Matiyu, echî 6 - Ejagham New Testament

Nne Obhasi a kâ tóŋe biji

¹ “Kó ebhú o kâ tóŋe biji se we ó yimá ekpin ka ekpak nji Obhasi a wóme. Ó toŋe biji ka ekpak njí, Obhasi Ńsé owa nnyo a ri ka ósô, á bhó karé wâ ekəp.”

Ka tóŋé biji se ó nyaŋe ntem

² “Nne á ka fon ejûm kən o nyáŋe yê na ńjə́ne, o kâ sə́re ngun ndə́m se ó nyaŋe nne ányo. Nâ noŋ ane áfúbhí á yíma ka óchâm Obhasi na kpe bhaghé mbá ka eték, sê á wóma ane á káre ábho nkat. Deê ń sə́ré ên bəre ta á fon ekəp ábho chénchén ebhú jə́t.

³ Kən ájoé ó nyaŋe ntem nnyo a ri ka eket, gyinî ogyiní kpe ntem i ḿbə́ŋé owa o kâ sə́re.

⁴ Deê é jóe ejûm ebhə̂t. Ka ekpak njí, Ńsé owa Obhasi nnyo á yena achot kpe á rî ka ebhə̂t, tîk a káre wâ ekəp.”

Ka tóŋé biji se o kí goré Obhasi

⁵ “Ebhú o kí goré Obhasi, ka yim noŋ ane áfúbhí. Ane áfúbhí á gyíma ka óchâm Obhasi na ndûm éré sê ane chénchén á yén noŋ ábho á góra Obhasi. Deê ń sə́ré ên bəre ta á fon ekəp ábho chénchén ebhú jə́t.

⁶ Kən ebhú nji o kí wom ó góre Obhasi, choŋ ka mmon-i-njû enuŋ owa, gyê, o bhâm njû. Gorê mân Ńsé owa, Obhasi, nnyo we ó bhó yen. Ńsé owa Obhasi fə́ne nnyo á yena nji ó yimá ka ebhə̂t, tîk a káre wâ ekəp.

⁷ “Ebhú o kí goré ên Obhasi, o kâ chôt ên etî-etî achot mma á ká fon echî. Nâ noŋ ane mba á ká məŋé Obhasi á yíma, á kera sê otî nchot nâ Obhasi á yugha.

⁸ Ka fóŋé ên ábho, ka Obhasi Ńsé owəné ta a mə́ŋe ejûm nji ó woma kən ta ó bhə́p yê ńjə́ne.

⁹ Deê nne a goré Obhasi ka ekpak njí. Obhasi Ńsé owəré nnyo a ri ka ósô, deê mbiŋ eya a fon ekpatə́m ejík.

¹⁰ Deê otúi obhâ ó bhá. Deê nji we o wóme, é jóe ka nsi noŋ é rî ka ósô.

¹¹ Karê êt nji e kí di égyé.

¹² Ri nsôn su obhí mbi e yimî noŋ êt fə́ne é rik nsôn e gyiná mbi ane á yíma êt.

¹³ Ka kâm é gyé ka egaé. Nyáŋe êt, ikom í Satan í kâ fî êt osʉ́ŋ.

¹⁴ Nâ é rî sê ó ri ên nsôn o gyíni ên obhí mbi ane á yími ên, Obhasi Ńsé owəné ka ósô a kí ri fə́ne nsôn a su obhə́né eróŋ.

¹⁵ Kən ájoé ó bhó ri ên nsôn ó gyíni ên obhí mbi ane á yími ên, Obhasi Ńsé fə́ne á bhó ri nsôn a su mbi o yimî ên yê.”

Ka tóŋé biji se ó ka njaé ka obhô Obhasi

¹⁶ “Ájoé o kí ka njaé se ó jíghí Obhasi, o kâ kə̂t na ochî nsôn-ńsôn noŋ ane áfúbhí á yíma. Á jéna á fará na ochî njaé-ńjáe ane á yén sê ábho á ka njaé á jíghí Obhasi. Deê ń sə́ré ên bəre ta á fon ekəp ábho chénchén ebhú jə́t.

¹⁷ Ájoé o kí ka njaé, su ochî obhâ, o jóme akʉ́ noŋ ó yimá mbôp nnyí.

¹⁸ Ka kâm ane etat á mə́ŋe sê o ri ágo o kák njaé təm Obhasi átíŋ nnyo a ri Ńsé owa, kən ó bhó yen yê. Yê nnyo a kí yen nji ó yimá ka ebhə̂t, tîk a káre wâ ekəp.”

Mfoné efaŋ é rî ka fan?

¹⁹ “Nne a kâ nôk se yê a gbo efaŋ a ri ka nsi nnyí. Ḿfa ka nsi, oké na ḿfáríkáŋ í kí bhibhi iyîm mbí í káre yê efaŋ. Anyághá-ajʉ̂ á kí gye á jʉ̂.

²⁰ Kən deê nne a nok a gbo efaŋ nji ósô. Ágo oké na ḿfáríkáŋ í bhó bhibhi efaŋ áji. Anyághá-ajʉ̂ á bhó gye á jʉ́.

²¹ É rî sê, eji ejûm efaŋ ejâ é joé, ḿbə́ŋé eya á joá áfo.

²² “Amə̂t á rî noŋ eyâŋ nji é tóŋa biji mbá. Ájoé amə̂t amâ á rî nono, biji ibhâ ndə́m í kí fon ebhát.

²³ Kən á ro joé, biji ibhâ ndə́m í kí joé ka ejírim. Ájoé mân ejâ ebhát a ri efaŋ í ngun, nâ ekpin ejâ é rî ka ejírim nji é chiŋi obhô.

²⁴ “Kpe nne yót nnyo a kí tʉk ásé ábháe cháŋ. A kí kot yót, a mághe yót. A kí karé ḿbə́ŋé eye mbâ yót, a kêp yót fóŋ. Ó bhó joé ḿgbán o káre Obhasi, o jóe o káre efaŋ í ngun ka ebhú jə́t.”

Maghê ên ḿbə́ŋé efíním ka efaŋ í ngun, kêp ên Obhasi ka ochî

²⁵ “Nâ echî n kí səre ên bəre nne a kâ káre biji oseŋe ka ejûm nji a kí di na nji a kí gwo kən a fon ekpin. Nne a kâ káre biji oseŋe ka nji a kí kak ka biji. Njə́n nji é chíŋi ochíŋ, ekpin kən édî, biji kən ḿfô?

²⁶ Yuŋ ên kpá amə̂t, kép ên nnón mmi ḿ fə́bha ka ósô, édî á bhó kpaŋ kən á fʉ̂, á ká fon eji nji sê á chúi édî á kí. A ri Obhasi Ńsé owəné nnyo a ri ka ósô nâ á gyek ábho. We mân na nnón ámi, nne nnyo a faŋê a chíŋi ntem nâ énê?

²⁷ Ka oseŋe mbi ó kará ên áno biji, énê owəné nnyo ofú ekʉ̂ obhê ó si, a bhîk ekpeém ofú bhə́t?

²⁸ “Jen nji o kí karé ên biji oseŋe ka nchot i ḿfô? Kêp ên mfem nnyi á kua ka ajé etə́m. Ntûm á bhó yim. Ḿfô á bhó yim.

²⁹ Kən deê ń sə́ré ên bəre kpe Soromon na njok efaŋ ejê, á ka fon ḿfô nnyi a nobhê a sî mfem nnyí.

³⁰ Obhasi nâ á sobhá ajé ka etə́m. Ajé mma, égyé á rî mfá, ójô á kpo, á kak ngûn á righi. Ájoé Obhasi a kí sobhe ajé ka ekpak njí, ó kere ên mân sê tîk á bhó sobhé ên a? Jen nji ó bhó ki ên ḿbə́ŋé sê Obhasi tîk a yîm noŋ a chorê?

³¹ “Ájoé ó ki ên ḿbə́ŋé na Obhasi, o kâ kpô karé biji oseŋe ka nji o kí di ên na nji o kí gwo na nji o kí kak ka biji?

³² Ḿfa nâ mfoné-mfoné íkíkéré mfi ane mba á ká ki ḿbə́ŋé na Obhasi. Kən ên, Obhasi Ńsé owəné ka ósô a mə́ŋe se o ri ên ka eket iyîm mbí chénchén.

³³ Nâ deê ó nót ên kpá otúi obhê na ekpin ka nnyen-i-mbá, tîk yê a káre ên chénchén iyîm mbí.

³⁴ Ka kúmi ên mân o kérá ójô-ójô. Ójô ábhi ó fon ifê íkíkéré. Kpe bhaghé ofú ngun ó fon amê achot mma á bhíghi na ḿbə́ne.”