Matiyu, echî 25 - Ejagham New Testament

Egan abhon asop etat ófó

¹ Jisos se, “Ebhú áji é si, otúi Obhasi ó kí joé noŋ egan abhon asop ófó etat. Ofú bhə́t asop mbá á kóe ńtʉ́ríkáŋ ábho na atʉ́ á jí kpúghi nne-ndûm yót nnyo a kí ko nkáé.

² Ka ekam ábho njí, árôn á fôn aron, mba ngá árôn a ri ánə́mé ane.

³ Mba ánə́mé mbá á kə̂n átʉ́ríkáŋ ábho kən á ká ko kpe mkpât akʉ́-ńtʉ́ríkáŋ mma tat.

⁴ Kən mba aməŋá-ejûm mbá á kə̂n átʉ́ríkáŋ ábho na akʉ́-ńtʉ́ríkáŋ mma tat.

⁵ Nkógha-nkáé nnyó á ka wághé obhá ka ebhú nji kə́n a bháe. Eyô é mêk asop mbá á róghe fə́ne eyáám.

⁶ “Ta étíŋanti atʉ́ é si, nâ ebhú eyum é bháe sê nkógha-nkáé nnyó a bhâ mân, asop mbá á jí kpúghí yê.

⁷ “Asop mbá á tə̂m á rúi ngyím á tʉ́ri ndíghí-ńtʉ́ríkáŋ ábho.

⁸ Mba ánə́mé mbá á góre mba ngá á káre ábho mkpât akʉ́-ńtʉ́ríkáŋ ka átʉ́ríkáŋ ábho á ro kpó ya.

⁹ “Kən atem mbá sê akʉ́ ábho tîk á bhó bhik ábho. Á sə́re ábho á chə́bhe njəm á jí wóm mma ábho akʉ́ á nâm.

¹⁰ “Ánə́mé mbá á maghe á jak akʉ́-ńtʉ́ríkáŋ onam, nâ ebhú nji nkógha-nkáé a bháe. Mba aməŋá-ejûm mbá, á tôp nkógha-nkáé nnyó á gyê ka óchâm erom mbí. Ane á tʉ̂ fə́ne itə̂m á bhâm.

¹¹ “Mba á jíi nná akʉ́ onam á chə́bhe njəm á bhak. Á róghe itə̂m esúmúm sê, ‘Ńsé! Ńsé! Rəbhê êt itə̂m.’

¹² “Kən nkógha-nkáé nnyó a táme ágo ka etím se yê á ka məŋé ábho bhúghí-bhúghí.”

¹³ Jisos a jéghe mân egan ejê na etí se, “Joê ên mân ka ibhábhé, ka ó ka məŋé ên ofú mbi Mmon-i-ntem-nne a kə́ bha. Kpe áwa nchane nne nnyo a məŋê cháŋ.”

Egan ágbán etat ásá

¹⁴ A kpô gaé se, “É kí joé noŋ nne-ndûm yót nnyo a kí maghé a ji ejen, a bhiŋ ágbán abhê a kíri iyîm a káre ábho á bhábhé ta yê a bhá.

¹⁵ A kíri iyîm mbí ka ekpak nji yê a gaê aron ábho a yên. A káre yót, ntâk i ntí érôn, nnyo tat a káre ntâk ébháe, nnyo tat a káre yə́t. A mághe mân a jak ejen ejê.

¹⁶ Nnyo á káre yê ntâk érôn, a kô ntí mmí a gyê ka ogəm ebhú jə́t, a kpô fon orʉrí, ntâk érôn.

¹⁷ Nnyo ntâk ébháe a fôn orʉrí ntâk ébháe nnyi tat.

¹⁸ Nnyo ntâk yə́t a kô ntí mmí a jî wôm eji nsi, a sə̂m a kâk.

¹⁹ “Ńsé ábho a kpô ká ejen njí a chə́bhe njəm, a bhâ bhə̂p a məŋé ekpak nji ntí imê ń jéne ka obhô ágbán abhê.

²⁰ Nnyo ntâk érôn nnyó a bhák na ntâk ófó. A sə́re se, ‘Ńsé, o karê ə̂m ntâk i ntí érôn, ńgyê ḿ kpo yim orʉrí ntâk érôn.’

²¹ “Ńsé owe a gyébhe ḿbə́ŋé, a sə́re yê se, ‘Ó yim kpe-eji, bhá kumî, é gyébhe ḿbə́ŋé na atem. We a ri nnyen i ḿgbán nnyo ó bhó chaghé ache ka etûm ejâ. Ka abhon iyîm, ó toŋe se nne á maghé wâ ejûm ejê ó kép, nne ányo á bhó fon efup. N kí karé wâ mân ntí mmi ń tíi otí, ó fî.’

²² “Nnyo á káre yê ntâk ébháe a bhák na énî se, ‘Ńsé, o karê ə̂m ébháe kən ébháe nnyi tat nnyí a kpeê noŋ orʉrí.’

²³ “Ńsé fə́ne a gyébhe ḿbə́ŋé, a sə́re yê se, ‘Ó yim kpe-eji, bhá kumî, é gyébhe ḿbə́ŋé na atem. We a ri nnyen i ḿgbán nnyo ó bhó chaghé ache ka etûm ejâ. Ka abhon iyîm, ó toŋe se nne kə́n á maghé wâ ejûm ejê ó kép, nne ányo á bhó fon efup. N kí karé wâ mân ntí mmi ń tíi otí, ó fî.’

²⁴ “Nnyo á káre nná ntâk yə́t, a bhâ sə́re ńsé ábho se, ‘Ńsé ḿ məŋe bəre we o ri nne ochu. Kpe ó ro kpaŋ ebhin, o kí fʉ, ó ro bhe nkap, o kí bhoŋ ka kpe bhaghé eji é kóre wâ.

²⁵ Efup nâ é yími ə̂m, n jak n jî sə̂m eji nsi m bə̂t ntí imâ. Ńgyê ntâk i ntí eya.’

²⁶ “Kən ńsé nnyó a kí fame ḿgbán nnyó se, ‘We a ri mfoné-mfoné ḿgbán i mbí! Njan ejûm í nchane! To ó məŋe se kpe n dô kpaŋ, n kí fʉ, kpe n dô bhe nkap, n kí bhoŋ.

²⁷ O kaghê nná ntí imámé ka njû-ntí, kə́n nji m báe nná n kí ko ntí mmi chénchén m kpê na mô orʉrí nnyo-nnyo á kághe ə̂m.’

²⁸ “A káre mân ikom se á tábhe ntâk i ntí eye á káre mbâ nne nnyo a fonê ntâk ófó.

²⁹ Echî aŋ? Kpe bhaghé nne nnyo a fonê ofon, á kí kpe yê é chíŋi mân obhô. Kən yê nnyo á ka fon, kpe mkpât nnyi a fonê áno, á kí tabhé.

³⁰ A sə́re se á túp ḿgbán nnyo á ka fáp ejûm ka éré a kə́t ágo ka ejírim a rʉ́rá ekpatə́m ekʉ̂, a dík akek.”

Ntə̂m Esup

³¹ Jisos se, “Ebhú Mmon-i-ntem-nne á bha noŋ ntûfâm na chénchén baénjel Obhasi á tobha yê, a kí kumí ka ekumi otúi ejê na ejík.

³² Nték i ngun chénchén tîk a chə́me ka ochî obhê. Ebhú á chəmé, tîk á kíri ábho ka nkam ébháe noŋ mbábha-obhúi á kirá ojô-obhúi na ákpúghí-obhúi, a kî egyê-egyê.

³³ Ntûfâm a kí saŋ ane mbá, mba á rî noŋ ojô-obhúi a kí obhô-orûm, mba á rî noŋ ákpúghí-obhúi a kí obhô-okáé.

³⁴ “A kí səre mân mba obhô-orûm mbá se, ‘Ên mba Ńsé omé a káre enare, bhá kó ên otúi mbi a yimî a kî ên ta ka ebhú ngun a róghe.

³⁵ Echî enare njí é rî sê, ebhú áji njaé a yámá ə̂m, ên nâ o karê ə̂m édî. Ayép á korá ə̂m, ên nâ o karê ə̂m ayép n gwô. M bák ojéné, ên nâ o fiî ə̂m.

³⁶ N di oyán, ên nâ o kaghê ə̂m ḿfô. M gbô emaŋé, ó ka yighí ên ə̂m amə̂t. N gyê ókúmí, o bhâ kûp ên ə̂m.’

³⁷ “Kən ane mbá tîk á tô sê, ‘Ntûfâm, bhaghé ebhú nâ e yéne wâ ka njaé kən e káre wâ édî o dî? Bhaghé ebhú nâ e yéne wâ ka ekot ayép, e káre wâ ejûm egwóóm?

³⁸ E yéne wâ o bhák ojéné bhaghé ebhú kən e gyê wâ? Bhaghé ebhú nâ e yéne wâ o kí chiŋ oyán, e kâk wâ ḿfô?

³⁹ Ntûfâm, bhaghé ebhú nâ e noghê oyén wâ o kí maŋé na kpe ebhú tat o ri ka ókúmí, e bhák sê é bhá yén wâ?’

⁴⁰ “Kən Ntûfâm a kí tame ábho se, ‘Deê ń sə́ré ên bəre kpe bhaghé ebhú nji o yimî ên erû njí na atem-abhon-í-nnyen abhámé mbá, mba kpe ejûm á ká fap, o yimî ên áno o káre ə̂m.’

⁴¹ “Ntûfâm a kí kpighi mân a nyân mba á gyími yê ebhat obhô-okáé se, ‘Duî ên ə̂m ka mkpe biji, ên mba Obhasi a tô ên enyo. Choŋ ên ka erəmta-ngûn ótúm-ótúm nji á yími á kî Satan na baénjel mba á jóe ágbán abhê.

⁴² Echî a toê ên enyo é rî sê ebhú áji n kí chiŋ na njaé, kən édî ó ka karé ên ə̂m. Ayép á korá ə̂m, kən ó ka karé ên ə̂m ayép ń gwó.

⁴³ M bák ojéné, kən ó ka fi ên ə̂m. N chíŋá oyán, kən ó ka kak ên ə̂m ḿfô. M maŋá, á kûm ə̂m ka ókúmí kən kpe sê ó bhá kûp ên ə̂m, cháŋ.’

⁴⁴ “Ane mbá eróŋ tîk á bhə̂p yê sê, ‘Ntûfâm, bhaghé ofú nâ e nôk oyén wâ o chíŋá na njaé, o ri ka ekot ayép, o bhák ojéné, o chíŋá oyán, o maŋá, á kûm wâ, kən é ka bhá sê é bhá nyáŋé wâ?’

⁴⁵ “Ntûfâm tîk a táme ábho se, ‘Deê ń sə́ré ên bəre kpe bhaghé ebhú nji ó taŋé ên enyáŋám atem-abhon-í-nnyen mbá, mba kpe ejûm á ká fap, ó yimá ên áno na mme.’

⁴⁶ “Tîk a tûm mân ekam ane nji obhô-okáé njí ka oseŋe mbi ótúm-ótúm. Kən mba á fóne ekpin ka nnyen-i-mbá, tîk á jak ka ekpin ótúm-ótúm.”