Tayitus, echî 2 - Ejagham New Testament

Mfoné okpígha-ejûm

¹ O ri ó kpí ane ekpin ka ekpak nji mfoné okpígha-ejûm ó tóŋe.

² Kpî ên akúí ane-arûm á fôn ekpin í nyamḿ, á fôn énoê erû, á jigha fə́ne biji ábho. Deê á kik ḿbə́ŋé nono na Jisos, á foná okot na atem-ane, á kəbha fə́ne ḿbə́ŋé.

³ Ka ekpak njí jə́t, kpî fə́ne akúí ane-akáé se á fôn ekpin nji é kára Obhasi ejík, á kâ sə́re áfúbhí á kpê na ane etat, á kâ gbô osʉ́ŋ á káre aməm. Kən deê á kpí ane nnyen ekpin.

⁴ Tîk é yîm ábho á kpî abhon asop mba á kóe arûm ka ekpak nji á kí kot arûm ábho na abhon ábho.

⁵ Tîk á kpî ábho fə́ne ekpak nji á kí fi biji, á kâ fôn kpe akôp. Ekpak nji á kí fi ojû ábho, á fôn nnyen erû, á yugha arûm ábho. Á fon ekpin njí, tîk nne á bhó chot kpe ejûm ebhí jə́t na achot Obhasi ka obhô ábho.

⁶ Ka ekpak njí, kpî abhon aguŋi á fî biji.

⁷ Ka iyîm chénchén, deê we ḿfoné ó fôn ekpin nji é kí kpi ane nnyen erû. Kpî ane achot na ḿbə́ŋé eya jáé, o kâ chághe ache.

⁸ Deê nchot kpe nnyə́n nnyi o kí chot a fon echî, tîk nne kpe yót á bhó bhibhi wâ mbiŋ. Tîk é yîm fə́ne ane-ebhan abhâ á fôn ísonê ka á ro fon kpe ejûm ebhí jə́t nji á kí chot á kpê na êt chénchén.

⁹ Kpî asʉ́ŋ se á jíghí ásé ábho ka chénchén iyîm. Kpî ábho fə́ne se á yimá iyîm mbi í kí kot ásé ábho. Deê á kâ táme ábho nchot ka ochî,

¹⁰ á kâ jʉ̂ ejʉ̂. Kən deê á tóŋé ekpin nji é kí yim ásé ábho á bhó fon efup na ábho kpe ka ejûm jə́t. Ekpin njí tîk é yîm ane á kâm sê okpígha-ejûm mbi Obhasi Ńsé nnyo á yimá êt e sémá ka obhí a ri nnyen okpígha-ejûm.

¹¹ Kpî ane achot mmá, ka Obhasi a tóŋe onobhá-eji obhê se ane chénchén á sém ka obhí.

¹² Onobhá-eji ábhi ó kí kpi êt sê é mághe ekpin ebhí na ekot iyîm í ngûn. Ó kí kpi êt fə́ne sê é fî biji, e foná ekpin ka nnyen-i-mbá, e yimá iyîm ka ebhú njí mbi í kóra Obhasi ka ḿbə́ŋé.

¹³ É yimá áno e chighá ofú ogyebhá-ḿbə́ŋé mbi e nyə́ne é kik amə̂t mbôp nnyí sê e kí yen ekpatə́m ejík nji Obhasi owəré, Jisos Krayis, nnyo a yimî êt é sem ka obhí.

¹⁴ Yê nâ a káre ekpin ejê ka echî ejə́ré se a yighí êt ka obhí chénchén, a sû ḿbə́ŋé eyəré é jóe ane abhê mba á kóra ono eyimím.

¹⁵ Kpî mân ane achot mmá, ó kaghá ábho ḿbə́ŋé. Kó ikom otúi ifâ, fáme ábho á mághe nchot obhí. Ka kâm nne kpe yót a kébhá wâ fóŋ.