ɛLuka 24 - ɛWee ne ìTsɛm iHywas

ɛYɛso gha Kɛ Yilitsik ne iKpuu Da

¹ Nikuk ka ne wuru ywiriri ɛtuk ne iLaadi, nibhɛ bo nɔɔy ɛnkyinkyɔp pa, nɛ nibhɛ kɛ ku ryɔng ngo nibhɛ phɛ nɛ ne ikpuu da.

² Nibhɛ ne bhɛ sɛ kɛ ku kungare ɛkikɛɛ wo ne kɛ cwaal ne ikpuu ba.

³ Nibhɛ ne lel ndɔ ne ikpuu ba, sɔng nibhɛ ne yaang ikom ɛDaray ɛYɛso de nang.

⁴ Nibhɛ ne wum en zii, nidɛng ninyi na ifaa ne shii wuru nibhɛ bok itsura ihwala yɛ hyahyak, nibhɛ kyinak cɛcɛk nɛ nibhɛ.

⁵ Nikuk ka ne wum ɛnik gbom, nibhɛ sese itso. Ninyi na ne yaak nibhɛ, “iKyee iphɛ kɛ te ɛ tɔk ɛn ɛnyi ɛken na ɛlɔ ne ikpom baa?

⁶ Sɔng ɛYɛso gha so ɛbɛ wo nang, Ɛ kɛ yilitsik. Taate ɛn ne ɛkɔn na ne ɛ kaa mɔng nyini wo nten de ne kaa so ɛn nɛ nibhɛ ne iGalili de.

⁷ Ɛ yaak nyini, ‘iPhɛ so nggbinggbing bhɛ nang ɛNgɔn ɛNyi gha ne iwɔ ninaa ne ɛfɔt nibhɛ gangat ɛbhɛ, ɛ ji yilitsik ndɔ ne ikpuu ba ɛtuk ne itwat tɛ.’ ”

⁸ Nikuk ka ne jii taate ne ibol ɛbhɛ de.

⁹ Kɛ ne sɛ nibhɛ kɛ kyii nibhɛ hyil en, nibhɛ ne bhɛ tɔng ninyi ɛnduwubɔ ne ɛnyi ɛdaan na, nɛ ɛbyin ninyi na nikɔn nɛnaa wo gbik.

¹⁰ Nikuk ka nɛ nibhɛ kaa tɔng Ninɔn ne Tom ma ivol lɛbaa wo kaa ne so ɛlɛ: ɛMɛri ne ɛ le ne ivel ne iMagadala, ne ɛYowana, ne ɛMɛri ne ɛ soye ɛgyinɛ ɛYakub; nɛ ɛbyin nikuk ka nɛ nibhɛ kaa sonɛ nibhɛ wo.

¹¹ Sɔng Ninɔn ne Tom ɛYɛso na kaa ne jung sim ibol nikuk kɛdee nggyɛ wo nang, nibhɛ kaa wɛɛ te ibol ɛbuu.

¹² Gbik ne iphɛ ɛlɛy, ɛBiturus sa ne bo nikɔn ne nggbiy ɛ phɛ gɔɔ ne ikpuu ba, ɛbhɛ te ne ɛkuum ɛ yɛɛn ndɔ yɛ, ɛ yaang ɛtura ne ililing ngo ndɔ ne ikpuu da zɔng. Ne ɛ ji kyii ne irway ne kparat, ɛɛ tas ɛkɔn na ne ɛ kɛ te.

Ne Nkiinɛ ne iMawus

¹³ ɛTuk kɛghaa nggyɛ wo nang, nidɛng ninaa ne roos sa ifaa, kaa ne so nkiinɛ, nibhɛ phɛɛs ɛdɛ ɛgarang nga ne bok ɛbhɛ iMawus. iKyakyak ɛgarang ngɛdee nggyɛ wo ne iYɛrushɛlɛm be kaa hɔn imɛɛl ɛniitaa.

¹⁴ Nibhɛ kaa ne i bol ivol nikɔn na nɛ nibhɛ kɛ tes so.

¹⁵ Kɛ ne sɛ nibhɛ so ndɔ ne ivol nibhɛ ba, ɛYɛso gha ne sɛ nibhɛ, nibhɛ te icwang.

¹⁶ Nibhɛ ne yaang ɛbhɛ, sɔng ne sim nibhɛ nɛ nibhɛ seng ɛbhɛ nang,

¹⁷ ɛYɛso gha ne yaak nibhɛ, “iYa ibol ne ɛ ji bol ɛn nkiinɛ wo lɛɛ?” Nibhɛ ne kunggbyak nibhɛ bees irway.

¹⁸ ɛDɛng ne i bok ɛbhɛ ɛKyilɔbas ne boote ne ɛYɛso gha, ɛ yaak ɛbhɛ, “iGyɛ zɔng ɛ ji so ɛphas ɛnyi ndɔ ne iYɛrushɛlɛm be ne ɛ tɔɔ doo nikɔn na nɛ nibhɛ kɛ tes ndɔ nituk kɛnaa wo naa?”

¹⁹ ɛYɛso gha ne phom ɛ yɔngɔ, “ɛYakɔn ɛbhɛ ɛ tes lɛɛ?” Nibhɛ ne kyii nɛ, nibhɛ yɔngɔ, “Nikɔn na nɛ nibhɛ kɛ tes ne ɛYɛso ne iNazarat ta. Ɛ kaa so ɛNɛbi ne ɛ bok ito daa ne nikɔn na ne ɛ bol ɛ ta i mɔn ɛnu ɛyisɛ ɛTaanggbey ya gbik nɛ ninyi na,

²⁰ nindiinday nibo ɛTaanggbey ya nɛ nigɔm mos sa kaa ne nang ɛBilatus se ɛbhɛ wu te bhɛ hyɛ ɛbhɛ ɛshara ne ku, nibhɛ ne ji gangat ɛbhɛ.

²¹ Njwì kaa yɛk ne irway njwii bo wu ɛbhɛ sɛ phɔt ninyi niSɛrɛla na. iPhɛ dee nituk kɛ kɛ hɔn itwat izenge nɛ nikɔn nɛnaa wo kaa tes so.

²² Kang ne ɛlɛy, nidɛng nikuk mos sa kɛ ji ta nang njwii ɛkɔn ne kparat. Nibhɛ kɛ wuru ne ihwɛlɛ ne izenge wo nibhɛ phɛ ne ikpuu ba,

²³ sɔng nibhɛ ne bhɛ sɛ ikom ɛYɛso de nang. Nibhɛ ne ji bhɛ kyii nibhɛ yaak njwii wu i kɛ yaang iyuwa niMalɛka nɛ nibhɛ kɛ yaak en wu ɛYɛso gha so ɛken.

²⁴ Nidɛng ndɔ mos kaa ne ma phɛ ne ikpuu ba, nibhɛ ne bhɛ sɛ ɛlɛy ne ibol lɛ so. Sɔng nibhɛ kyii yaang ɛYɛso yegha nang.”

²⁵ ɛYɛso gha ne yaak nibhɛ, “Niwamang en, ˆɛ so hyɔl ne nang ne itin nɛ ne ibol de nɛ ninabawa na kɛ tɔng ngo!

²⁶ iPhɛ so nggbinggbing ɛKiriti gha sɔ nggbang ngɛdaa nggyɛ wo nyɛɛn ɛ kyi lel ndɔ ne ndiinday ɛbhɛ de!”

²⁷ ɛYɛso gha ne ji kpɛl nibhɛ ɛkɔn na ne ɛWee ne iBol ɛTaanggbey yo kɛ bol daa ne ito ɛbhɛ de. Ɛ kaa tsa ne ɛkɔn na ne ɛMuusaa kɛ bol ɛ phyii bhɛ hɔn ne ɛhaa nɛ ninabawa na kɛ ma bol lo.

²⁸ Kɛ ne sɛ nibhɛ kɛ bhɛ tuu cɛcɛk ne ɛgarang nga nɛ nibhɛ phɛɛs so nang, ɛYɛso gha ne mɔnte te aa phee.

²⁹ Nibhɛ ne roro ne ɛbhɛ nibhɛ yaak ɛbhɛ, “Sɔng ɛ phee wo nang. Ɛlɔ yɛ kɛ phee ye, ɛ yungaa te gbyik, yɛɛs te ɛ ra ne ijwee mos so.” ɛYɛso gha ne ɛ roos nibhɛ, ɛ phɛ ne ijwee nibhɛ wo.

³⁰ Kɛ ne sɛ nibhɛ kɛ bhɛ sos nibhɛ yaa re ire, ɛYɛso gha ne bo ibɛrɛdi, ɛ tɔɔrek ɛTaanggbey ye irway ihwala, ɛ kpɛl iphɛ ɛ ji nang nibhɛ wu te nibhɛ re.

³¹ ɛNggyɛy yo ne irwisɛ nibhɛ ba ne ji phaal le, nibhɛ ne seng wu ɛYɛso ghaa wo. ɛYɛso gha ne shii tek nibhɛ ɛ birit.

³² Nibhɛ ne yaa phomos en ndɔ nibhɛ, nibhɛ bo, “Sɔng irway mos ba kɛ maa re te igboo wo nten de ne ɛ kɛɛ bol ne njwii nkiinɛ wo ɛɛ kpɛl njwit ɛwee ne Ibol ɛTaanggbey yo nang nge?”

³³ Nibhɛ shii bo nikɔn nibhɛ kyii ne iYɛrushɛlɛm be. ɛNggyɛ wo nibhɛ ne bhɛ sɛ ninɔn ne icwam ɛnduwubɔ ne ɛnyi ɛdaan na so ɛlɔ ɛdaan ne ɛbyin ninyi na,

³⁴ nibhɛ bol nibhɛ bo, “ɛTsak ne ɛYɛso gha kɛ yilitsik ndɔ ne ikpuu ba! Ɛ kɛ bhɛ wuru ɛSimɔn ne!”

³⁵ Ninaa ifaa yɛnaa nggyɛ wo ne ma tɔng ɛkɔn na ne ɛ kɛ te nɛ nibhɛ nkiinɛ wo, ɛli nɛ nibhɛ kɛ seng ɛYɛso yegha ɛtsim mɛ ne ɛ kɛ kpɛlɛ ibɛrɛdi de ɛ nang nibhɛ wo.

ɛYɛso kɛ bhɛ Wuru Ninɔn ne iCwam Ɛbhɛ

³⁶ Kɛ ne sɛ ninyi ifaa yɛnaa nggyɛ wo maa tɔɔ tɔng nibhɛ ibol lɛdee nggyɛ wo nang, ɛYɛso ne shii bhɛ kyinak ndɔ nibhɛ ɛ yɔngɔ, “Te irway ne laal shɛɛ ndɔ mon.”

³⁷ Nibhɛ ne wum ɛnik nibhɛ yaa kparat, daa ɛli nɛ nibhɛ wɛɛ tɛ nibhɛ yaang iyuwa.

³⁸ ɛYɛso gha ne yaak nibhɛ, “iKyee phɛ kɛ te ɛ kparat ɛn no, ˆɛ ta i to ɛn irway baa?

³⁹ Yaang ɛn ibɔ nge de ne ita nge de. Mee ne ito nge! Dat ɛn mɛɛn te ɛ yaang ɛn, sɔng iyuwa ɛnyi de bok ikpup ne inwam ɛli ne ɛɛ yaang ɛn n bok ko nang.”

⁴⁰ Kɛ ne sɛ ɛ kɛ boote ɛlɛ wo nang, ne ɛ ji tɔɔrek nibhɛ ibɔ ɛbhɛ de ne ita de gbik.

⁴¹ Gbik ne irway ihwala nɛ nibhɛ bok ko, nibhɛ ne jung wum en zii, nibhɛ to irway, ɛYɛso gha ne phom nibhɛ ɛ yɔngɔ, “Ɛ bok ɛn ire ɛbɛ woo?”

⁴² Nibhɛ ne nang ɛbhɛ ikun ne izing nɛ nibhɛ kɛ wol.

⁴³ ɛYɛso gha ne say ɛ re ɛnu ɛyisɛ nibhɛ.

⁴⁴ Ne ɛ yaak nibhɛ, “iBol lɛdee wo ne nggaa mɔng nyini ɛli ne nggaa tɔ ne nyinɛn no: iPhɛ so nggbinggbing i shwaak nikɔn na ne kɛ haa daa ne ito nge de ndɔ iMɛmɛ ɛMuusaa da ninabawa na ma ta haa wo, i kyii ta haa ndɔ ne ɛWee ne iGhel lo.”

⁴⁵ ɛYɛso gha ne ji phaal irway nibhɛ da tɛ nibhɛ seng ɛkɔn na ne kɛ haa ndɔ ne ɛWee ne iBol ɛTaanggbey yo.

⁴⁶ Ɛ kaa yaak nibhɛ, “ɛKɔn neghaa ne Kaa haa ndɔ ne ɛWee ne iBol ɛTaanggbey yo, iPhɛ so nggbinggbing, ɛKiriti gha sɔ nggbang ɛ ji yilitsik ndɔ ne ikpuu ba ɛtuk ne itwat tɛ,

⁴⁷ ndɔ ne irywɛɛk ɛbhɛ wo ne sɛ ne tɔng igbagha wo gbik ibol ne san ɛbɔk ge, ne idee ne hana ɛfɔt. Sɛ ne tsa ne iYɛrushɛlɛm.

⁴⁸ Nyinɛn ɛ kɛ ne yaang ɛ nikɔn nɛnaa wo ne irwisɛ mon.

⁴⁹ Naa ne bhɛ tom nyini ne ɛHaa gha ne ɛKyɛɛ nge kɛ ku sim-mɛ wo. Ne ɛ shɛɛ ɛn ne iYɛrushɛlɛm be ɛ hyep ɛn te nang nyini ihwet ɛdaa ne irywa ba.”

Kɛ Bo ɛYɛso yegha Phɛ nɛ Daa ne iRywa

⁵⁰ Kɛ ne sɛ ɛYɛso gha kɛ bo ninɔn ne icwam ɛbhɛ na ɛ phɛ nɛ ɛgarang nga ne i bok ɛbhɛ iBɛtani, ne ɛ yinɛ ibɔ ɛbhɛ daa ne irywa ɛ sit nibhɛ ne ɛwɛng.

⁵¹ Kɛ ne sɛ ɛ tɔ ne sirit nibhɛ ne ɛwɛng nga, ne ɛ tek nibhɛ i bo ɛbhɛ i wara nɛ daa ne irywa.

⁵² Nibhɛ ne re ɛbhɛ ntsong nibhɛ ji kyii nibhɛ phɛ ne iYɛrushɛlɛm be ne irway ihwala gbom.

⁵³ Nibhɛ ne yaa shɛsɛ ndɔ ne iDeng nge cɛcɛɛy nibhɛ dɛp ɛTaanggbey yegha.