Matiyu, echî 3 - Ejagham New Testament

Okpígha-ejûm í Jon nnyo mfúgha-ane-ayép

¹ Ka ebhú áji, Jon nnyo á fugha ane ayép a fâp a kúmi ebhat etə́m í Judiya, a kí səre ane se,

² “Yóŋe ên ḿbə́ŋé, maghê ên obhí obhə́né, ka otúi Obhasi ó bha.”

³ Jon nâ nne nnyo nkara-otîp Obhasi nnyo á kamá se Asaya a chorê se, “Nne yót a ri ka etə́m, a bhíná a sə́rá ane se, Tʉrî ên mbá ntûfâm, ka yê a kə́ bha, yim ên ebhə̂k é jóe tə́níní nji yê a kí chiŋ.”

⁴ Á kóe anyot í nnyam nnyi á bhíŋa sê kámel, á jə̂m nkʉ̂ nnyi Jon á kaghá. A bhóbhá ekandá ngu nnyam ka ebhûn. A dík ogurobhí na akʉ́ okon.

⁵ Ane etî-etî á bhak mbâ Jon. Etʉ̂ á dʉ̂ Jerusarem, na nték etat ebhat í Judiya ndə́m na chénchén nnyi akpe aya Jodan.

⁶ Á râk obhí ábho, Jon a fûk ábho ayép ka aya Jodan.

⁷ Jon a kpo to a yén etî-etî ane echəme Farasi na echəme Sadusi á kə́ bha sê yê a fúk ábho ayép, a fáme ábho se, “O ri ên ńgô, ekpin noŋ efomnté! Énê a sə́re ên se kə́n o bê ên oyámá-ḿbə́ŋé Obhasi mbi ó kə́ bha?

⁸ Ájoé ó səre ên sê ó yoŋe ên ḿbə́ŋé, ó maghe ên obhí obhə́né, nâ yim ên ekpin nji nne a kí yen a kâm se ó yoŋe ên ka etʉri.

⁹ O kâ ríri ên biji sê, ‘Ńsé owəré Abraham a ri ágo, nchot cháŋ.’ N kí səre ên bəre Obhasi kə́n a kô atáé mmá a yîm á chə́bhe biyábhé-abhon Abraham.

¹⁰ Kpe mfá-mfá, efúk é rî ka obhô nji á kí gbut átí na arʉk-arʉk, á túp ka nsi. Kpe njə́n étí mân nji é ká kap nnyen i nkap, á kí gbut á túp ka erəmta-ngûn.

¹¹ “Mme n kí fuk ên a ri ayép ka etóŋóm sê ó yóŋe ên ḿbə́ŋé ó maghe ên obhí obhə́né. Kən nne nnyo a kə́ bha ə̂m mbá-njəm a fâŋ a chíŋi ə̂m. Nne nnyó a kí su ên ḿbə́ŋé na Obhasi Ebhare Ntʉgantʉ na erəmta-ngûn. Ń ka bhik nnyo n kí kən kpe iyîm-akát ibhê.

¹² A fî nchekere nnyi tîk a châk átép a yíghi ka nkap eye. Á chak, a kí ko mfoné nkap a kî ka ókpáré, a ríghi átép ka ngûn mmi etánám, ḿ bó tan.”

Jon a fûk Jisos ayép

¹³ Ka ebhú áji, Jisos a mághe ebhat í Gariri, a jak ka Jodan se Jon a fúk yê ayép.

¹⁴ Kən Jon á ka kam. A nôk yê a yóŋé ḿbə́ŋé Jisos. A chôt na Jisos se, “We nâ kə́n o kí fuk ə̂m ayép. É yími nan nji ó bha a ri mbâ amé se ḿ fúk wâ ayép?”

¹⁵ Kən Jisos a táme se, “Deê é jóe ekpak njí, ka mfá-mfá deê é yîm chénchén nji Obhasi a wóme.” Jon a kâm mân.

¹⁶ Ka nkúbhi ebhú nji á fúghi Jisos ayép, a gyʉ̂t ka mkpe aya, ósô ó rə́bhe. A yên Ntʉgantʉ Obhasi, a kí bhət a bhák yê ka biji noŋ ibhʉ́í.

¹⁷ Eyum é fâp nnyi ósô sê, “Ḿfa a ri Mmon okot omé nnyo ḿ foná ekpatə́m ogyebhá-ḿbə́ŋé.”