Tayitus, echî 3 - Ejagham New Testament

Fon ên ekpin noŋ atem-ane Krayis

¹ Tit ane abhâ se á fóne ka eyúghúm atúi-ofâm na ane mba á fíi ikom eték. Deê á jíghí ábho, á korá ka ḿbə́ŋé sê kpe jen ábho nji á yíma é jóe ka mbá.

² Sə́re ábho á kâ chôt ejûm ebhí á kpê na nne kpe yót, á kâ kpóŋe na atem, á tóŋé onobhá-eji mbâ atem, á jigha fə́ne ane chénchén.

³ Ka ebhú áji, êt eróŋ e ri e nə́má, é bhó yuk nchot i nne, e tân fə́ne mbá, e gbô osʉ́ŋ e káre ekot na ogyep í ngun ka mkpak ka mkpak. E yimá ndibhí, e kík atem amə̂t abhí, e yírá atem, atem á yira êt fə́ne.

⁴ Kən ebhú nji Obhasi nnyo á yimá êt e sémá a tóŋe êt okot na onobhá-eji obhê,

⁵ e sêm. Á ka yim êt e sêm ka é yim nnyen ejûm kpe jə́t, kən a yimî ka nsôn nnyi a fonê na êt. E séme ka ikom Ebhare Ntʉgantʉ owe nnyo a suî obhí obhə́ré a yíghi se a kpó ji êt ka ekpin efê.

⁶ Ka obhô Jisos Krayis nnyo a yimî êt e sêm, Obhasi a káre êt Ebhare Ntʉgantʉ owe na onobhá-eji.

⁷ A yimî áno se ka onobhá-eji obhê, a kó êt se ekpin ejə́ré é rî ka nnyen-i-mbá, se é chə́bhe abhon okot abhê, é fôn nkiri ka ekpin ótúm-ótúm nji é kuná ḿbə́ŋé mbôp nnyí sê tîk e fôn.

⁸ Nnyi ń səra wâ áno a ri ka echî. Ń woma bəre ó sə́ré achot mmá o kpek, tîk é yîm ane mba á kíi ḿbə́ŋé na Obhasi á kaghá echî kpe bhaghé ebhú á yimá ono. Achot mmá á nóbhe kpe-eji, á nyáŋa fə́ne ane chénchén.

⁹ Ka bhíbhi ebhú ejâ ka énə́mé áfírí na ka achot ane éməné. Ka gyé ên ka achot í bibhín í Mosis na okpóŋe na enok. Áfo a ri iyîm í chichi, orʉrí í ká fon.

¹⁰ Taŋê nne, ntə̂m kpe ébháe, nnyo á bhak na achât. Ebhú á ro yuk nchot eya, ka kpó fon obhô ka ejûm kpe jə́t na yê.

¹¹ Məŋê se íkíkéré ntʉ́ghi nne ányo cháŋ ka mbá, obhí obhê fə́ne ó toŋe jáé sê yê a gbô.

Ejegha-ndə́p í nchot

¹² Ka ane mbá ábháe, Atemis na Techikos, n kí tum yót mbâ eya. Ebhú á si ágo, we nok nnyen enoghóm ó bhá kpúghí ə̂m ka eték í Nikoporis babhap. Echî é rî se mme ń timi bəre n kí kumí ágo ta ebhú ekok é man.

¹³ Nok nnyen enoghóm ó nyáŋé Sinas nnyo ntáŋa-achot, o nyáŋe eróŋ Aporos, á róghé ejen ábho á fôn kpe bhaghé ejûm nji á kí fi ka ejen ábho.

¹⁴ Yim ane abhə́ré á kpí fə́ne noŋ á yíma ono kpe bhaghé ebhú, á mə́ŋe fə́ne noŋ á nyáŋa ane mba á rî ka eket. Ka kâm se á kúmi abhô-ábhô, kpe ejûm cháŋ nji á yíma.

¹⁵ Ane fép mba á rî na mme sê ń kúp wâ. Kûp atem ágo mba é chəm okot ka nchot Obhasi. Deê Obhasi a tóŋé ên onobhá-eji.