaa niFarisawa na, ikyee iphɛ kɛ te ninaa mo na i re, nibhɛ sɔ woo?”

³⁴ ɛYɛso gha ne yaak nibhɛ, “Yaa mɔn ɛlii nitaay ɛyiyaam ne yɛl la shɛɛ kpyak ko nten de ne ɛyiyaam ne yɛl la sonɛ nibhɛ woo?

³⁵ Nten nɛ yaaso ne sɛ bo ɛyiyaam ne yɛl la, i tek nitaay ya buu. Nɛ nten nɛ, nɛ nibhɛ sɛ ne ji yaa roro nibhɛ kuma wo.”

³⁶ Ne ɛ ji tɔng nibhɛ idɛ ibol de ndɔ ne igɔrɔp, ɛ yaak nibhɛ, Sɔng ɛNyi gha bo nggyɛt ne ɛtura ɛphas ɛ baa ne ɛtɛl lo nang. Wu ɛ kɛ mɔn ɛlɛ wo, ɛphas so yaa ne bonɛ ɛtɛl nggbot, ibong ne ɛtura de ne kyii hantey yɛ.

³⁷ Sɔng ɛnyi gha ne ta sit inɛn ɛnap mpas da ndɔ ihuhu ne ifɛ kɛ taal ihwet tang. Wu ɛ kɛ mɔn ɛlɛy wo, inɛn da yaa ne kpɛrɛ ihuhu da mpɛ loghɛt, ihuhu da ne ta bees se.

³⁸ I yang banas iguut de ndɔ ne izong ne ifɛ tɔ ne ihwet!

³⁹ Ɛlɛy dɔng, sɔng ɛnyi gha ne sɔ itsas ne iguut, ɛ kyii ta i sim te ɛ sɛɛ dad ifene yɛ nang, daa ɛli ne ɛ bo, iTsas de kɛ jam iphɛ phyin ifene ba!