1 ɛYohana 3 - ɛWee ne ìTsɛm iHywas

Ninɔn ɛTaanggbey

¹ Yaang ɛn, sɔng ishwim ba ne ɛTaa gha kɛ sim njwɛɛn no bok ɛgak nang. Ɛ kɛ sim njwɛɛn gbom ishwim mɛ te i yaa yeres njwɛɛn ninɔn ɛTaanggbey! ɛLɛy ne njwɛɛn ne so. ɛKɔn na ne ɛ kɛ te ɛzay ya i doo njwɛɛn no daa ɛli ne ɛzay ya i doo ɛTaa yegha.

² Nigwaa nge ne nzi sim, njwɛɛn soye ninɔn ɛTaanggbey ɛlyilyɛghaa wo. Sɔng kɛ ne ku tɔɔl njwɛɛn ɛkɔn na ne njwɛɛn sɛ teye nɛ nang, njwɛɛn i yang yɛɛ wu sɛ́ sɛ ɛKiriti gha kɛ tɔɔl le wo njwɛɛn sɛ ne ma te tɛ ɛbhɛ, daa ɛli ne njwɛɛn sɛ yaang ɛbhɛ ɛli ne ɛ so.

³ Gbik ɛnyi gha ne ɛ bok iyɛk ne irway yɛdaa wo daa ɛKiriti gha, te ɛ te ito ɛbhɛ wɛwɛy ɛ shɛɛ wɛwɛy daa ɛli ne ɛKiriti gha so wɛwɛy.

⁴ Gbik ɛnyi gha ne ɛ mɔn ɛfɔt to, ɛ ne tselem iMɛmɛ ɛTaanggbey da. ɛFɔt to ɛbhɛ so iyɔm ne roos iMɛmɛ ɛTaanggbey da.

⁵ Ɛ ku yɛɛ ɛn wu ɛYɛso gha kaa yɛɛs te ɛ ba ɛfɔt to. Ndɔ ɛYɛso gha sɔng ɛfɔt sonɛ nang.

⁶ iPhɛ ɛlɛy, gbik ɛnyi gha ne ɛ so ndɔ ɛKiriti gha, sɔng aa ne re ɛnu ɛyisɛ ne mɔn ɛfɔt to nang. Gbik ɛnyi gha ne ɛ ne re ɛnu ɛyisɛ ne mɔn ɛfɔt to, sɔng ɛ kɛ ne ku yaang ɛYɛso yegha nang, sɔng ɛ ma yung yɛɛ ɛbhɛ nang.

⁷ Nyinɛn ninɔn nge ne nzi sim, sɔng ˆɛ tek ɛn ɛnyi luk nyini nang. Gbik ɛnyi gha ne ɛ mɔn nikɔn nicik ka ne ɛ so ɛnyi ɛcik ɛli ne ɛKiriti gha so cik ko.

⁸ Gbik ɛnyi gha ne ɛ re ɛnu ɛyisɛ ne mɔn ɛfɔt to, ɛ soye ɛhaa ɛShɛtan, daa ɛli ne ɛShɛtan na kaa ku mɔn ɛfɔt to ne ile ne ɛtum mɛ. ɛKɔn na ne ɛ kɛ te ɛNgɔn ɛTaanggbey ya yɛɛs ɛzay ya so te bunga nitomɛ ɛShɛtan na.

⁹ Gbik ɛnyi gha ne ɛ so ɛNgɔn ɛTaanggbey ya, sɔng aa ne re ɛnu ɛyisɛ ne mɔn ɛfɔt to nang, daa ɛli ne iken iphas ɛTaanggbey de so ndɔ ɛbhɛ. Sɔng aa ne yɛɛ ne re ɛnu ɛyisɛ ne mɔn ɛfɔt to nang, daa ɛli ne ɛ kɛ teye ɛNgɔn ɛTaanggbey ya.

¹⁰ I yɛɛ ne seng ɛngɔn ɛTaanggbey ya ne ɛngɔn ɛShɛtan na ɛlɛ: Gbik ɛnyi gha ne hame ɛ mɔn ɛkɔn na ne ɛ so cik sɔng ne ɛ soye ɛNgɔn ɛTaanggbey ya nang, ɛhaa ne ɛ ne mbaray ɛgwaa ɛbhɛ sɔng ne ɛ soye ɛngɔn ɛTaanggbey ya nang.

Te ɛRɔngɔ Sim ɛRɔngɔ

¹¹ iBol de ne ˆɛ kaa ku phok ɛn ne ile ne ɛtum mɛ wo kaa i bo te ɛrɔngɔ ndɔ njwɛɛn no sim ɛrɔngɔ.

¹² Sɔng ˆɛ te ɛn te ɛKɛɛnu gha ne ɛ kaa soye ɛngɔn ɛShɛtan na, ne ɛ kaa phoo ɛgwaa ɛbhɛ gha nang. iKyee iphɛ kaa te ɛ phoo ɛgwaa ɛbhɛ ghaa? ɛKɛɛnu gha kaa phoo ɛgwaa ɛbhɛ gha daa ɛli nɛ nitomɛ ɛbhɛ ɛKɛɛnu gha kaa so nibebhe yɛ, ninaa ɛgwaa ɛbhɛ na ne so cik.

¹³ Nigwaa en, sɔng iphɛ so nyini ɛkɔn ne kparat wu ninaa ɛzay ya kɛ mbaray nyini wo nang.

¹⁴ Njwɛɛn i yɛɛ kɛ ku phee iku de, so niken daa ɛli ne njwɛɛn i sim nigwaa njwɛɛn. ɛNyi gha ne ɛ ne sang sim ɛgwaa ɛbhɛ gha, ne ɛ tɔ shɛɛ ishwɛɛ ne iku de.

¹⁵ Gbik ɛnyi gha ne ɛ mbaray ɛgwaa ɛbhɛ gha ne ɛ so ɛhaa ne phobho ninyi, ˆɛ yɛɛ ɛn ɛli ne hame ɛhaa ne phobho ninyi na sang bok iken ne inat de.

¹⁶ ɛLɛ ne njwɛɛn i seng ɛli ne ishwim ba so: ɛYɛso gha kɛ nang iken ɛbhɛ ɛlɔ njwɛɛn. iPhɛ ne so nggbinggbing njwɛɛn ma nang iken njwɛɛn de ɛlɔ nigwaa njwɛɛn na.

¹⁷ Wu ɛnyi bok iryat ɛ yaang ɛgwaa ɛbhɛ ne ɛ tɔk iphyik, ɛ mbaray tang phyik ɛgwaa ɛbhɛ, ɛnyi yɛghaa nggyɛ wo ne bok ishwim ɛTaanggbey da bɛ?

¹⁸ Nyinɛn ninɔn nge ne nzi sim, sɔng njwɛɛn tɔɔrek ishwim ba daa ne igbɛrɛ ɛnu nang, te njwɛɛn yang tɔɔrek ifɛ daa ɛtomɛ ne njwɛɛn i mɔn nɛ ne itin nɛ.

¹⁹ ɛLɛ ne njwɛɛn yaa ne seng wu njwɛɛn soye ninaa ne itin na, irway njwɛɛn ta yɛɛ ne tɔɔrek njwɛɛn wu njwɛɛn sɛ yɛɛ ne kyinak ɛnu ɛyisɛ ɛTaanggbey ya tɔrɔk.

²⁰ Wu izɔlɔs ne irway njwɛɛn da kɛ ne tɔɔrek njwɛɛn iben njwɛɛn, te njwɛɛn ne seng wu ɛTaanggbey ya phyin izɔlɔs ne irway njwɛɛn da, ɛ ne ta yɛɛ nikɔn na gbik.

²¹ Nitaay nge ne nzi sim, wu izɔlɔs ne irway njwɛɛn da kɛ ne sang tɔɔrek njwɛɛn iben njwɛɛn da, njwɛɛn ne so tɔrɔk ɛnu ɛyisɛ ɛTaanggbey ya,

²² njwɛɛn i ne ta sɛ gbik ɛkɔn na ne njwɛɛn kɛ phom ɛbhɛ, daa ɛli ne njwɛɛn i roos ikpii ɛbhɛ da, njwɛɛn i ta mɔn ɛkɔn na ne ɛ nang ɛbhɛ irway ihwala.

²³ iKpii ɛbhɛ da ne so ɛlɛ: te njwɛɛn nang ne itin nɛ ne ɛNgɔn ɛbhɛ ɛYɛso ɛKiriti gha, te ɛrɔngɔ ta sim ɛrɔngɔ ɛli ne ɛKiriti gha kɛ yɛk njwɛɛn nɛ wo.

²⁴ Ninaa nibhɛ roos ikpii ɛTaanggbey da i shɛɛ ndɔ ɛTaanggbey ya, ɛTaanggbey ya ne maa shɛɛ ndɔ nibhɛ. ɛLɛ wo ne njwɛɛn i seng wu ɛ shɛɛ ndɔ njwɛɛn no: njwɛɛn i seng lenɛ ne iKabyik ne ɛ kɛ nang njwɛɛn.