ɛLuka 23 - ɛWee ne ìTsɛm iHywas

Kɛ Phɛ ne ɛYɛso gha ɛLɔ ɛBilatus

¹ iTɔrɔng niYahodawa de ne kpuruuy gbik nibhɛ phɛ ne ɛYɛso gha ɛlɔ ɛBilatus.

² Kɛ ne sɛ nibhɛ kɛ tuu ɛnggyɛy wo nang, nibhɛ ne rop ɛYɛso yegha ne ihyoo nibhɛ bo, “Njwi kɛ wum ɛnyi yɛghaa wo ɛ subhus ninyi. ˆƐɛ bok nibhɛ wu hang nibhɛ tal ɛKɛɛsat re ijam ne ivel, ne ɛ ta yaak nibhɛ wu yee i soye ɛKiriti, i ta soye ɛgɔm.”

³ ɛBilatus sa ne phom ɛYɛso yegha, ɛ yaak ɛbhɛ, “iGyɛ so ɛgɔm niYahodawa na ɛsaa?” ɛYɛso gha ne kyii nɛ, ɛ yaak ɛbhɛ, “Ɛɛy, ɛ bo ɛlɛy.”

⁴ ɛBilatus sa ne yaak nindiinday nibo ɛTaanggbey ya gbik ne idira ninyi de, “Sɔng nzi yaang ɛnyi yɛghaa wo kɛ mɔn ɛkɔn ɛbebhe nang.”

⁵ Nibhɛ ne jung re ɛnu ɛyisɛ nibhɛ yɔngɔ, “Lenɛ ne mɛmɛ ɛbhɛ da ɛ kɛ te ninyi ne ivel ne iYahudiya na yɛk ishishim. Ɛ kɛ tsa ɛkɔn neghaa wo ne iGalili, ɛbhɛ ghaa kɛ ne i hɔn ne ɛbɛ.”

Kɛ Phɛ ne ɛYɛso gha ɛLɔ ɛHyiridus

⁶ Kɛ sɛ ɛBilatus sa kɛ phok ɛlɛ wo nang, ne ɛ phom nibhɛ, ɛ yaak nibhɛ, “ɛNyi yɛghaa wo so ɛnyi ne iGalili naa?”

⁷ Nibhɛ ne yɔngɔ yɛɛy. Ne sɛ ɛBilatus sa kɛ seng wu ɛYɛso gha le ne ivel ba ne ɛHyiridus sa ɛbhɛ so ɛgɔm mɛ wo, ne ɛ yɛk ngɛ nibhɛ bo ɛbhɛ nibhɛ phɛ ne ɛbhɛ ɛlɔ ɛHyiridus sa, ne ɛ kaa so ne iYɛrushɛlɛm nɛ nten nɛ.

⁸ Kɛ ne sɛ ɛHyiridus sa kɛ yaang ɛYɛso yegha nang, ne ɛ yɛk irway ihwala gbom, daa ɛli ne ɛ kaa ku i tɔk te ɛ sɛɛ yaang ɛbhɛ. Ɛ kaa ku i phok ngka ɛYɛso de ne ɛ yaa sim te ɛ sɛ yaang ɛdɛ ɛkɔn ne kparat ta ne ɛYɛso gha yaa mɔn.

⁹ iPhɛ ɛlɛy yang, ɛHyiridus sa ne phomos ɛYɛso yegha nikɔn na, sɔng ɛYɛso gha ne kyii ɛbhɛ ibol nang.

¹⁰ Nindiinday nibo ɛTaanggbey ya nɛ Ninaa Kpɛl ɛShara gha ne shompeey ɛnu ɛyisɛ nibhɛ hante ne sɔke ne igboo yɛ te yaang ibebhe ɛYɛso de.

¹¹ ɛHyiridus sa nɛ nisooja ɛbhɛ na ne cɔk ɛYɛso yegha irway nibhɛ ne i sɛ ɛbhɛ. Nibhɛ bo ɛgbaang ne ɛtura, ne ɛbhɛ so te ɛwoo nigɔm, nibhɛ yɛk ɛbhɛ nɛ, nibhɛ kyii ne ɛbhɛ ɛlɔ ɛBilatus sa.

¹² ɛTuk kɛghaa nggyɛ wo nang, ɛBilatus sa ne ɛHyiridus sa kaa ne teye nitay daa ɛli ne sɔng nibhɛ kaa ku i yaang en ywit tang.

Kɛ Hyɛ ɛYɛso yegha ɛShara ne iKu

¹³ ɛBilatus sa ne yel-le nindiinday nibo ɛTaanggbey ya nɛ nigɔm ma gbik ne igbagha wo ɛlɔ ɛdaan,

¹⁴ ne ɛ yaak nibhɛ, “Ɛ kɛ yɛɛs ɛn mɛɛn ne ɛnyi yɛghaa wo ɛ bok ɛn wu ɛ subhus ninyi. Nggɛ ne phɛl ɛbhɛ ɛbɛ wo, ɛnu ɛyisɛ mon, sɔng nggɛ ne sɛ ɛbhɛ ne ɛdɛ ɛkɔn ɛbebhe gha ne ɛ bo ɛn wu ɛɛ mɔn no nang.

¹⁵ Ɛlɛy ne ɛHyiridus sa kɛ ma bhɛ sɛ ɛbhɛ. iPhɛ phɛ kɛ te ɛ kɛ bhɛ kyii njwii ne ɛbhɛ ɛbɛ wo. Sɔng ɛnyi yɛghaa wo kɛ mon ɛkɔn ne sɛɛ yɔng yaa phoo ɛbhɛ wo nang.

¹⁶ iPhɛ ɛlɛy yang, naa ne sɔn ɛbhɛ ne ihon tsasarak n ji tek ɛbhɛ ɛ hyel.”

¹⁷ Nten ne iDira ne Tes iDee de Tsak ko nang ɛBilatus sa kaa ne i biri ninyi na ɛnyi ɛdaan ndɔ ninaa ne kɛ rop po.

¹⁸ iDira ninyi de gbik ne byinkit nibhɛ tɔɔk izɔlɔs, nibhɛ yɔngɔ, “Te phoo ɛnyi yeghaa wo, te tul njwii ɛBarabas se!”

¹⁹ Kaa rop ɛBarabas segha daa ɛli ne ɛ kaa yɛk ninyi nɛ nibhɛ yaa bɛɛs igbɔm phyii bhɛ phoo ne ɛnyi.

²⁰ ɛBilatus sa ne jung ngee sim te sɛɛ tek ɛYɛso yegha, iphɛ ɛlɛy yang ne ɛ ta roo nɛ ninyi na dɔng.

²¹ Nibhɛ ne jung ngee rɛrɛ nibhɛ bo, “Te gangat ɛbhɛ! Te gangat ɛbhɛ!”

²² ɛBilatus sa ne boote nɛ nibhɛ ɛhaa ne itwat tɛ, ɛ yaak nibhɛ, “Ɛlɔ ne ikyee? ɛFɔt ne iKyee ne ɛ kɛ mɔn ne? Sɔng nzi yaang ɛ kɛ mɔn ɛkɔn na ne aa te i phoo ɛbhɛ wo nang. Naa yɛk ngɛ hal ɛbhɛ, te tek ɛbhɛ.”

²³ Ninyi na ne jung hante ne yinɛ izɔlɔs nibhɛ bo wu te gangat ɛYɛso yegha, ivol nibhɛ ba ne mɔɔng ifɛ re.

²⁴ ɛBilatus sa ne hyɛ ɛYɛso yegha ɛshara gha ɛli nɛ nibhɛ bol lo.

²⁵ Ɛ kaa tul nibhɛ ɛnyi gha nɛ nibhɛ sim mo. ɛNyi gha ne kaa rop ɛbhɛ ɛlɔ ne bɛɛs igbɔm ba gbik ne iphoo ɛnyi ba, ɛ ji nang nibhɛ ɛYɛso yegha wu tɛ nibhɛ bhɛ mɔn ɛbhɛ ne ɛkɔn na nɛ nibhɛ sim.

Kɛ Gangat ɛYɛso Yegha

²⁶ Nisooja na ne bo ɛYɛso yegha nibhɛ yaa hyel lɛ. Kɛ ne sɛ nibhɛ so ne ihywel ba, nibhɛ ne sɛ ɛdɛ ɛnyi ne iSɛrene gha ne i bok ɛbhɛ ɛSimɔn ɛ yaaso ndɔ ɛgarang nga. Nibhɛ ne wum ɛbhɛ nibhɛ nang ɛbhɛ ihon ne gangat ɛYɛso wo ɛ roos ɛbhɛ ne ɛtsim.

²⁷ iDira ninyi de kaa ne so gbom nɛ nibhɛ kaa ma kungus ɛYɛso yegha. Nikuk kaa ne ma sonɛ nɛ, nɛ nibhɛ kaa san ɛYɛso yegha, nibhɛ banga ikpun.

²⁸ ɛYɛso gha ne hyereey ɛ yaak, “Nikuk ne iYɛrushɛlɛm yɛɛy! Sɔng ɛ san ɛn mɛɛn no nang, san ɛn ishwin ne itso mon, ne ivaa ninɔn mon.”

²⁹ Nten yaaso nɛ ninyi na sɛ yɔngɔ, “ɛKuk ɛkuru gha, ne ɛ kɛ sang ku yɛk ko, ɛ sang ku sunga ɛngɔn na, ɛbhɛ soye ɛhaa ɛwɛng.”

³⁰ Nten nɛdee nggyɛ wo nɛ ninyi na sɛ yaak ibarang ngge: “Hoghɛse ɛn daa mos!” Nibhɛ ne yaak igbol ba, “Cwamas ɛn njwii.”

³¹ ɛYɛso gha ne hante ne yaak nibhɛ, “Wu ninyi kɛ mɔn nikɔn nɛnaa wo daa ne ihon no ne ifɛ tɔ ishwirim mo, nibhɛ sɛ ne ji mɔn ɛlii ne sɛ́ sɛ ifɛ kɛ howo woo?”

³² Kaa ne ma boos nidɛng ninaa ɛyi na ifaa ne yaa bhɛ phobho nibhɛ gbik ne ɛYɛso gha.

³³ Kaa ne sɛ nibhɛ kɛ bhɛ tuu ɛlɔ gha ne i bok ɛbhɛ ɛlɔ ne iKpɔrɔk ne iTso ba, nibhɛ ne gangat ɛYɛso yegha ɛnggyɛ wo nɛ ninaa ifaa na, ɛdaan ne so ne iwɔ ne irwye ɛbhɛ ɛdɛng ne ji so ne iwɔ ne itsan ɛbhɛ.

³⁴ ɛYɛso gha ne yɔngɔ, “ɛTaa, hana nibhɛ nɛ, sɔng nibhɛ yɛɛ ɛkɔn na nɛ nibhɛ mɔn nang.” Nisooja na ne ji ren inɛn daa ne ibol ne itsura da, te nibhɛ seng ɛwoo ne ɛrɔngɔ yaa boos.

³⁵ Ninyi na ne kyinasek nibhɛ wɛɛ. Nindiinday ya ne i cɔk ɛbhɛ irway nibhɛ bo, “Ɛ kɛ phɔrɔt nidɛng te ne ɛ ma phɔt ito ɛbhɛ de, wu ɛbhɛ ɛ so ɛKiriti gha ne ɛTaanggbey ya kɛ kasa wo.”

³⁶ Nisooja na ne ma cɔk ɛbhɛ irway ba. Nibhɛ bo inɛn ɛnap, nzɔwɔkɔk kɛ nibhɛ nang ɛbhɛ wu te ɛ sɔ.

³⁷ Nibhɛ ne ji yɔngɔ, “Wu igyɛ wo ɛ so yɛ ɛgɔm niYahodawa na, ne ɛ phɔt ito mo!”

³⁸ Nibhɛ haal, nibhɛ baa daa ɛco ne ihon na ne kɛ gangat ɛYɛso yegha nɛ wo, nibhɛ bo, “ɛgɔm niyahodawa ghaa wo!”

³⁹ ɛDɛng ndɔ ninaa ɛyi na ne kɛ gangat nibhɛ nɛ niYɛso yena, ne ɛ ma cwaak ne idɛ ibol ne bɛɛs de, ɛ yaak ɛYɛso yegha, “Nzi shɛɛ bo igyɛ soye ɛKiriti gha nang? Ne ɛ phɔt ito mo, ɛ ta phɔt njwii.”

⁴⁰ ɛHaa ne ifaa yɛ ne sit ɛbhɛ ne ɛbung, ɛ yaak ɛbhɛ, “Ɛɛ ma phok ɛnik ɛTaanggbey yo ne kɛ hyɛ njwɛɛn ɛshara ɛdaan nɛ ne ɛbhɛ woo?

⁴¹ Njwit to nang, i tal njwii ne ɛkɔn na ne njwi kɛ mɔn, njwii saasel iphɛ. Ɛbhɛ wo sɔng ɛ kɛ ne mɔn ɛkɔn ɛbebhe nang.”

⁴² Ne ɛ ji yaak ɛYɛso yegha, “ɛYɛso! Yaa sɛ ɛ kɛ bhɛ wara ne igbɔm mo da te ɛ ne taate ne mee.”

⁴³ ɛYɛso gha ne kyii ɛbhɛ nɛ, ɛ yaak ɛbhɛ, “Nzi tɔng ngɛ itin nɛ, izenge wo aa bhɛ soos ɛlɔ nge daa ne ijwee ne irway ihwala wo.”

iKu ɛYɛso De

⁴⁴ Kɛ ne sɛ ɛceree ne igbey, ɛzay ya ne ku te gbyik gbik. Ɛlɔ gha ne shɛɛ ɛlɛ wo ɛ phyii hɔn ɛwa ɛtat.

⁴⁵ Sɔng iroy de kaa ne tɔ tol nang, ɛlɛbhɛlɛ ndɔ ne iDeng nga ne le dak ɛ kpɛrɛt ɛceree ɛ hobhoset ɛphaa. ɛLɛbhɛlɛ ndɔ ne iDeng nga ne ɛ kɛ hobhose ɛLɔ gha kɛ Tul Kang ngo ne ɛHaa ne kɛ Tul Kang i Shɛs so.

⁴⁶ ɛYɛso gha ne yel-le ne ɛgbaang ne izɔlɔs, ɛ yɔngɔ, “ɛTaa, nggɛ tek iken nge de ndɔ ne iwɔ mo.” Kɛ ne sɛ ɛ kɛ boote ɛlɛ wo nang, ifɔng ɛbhɛ da ne ji wuru.

⁴⁷ ɛNdiinday nisooja na ne ɛ sonɛ ɛlɔ yɛwo ne yaang ɛkɔn na ne ɛ kɛ te wo, ne ɛ nang ɛTaanggbey ye ne ndiinday, ɛ yɔngɔ, “ɛTsak! ɛNyi yeghaa wo ɛnyi ɛyɛnɛng.”

⁴⁸ Kɛ ne sɛ ninyi na nɛ nibhɛ kaa tumɛy ɛnggyɛ wo, tɛ nibhɛ yaang ɛkɔn na ne ɛɛ tes so, kɛ yaang ɛlɛ wo, nibhɛ kyii gbik ne ibɔ nibhɛ ɛgyɛy, nibhɛ bees irway.

⁴⁹ Ninyi nɛ nibhɛ kaa ne i yɛɛ ɛYɛso yegha, gbik nɛ nikuk ka nɛ nibhɛ kɛ les ne iGalili de nibhɛ kungus ɛYɛso yegha ne shɛɛ kyakyak nibhɛ wɛɛ nikɔn nɛnaa nggyɛ wo.

iRɛɛ ɛYɛso Da

⁵⁰ ɛDɛ ɛnyi ne itɔrɔng niYahodawa na kaa ne sonɛ ne kaa bok ɛbhɛ ɛYisifu, ɛ kaa so ɛnyi ɛyɛnɛng ɛ ta so cik.

⁵¹ Ɛ kaa ne mbaray ibol ne itɔrɔng ngge. Ɛ kaa ne so ɛnyi ɛgarang ne iRamatiya ne iphɛ so ne ivel ne iYahudiya. Ɛ kaa ne ta i hyep igbɔm ɛTaanggbey.

⁵² Ɛ kaa ne phɛ ɛlɔ ɛBilatus sa, ɛbhɛ phom ɛbhɛ, wu te ɛ nang nge ikom ɛYɛso de te rɛɛ.

⁵³ Ne ɛ bo ikom ɛYɛso de ɛ harap iphɛ ne ɛtura ne ililing ɛ ji bhɛ rɛɛ ndɔ ne idɛ ikpuu ba ne ɛ kaa ku ryɔng ifɛ ɛmbambang ne ɛphang, ne hame kɛ ku rɛɛ ne ɛnyi.

⁵⁴ ɛTuk kɛ kaa ne so ɛTuk iwii ne yaa yunga tsa iWɛsɛ ba.

⁵⁵ Nikuk ka nɛ nibhɛ kɛ le ne iGalili de nɛ niYɛso yena ne kungus ɛtsim ɛYisifu gha nibhɛ bhɛ yaang ikpuu ba, nibhɛ ne ta yaang ɛli ne kɛ rɛɛ ikom be.

⁵⁶ ɛTsim mɛ ɛlɛy, nibhɛ ne ji kyii nibhɛ hyil en nibhɛ bhɛ ryɔng inɔɔy ne mpɛ bok ɛnkyinkyɔp. Nibhɛ ne ji cwiil nibhɛ shɛɛ ne iWɛsɛ ba tɛ nibhɛ hyep ne ikpii da.