Matiyu, echî 23 - Ejagham New Testament

Fiî ên biji na atóŋá-ebhín na ane echəme Farasi

¹ Jisos a sə́re mân atóbhá abhê na ekam ane nji é rî áfo se,

² “Atóŋá-ebhín na ane echəme Farasi nâ á fóne ikom mfi á kí səre sê ńjî ebhín í Mosis é fábhe se, ńji é fábhe se.

³ Ka obhô mbí, deê ó yîm ên ka ekpak nji á səre ên sê ó yîm. Kən deê ń sə́ré ên bəre o kâ yîm ên ka ekpak nji ábho áfoné á kí yim. Echî aŋ? Ejûm nji á kí səre ên sê ó yîm ên, ńjə́ne asík ábho á kí yim.

⁴ Á kí bhop ekpatə́m nchóé á káre ane á kə́n, kən kpe obhô á bhó kak sê á nyáŋé ábho.

⁵ “Kpe jen nji ane mbá á yíma, á yíma sê á tóŋe biji. Ájoé áno asík, kêp akpatə́m otâk mbi á kágha mbi ábho onwet Obhasi, á bhobha ka mbûk na ka abhô. Kêp arûm árâm okʉ̂ mma ábho á jə́ma.

⁶ Á korá ekumúm ka ngûm ekumi nnyi ejík ka erom na ka óchâm Obhasi.

⁷ Á kóra sê ane á kubha ábho na ejík ka ndûm éré, á bhiŋá ábho sê, ‘Ńsé! Ńsé!’

⁸ “Deê o kâ kâm ên se ane á bhiŋá ên sê, ‘Ńsé! Ńsé!’ Echî aŋ? Ên fép a ri abhon-í-nnyen atem. Ńsé owəné a ri yót.

⁹ Deê o kâ bhîŋ ên fə́ne kpe nne yót ka ngun nnyí ńsé, ka Ńsé owəné a ri yót ka ósô.

¹⁰ O kâ kâm fə́ne se ane á bhiŋá ên ane-echî, ka nne-echî owəné a ri yót. Yê nâ Krayis, nne nnyo Obhasi a túmi se a bhá yim ngun á sém.

¹¹ Kpe ka ekam ejə́né, nnyo a kí joé nâ nne-echî, a ri a joé ḿgbán owəné chénchén.

¹² Kpe énê nnyo á ko biji se yê a fâŋ a chíŋi ochíŋ, á kí ko yê sê kpe ejûm á ka fáp. Kən nne nnyo á ko biji se yê á ka fáp ejûm, á kí ko yê sê yê nâ a faŋê a chíŋi ochíŋ.”

Tîk é bhîp é chîŋ na ane áfúbhí

¹³ “Tîk é bhîp é chîŋ na ên, ane áfúbhí, atóŋá-ebhín na ane echəme Farasi! Ó gbʉa ên ane mbá á kâ gyê otúi Obhasi, ên áfoné egyéém ó bhó gye na kpe ó kâm ên ane etat mba á nógha egyéém, á gyé.

¹⁴ “[Tîk é bhîp é chîŋ na ên, ane áfúbhí, atóŋá-ebhín na ane echəme Farasi! Ka ó moá ên ane-akáé ekə́t amoe, ngun á yen sê o kí saé ên ábho. Ó kpo yim ên mân, o gyê ên Obhasi egoróm ntə̂m cháŋ. Na ntʉ́ghi ekpin njí, Obhasi tîk a kpə́re ên nnyen ekpərə́m.]

¹⁵ “Tîk é bhîp é chîŋ na ên, ane áfúbhí, atóŋá-ebhín na ane echəme Farasi! Ó jená o fará ên, o yaŋá aya o chəbhá ên njəm sê ó nôk ên kpe nne yót a kí ḿbə́ŋé na Obhasi. Kən ó kpo fon ên nne nnyó, o kí yim ên yê a râŋ mbá a gyê ka erəmta-ngûn kən ên áfoné.

¹⁶ “Tîk é bhîp é chîŋ na ên, atáná-amə̂t mba á tóe sê ó tʉk ên ane mbá! Ó kpik ên ane sê nne á chot nchot ta a chími ka mbiŋ ókʉ́rí achot Obhasi mbí, kpe a rô kpó yim ejûm nji a chimî, nchot cháŋ. Kən nne á chimí ka mbiŋ i ntí mmi á túbhi nná noŋ efin mbâ Obhasi, a ri a yim ejûm nji a chimî.

¹⁷ Ánə́mé atáná-amə̂t! Njə́n nji é fáŋe é chíŋ? Ntí kən ókʉ́rí mbi ó kí yim ntí mmí ń chə́bhe ejûm eno mbâ Obhasi?

¹⁸ Ó kpik ên ane sê nne á chot nchot a chími ka mbiŋ eji á túbha nná ekəp mbâ Obhasi, nchot cháŋ ájoé á ka yim nji a chimî. A ri nne á chimí ka mbiŋ ekəp nji á túbha nná, a ri a yim nji a chimî.

¹⁹ Otána-amə̂t í jen! Njə́n nâ é fáŋe é chíŋi ntem, ekəp kən eji nji á túbha ekəp njí nji é kí yim ekəp é jóe ejûm eno mbâ Obhasi?

²⁰ Nâ deê ó mə́ŋe ên sê nne á chimí ka mbiŋ eji ekəp etúbhúm njí, nâ a chími a kpê na chénchén iyîm mbi í rî ka eji njí.

²¹ Nne á chimí a bhîŋ ókʉ́rí achot Obhasi nâ a chími a kpê na Obhasi nnyo á kumá áfo.

²² Nne nnyo á chimí a bhîŋ mbiŋ ósô, á chimá áno na mbiŋ eji ekumi Obhasi a kpek fə́ne na nne nnyo á kumá áfo.

²³ “Tîk é bhîp é chîŋ na ên, ane áfúbhí, atóŋá-ebhín na ane echəme Farasi! O kí karâ ên Obhasi eji nkiri jə́t ka nkiri iyîm ófó ka ńnyóré na óyók na nsíŋ, ka ekpak fə́ne nji ebhín é fíi, kən mfoné-mfoné nji é fáŋe é chîŋ ka ebhín njí jə́t, ên ó bhó top ên. Bibhín noŋ sê nne a kâ móe amoe, nne a ri ntem-nne nsôn, nne a yim iyîm mbi yê a chimî se a kí yim. Fiî ên bibhín mbí chénchén, o kâ mághe ên fə́ne mbi ngá eyimím.

²⁴ Atáná-amə̂t sê ábho á tʉ̂k ane mbá! Ó maghe ên mfoné-mfoné ebhín nji é fáŋe é chîŋ etóbhóm, o kí top ên a ri mbi ngá mbi chiîŋ.

²⁵ “Tîk é bhîp é chîŋ na ên, ane áfúbhí, atóŋá-ebhín na ane echəme Farasi! Ó suk ên njəm i nkuni ayép na okpere, kən etím é sui na iyîm amoe na obhí chénchén.

²⁶ Atáná-amə̂t ane Farasi! Su ên kpá nji é rî ka etím í ńkôp, njəm i ńkôp tîk á bhó fon akôp fə́ne.

²⁷ “Tîk é bhîp é chîŋ na ên, ane áfúbhí, atóŋá-ebhín na ane echəme Farasi! O ri ên noŋ oyəm mbi á tʉri ka éré nono, kən ka etím ó cha ó man na ákə́p-í-nne.

²⁸ Ka ekpak njí eróŋ, nne á yen ên ka ochî se yê a yên ane, kən ḿbə́ŋé eyəné a súi na áfúbhí na obhí ka mkpak ka mkpak.

²⁹ “Tîk é bhîp é chîŋ na ên, ane áfúbhí, atóŋá-ebhín na ane echəme Farasi! O kí tʉrí ên ánoê ayəm mbâ akará-otîp Obhasi mba á kpóe na ane mba á fóne énoê ekpin ka nsi ebhú áji.

³⁰ O kí səre ên sê ebhú sê ên nâ o ri ên ka ebhú áji, kə́n ó ka yúí ên akará-otîp Obhasi.

³¹ Nâ ó kam ên sê ên a ri biyábhé-abhon ane mba á yúi akará-otîp Obhasi.

³² Kpére jeghê ên etûm nji ásé abhə́né éməné á róghe eyimím.

³³ “Abhon efomnté iyîm ane! O kére ên sê tîk o chébhe ên akpəre mma Obhasi a kí karé ên ka erəmta-ngûn a?

³⁴ Deê ń sə́ré ên mân bəre tîk n tûm akará-otîp Obhasi na ane mba á rî na aron na akpíghá-ane achot. Tîk o yúi ên etʉ̂, tîk o kûm ên etʉ̂ ka ego. O kə́bhe ên etʉ̂ ndə́p ka óchâm Obhasi obhə́ré. O kí bhim ên etʉ̂ á yoŋa nték á fará.

³⁵ Ka obhô mbí, Obhasi a kí kpəré ên ka chénchén ane mba á yúi ka ngun nnyí nji á ká mom. É róghé ta ka ebhú á yúi Abel, ejûm a yimî cháŋ, ta o sî mba Sakariya nnyo mmon i Barakiya nnyo o yúi ên ka étíŋanti eji ekəp etúbhúm na njû ekumi Obhasi.

³⁶ Deê ń sə́ré ên bəre abhon ebhú njí nâ á kí chəme oseŋe ábhi chénchén ka echî.”

Okot mbi Jisos a fonê na Jerusarem

³⁷ Jisos se, “Oô, Jerusarem! Jerusarem! Ó yua ên akará-otîp Obhasi, o túbhá ên ágbán mba Obhasi a túmi mbâ eyəné na atáé. Ntə̂m é bhík nnyi ń wom kə́n bəre ń chúi ên chénchén ń kâk ka biji noŋ nkok abhon á bhuá abhon abhê na afabhe, kən ên ó bhó kam.

³⁸ Mfá-mfá Obhasi a yíghi ên abhô, é bhîp ên.

³⁹ Deê ń sə́ré ên bəre tîk ó ro kpó yen ên ə̂m, ta ebhú é bhak nji o kí to ên sê, ‘Deê enare Ńtâ Obhasi é jóe na nne nnyo a kə́ bha ka mbiŋ eye.’ ”