Matiyu, echî 8 - Ejagham New Testament

Jisos a yîm nne nnyo á maŋá ofunum a sôn

¹ Nji Jisos a kí bhət egúí a bhák, ekpatə́m ekam ane á jak á tôp yê.

² Mmaŋa-ofunum yót a bhák a bhâ bhə́ne yê ka akát a góre yê se, “Ntûfâm, ka okorá-ḿbə́ŋé obhâ, yim ofunum obhámé mbí ó mân, n kâ kpô fon akôp.”

³ Jisos a tóne obhô obhê a kə́me yê, a chôt se, “Ń kot, deê ofunum obhâ ó mân.” Ka ngyím ányi, ofunum mbí ó mân.

⁴ Jisos a sə́re mân yê se, “Yûk, kî nchot nnyí ka ḿbə́ŋé, ka sə́re nne kpe yót. Choŋ mbâ nkara-agore Obhasi a kép wâ. Karê yê ekəp ka ekpak nji ebhín í Mosis é fíi, ka etóŋóm ane se ofunum obhâ ó man.”

Jisos a yîm ḿgbán i ntûfâm ane-enok a sôn

⁵ Nji Jisos a gyée Kapanom, ntûfâm ane-enok yót a bhák a bhâ góre yê se a nyáŋe yê.

⁶ A sə́re Jisos se, “Ntûfâm, ḿgbán omé a nuŋ ka enuŋ a maŋá. Kpe ejen á ka məŋé ojen, a kí yen oseŋe kpe-eji.”

⁷ Jisos se, “Tîk n jak n jî yîm ḿgbán owa a sôn.”

⁸ Kən ntûfâm enok nnyó se, “Ntûfâm, ń ka bhik nnyo o kə́ bha ó bhá gyé njû amé. Karê a ri ikom, ḿgbán omé tîk a sôn.

⁹ Mme eróŋ a ri nne nnyo n di ka óséré ane. Ḿ fon ane-enok mba á rî fə́ne ka óséré obhámé. N kí səre nnyó bəre, choŋ, a jak. M bîŋ ńnyô bəre, bhák, a bhák. N kí səre ḿgbán nnyó bəre, yim njí, á yimá ńjə́ne.”

¹⁰ Nji Jisos a yúghi nchot nnyí, biji í mân yê kpe-eji. A sə́re ane mba á tóbha yê se, “Deê ń sə́ré ên bəre ń ka nok oyén nne kpe yót ka eték Isrel ndə́m nnyo a kíi ḿbə́ŋé na Obhasi ka ekpak njí.

¹¹ Məŋê ên sê ane etî-etî tîk á dʉ̂ nték etat á bhak obhô-orûm na obhô-okáé, á bhâ kúmi na Abraham na Isak na Jakop, á dî erom ka otúi Obhasi.

¹² Kən ane mba á rî nâ afoné otúi nchane, á kí tup ábho njəm éré ka ejírim, á kə̂t ágo á rʉra ekpatə́m ekʉ̂, á dik akek.”

¹³ Jisos a sə́re mân ntûfâm nnyó se, “Choŋ kʉ́ri ka njû eya, ḿgbán owa tîk a sôn ka ekpak nji o kamê.” Ḿgbán i nne-ndûm nnyó fə́ne a sôn ka nkúbhi ebhú áji.

Jisos a yîm ane etî-etî á son

¹⁴ Nji Jisos a síi ka njû Pita, a jî yên nnyen-i-nkáé Pita enuŋ, mô egyʉk a ri yê ka biji.

¹⁵ Jisos a râŋ nne-nkáé nnyó ka obhô, egyʉk njí é mân. Nne-nkáé nnyó a rúi fə́ne ngyím, a kô édî a bhâ gyê yê.

¹⁶ Na egu áji, á kô ane etî-etî mba ojê ó kára oseŋe, á bhak mbâ Jisos. Na eyum í nnyo, Jisos a kí bhim fə́ne ḿbə́ne, a yighá ka biji ane mbá. A yîm fə́ne ane emaŋé chénchén á sôn.

¹⁷ Achot mmá á fap fə́ne ka ekpak nji nkara-otîp Obhasi éməné nnyo á kamá se Asaya a chorê se, “Yê ḿfoné a fôn nsôn na êt, a yíghi bimaŋé ibhə́ré ka mkpak ka mkpak.”

Atóbhá Jisos Krayis á rî á fôn bhaghé ekpin?

¹⁸ Jisos a kpo to a yén ekpatə́m ekam ane á kí faré yê á kaghá ka étíŋanti, a sə́re atóbhá abhê se á yáŋe njəm aya nnyi ńgô.

¹⁹ Ntóŋa-ebhín yót a bhák mbâ eye a bhâ sə́re yê se, “Ńsé, kpe ó jak fan n kí top wâ.”

²⁰ Kən Jisos a táme se, “Ebhi é fon mfúk imê, inón í fon njû eye, kən Mmon-i-ntem-nne á ka fon eji ekâ.”

²¹ Nne etat a ri áfo nnyo á tobha Jisos. A bhâ sə́re Jisos se, “Ntûfâm, ta n kə̂n ńsé omé kən m bák.”

²² Kən Jisos a táme yê se, “Bhák é jî, deê akə́bha-nsi á kə́n nne ábho.”

Jisos a kími mfêp

²³ Jisos a jak a jî gyê ka okpi na atóbhá abhê.

²⁴ Ka ngyím ányi, ekpatə́m í mfêp a róghe enoghóm. A nôk ta ayép á róghe egyéém ka okpi. Jisos a kí yae.

²⁵ Atóbhá abhê á jak á jî sʉ̂k yê á sə́re yê sê, “Ntûfâm, nyáŋé êt, e kə́ bha otán ka aya.”

²⁶ Jisos a fáme ábho se, “Jen nji o kí fup ên ka ekpak njí, ḿbə́ŋé nnyi o kíi ên na Obhasi á ka son kpe mkpât.” A rúi mân ngyím a nyân mfêp na aya, ngûm fə́ne a nâ chák.

²⁷ Biji í kpô ábho kpe-eji. Á kí bhəp sê, “Bhaghé ekpak í nne nná nnyo kpe mfêp, kpe aya, í kí yuk yê?”

Jisos a yíghi ojê mbâ ane ábháe

²⁸ Nji Jisos a síi ka ebhat eték ane Gadarin njəm aya nnyi ńgô, ane ábháe á dʉ̂ ebhat ayəm-áyə̂m á bhâ kpúghi yê. Ojê ó kára ane mbá oseŋe. Na ojê ábho mbí, ane mbá á chúbha ochu mbi kpe nne nnyo a kí gaé a chíŋ ebhat í mbá nnyi ábho á rî cháŋ.

²⁹ Nji á yéne Jisos, á kûk káŋ káŋ káŋ sê, “Wóó Mmon Obhasi, ó woma jen na êt. O bháe ó bhá kpə́re êt kpá kən mfoné ebhú é sí a?”

³⁰ Ekam akûk é rî áfo é dik édî kpe mbá á ka rap.

³¹ Ojê mbí ó góre Jisos sê, “Ájoé o kí wom ó bhím êt, tûm êt é gyé akûk ḿmâ.”

³² Jisos se, “Nâ choŋ ên.” Ojê mbí ó gyê akûk mmá, á bhéne á bhə̂t ḿkpábhé egúí á jî gbô ka aya, á tân.

³³ Ane mba á bhábha akûk mmá á bê á jak ka eték, á jî sə́re ane chénchén nchot nnyi a fábhe na ekpak fə́ne nji é fábhe na ane mba ojê ó kára nná ábho oseŋe.

³⁴ Ane eték á yə̂p fə́ne chénchén á jak á jî kpúghi Jisos á góre yê sê a maghé ebhat eték ábho.