ɛLuka 3 - ɛWee ne ìTsɛm iHywas

ɛYohana ne Yaak ne iBatisima gha Kɛ Sanga iBol ɛTaanggbey

¹ Kaa ne sɛ igbɔm ɛTibaryus sa, ne ɛ so ɛgbaang ɛgɔm ne ivel ne iRooma ba, kɛ hɔn ishay ɛnduwubɔ ne iphɛ iwii, ɛBuntus ɛBilatus kaa ne soye ɛgɔm-na ne iYahudiya. ɛHyiridus ne soye ɛgɔm ne iGalili, ɛgwaa ɛbhɛ ɛFilibus ne soye ɛgɔm ne iTuriya gbik ne iTarakɔnitis. ɛLisaniya ɛbhɛ ne soye ɛgɔm ne iBiliya.

² ɛNas ne ɛKayafa nibhɛ kaa ne soye igbaang nibo ɛTaanggbey. Nten nɛ ne ibol ɛTaanggbey de kaa ne bhɛ sɛ ɛYohana yegha, ne ɛ so ɛngɔn ɛZakaraya gha, ndɔ ɛhay.

³ ɛYohana gha kaa phɛ ndɔ nigarang nga nɛ nibhɛ tes iHywel ne iWurudun no gyɔɔ wo, ɛɛ tɔng ninyi na ibol ɛTaanggbey de, ɛ bok nibhɛ, “Tek ɛfɔt mon no ɛ san ɛn ɛbɔk, te ne yaak nyini ne ibatisima de, ɛTaanggbey ya yaa ne han nyini ne ɛfɔt mon no.”

⁴ Te ɛli ne ɛNɛbi ɛShaa gha kaa ku ibol ndɔ ne iwee ɛbhɛ wo ɛ bo, “ɛDɛ ɛnyi gha yeres ndɔ ɛhay ɛ bo, Ryɔng ɛn ɛDaray yegha ɛnkiinɛ wo. Ryɔng ɛn ɛbhɛ ɛnkiinɛ wo cik te ɛ roos.

⁵ Shwaasek ɛn nibesek ka, te ˆɛ bunga ɛn igbol ba, gbik ne ibarang ngge te iphɛ tes mbus. Tes ɛn nkpiinɛ ba ne ifɛ so nggyuk ko cik, Te nkpiinɛ ba ne ifɛ bok nikyuruk ka tes feles.

⁶ Gbik ninyi ɛzay ya sɛ ne yaang ɛli ne ɛTaanggbey ya kɛ phɔt nibhɛ!”

⁷ iDira ninyi de kaa ne wuru nibhɛ phɛ ɛlɔ ɛYohana gha te ɛbhɛ yaak nibhɛ ne ibatisima de. ɛYohana gha ne yaak nibhɛ, “Nyinɛn no ne ɛ so ɛn izɔ igywebhe! ɛHay ɛbhɛ kɛ ku shii yaak nyini wu te ɛ tel ɛn njenjek ɛTaanggbey de ne ihywɛ yaaso woo?

⁸ Mɔn ɛn nikɔn na nɛ nibhɛ yaa tɔɔrek wu ɛ kɛ san ɛn ɛbɔk ka nɛ ne itin nɛ. Sɔng ɛ ma shii hal ɛn ɛgyɛy ya wu ɛBaraying nga bhɛ so ɛkyɛɛ mon na nang. ɛTaanggbey ya sɛ yɛɛ ne hyere ikpɛɛ yɛdaa bɛ ifɛ teye ninɔn ɛBaraying nga.

⁹ iTsɛm be ne ku so ne icwin nihon da ihywɛ hyep ɛhiha ɛhon ne ɛ kɛ sang yɛk ikpam iywɛnɛng, te ihywɛ tɛmɛ ɛbhɛ, i cwaak ndɔ ne igboo.”

¹⁰ iDira ninyi de ne yaak ɛYohana yegha, “Njwi yaa ne ji mɔn ɛli daa mɛɛ?”

¹¹ ɛYohana gha ne kyii nɛ, ɛ yaak nibhɛ, “ɛNyi gha ne ɛ bok itsura ifɛ ifaa, te ɛ nang ɛhaa ne ɛ sang ɛdɛng, ɛhaa ne ɛ bok ire nang, te ne ɛ ma mɔn ɛlɛy.”

¹² Nidɛng ninaa ne saasel ijam ne ivel la kaa ne ma phɛ te bhɛ yaak nibhɛ ne ibatisima de; nibhɛ yɔngɔ, “ɛKyɛɛ ne iCwam, njwi yaa ne ma mɔn ɛlii?”

¹³ ɛYohana gha ne kyii nɛ, ɛ yaak nibhɛ, “Sɔng ɛ say ɛn ijam be ihywɛ phee ɛnu gha ne kɛ mɔng nyini wo nang.”

¹⁴ Nidɛng nisooja na ne ma phom ɛbhɛ nibhɛ yaak ɛbhɛ, “Njwit to lɛɛ? Njwi yaa ne ma mɔn ɛlii?” Ne ɛ yaak nibhɛ, “Sɔng ɛ bo ɛn ihwet ba ɛ phɔrɔt ɛn ne ijam ninyi de nang. Sɔng ɛ rop ɛn ninyi na ne ihyoo nang. Say ɛn ijam ne ifɛl mon de ne irway ihwala.”

¹⁵ Ninyi na kaa ku i hyep, nibhɛ ne yaa wɛɛ te ɛYohana gha ɛbhɛ soye ɛKiriti gha.

¹⁶ ɛYohana gha ne yaak nibhɛ, “Nzi yaak nyini ibatisima de ne inɛn, ɛdɛ ɛnyi gha ne yaaso ne ɛ phyin me. Sɔng nggɛ ma yung hɔn nzɛ biri ɛbhɛ irwik ne ikpikpangat nang. Ɛ sɛ ne yaak nyini ne ibatisima de idee ne iKabyik ɛTaanggbey, gbik ne igboo.

¹⁷ Ɛ bok igbii ɛbhɛ ne ɛ sɛ phemes ne ire ɛbhɛ de ɛ tul iphɛ kang, ɛbhɛ sit ne igban, ɛ ji tek ishoo yɛ, ɛ sit ndɔ ne igboo ne ifɛ sang taal le.”

¹⁸ Ndɔ ne nkpiinɛ ba kang-ka-kang, ɛYohana gha kaa ne tɔng ninyi na iBol iYɛnɛng.

¹⁹ ɛYohana gha kaa ne nep ɛGɔm ɛHyiridus se, daa ɛli ne ɛ kaa phɔt ɛHyirɔdiya ye ne ɛ so ɛkuk ɛgwaa ɛbhɛ ɛFilibus; nɛ nidɛng nikɔn nibebhe na ne ɛ mɔn.

²⁰ iPhɛ ɛlɛy, ɛHyiridus sa ne wum ɛYohana yegha ɛ cwaal ɛbhɛ ndɔ ne ijwee ne nyang, ɛ kyii ta hante ne ɛfɔt ɛbhɛ wo dɔng.

Kɛ Yɛk ɛYɛso yegha ne iBatisima

²¹ Kaa ne sɛ ɛtsim mɛ ne kɛ yaak ninyi na ne ibatisima de gbik, ne ma ji yɛk ɛYɛso yegha nɛ. ɛYɛso gha ne ji yaa roro ne ɛTaanggbey, irywa wo ne phaal le,

²² iKabyik ɛTaanggbey ne iphɛ so te ihywiyhwaa, ne tɔm iphɛ soos daa ɛYɛso gha. iZɔlɔs ne le daa ne irywa wo, ihywɛ boote, ihywɛ yɔngɔ, “iGyɛ ɛ so ɛngɔn nge ne nzi sim, nzi ne phok yɛnɛng mo.”

niKyɛɛ-niKyɛɛ ɛYɛso Gha

²³ ɛYɛso gha kaa bok ishay de nzuwubɔ icwat ɛ tsa ɛtomɛ ɛbhɛ gha. Ninyi na kaa ne i tas nibhɛ bo wu ɛ soye ɛngɔn ɛYisifu, ne ɛ kaa so ɛngɔn ɛHɛli.

²⁴ ɛHɛli gha kaa ne soye ɛngɔn ɛMatat. ɛMatat ta ne so ɛngɔn ɛLawi. ɛLawi gha kaa ne so ɛngɔn ɛMɛlɛki. ɛMɛlɛki gha ne so ɛngɔn ɛYanay. ɛYanay ya kaa ne so ɛngɔn ɛYisifu.

²⁵ ɛYisifu gha ne so ɛngɔn ne ɛMatatiya. ɛMatatiya gha kaa ne so ɛngɔn ɛMos. ɛMos sa ne so ɛngɔn ɛNahum. ɛNahum ma kaa ne so ɛngɔn ɛSili. ɛSili gha ne so ɛngɔn ɛNagay.

²⁶ ɛNagay ya kaa ne so ɛngɔn ɛMaat. ɛMaat ta ne so ɛngɔn ɛMatatiya. ɛMatatiya gha kaa ne so ɛngɔn ɛSɛmɛyen. ɛSɛmɛyen na ne so ɛngɔn ɛYɔsɛk. ɛYɔsɛk ka kaa ne so ɛngɔn ɛYooda.

²⁷ ɛYooda gha ne so ɛngɔn ɛYowana. ɛYowana gha kaa ne so ɛngɔn ɛResa. ɛResa gha ne so ɛngɔn ɛZɛrubabɛl. ɛZɛrubabɛl la kaa ne so ɛngɔn ɛShɛtiyɛl. ɛShɛtiyɛl la ne so ɛngɔn ɛNɛri.

²⁸ ɛNɛri gha kaa ne so ɛngɔn ɛMɛlɛki. ɛMɛlɛki gha ne so ɛngɔn ɛDi. ɛDi gha kaa ne so ɛngɔn ɛKosam. ɛKosam ma ne so ɛngɔn ɛLamadam. ɛLamadam ma kaa ne so ɛngɔn ne ɛRi.

²⁹ ɛRi gha kaa ne so ɛngɔn ɛYɛsuwa. ɛYɛsuwa gha ne so ɛngɔn ɛLiyeza. ɛLiyeza gha kaa ne so ɛngɔn ɛYɔrim. ɛYɔrim ma ne so ɛngɔn ɛMatat. ɛMatat ta kaa ne so ɛngɔn ɛLawi.

³⁰ ɛLawi gha ne so ɛngɔn ɛSimiyɔn. ɛSimiyɔn na kaa ne so ɛngɔn ɛYahoda. ɛYahoda gha ne so ɛngɔn ɛYisifu. ɛYisifu gha kaa ne so ɛngɔn ɛYonam. ɛYonam na ne so ɛngɔn ɛLiyakyim.

³¹ ɛLiyakyim ma kaa ne so ɛngɔn ɛMɛlɛya. ɛMɛlɛya gha ne so ɛngɔn ɛMɛna. ɛMɛna na kaa ne so ɛngɔn ɛMatata. ɛMatata gha ne so ɛngɔn ɛNatan. ɛNatan na kaa ne so ɛngɔn ɛDoda.

³² ɛDoda gha ne so ɛngɔn ɛYɛsɛ. ɛYɛsɛ gha kaa ne so ɛngɔn ɛBadi. ɛBadi ta ne so ɛngɔn ɛBowas. ɛBowas gha ne so ɛngɔn ɛSalamon. ɛSalamon na kaa ne so ɛngɔn ɛNashon.

³³ ɛNashon na ne so ɛngɔn ɛMinadap. ɛMinadap pa kaa ne so ɛngɔn ɛRam. ɛRam ma ne so ɛngɔn ɛDimi. ɛDimi na kaa ne so ɛngɔn ɛRini. ɛRini gha kaa ne so ɛngɔn ɛHɛziron. ɛHɛziron na ne so ɛngɔn ɛPɛrɛs. ɛPɛrɛs sa ne so ɛngɔn ɛYahoda.

³⁴ ɛYahoda gha ne so ɛngɔn ɛYakub. ɛYakub pa kaa ne so ɛngɔn ɛShaaku. ɛShaaku gha ne so ɛngɔn ɛBaraying. ɛBaraying nga kaa ne so ɛngɔn ɛTɛɛra. ɛTɛɛra gha kaa ne so ɛngɔn ɛNahot.

³⁵ ɛNahot ta kaa ne so ɛngɔn ɛSɛruk. ɛSɛruk ka ne so ɛngɔn ɛRɛyu. ɛRɛyu gha ne so ɛngɔn ɛPɛlɛk. ɛPɛlɛk ka kaa ne so ɛngɔn ɛBet. ɛBet ta kaa ne so ɛngɔn ɛShɛla.

³⁶ ɛShɛla gha ne so ɛngɔn ɛKɛnan. ɛKɛnan na kaa ne so ɛngɔn ɛRafahat. ɛRafahat ta kaa ne so ɛngɔn ɛShɛɛm. ɛShɛɛm ma ne so ɛngɔn ɛNuhu. ɛNuhu gha kaa ne so ɛngɔn ɛLamɛk.

³⁷ ɛLamɛk ka ne so ɛngɔn ɛMɛtusɛla. ɛMɛtusɛla gha kaa ne so ɛngɔn ɛNɔk. ɛNɔk ka ne so ɛngɔn ɛYarɛt. ɛYarɛt ta kaa ne so ɛngɔn ɛMahalɛl. ɛMahalɛl la ne so ɛngɔn ne ɛKɛnan.

³⁸ ɛKɛnan na kaa ne so ɛngɔn ɛNos. ɛNos sa kaa ne so ɛngɔn ɛSɛt. ɛSɛt ta kaa ne so ɛngɔn ɛDɛmu. ɛDɛmu gha kaa ne so ɛngɔn ne ɛTaanggbey.