Matiyu, echî 5 - Ejagham New Testament

Mfoné ogyebhá-ḿbə́ŋé mbi Obhasi

¹ Jisos a yên ane á kə́ bha ka nkam ka nkam. A gyʉ̂t a kúmi ka egúí etat, atóbhá abhê á fáre yê á kâk.

² A róghe ábho ekpíím se

³ “Deê ogyebhá-ḿbə́ŋé ó jóe na ane mba á məŋe sê á rî noŋ akpák ka achot Obhasi, otúi Obhasi a ri mbi ábho.

⁴ Deê ogyebhá-ḿbə́ŋé ó jóe na ane mba á rî ka ekʉ̂, Obhasi tîk a fôn ábho obhə́bhe.

⁵ Deê ogyebhá-ḿbə́ŋé ó jóe na ane mba á ká kep biji ábho sê á chiŋi ochíŋ, tîk ngun nnyí a jóe nnyi ábho.

⁶ Deê ogyebhá-ḿbə́ŋé ó jóe na ane mba ndûm íkíkéré ḿbə́ŋé ábho a ri sê á yîm iyîm mbi í rî ka nnyen-i-mbá, Obhasi tîk a káre ábho nji á wóme.

⁷ Deê ogyebhá-ḿbə́ŋé ó jóe na ane mba á kí ri nsôn na atem-ane, Obhasi tîk a rî ábho nsôn.

⁸ Deê ogyebhá-ḿbə́ŋé ó jóe na ane mba á fóne ḿbə́ŋé ábho jáé, tîk á yên Obhasi.

⁹ Deê ogyebhá-ḿbə́ŋé ó jóe na ane mba á nógha sê ekone é jóe ka ngun, Obhasi tîk a bhîŋ ábho se abhon abhê.

¹⁰ Deê ogyebhá-ḿbə́ŋé ó jóe na ane mba ngun á kí karé ábho onyʉk ka á kí yim ejûm nji Obhasi a wóme, otúi Obhasi a ri mbi ábho.

¹¹ Deê ogyebhá-ḿbə́ŋé ó jóe na ên nji ane á tu ên, á bhibha ên, á nyerá ên mkpak achot áfúbhí ka ó tobha ên ə̂m.

¹² Gyebhê ên ḿbə́ŋé kpe-eji, ka Obhasi a kî ên ekpatə́m ekəp ka ósô. Nâ noŋ á yími fə́ne na akará-otîp Obhasi ebhú áji.”

O ri ên noŋ akâŋ na ebhát mbâ ane ngun

¹³ “O ri ên noŋ akâŋ mbâ ane ngun chénchén. Kən ájoé ogyep akâŋ ó man, ekpak nji á kí yim ḿmáne á kpó gyebhé cháŋ. Eji á kí kpo ko ḿmáne á yîm kpe ejûm cháŋ. Á kí bhum ḿmáne ane á chemá.

¹⁴ “O ri ên noŋ ebhát í ngun. Eték nji á gbée ka ńchí egúí, é ká joé ka ebhə̂t.

¹⁵ Nne á bhó nyoé ńtʉ́ríkáŋ, a kô ejûm a bhúi. Á kik nná ka echî ébhúní se ane chénchén ka njû á yén ebhát.

¹⁶ Ka ekpak njí mân, deê erû ejə́né é jóe noŋ ebhát mbâ ane chénchén. Ane á yen, á káre nkat mbâ Obhasi Ńsé owəné nnyo a ri ka ósô.”

Okpígha-ejûm ka achot ebhín

¹⁷ “Nne a kâ kére se m báe áno ḿ bá bhíbhí ebhín nji Mosis a karê ên na kpe ḿ bá bhíbhí fə́ne okpígha-ejûm akará-otîp Obhasi. Ń ka bhá áji. Kən m báe bəre ḿ bá yîm iyîm mbi á séŋe í jóe ka etʉri.

¹⁸ Deê ń sə́ré ên bəre ta ósô na nsi í chîŋ, kpe mmon ikóé ebhín yót nnyo á kí yighí cháŋ, ta chénchén é jên ka ekpak ebhín í nchane é fíi.

¹⁹ Kpe énê mân nnyo á ka kí ebhín, kpe é rî mkpât, a kpík fə́ne ane etat se á tóp erû ejê, tîk a jóe ńgô mkpât ka otúi Obhasi. Kən nne nnyo a kí ki ebhín Obhasi, a kpík fə́ne ane etat se á tóp erû ejê, tîk a jóe nne nyúp ka otúi Obhasi.

²⁰ N kí səre ên mân bəre kən nne a yén otúi Obhasi, ekpin ejê é rî é jóe ka nnyen-i-mbá é chíŋí ekpak nji atóŋá-ebhín na ane echəme Farasi á yíma.”

Nne Obhasi a kâ yâm ḿbə́ŋé na ntem

²¹ “Ó yuk ên sê ka éməné á sə́re sê, nne a kâ yúi nne. Ó yui, á kí kak wâ ka esup.

²² Kən mme n kí səre ên mfá-mfá bəre kpe énê nnyo á fon oyámá-ḿbə́ŋé na ntem, á kí kak yê ka esup. Kpe énê nnyo á sə́re ntem se, we nâ énê, a kí gyimi a támé bibhə̂p ka ochî echəme Atáŋá-eték. Nne fə́ne nnyo á tu ntem se o ri énə́mé nne, nne ányo á ro məŋé, a kí gye ka erəmta-ngûn.

²³ “Ájoé mân ó ko ekəp ó jí káre mbâ Obhasi kən o sî eji á túbha ekəp njí, o tît se ó yim ntem owa ejûm ebhí,

²⁴ kî ekəp ejâ áfo, o chə́bhe njəm o jî mân achot. Ó fôn ên ekone kən o bhâ kə̂n ekəp ejâ mân o káre mbâ Obhasi.

²⁵ “Ájoé ó fon nchot na nne, deê ó wóm ekpak nji nchot ányi a kí man, a kâ kô wâ a ji esup. Man ńnyə́ne ka mbá kən ó sí ên esup, ka ó kam a sî na we, a kí karé wâ mbâ ntáŋa-esup. Ó ro məŋé, ntáŋa-esup tîk a káre wâ ka obhô anyaghá-orə́p, á kâk wâ ka ókúmí.

²⁶ Deê ń sə́ré wâ bəre o kí kət ka ókúmí mbí ta o káre ngom eya a mân fép.”

Nne Obhasi a kâ gbô ekun

²⁷ “Ó yuk ên noŋ á sə́re éməné sê, nne a kâ gbô ekun.

²⁸ Kən mme, n kí səre ên bəre nne nnyo á kep nne-nkáé kpe nnyón-nnyón a fôn íkíkéré enuŋ na yê, a gbô ekun.

²⁹ Ájoé eyə̂t obhô-orûm ejâ é kí kak wâ ka obhí, kpaghê ńjə́ne bhum. É nop sê ó bhíbhí eyô-biji ejâ jə́t, na nji o kí joé biji ibhâ ndə́m, o gyê ka erəmta-ngûn.

³⁰ Ájoé obhô-orûm obhâ ó kí kak wâ ka obhí, gbût bhum. É nop sê ó bhíbhí eyô-biji ejâ jə́t na nji ó kə́n biji ndə́m ó kâk ka erəmta-ngûn.”

Kə́n ebháé é mân nan?

³¹ “Ó yûk ên noŋ á sə́re éməné sê nne nnyo á timí a bhím nkáé ka ebháé, deê a séŋ nwet ebháé emanám a káre nne-nkáé ányo.

³² Kən mme, n kí sə́re ên bəre nne-ndûm nnyo á bhim nkáé owe nji nkáé á ka nuŋí nne-ndûm etat, nâ a chóe nkáé owe a gbô ekun nji nkáé á ko ndûm etat. Kpe nne-ndûm nnyón fə́ne nnyo a kóe nkáé nnyó, a gbô ekun.”

Nne Obhasi á chot nchot, a kâ chími

³³ “Ó yuk ên fə́ne á to ta ka éməné sê, nne á chimí ejûm ka ochî Obhasi, deê a yim ńjə́ne a kâ yóŋe eyum.

³⁴ Kən mme, n kí səre ên bəre nne a kâ chími kpe echimím. O kâ chími ebhú tat se, ‘Ta ósô,’ ka ósô a ri ekumi otúi Obhasi.

³⁵ Ka chími se, ‘Ta nsi,’ ka nâ eji Obhasi á kuná akát. Ka chími ebhú tat se, ‘Jerusarem ee!’ ka nâ eték ekpatə́m í ntûfâm nnyo a chíŋi ochíŋí.

³⁶ Kpe se ó chími se, ‘Ta echî ejámé,’ o kâ chími, ka kpe ekát í nnyʉ̂ jə́t ó ka yim se é chə́bhe ényaghê, kpe ébháré.

³⁷ Kpe é fóghe wâ nan, nji o fonê ka eyimím a ri ekamám se, ‘Nn̂,’ na etáŋám se, ‘Ée.’ Nji ó kpo chot é chíŋi njí, é dʉ̂ mbâ Satan.”

Nne Obhasi a kâ dî nkáŋ

³⁸ “Ó yuk ên noŋ á tóe sê, ó tane eyə̂t í ntem, á táne ejâ eróŋ. Ó mək eyîŋ í ntem, á yíghi fə́ne ejâ.

³⁹ Kən mme, n kí səre ên bəre, nne á yim wâ ejûm, deê o kâ yîm yê ó fé. Nne á sum wâ nsâp ka okîk obhô-orûm, kpíghi, tóŋé yê fə́ne okîk obhô-okáé, yê a súm.

⁴⁰ Sê ebhú tat a kâk wâ ka esup, ńga a kə̂n nkʉ̂ eya nnyi ó kaghá, kpére kə̂n kût eya fə́ne karê yê.

⁴¹ Ájoé nne a fî wâ ka ikom se ó kə́n echóé ejê ó jên ntáé yə́t, kə́n ńjə́ne jen ntáé ébháe.

⁴² Ájoé nne á bhəp wâ ejûm nji ó fon, karê yê. Nne a bháe obhô mbâ eya, ájoé ó fon, bho yê.”

Kot ane ebhan abhâ

⁴³ “Ó yuk ên fə́ne á səre éməné sê deê nne a tóŋé okot na nne nnyo a korê yê, a bhan fə́ne nne nnyo a yíri yê.

⁴⁴ Kən mme, n kí səre ên bəre ó kôt ên ane ebhan abhə́né. Gorê ên Obhasi sê a ri nsôn na ane mba á kára ên oseŋe.

⁴⁵ Ó yim ên ka ekpak njí, tîk o jóe ên abhon í Ńsé owəné Obhasi nnyo a ri ka ósô. Echî aŋ? Yê a kí yim njúí a gbok ane chénchén, kpe ane abhí, kpe ane ano. A kí yim mbúta a nak a bherá ane chénchén, kpe á yíma iyîm ka nnyen-i-mbá, kpe á rôk oyim.

⁴⁶ Ájoé ó kot ên a ri ane mba á kóre ên, o kí yim ên nan ó fôn ekəp Obhasi, ka kpe ane abhí noŋ abhə́bhá-ntí-echî á kóra a ri ane mba á kóra ábho.

⁴⁷ Ájoé o kí joé ka ekone a ri na atem abhâ, ó kere se ó yim ejûm eno etat egyê a? Ó ka yim, ka kpe ane mba á ká məŋé Obhasi, á kóra fə́ne a ri atem ábho.

⁴⁸ Nâ deê mân erû ejə́né é jóe ka nnyen-i-mbá noŋ nji Ńsé owəné ka ósô.”